ស្ត្រីម្នាក់កំពុងឈ្វេងយល់ពីរបៀបប្រើប្រាស់ការទូទាត់ប្រាក់តាមប្រព័ន្ធបាគង។ ភ្នំពេញប៉ុស្តិ៍
ប្រតិបត្តិការផ្ទេរ និងទូទាត់ប្រាក់ ដែលធ្វើឡើងតាមរយៈប្រព័ន្ធបាគង កើនដល់ជាង ៦០៨ លានប្រតិបត្តិការនៅត្រឹមឆ្នាំ ២០២៤ ដែលក្នុងនោះប្រតិបត្តិការជាប្រាក់រៀល មានចំនួនជាង ២៩៩ លានប្រតិបត្តិការ និងប្រតិបត្តិការជាប្រាក់ដុល្លារអាមេរិក មានជាង ៣០៨ លានប្រតិបត្តិការ។ នេះបើយោងតាមធនាគារជាតិនៃកម្ពុជា(NBC)។
យោងតាមរបាយការណ៍ប្រចាំឆ្នាំ ២០២៤ របស់ NBC ប្រតិបត្តិការផ្ទេរ និងទូទាត់ប្រាក់ដែលធ្វើឡើងតាមរយៈប្រព័ន្ធបាគង ក្នុងឆ្នាំ ២០២៤ មានចំនួនសរុប ៦០៨,៣២ លានប្រតិបត្តិការ ក្នុងនោះប្រតិបត្តិការជាប្រាក់រៀលមានចំនួន ២៩៩,៣២ លានប្រតិបត្តិការ កើនឡើង ៣៣៤ ភាគរយបើធៀបនឹងឆ្នាំ ២០២៣ និងប្រតិបត្តិការជាប្រាក់ដុល្លារមានចំនួន ៣០៨,២ លានប្រតិបត្តិការ កើនឡើង ១៣៣ ភាគរយ។
បើគិតជាទំហំប្រាក់ គឺជាប្រាក់រៀល មានប្រមាណ ១៨៣,៧៤ ទ្រីលានរៀល កើនឡើង ១២៧ភាគរយ ចំណែកទំហំប្រាក់ជាប្រាក់ដុល្លារ មាន ១០៤,៨១ ប៊ីលានដុល្លារ កើនឡើង ៩៥ ភាគរយ។
NBC បានឱ្យដឹងទៀតថា ទំហំប្រាក់សរុបនៅក្នុងឆ្នាំ២០២៤ ស្មើនឹង ៣៣០ ភាគរយ នៃផលិតផលក្នុងស្រុកសរុប(ផ.ស.ស)។
ប្រភព៖ ធនាគារជាតិនៃកម្ពុជា
ការប្រើប្រាស់ប្រាក់រៀលក្នុងការទូទាត់តាមប្រព័ន្ធអេឡិចត្រូនិកនៅកម្ពុជាបានកើនឡើងជាលំដាប់ បន្ទាប់ពីប្រព័ន្ធបាគង ត្រូវបានដាក់ឱ្យដំណើរការកាលពីថ្ងៃទី២០ ខែតុលា ឆ្នាំ២០២០ ដោយធនាគារជាតិនៃកម្ពុជា។
ប្រព័ន្ធបាគង គឺជាហេដ្ឋារចនាសម្ព័ន្ធសាធារណៈឌីជីថលដ៏សំខាន់មួយ ដែលដើរតួនាទីក្នុងការសម្រួលដល់ការទូទាត់ជាឌីជីថលសម្រាប់សាធារណជន។
NBC បានលើកឡើងថា៖«ការណ៍នេះបានពង្រីកនូវលទ្ធភាពក្នុងការធ្វើប្រតិបត្តិការប្រកបដោយភាពងាយស្រួល និងកាន់តែទូលំទូលាយជាងមុនដល់សាធារណជន។ លើសពីនេះ មុខងារទូទាត់ភ្លាមៗរបស់ប្រព័ន្ធបាគង បានជួយបង្កើនប្រសិទ្ធភាព និងសម្រួលដល់ដំណើរការទូទាត់របស់រាជរដ្ឋាភិបាល