ម៉ាស៊ីនលើកទូរកុងតឺន័រចេញពីរថយន្ត នៅកំពង់ផែស្វយ័តក្រុងព្រះសីហនុ។ ភ្នំពេញប៉ុស្តិ៍
វិនិយោគិនចំនួន ១៨ ក្រុមហ៊ុនមកពីប្រទេសចិនបានបង្ហាញការចាប់អារម្មណ៍ចំពោះសក្តានុពលវិនិយោគនៅកម្ពុជា ខណៈកម្ពុជាមានវិស័យចម្រុះជាច្រើនដែលត្រូវការអ្នកវិនិយោគចូលមកបណ្តាក់ទុនផ្ទាល់ ដើម្បីដាំដុះ ផលិត/កែច្នៃទំនិញបំពេញឱ្យតម្រូវការក្នុងស្រុក និងនាំចេញទៅទីផ្សារអន្តរជាតិ។
ការបង្ហាញចំណាប់អារម្មណ៍នេះត្រូវបានធ្វើឡើងនៅទីស្តីការក្រុមប្រឹក្សាអភិវឌ្ឍន៍កម្ពុជា(CDC) កាលពីថ្ងៃទី១៧ ខែកុម្ភៈ នាឱកាសជំនួបពិភាក្សារវាង លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា(CDC) រួមជាមួយលោក ពុង ខៀវសែ ប្រធានក្រុមប្រឹក្សាភិបាលធនាគារកាណាឌីយ៉ា ភីអិលស៊ី និងក្រុមហ៊ុនចម្រុះវិស័យជាច្រើនទៀត ព្រមទាំងគណៈប្រតិភូចំនួន ១៨ ក្រុមហ៊ុនមកពីទីក្រុងនីងប៉ ខេត្តចឺជាំង ប្រទេសចិន ដែលដឹកនាំដោយលោកស្រី Lu Zhiqiong អគ្គនាយកធនាគារនីងប៉។
ជាកិច្ចចាប់ផ្តើម លោក ជា វុទ្ធី បានសម្តែងការស្វាគមន៍ និងវាយតម្លៃខ្ពស់ចំពោះការវិនិយោគរបស់វិនិយោគិនចិននៅប្រទេសកម្ពុជានាពេលកន្លងមក និងបានលើកឡើងពីសក្តានុពលនៃវិស័យចម្រុះដែលកម្ពុជាកំពុងមានសម្រាប់ការមកបណ្តាក់ទុន។
លោកបន្តថា ជាមួយនឹងគោលនយោបាយលើកទឹកចិត្តជាច្រើនដែលរដ្ឋាភិបាលកម្ពុជាបានដាក់ចេញជាបន្តបន្ទាប់ គឺរូបលោកពិតជាចង់ឃើញអ្នកវិនិយោគចូលមកវិនិយោគនៅកម្ពុជាកាន់តែច្រើន។
ការវិនិយោគលើវិស័យឧស្សាហកម្ម កម្មន្តសាល ការកែច្នៃផលិតផល ការបង្កើតតំបន់សេដ្ឋកិច្ចពិសេស និងការវិនិយោគក្នុងវិស័យកសិកម្ម(ពិសេសដំណាំស្រូវ ដំទ្បូងមី និងស្វាយចន្ទី) គឺសុទ្ធតែជាអ្វីដែលកម្ពុជាចង់បាន។
លោកថ្លែងថា៖«ខ្ញុំសូមជំរុញ និងលើកទឹកចិត្តឱ្យវិនិយោគិនធ្វើការគិតគូរក្នុងការបង្កើតខ្សែចង្វាក់ផលិតកម្មក្នុងវិស័យកសិកម្ម ជាពិសេសការកែច្នៃស្វាយចន្ទីដែលជាគំនិតផ្តួចផ្តើមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាផងដែរ»។
