ទិដ្ឋភាពខាងមុខតំបន់សេដ្ឋកិច្ចពិសេសខេត្តកោះកុង នាពេលកន្លងមក។ ភ្នំពេញប៉ុស្តិ៍
បើទោះបីកំណើនសេដ្ឋកិច្ចពិភពលោកនៅមិនទាន់មានភាពល្អប្រសើរបន្ទាប់ពីវិបត្តិជំងីកូវីដ១៩ ប៉ុន្តែប្រទេសកម្ពុជានៅតែមានសក្តានុពលគ្រប់គ្រាន់ក្នុងការទាក់ទាញអ្នកវិនិយោគឱ្យចូលមកបណ្តាក់ទុនជាបន្តបន្ទាប់។
ជាក់ស្តែងក្នុងឆ្នាំ ២០២៤ កន្លងមក មានតំបន់សេដ្ឋកិច្ចពិសេស(SEZ) ថ្មីចំនួន ៤ បានបើកដំណើរការ ដែលធ្វើឱ្យចំនួនតំបន់សេដ្ឋកិច្ចពិសេសកំពុងមានប្រតិបត្តិការនៅកម្ពុជា កើនឡើងដល់ចំនួន ៣០។
របាយការណ៍លទ្ធផលការងារឆ្នាំ ២០២៤ និងទិសដៅការងារឆ្នាំ ២០២៥ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ចេញផ្សាយក្នុងសប្តាហ៍នេះឱ្យដឹងថា គិតត្រឹមចុងឆ្នាំ ២០២៤ នៅកម្ពុជាមានតំបន់សេដ្ឋកិច្ចពិសេសសរុបចំនួន ៣០ ដែលមានរោងចក្រកំពុងដំណើរការ។
ចំនួននេះ គឺកើនឡើងចំនួន ៤ ឬស្មើនឹង ១៥,៣៨ភាគរយបើធៀបនឹងឆ្នាំ ២០២៣។
តំបន់សេដ្ឋកិច្ចពិសេសទាំង ៣០ គឺមានទីតាំងនៅ ១២ រាជធានី-ខេត្ត ដោយ ៩ ស្ថិតក្នុងខេត្តស្វាយរៀង, ៥ ក្នុងខេត្តព្រះសីហនុ, ៣ ក្នុងខេត្តបន្ទាយមានជ័យ កោះកុង និងកណ្តាល, និងចំនួន ១ នៅក្នុងរាជធានីភ្នំពេញ ខេត្តពោធិ៍សាត់ ក្រចេះ កំពត កំពង់ស្ពឺ កំពង់ឆ្នាំង និងខេត្តកំពង់ចាម។
ចំនួនតំបន់សេកិច្ចពិសេសដែលមានប្រតិបត្តិការ គឺកើនឡើងពីចំនួន ២១ ក្នុងឆ្នាំ ២០២០ ដល់ចំនួន ២៣ ក្នុងឆ្នាំ ២០២១ និង ២៥ ក្នុងឆ្នាំ ២០២២ ព្រមទាំងចំនួន ២៦ ក្នុងឆ្នាំ ២០២៣។
របាយការណ៍ឱ្យដឹងទៀតថា ក្នុងឆ្នាំ ២០២៤ មានរោងចក្រធុនធំ កើតឡើងថ្មីចំនួន ៣២៦ និងបិទទ្វារចំនួន ២៦។
គិតត្រឹមឆ្នាំ ២០២៤ នៅកម្ពុជាមានរោងចក្រធុនធំសរុប ២ ៤២៥ រោងចក្រ ដែលរោងចក្រធុនធំទាំងនោះភាគច្រើនស្ថិតក្នុងរាជធានីភ្នំពេញ ខេត្តកំពង់ស្ពឺ កណ្តាល ព្រះសីហនុ ស្វាយរៀង និងខេត្តតាកែវ។
រោងចក្រទាំងនោះមានដូចជា រោងចក្រដេរសម្លៀកបំពាក់ ផលិតផលពីស្បែកសត្វ ផលិតផលម្ហូបអាហារ ផលិតផលកៅស៊ូ-ផ្លាស្ទិក ផលិតផលពីក្រដាស និងគ្រឿងម៉ាស៊ីន-បរិក្ខាផ្សេងៗ។
