លោក ពុយ គា ប្រធានក្លឹបអ្នកកាសែតកម្ពុជា (CCJ) បានជួបជាមួយប្រធានក្រុមហ៊ុននានាក្នុងតំបន់សេដ្ឋកិច្ចពិសេសខេត្តក្រចេះ កាលពីពេលថ្មីៗនេះ។ រូបថត ហុង រស្មី
ខេត្ដក្រចេះ៖ ស្ថិតលើផ្ទៃដី ៨១៨ ហិកតា តំបន់សេដ្ឋកិច្ចពិសេសស្រុកស្នួលមាន ១៤ក្រុមហ៊ុន មានទុនវិនិយោគរួមចំនួន ១២០០លានដុល្លារ និង ៣ក្រុមហ៊ុនត្រៀមដាក់បញ្ចូល ដោយក្រុមហ៊ុនធំផលិតកង់ឡានចំនួនពីរ រោងចក្រផលិតខ្យល់ផ្គង់ផ្គង់តម្រូវការដល់រោងចក្រផលិតកង់ឡាន។
ក្រុមហ៊ុនផលិតបន្ទះសូឡា ត្រូវបានផ្អាកជាបណ្ដោះអាសន្នដោយរង់ចាំអ៊ុតមើលតារាងពន្ធរបស់សហរដ្ឋអាមេរិក។
សក្ដានុពលរបស់តំបន់សេដ្ឋកិច្ចពិសេសនេះនឹងកាន់តែមានសក្ដានុពលថែមទៀតជាមួយគម្រោងអភិវឌ្ឍន៍ព្រែកជីកហ្វូណន ដែលរំពឹងថានឹងកាត់បន្ថយការចំណាយលើការនាំចេញយ៉ាងច្រើន និងលើកកម្ពស់ការប្រកួតប្រជែងរបស់កម្ពុជានៅក្នុងទីផ្សារពិភពលោក។
លោក ចាំង លូជឺ (Zhang Lu Ze) នាយកប្រចាំតំបន់សេដ្ឋកិច្ចពិសេស ស្រុកស្នួល ខេត្តក្រចេះ Zhongqi Holding Group បានឱ្យដឹងថា លោកមានក្ដីរំពឹងខ្ពស់ចំពោះការអភិវឌ្ឍព្រែកជីកហ្វូណនរបស់កម្ពុជា ដែលជួយកាត់បន្ថយដល់ការនាំចេញផលិតផលពីតំបន់សេដ្ឋកិច្ចពិសេស ស្រុកស្នួលនេះ។
ផលិតផល «Made in Cambodia» របស់ចិន ជាក្រុមហ៊ុនរដ្ឋលំដាប់ទីពីរប្រចាំប្រទេសដែលមានអាយុកាលជាង១០០ឆ្នាំជាមួយទុនវិនិយោគសរុប ៣ពាន់ពាន់លានដុល្លារ។ រូបថត ហុង រស្មី
លោកបាននិយាយថា៖ «ផលិតផលទាំងអស់ពីតំបន់សេដ្ឋកិច្ចពិសេសត្រូវបាននាំចេញទៅតាមវៀតណាម។ ក្រុមហ៊ុនសង្ឃឹមខ្ពស់ចំពោះព្រែកជីកហ្វូណន ដែលមានតម្លៃដឹកជញ្ជូនទាប ហើយក្រុមហ៊ុននឹងប្រើប្រាស់ព្រែកជីកនេះនាំចេញផលិតផល»។
លោក លូជឺ បានលើកឡើងថា ជាមួយការវិនិយោគទឹក ភ្លើង និងហេដ្ឋរចនាសម្ព័ន្ធនានា តំបន់សេដ្ឋកិច្ចពិសេស អាចទទួលក្រុមហ៊ុនតូចធំប្រមាណ ៣០០ ខណៈក្រុមហ៊ុនធំៗ អាចផ្ទុកតែ ៦០ក្រុមហ៊ុនប៉ុណ្ណោះ ដោយក្រុមហ៊ុនមួយត្រូវការដីយ៉ាងតិច ៤០ ហិកតា។
ទំនុកចិត្តរបស់លោកកើតចេញពីទីតាំងយុទ្ធសាស្ត្ររបស់តំបន់ ដែលស្ថិតនៅជិតច្រកទ្វារអន្តរជាតិកម្ពុជា-វៀតណាម និង ១៦០ គីឡូម៉ែត្រពីទីក្រុងហូជីមិញរបស់វៀតណាម។