បន្ថែមលើនេះ លោក ជា វុទ្ធី ក៏បានប្រាប់គណៈប្រតិភូពីចិនអំពីស្ថានភាពវិនិយោគនៅកម្ពុជា ច្បាប់ និងបទប្បញ្ញត្តិពាក់ព័ន្ធនឹងការវិនិយោគដែលបើកចំហ មានតម្លាភាព និងអាចប៉ាន់ប្រមាណទុកជាមុនបាន ព្រមទាំងមានការលើកទឹកចិត្តនានាជាច្រើន។
លោកស្រី Lu Zhiqiong បាននិយាយថា តាមរយៈជំនួបនេះលោកស្រីមានជំនឿថានឹងធ្វើឱ្យថ្នាក់ដឹកនាំក្រុមហ៊ុនទាំង ១៨ បន្ថែមការចាប់អារម្មណ៍កាន់តែខ្លាំងក្នុងការគិតគូរមកបណ្តាក់ទុនវិនិយោគផ្ទាល់នៅកម្ពុជា។
យោងតាម CDC ក្រុមហ៊ុនទាំង ១៨ គឺមកពីវិស័យជាច្រើនដូចជា ការកែច្នៃកៅស៊ូ ផលិតសម្ភារបរិក្ខារពេទ្យ សម្ភារឆ្លាតវៃប្រើប្រាស់ក្នុងផ្ទះ សម្លៀកបំពាក់ និងធនាគារ។ល។
ក្រៅពីជំនួបខាងលើក្នុងថ្ងៃទី១៧ ខែកុម្ភៈ លោកនាយករដ្ឋមន្ត្រី ហ៊ុន ម៉ាណែត ក៏បានជួបពិភាក្សាជាមួយ លោក Zhang Chaomin ប្រធាន និងជាអគ្គនាយកប្រតិបត្តិនៃក្រុមហ៊ុន Infinite Capital Holding Company (ICAP) ដែលជាក្រុមហ៊ុនមានជំនាញលើវិស័យការផលិតសម្ភារ បច្ចេកវិទ្យាបញ្ញានិមិ្មត (AI), សឺមីកុងឌុចទ័រ (Semiconductor), និងសរសៃកាបូន (Carbon Fiber) ជាដើម។
លោក Zhang Chaomin បានលើកឡើងថា បច្ចុប្បន្នក្រុមហ៊ុនរបស់លោកកំពុងស្វែងរកឱកាសវិនិយោគនៅកម្ពុជាលើវិស័យយានយន្ដប្រើប្រាស់ថាមពលស្អាត(រថយន្តអគ្គិសនី) ក៏ដូចជាការផលិតនូវគ្រឿងបង្គុំរថយន្តអគ្គិសនី ជាដើម។
លោកបញ្ជាក់ថា៖«មូលហេតុដែលក្រុមហ៊ុនកំពុងចាប់អារម្មណ៍ស្វែងរកឱកាសវិនិយោគនៅកម្ពុជា គឺដោយសារកម្ពុជាមានសុខសន្តិភាពពេញលេញ និងស្ថិរភាពនយោបាយ ជាពិសេសការរក្សាបាននូវកំណើនសេដ្ឋកិច្ចខ្ពស់ និងប្រកបដោយភាពភាពធន់ក្នុងរង្វង់ ៦ ភាគរយ បើទោះបីជាកម្ពុជាកំពុងបន្តទទួលរងនូវផលប៉ះពាល់ដោយសារការរីករាតត្បាតពីជំងឺកូវីដ ១៩ ក៏ដូចជាភាពមិនប្រាកដប្រជាខ្ពស់នៃសេដ្ឋកិច្ចពិភពលោកនាពេលនេះ។
ជាការឆ្លើយតប លោកនាយករដ្ឋមន្ត្រី ហ៊ុន ម៉ាណែត បានសម្តែងក្ដីសោមនស្សចំពោះក្រុមហ៊ុនដែលបានបង្ហាញចំណាប់អារម្មណ៍នៅក្នុងការស្វែងរកឱកាសវិនិយោគនៅប្រទេសកម្ពុជា។
