សំណង់អគារមិនទាន់បញ្ចប់ការសាងសង់ជាច្រើនក្នុងខេត្តព្រះសីហនុ នាពេលកន្លងមក។ រដ្ឋបាលខេត្តព្រះសីហនុ
មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ អះអាងថា ដើម្បីលើកទឹកចិត្តដល់វិនិយោគិនបន្ថែមទៀត រដ្ឋាភិបាលនឹងពង្រីកវិសាលភាពកម្មវិធីពិសេសជំរុញការវិនិយោគក្នុងក្របខ័ណ្ឌទូទាំងប្រទេស បន្ទាប់ពីកម្មវិធីនេះត្រូវបានអនុវត្តន៍ដោយជោគជ័យគួរជាទីមោទនៈនៅក្នុងខេត្តព្រះសីហនុ។
ក្រោមគំនិតផ្តួចផ្តើមដោយលោកនាយករដ្ឋមន្ត្រី ហ៊ុន ម៉ាណែត «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» ត្រូវបានប្រកាសដាក់ឱ្យអនុវត្តជាផ្លូវការកាលថ្ងៃទី៣១ ខែមករា ឆ្នាំ ២០២៤ និងបានបន្តដំណើរការអនុវត្តន៍រហូតមកដល់ពេលបច្ចុប្បន្ន។
លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ កាលពីពេលថ្មីៗនេះបានថ្លែងថា រាជរដ្ឋាភិបាលកម្ពុជាអាចនឹងដាក់ឱ្យអនុវត្តន៍កម្មវិធីពិសេសជំរុញការវិនិយោគនៅទាំងប្រទេស ដូចដែលបាននិងកំពុងអនុវត្តនៅក្នុងខេត្តព្រះសីហនុ។ កម្មវិធីនេះអាចនឹងអនុវត្តចាប់ពីឆ្នាំនេះតទៅ។
លោកបានថ្លែងថា៖«ការវិនិយោគឯកជននៅកម្ពុជា ដូចដែលឯកឧត្តម លោក លោកស្រី ជ្រាបហើយ គឺមានការកើនឡើងច្រើន នៅក្នុងឆ្នាំ ២០២៤ កន្លងមកនេះ។ អ្វីដែលខ្ញុំចាំ គឺគ្រាន់តែក្នុងខេត្តព្រះសីហនុមួយ យើងមានរហូតដល់គម្រោងជាង ២០០គ្រោង ហើយទុនវិនិយោគមានជាង ៦ ពាន់លានដុល្លារនៅឆ្នាំ ២០២៤ កន្លងមក។ បច្ចុប្បន្ននេះ រាជរដ្ឋាភិបាលក៏កំពុងបន្តនូវការយកចិត្តទុកដាក់ជំរុញការវិនិយោគខេត្តព្រះសីហនុបន្តទៀត។ យើងសង្ឃឹមថានឹងមានការវិនិយោគកើនឡើង»។
លោកបានបន្ថែមថា៖«ជារួមក្នុងឆ្នាំ ២០២៥-២០២៦ ខាងមុខនេះ រាជរដ្ឋាភិបាលក៏នឹងដាក់ចេញនូវកម្មវិធីពិសេសសម្រាប់ជំរុញការវិនិយោគទូទាំងប្រទេសតែម្តង មានន័យថា នឹងផ្តល់នូវការលើកទឹកចិត្តបន្ថែមទៀតទៅអ្វីដែលមាននៅក្នុងច្បាប់វិនិយោគសម្រាប់កិច្ចការវិនិយោគនេះ។ យើងសង្ឃឹមថានៅក្នុងឆ្នាំ ២០២៥-២០២៦ នឹងមានការវិនិយោគកើនឡើងច្រើន»។
កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ ២០២៤ បានផ្តល់នូវអត្ថប្រយោជន៍ពិសេសៗចំនួន ៣ ទៅអ្នកវិនិយោគ ដើម្បីគាំទ្រ និងជំរុញលើកទឹកចិត្តបន្ថែមក្នុងការទាក់ទាញការវិនិយោគ និងការអភិវឌ្ឍឧស្សាហកម្មនៅក្នុងខេត្តព្រះសីហនុ ដែលរួមមាន ទី១.គម្រោងវិនិយោគពាក់ព័ន្ធនឹងអគារជាប់គាំង ទី២. គម្រោងវិនិយោគដែលមិនជាប់ពាក់ព័ន្ធនឹងអគារជាប់គាំង និងទី៣. ការពង្រីកគម្រោងវិនិយោគ និងធុរកិច្ច។
ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចាំខេត្តព្រះសីហនុ លោក អ៊ឹម សេងហួ បានគាំទ្រចំពោះគំនិតផ្តួចផ្តើមរបស់រាជរដ្ឋាភិបាលក្នុងការពង្រីកវិសាលភាពកម្មវិធីពិសេសជំរុញការវិនិយោគនៅទូទាំងប្រទេស ព្រោះកម្មវិធីពិសេសជំរុញការវិនិយោគដែលកំពុងអនុវត្តន៍ក្នុងខេត្តព្រះសីហនុ បាននិងកំពុងធ្វើឱ្យសកម្មភាពវិនិយោគពាក់ព័ន្ធនឹងអគារជាប់គាំង ចាប់ផ្តើមមានសកម្មភាពរស់រវើកឡើងវិញជាបណ្តើរៗ។