ក្រសួងបានលើកឡើងទៀតថា វិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (ឧ.វ.ប.ន)ត្រូវបានរាជរដ្ឋាភិបាលកម្ពុជាចាត់ជាឧបករណ៍យុទ្ធសាស្ត្រចាំបាច់មួយដើម្បីឈានទៅសម្រេចនូវចក្ខុវិស័យនានាដូចបានកំណត់ក្នុងយុទ្ធសាស្ត្របញ្ចកោណ ដំណាក់កាលទី១ និងជាកម្លាំងចលករមួយជំរុញកំណើន ដើម្បីរួមចំណែកអភិវឌ្ឍសង្គម និងសេដ្ឋកិច្ចកម្ពុជា។
ជាក់ស្តែង ក្នុងឆ្នាំ ២០២៤ កន្លងទៅ សេដ្ឋកិច្ចកម្ពុជាបន្តនិន្នាការកើនឡើងក្នុងរង្វង់ ៦ភាគរយនៃ ផ.ស.ស. ស្របពេលចំណូលមធ្យមសម្រាប់ពលរដ្ឋម្នាក់ៗកើនឡើងដល់ ២ ៧១៣ដុល្លារអាមេរិក បើធៀបនឹងប្រមាណ ១ ៩១៧ ដុល្លារអាមេរិកក្នុងឆ្នាំ ២០២៣។
កំណើននេះត្រូវបានគាំទ្រដោយវិស័យសេដ្ឋកិច្ចសំខាន់ៗមួយចំនួន ក្នុងនោះវិស័យឧស្សាហកម្មបានបន្តនិន្នាការកើនឡើងក្នុងរង្វង់ ៨,៥ភាគរយក្នុងឆ្នាំ២០២៤ ពីប្រមាណ ៥ភាគរយក្នុងឆ្នាំ២០២៣។
ក្រសួងបញ្ជាក់ថា៖«សម្រាប់ឆ្នាំ ២០២៥ នេះ ផ្អែកតាមក្របខ័ណ្ឌម៉ាក្រូសេដ្ឋកិច្ច សេដ្ឋកិច្ចកម្ពុជានឹងបន្តមាននិន្នាការកើនឡើងក្នុងរង្វង់ ៦,៣ភាគរយនៃ ផ.ស.ស. ហើយចំណូលមធ្យមសម្រាប់ពលរដ្ឋម្នាក់ៗត្រូវបាន រំពឹងថានឹងកើនឡើងដល់ ២ ៩២៤ដុល្លារអាមេរិក។ វិស័យឧស្សាហកម្មត្រូវបានព្យាករណ៍ ថានឹងបន្តនិន្នាការកើនឡើងក្នុងរង្វង់ ៨,៦ភាគរយក្នុងឆ្នាំ ២០២៥ ដែលគាំទ្រដោយការរក្សាបានតុល្យភាពនៃអនុវិស័យកាត់ដេរ និងអនុវិស័យកម្មន្តសាលមិនមែនកាត់ដេរ ខណៈអនុវិស័យសំណង់នៅបន្តមានកំណើនទាប»។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២៨ ខែកុម្ភៈ ថា ការកើនឡើងព្រមគ្នានៃរោងចក្រ/សហគ្រាស និងតំបន់សេដ្ឋកិច្ចពិសេស គឺបញ្ជាក់ថាកម្ពុជាគឺជាទីតាំងដ៏មានសក្តានុពលសម្រាប់ការវិនិយោគមកពីគ្រប់តំបន់ទូទាំងពិភពលោក និងគ្រប់វិស័យ។
ភាពវិជ្ជមានទាំងនេះនឹងបន្តមានច្រើនបន្ថែមទៀតក្នុងឆ្នាំ ២០២៥ នេះ ខណៈការមកបណ្តាក់ទុនផ្ទាល់នៅកម្ពុជា អ្នកវិនិយោគនឹងទទួលបានផលបំណេញជាច្រើនទាំងកត្តាក្នុងប្រទេស និងទីផ្សារនាំចេញ។