ជាមួយគ្នានេះលោក ហ៊ុន ម៉ាណែត ក៏បានលើកឡើងពីសារៈសំខាន់ និងភាពចាំបាច់របស់កម្ពុជានៅក្នុងការលើកទឹកចិត្តដល់បណ្ដាក្រុមហ៊ុនវិនិយោគឱ្យចូលមកស្វែងរកឱកាសវិនិយោគទៅលើវិស័យផលិតគ្រឿងបង្គុំរថយន្ត ក៏ដូចជាខ្សែច្រវាក់ផ្គត់ផ្គង់នានា ដើម្បីផ្គត់ផ្គង់ទីផ្សារក្នុងស្រុក តំបន់ និងពិភពលោក។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ក្នុងខែដំបូងឆ្នាំ ២០២៥ នេះចរាចរណ៍ទំនិញឆ្លងកាត់ព្រំដែនប្រទេសទាំង ២ មានទឹកប្រាក់សរុប ១,៥៥ ពាន់លានដុល្លារ កើនឡើង ៣៤,៧ភាគរយបើធៀបខែមករា ឆ្នាំ២០២៤ ក្នុងនោះកម្ពុជានាំទៅចិន ១០៣,០៧លានដុល្លារ ធ្លាក់ចុះ ១៥,៣ភាគរយ ចំណែកទំនិញចិននាំមកកម្ពុជា ១,៣៥ ពាន់លានដុល្លារ កើនឡើង ៤០,៥ភាគរយ។
ក្នុងឆ្នាំ ២០២៤ សកម្មភាពនៃការនាំចូល នាំចេញទំនិញរវាងប្រទេសកម្ពុជា និងចិន មានទឹកប្រាក់សរុប ១៥,១៩ ពាន់លានដុល្លារ កើនឡើង ២៣,៨ភាគរយបើធៀបនឹងឆ្នាំ ២០២៣។
ក្នុងចំនួននេះ គឺទំនិញចិននាំមកកម្ពុជា មានចំនួន ១៣,៤៤ ពាន់លានដុល្លារ កើនឡើង ២៤,៦ភាគរយ ចំណែកទំនិញកម្ពុជានាំទៅប្រទេសចិន ១,៧៥ពាន់លានដុល្លារ កើន ១៨,៤ភាគរយ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី១៨ ខែកុម្ភៈថា ភាពល្អប្រសើរនៃទំនាក់ទំនងរវាងរដ្ឋាភិបាលកម្ពុជា-ចិន ព្រមទាំងភាពមិនស៊ីចង្វាក់គ្នារវាងរដ្ឋាភិបាលចិន និងអាមេរិក គឺជាកម្លាំងចលករមួយដ៏ខ្លាំងដែលជំរុញឱ្យវិនិយោគិនចិនកាន់តែច្រើនចូលមកវិនិយោគនៅកម្ពុជា។
ចំនួននេះនឹងបន្តកើនឡើងបន្ថែមទៀតនៅឆ្នាំបន្តបន្ទាប់ខាងមុខ ខណៈកម្ពុជាកំពុងមានភាពល្អប្រសើរទាំងកត្តាខាងក្នុង និងខាងក្រៅ។
លោកបាននិយាយថា៖«លក្ខខណ្ឌនៃទីតាំងភូមិសាស្រ្ត កម្លាំងពលកម្មជំនាញ ច្បាប់វិនិយោគរបស់កម្ពុជា និងប្រព័ន្ធពន្ធនាំចេញទំនិញ គឺសុទ្ធតែមានភាពល្អប្រសើរសម្រាប់អ្នកវិនិយោគ។ កម្ពុជាមានបរិយាកាសដ៏ល្អសម្រាប់អ្នកវិនិយោគ»៕