ដូចជា ការប្រមូលពន្ធ និងសេវាសាធារណៈផ្សេងទៀតបានកាន់តែប្រសើរ។ ក្នុងន័យនេះ ប្រព័ន្ធបាគង មិនត្រឹមតែជា ហេដ្ឋារចនាសម្ព័ន្ធសាធារណៈឌីជីថលប៉ុណ្ណោះទេ ប៉ុន្តែថែមទាំងជាប្រព័ន្ធទូទាត់ដ៏សំខាន់ដែលជំរុញ និងសម្រួលដល់ការចូលរួមក្នុងសកម្មភាពសេដ្ឋកិច្ច ពាណិជ្ជកម្ម សំដៅគាំទ្រដល់កំណើនសេដ្ឋកិច្ចប្រកបដោយចីរភាពរបស់ប្រទេសកម្ពុជាផងដែរ»។
ទេសាភិបាលធនាគារជាតិនៃកម្ពុជា លោកស្រី ជា សិរី បានលើកឡើងក្នុងរបាយការណ៍ខាងលើថា ការធ្វើទំនើបកម្មប្រព័ន្ធទូទាត់បានបង្កើនប្រសិទ្ធភាពក្នុងការទូទាត់ទាំងនៅទីប្រជុំជន និងតំបន់ជនបទ ដែលបានជំរុញសកម្មភាពសេដ្ឋកិច្ចក្នុងស្រុក ព្រមទាំងបានរួមចំណែកកាត់បន្ថយគម្លាតនៃការអភិវឌ្ឍ ស្របតាមគោលនយោបាយរដ្ឋាភិបាលឌីជីថលកម្ពុជា ឆ្នាំ២០២២-២០៣៥។
លោកស្រីបានថ្លែងថា៖«ធនាគារជាតិនៃកម្ពុជា បានបន្តភ្ជាប់ប្រព័ន្ធទូទាត់ជាមួយប្រទេសក្នុងតំបន់ និងក្រុមហ៊ុនបណ្តាញទូទាត់អន្តរជាតិ ដើម្បីគាំទ្រការបង្កើនប្រតិបត្តិការទូទាត់ឆ្លងដែន សំដៅគាំទ្រវិស័យទេសចរណ៍ និងពាណិជ្ជកម្ម។ ម៉្យាងទៀត កម្មវិធីទូទាត់បាគងទេសចរ ត្រូវបានដាក់ឱ្យប្រើប្រាស់ដើម្បីសម្រួលដល់ភ្ញៀវទេសចរក្នុងការទូទាត់ និងកាត់បន្ថយការប្រើប្រាស់ក្រដាសប្រាក់ដែលកន្លងមកមានការលំបាកមួយចំនួន។ ការតភ្ជាប់ទាំងនេះ នឹងរួមចំណែកផងដែរលើការប្រើប្រាស់រូបិយវត្ថុជាតិ បង្កើនជម្រើសលើមធ្យោបាយទូទាត់អន្តរជាតិ ដោយប្រសិទ្ធភាព សុវត្ថិភាព និងកាត់បន្ថយការចំណាយថ្លៃប្រតិបត្តិការសម្រាប់គាំទ្រសមាហរណកម្ម និងការកើនឡើងទំនាក់ទំនងសេដ្ឋកិច្ចនិងហិរញ្ញវត្ថុក្នុងតំបន់ និងអន្តរជាតិ»។
របាយការណ៍ប្រចាំឆ្នាំ២០២៤ របស់ធនាគារជាតិនៃកម្ពុជា បញ្ជាក់ថា គិតត្រឹមឆ្នាំ ២០២៤ ប្រព័ន្ធបាគងមានសមាជិកសរុបចំនួន ៦៩ គ្រឹះស្ថាន ក្នុងនោះគ្រឹះស្ថានចំនួន ៦០ បានដាក់ឱ្យដំណើរការជាផ្លូវការ និងគ្រឹះស្ថានចំនួន ៩ ផ្សេងទៀតបាននិងកំពុងបន្តធ្វើសន្ធានកម្មប្រព័ន្ធ។
