លោក ហ៊ាន សាហ៊ីប ឡើងថ្លែងក្នុងពិធីប្រកាសជាផ្លូវការពីការបោះផ្សាយសញ្ញាបណ្ណបន្ទាប់បន្សំរបស់ អេស៊ីលីដា។ ហ៊ឹន ពិសី
ធនាគារ អេស៊ីលីដា បានប្រកាសជាផ្លូវការពីការបោះផ្សាយសញ្ញាបណ្ណបន្ទាប់បន្សំរបស់ខ្លួនដើម្បីប្រមូលទុនប្រមាណជិត ៨៦ លានដុល្លារអាមេរិក តាមរយៈផ្សារមូលបត្រកម្ពុជា(CSX) សម្រាប់យកទៅពង្រីកអាជីវកម្មរបស់ខ្លួនឱ្យកាន់តែរឹងមាំ និងបង្កើនទំនុកចិត្តពីអតិថិជនបន្ថែមទៀត។
ពិធី«ចុះបញ្ជីលក់សញ្ញាបណ្ណបន្ទាប់បន្សំ»(The Official Subordinated Bond Listing Ceremony)នេះត្រូវបានធ្វើឡើងកាលពីព្រឹកថ្ងៃទី ២៤ ខែកុម្ភៈ ឆ្នាំ២០២៥ នៅទីស្នាក់ការផ្សារមូលបត្រកម្ពុជា(CSX) ដោយមានការចូលរួមពីលោក ហ៊ាន សាហ៊ីប រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃផ្សារមូលបត្រកម្ពុជា លោក ស៊ូ សុជាតិ អគ្គនាយកនៃនិយ័តករមូលបត្រកម្ពុជា, លោក ហុង សុហួរ អគ្គនាយកផ្សារមូលបត្រកម្ពុជា និងលោក លោកស្រីជាតំណាងក្រសួងស្ថាប័ន និងវិស័យឯកជនជាច្រើន។
ប្រធាននាយកប្រតិបត្តិធនាគារ អេស៊ីលីដា ភីអិលស៊ី លោក អ៊ិន ចាន់នី បាននិយាយថា សញ្ញាបណ្ណបន្ទាប់បន្សំដែលប្រកាសលក់នៅថ្ងៃនេះ គឺជាឧបករណ៍ហិរញ្ញវត្ថុទូទៅដែលធនាគារជុំវិញពិភពលោករួមទាំងធនាគារ អេស៊ីលីដា បាននិងកំពុងប្រើប្រាស់ ដើម្បីចូលរួមចំណែកក្នុងការពង្រឹង និងការពង្រីកវិសាលភាព ព្រមទាំងការបង្កើនសក្តានុពលអាជីវកម្មរបស់ធនាគារឱ្យកាន់តែរីកចម្រើនប្រកបដោយចីរភាព និងប្រសិទ្ធភាពប្រកបដោយទំនុកចិត្តពីអតិថិជន និងសាធារណជន។
លោកថ្លែងថា៖«ការបោះផ្សាយសញ្ញាបណ្ណបន្ទាប់បន្សំនេះ និងផ្តល់ឱ្យវិនិយោគិន និងអតិថិជនរបស់ធនាគារនូវជម្រើសវិនិយោគមួយបន្ថែមទៀតជាមួយធនាគារ អេស៊ីលីដា។ ការបោះផ្សាយសញ្ញាបណ្ណបន្ទាប់បន្សំនេះ ជាការចូលរួមចំណែកដ៏សំខាន់ក្នុងការជំរុញកំណើន និងអភិវឌ្ឍទីផ្សារមូលធននៅកម្ពុជា និងជាយន្តការថ្មីសម្រាប់ការកៀរគរប្រភពទុនក្នុងស្រុកសម្រាប់គាំទ្រអតិថិជន និងចូលរួមចំណែកដល់ការអភិវឌ្ឍសេដ្ឋកិច្ចជាតិ និងសង្គម»។
យោងតាមធនាគារ អេស៊ីលីដា តាមរយៈការធ្វើបរិវិសកម្មលើកទីមួយរបស់វិនិយោគិនគុណវុឌ្ឍិ កាលពីថ្ងៃទី២២ ខែមករា ឆ្នាំ២០២៥ ដែលទទួលបានទឹកប្រាក់រហូតដល់ ៣៤៣.៣៥០.០០០.០០០រៀល (ប្រមាណ ៨៥,៨៤លានដុល្លារអាមេរិក) ជាលទ្ធផលជោគជ័យដែលធនាគារ អេស៊ីលីដា ទទួល បានទំនុកចិត្ត និងការជឿជាក់ពីសំណាក់វិនិយោគិនលើសពីការរំពឹងទុក។