លោក សេងហួ និយាយថា៖«ពាក់ព័ន្ធនឹងអគារជាប់គាំងជាង ១ពាន់អគារ កាលពីប៉ុន្មានឆ្នាំមុននោះ ឥឡូវចាប់តាំងអនុវត្តន៍កម្មវិធីពិសេសជំរុញការវិនិយោគប្រមាណ ១ឆ្នាំកន្លងមកនេះ ទទួលបានលទ្ធផលល្អប្រសើរ។ ប្រសិនបើកម្មវិធីពិសេសជំរុញការវិនិយោគនេះ ត្រូវបានពង្រីកទៅតាមបណ្តាខេត្តផ្សេងៗទៀត ខ្ញុំគិតថា វាល្អព្រោះជាគោលនយោបាយមួយក្នុងការលើកទឹកចិត្តដល់ម្ចាស់គម្រោង និងអ្នកវិនិយោគ»។
លោកបន្ថែមទៀតថា ក្រុងប៉ោយប៉ែត ក្រុងបាវិត និងខេត្តសៀមរាប គឺសុទ្ធសឹងជាប៉ូលសេដ្ឋកិច្ចសំខាន់ៗ ប្រសិនបើរាជរដ្ឋាភិបាលពង្រីកកម្មពិធីពិសេសជំរុញការវិនិយោគទៅទីនោះ គឺតំបន់ទាំងនេះនឹងមានសកម្មភាពវិនិយោគលើវិស័យសំណង់ និងអចលនទ្រព្យ កាន់តែរស់រវើកឡើង ពិសេសគម្រោងដែលកំពុងជាប់គាំង។
លោកនិយាយថា៖«ខ្ញុំចង់មានន័យថា ប្រសិនបើរាជរដ្ឋាភិបាលយកគោលការណ៍ដែលអនុវត្តន៍ក្នុងខេត្តព្រះសីហនុ ទៅអនុវត្តន៍ទៅគ្រប់ទីកន្លែង ខ្ញុំគិតថា ល្អ ហើយជាសញ្ញាវិជ្ជាមានមួយសម្រាប់អ្នកវិនិយោគបរទេស។ អ្នកវិនិយោគ និងប្រជាពលរដ្ឋនឹងរីករាយ ព្រោះទទួលបានការជួយជ្រោមជ្រែងពីរដ្ឋាភិបាល»។
គិតត្រឹមខែកុម្ភៈ ឆ្នាំ ២០២៥ ក្រុមការងារជំរុញការវិនិយោគក្នុងខេត្តព្រះសីហនុ បានសម្រេចជាគោលការណ៍ផ្តល់ការលើកទឹកចិត្តដល់គម្រោងចំនួន ២៦៩ គម្រោង ដែលមានទុនវិនិយោគប៉ាន់ស្មានសរុប ៦,៦៦៩ លានដុល្លារអាមេរិក។
ក្រុមការងារនឹងបំពេញភារកិច្ចស្នូលសំខាន់ ២ រួមមាន៖ ទី១. បន្តតាមដាន ត្រួតពិនិត្យ និង ជំរុញការអនុវត្តគម្រោងទាំង ២៦៩ គម្រោង និង ទី២. ធ្វើការសម្របសម្រួលការផ្តល់ការលើកទឹកចិត្តជាក់ស្តែង និងដោះស្រាយបញ្ហាប្រឈម និងសំណូមពររបស់ម្ចាស់គម្រោង ។ នេះបើតាម ឯកឧត្តមបណ្ឌិតសភាចារ្យ ហ៊ាន សាហ៊ីប។
លោកបានឱ្យដឹងទៀតថា រយៈពេលកន្លងមក ក្រុមការងារបានធ្វើកិច្ចការជាច្រើនដូចជា ជួយសម្របសម្រួលផ្តល់លិខិតអនុញ្ញាតសាងសង់, ការចុះបញ្ជីសហគ្រាស, ការផ្តល់អាជ្ញាបណ្ណទេសចរណ៍, ការផ្តល់អាជ្ញាបណ្ណអាជីវកម្មអភិវឌ្ឍន៍អចលនវត្ថុ, ការសាងសង់ផ្លូវចូលទៅទីតាំងគម្រោង, ការតបណ្តាញលូកាត់ផ្លូវពីទីតាំងគម្រោងឆ្ពោះទៅអាងប្រព្រឹត្តកម្មទឹកកខ្វក់, ការរៀបចំប្រព័ន្ធអាងប្រព្រឹត្តកម្មទឹកកខ្វក់ ដើម្បីជំរុញការវិនិយោគ, និងការសម្របសម្រួលដោះស្រាយវិវាទក្រៅប្រព័ន្ធតុលាការចំពោះគម្រោងពាក់ព័ន្ធអគារជាប់គាំង។
តាមរយៈសកម្មភាពទាំងអស់នេះ វាក៏នឹងជួយទាក់ទាញ និងជំរុញការវិនិយោគបង្កើតតំបន់សេដ្ឋកិច្ចពិសេស និងសួនឧស្សាហកម្ម បានកាន់តែច្រើន និងមាននិរន្តន៍ភាពផងដែរ៕