លោក Chen Gang អគ្គនាយកក្រុមហ៊ុន DoubleStar ផលិតកង់រថយន្ដធំបំផុតលំដាប់ទីពីរនៅប្រទេសចិន បានឱ្យដឹងថា មានក្រុមហ៊ុនចំនួន ១១ តាមបណ្ដាប្រទេសផ្សេងៗ ដូចជា កូរ៉េខាងត្បូង សហរដ្ឋអាមេរិក កម្ពុជា វៀតណាម ចិន រួមទាំងសហភាពអឺរ៉ុបជាដើម។
ចំណូលពីការផលិតផលកង់រថយន្ដឆ្នាំ២០២៤នេះ យើងទទួលបានចំនួន ២លានដុល្លារ។ រូបថត ហុង រស្មី
ជាមួយទុនវិនិយោគជាង ២០០លានដុល្លារ DoubleStar មានបុគ្គលិក ១៧០០នាក់ក្នុងដំណាក់កាលដំបូង និងចាប់ផ្ដើមដំណាក់កាលទីពីរ ដែលផ្ដោតលើបុគ្គលិកក្នុងស្រុក ទាំងការផ្ដល់ការងារ និងជំនាញដល់ពួកគេ។
លោក Gang បាននិយាយថា៖ «ផលិតផលជ័រកៅស៊ូប្រើប្រាស់ក្នុងខេត្ដក្រចេះ និងបណ្ដាខេត្ដនានាក្នុងបរិមាណពី ៥ ទៅ ៦ម៉ឺនតោនមួយឆ្នាំសម្រាប់ការផលិតកង់រថយន្ដ»។
ក្រុមហ៊ុនមានសមត្ថភាពផលិតកង់រថយន្ដចំនួន ៧ ទៅ ៨ម៉ឺនគ្រាប់ តែមិនទាន់មានការចែកចាយលក់នៅក្នុងស្រុកនោះទេ ដោយលោក Gang បានឱ្យដឹងថា ក្រុមហ៊ុននឹងបែងចែក ១៥ភាគរយសម្រាប់លក់នៅកម្ពុជា។
លោក Gang បានឱ្យដឹងថា ពេលនេះ ក្រុមហ៊ុនកំពុងតែរៀបចំឯកសារអាជ្ញាប័ណ្ណសម្រាប់លក់ផលិតកង់រថយន្ដក្នុងស្រុក ដែលផលិតផលទាំងនេះត្រូវបានសរសេរថា «Made in Cambodia»។
ជាមួយទុនវិនិយោគជាង ២០០លានដុល្លារ DoubleStar មានបុគ្គលិក ១៧០០នាក់ក្នុងដំណាក់កាលដំបូង។ រូបថត ហុង រស្មី
ផលិតផល «Made in Cambodia» របស់ចិន ជាក្រុមហ៊ុនរដ្ឋលំដាប់ទីពីរប្រចាំប្រទេសដែលមានអាយុកាលជាង១០០ឆ្នាំជាមួយទុនវិនិយោគសរុប ៣ពាន់ពាន់លានដុល្លារ ផ្ដោតទីផ្សារចម្បងទៅកាន់សហភាពអឺរ៉ុប និងសហរដ្ឋអាមេរិក។
លោកបានបង្ហើបប្រាប់ថា៖ «ចំណូលពីការផលិតផលកង់រថយន្ដឆ្នាំ២០២៤នេះ យើងទទួលបានចំនួន ២លានដុល្លារ»។
ថ្វីដ្បិតតែមានក្ដីបារម្ភចំពោះការតម្លើងពន្ធនាំចូលសហរដ្ឋអាមេរិកក្រោមរដ្ឋបាលរបស់លោក ដូណាល់ ត្រាម លោក Gang បានថ្លែងថា លោកមិនបារម្ភខ្លាំងនោះដោយច្រវាក់ផលិតកម្មរបស់លោកផ្ដោតសំខាន់លើគុណភាព។
លោក Gang បានប្រាប់ភ្នំពេញប៉ុស្ដិ៍ថា៖ «ខ្ញុំពិបាកមើលពីចរឹតរបស់គាត់ដែរ [ត្រាំ]។ គាត់សង្ឃឹមអ្វីជារឿងរបស់គាត់ ហើយខ្ញុំធ្វើតែការផលិតរបស់ខ្ញុំ។ ខ្ញុំក៏មិនបារម្ភទេ ដោយសារមានរដ្ឋាភិបាលគាំទ្រ»៕
DoubleStar មានសមត្ថភាពផលិតកង់រថយន្ដចំនួន ៧ ទៅ ៨ម៉ឺនគ្រាប់ក្នុងឆ្នាំ២០២៤។ រូបថត ហុង រស្មី