ប្រធានក្រុមប្រឹក្សាភិបាលនៃផ្សារមូលបត្រកម្ពុជា លោក ហ៊ាន សាហ៊ីប បានឱ្យដឹងថា មូលបត្របំណុលកំពុងចូលរួមចំណែកយ៉ាងច្រើននៅក្នុងវិស័យហិរញ្ញវត្ថុនៅកម្ពុជា ដែលមានដូចជា ការរក្សាស្ថិរភាព និងជំរុញកំណើនសេដ្ឋកិច្ចប្រកបដោយផលិតភាព និងនិរន្តរភាព, កាត់បន្ថយការពឹងផ្អែកលើប្រាក់កម្ចីពីបរទេស, ការបង្កើនទំហំ និងប្រភពហិរញ្ញប្បទានរបស់រាជរដ្ឋាភិបាលសម្រាប់ការអភិវឌ្ឍនានា ដែលនឹងជួយជំរុញការអភិវឌ្ឍសេដ្ឋកិច្ចរយៈពេលវែង ។
អគ្គនាយកនៃនិយ័តករមូលបត្រកម្ពុជា លោក ស៊ូ សុជាតិ បានលើកឡើងថា ធនាគារ អេស៊ីលីដា ភីអិលស៊ី ដែលបានសម្រេចនូវការចុះបញ្ជីលក់សញ្ញាបណ្ណបន្ទាប់បន្សំបន្ថែមពីការបោះផ្សាយ និងចុះបញ្ជីលក់មូលបត្រកម្មសិទ្ធិ កាលពីខែមិថុនា ឆ្នាំ ២០២០ គឺកំពុងចូលរួមចំណែកយ៉ាងសកម្មក្នុងការធ្វើឱ្យទីផ្សារមូលបត្រកម្ពុជាមានសកម្មភាពកាន់តែខ្លាំង។
ការណ៍នេះបញ្ជាក់ឱ្យឃើញថា ទីផ្សារមូលបត្រកម្ពុជាកំពុងមានវឌ្ឍនភាពគួរឱ្យកត់សម្គាល់ជាមួយនឹងកំណើននៃការបោះផ្សាយលក់មូលបត្រកម្មសិទ្ធិ និងមូលបត្របំណុលតាមវិស័យ រួមមាន សញ្ញាបណ្ណបៃតងសង្គម និងចីរភាព។
ចំណែក លោក ហុង សុហួរ អគ្គនាយកផ្សារមូលបត្រម្ពុជា បានអះអាងថា អេស៊ីលីដា ភីអិលស៊ី បានធ្វើការកៀរគរទុនបន្ថែមទៀតតាមរយៈការបោះផ្សាយ និងចុះបញ្ជីលក់សញ្ញាបណ្ណសាជីវកម្មក្នុងចំណោមវិនិយោគិនគុណវុឌ្ឍិ ក្នុងទំហំប្រមាណ ៨៦ លានដុល្លារអាមេរិក ជាមួយនឹងឥណប្រតិទាន ៧ឆ្នាំ ដោយផ្តល់ជូនអត្រាគូប៉ុង ៨,៥ភាគរយក្នុងមួយឆ្នាំ ។
គិតត្រឹមថ្ងៃនេះ ផ្សារមូលបត្រកម្ពុជាមានក្រុមហ៊ុនចុះបញ្ជី ចំនួន ២៤ ដែលរួមមាន ក្រុមហ៊ុនចំនួន ១១ បានចុះបញ្ជីលក់មូលបត្រកម្មសិទ្ធិ និងក្រុមហ៊ុនចំនួន ១៣ ទៀតបានចុះបញ្ជីលក់សញ្ញាបណ្ណសាជីវកម្ម ដោយបានកៀរគរទុន ពីផ្សារមូលបត្រកម្ពុជា សរុបប្រមាណ ៤៧៥ លានដុល្លារអាមេរិក ។
លោកបញ្ជាក់ថា ការបោះផ្សាយរបស់ធនាគារអេស៊ីលីដានៅដើមឆ្នាំនេះ បង្ហាញឱ្យឃើញអំពីវឌ្ឍនភាពនៃវិស័យមូលបត្រកម្ពុជាដែលកំពុងបោះជំហានទៅមុខកាន់តែល្អ បើទោះបីចំនួនទឹកប្រាក់នៃការជួញដូរ និងចំនួនអ្នកជួញដូរនៅមានចំនួនតិចបើធៀបនឹងប្រទេសនានាក៏ដោយ។
យោងតាមសេចក្តីប្រកាសព័ត៌មានរបស់ធនាគារ អេស៊ីលីដា គិតត្រឹមដំណាច់ខែធ្នូ ឆ្នាំ២០២៤ ធនាគារមានទ្រព្យសកម្មសរុបចំនួនជាង ១០,៨៣ ប៊ីលានដុល្លារអាមេរិក ប្រាក់បញ្ញើសន្សំសរុបចំនួន ៨,៣៦ ប៊ីលានដុល្លារអាមេរិក និងមានអតិថិជនប្រមាណជាង ៥,៥២ លាននាក់៕