ក្នុងឆ្នាំ២០២៤ អតិថិជនចុះឈ្មោះប្រើប្រាស់ប្រព័ន្ធបាគង តាមរយៈកម្មវិធីបាគងមានចំនួន ៦៤២,៥ ពាន់គណនី កើនឡើង ៧ ភាគរយ ធៀបនឹងឆ្នាំ២០២៣។
ទន្ទឹមនេះ ចំនួនអតិថិជនដែលមានគណនីធនាគារ/កាបូបអេឡិចត្រូនិក នៅគ្រឹះស្ថានធនាគារ និងហិរញ្ញវត្ថុ និងគ្រឹះស្ថានផ្តល់សេវាទូទាត់សងប្រាក់ ហើយអាចធ្វើប្រតិបត្តិការតាមប្រព័ន្ធបាគង (Customer Reached) មានចំនួនប្រមាណ ៣០ លានគណនី ដែលប៉ាន់ប្រមាណស្មើនឹង ១,៦៩ ដងនៃចំនួនប្រជាជនសរុប។
លើសពីនេះ ប្រព័ន្ធបាគងក៏មានមុខងារទូទាត់ តាមរយៈខេអេចយ្យូអរកួត (KHQR Code) សម្រាប់ការទូទាត់នៅកម្ពុជាផងដែរ។
គិតត្រឹមដំណាច់ឆ្នាំ២០២៤នេះ គ្រឹះស្ថានធនាគារបានចុះឈ្មោះពាណិជ្ជករទទួលការទូទាត់តាម ខេអេចយ្យូអរកូត មានប្រមាណ ៤,៥ លានគណនី កើនឡើង ៣៦,៤ភាគរយ ធៀបនឹងចុងឆ្នាំ២០២៣។
អ្នកសេដ្ឋកិច្ចនៅរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២៦ ខែកុម្ភៈ ថា និន្នាការនៃការទូទាត់ប្រាក់តាមប្រព័ន្ធអេឡិចត្រូនិកនៅកម្ពុជា(ប្រព័ន្ធបាគង) បានទទួលការពេញនិយមកាន់តែច្រើនពីសំណាក់អ្នកប្រើប្រាស់គ្រប់មជ្ឈដ្ឋាន ពិសេសអ្នកនៅតាមទីប្រជុំជនដែលមានសេវាអ៊ីនធឺណិតដំណើរការល្អ។
ការប្រើប្រាស់វិធីសាស្រ្តទូទាត់តាមប្រព័ន្ធបាគង បានផ្តល់ផលចំណេញយ៉ាងច្រើនទៅដល់ប្រជាជន និងរដ្ឋាភិបាល។
លោកបានពន្យល់ថា សម្រាប់ប្រជាជនការប្រើប្រាស់ការទូទាត់តាមប្រព័ន្ធបាគង គឺធ្វើឱ្យពួកគេមានភាពងាយស្រួល ដោយពួកគេមិនចាំបាច់ដាក់ក្រដាសប្រាក់ជាប់ខ្លួនច្រើនៗដូចពីពេលមុនឡើយ, ការទូទាត់មានភាពឆាប់រហ័ស, មិនមានការបារម្ភពិប្រាក់ក្លែងក្លាយ, ព្រមទាំងកាត់បន្ថយការឆ្លងជំងឺមួយចំនួនពីតាមរយៈក្រដាសប្រាក់។
ចំណែករដ្ឋាភិបាល គឺអាចកាត់បន្ថយការចំណាយលើថ្លៃបោះពុម្ភក្រដាសប្រាក់ និងមានភាពងាយស្រួលក្នុងការត្រួតពិនិត្យប្រតិបត្តិការផ្ទេរប្រាក់ពីគណនីមួយទៅគណនីមួយ ឬច្រើន។
លោកបានថ្លែងថា៖«នៅពេលការទូទាត់កាន់តែលឿន ផលចំណេញនៅក្នុងចរន្តសេដ្ឋកិច្ចជាតិ និងប្រជាជនក៏កាន់តែល្អប្រសើរផងដែរ»៕