លោកពន្យល់ថា កត្តាខាងក្នុង គឺប្រទេសកម្ពុជាមានស្ថិរភាពនយោបាយនិងកំណើនសេដ្ឋកិច្ចរឹងមាំ ច្បាប់វិនិយោគអំណោយផលសម្រាប់ការបណ្តាក់ទុនផ្ទាល់ សម្បូរកម្លាំងពលកម្មជំនាញនិងមានតម្លៃសមរម្យ មានទីតាំងភូមិសាស្រ្តនិងហេដ្ឋារចនាសម្ព័ន្ធដឹកជញ្ជូនល្អ។
ចំណែកកត្តាខាងក្រៅ គឺកម្ពុជាមានទីផ្សារទទួលទិញទំនិញច្រើន មានកិច្ចព្រមព្រៀងពាណិជ្ជកម្មជាមួយប្រទេសជាច្រើន ព្រមទាំងមានប្រព័ន្ធអនុគ្រោះពន្ធគយនៅពេលនាំទំនិញទៅកាន់ប្រទេសមួយចំនួន។
លោកបានថ្លែងថា៖«ជាមួយនឹងសក្តានុពលទាំងអស់នេះ គឺកម្ពុជាប្រាកដជាអាចទាក់ទាញអ្នកវិនិយោគកាន់តែច្រើនឱ្យចូលមកបើកតំបន់សេដ្ឋកិច្ចពិសេស និងរោងចក្រផលិតទំនិញសម្រាប់នាំចេញទៅទីផ្សារអន្តរជាតិ»។
ឧបនាយករដ្ឋមន្ដ្រី រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី លោក វង្សី វិស្សុត ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងឧស្សាហកម្ម កាលពីថ្ងៃទី២៦ ខែកុម្ភៈ បានលើកឡើងថា ការនាំចេញរបស់កម្ពុជានៅឆ្នាំ ២០២៤ សម្រេចបានកំណើន ១៥,៧ភាគរយ ហើយផលិតផលកម្ពុជាកាន់តែច្រើនកំពុងបោះជំហានចូលទៅកាន់ទីផ្សារតំបន់ និងអន្តរជាតិ ដែលកម្ពុជាត្រូវពង្រឹង និងពន្លឿនឧស្សាហូបនីយកម្ម រចនាសម្ព័ន្ធ និងមូលដ្ឋានសេដ្ឋកិច្ច នៅក្នុងដំណើរត្រៀមខ្លួនចាកចេញពីឋានៈជាប្រទេសអភិវឌ្ឍន៍តិចតួចនៅចុងឆ្នាំឆ្នាំ២០២៩ ខាងមុខ។
លោកថ្លែងថា៖«កម្ពុជាត្រូវលើកកម្ពស់បរិយាកាសវិនិយោគ និងបង្កើនភាពងាយស្រួលក្នុងការធ្វើធុរកិច្ច ដើម្បីទាក់ទាញការវិនិយោគទាំងក្នុងស្រុក និងពីបរទេស រួមទាំងទាក់ទាញឧស្សាហកម្មដែលនឹងផ្លាស់ប្តូរមូលដ្ឋានផលិតកម្ម ដោយត្រៀមធ្វើជាមជ្ឈមណ្ឌលផលិតកម្មជំនួស»។
ក្រុមប្រឹក្សាអភិវឌ្ឍន៍កម្ពុជា(CDC) កាលពីឆ្នាំ ២០២៤ បានអនុម័តឱ្យគម្រោងវិនិយោគចំនួន ៤១៤ គម្រោង កើនឡើង ៥៤ ភាគរយ(១៤៦ គម្រោង) បើធៀបនឹងឆ្នាំ ២០២៣ ដែលមានចំនួន ២៦៨ គម្រោង។
ទុនវិនិយោគសរុបរបស់គម្រោងទាំង ៤១៤ គឺប្រមាណ ៦,៩ ពាន់លានដុល្លារ កើនឡើង ៤០ភាគរយ ពីចំនួន ៤,៩២ ពាន់លានដុល្លារ៕
