ជំនួបពិភាក្សារវាងថ្នាក់ដឹកនាំ CDC (ស្តាំ) ជាមួយគណៈប្រតិភូចំនួន ៩ ប្រទេសក្នុងទ្វីបអឺរ៉ុប។ CDC
គណៈប្រតិភូចំនួន ៩ ប្រទេសនៅក្នុងទ្វីបអឺរ៉ុប បានបង្ហាញចំណាប់អារម្មណ៍ចំពោះសក្តានុពលនៃការវិនិយោគនៅកម្ពុជា និងចេតនាក្នុងការជួយផ្សព្វផ្សាយ និងទាក់ទាញវិនិយោគិនរបស់ខ្លួនឱ្យពិចារណា និងពិនិត្យលទ្ធភាពក្នុងការដាក់ទុនវិនិយោគនៅក្នុងប្រទេសកម្ពុជាឱ្យកាន់តែច្រើនបន្ថែមទៀតបន្ទាប់ពីបានជួបពិភាក្សាជាមួយថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា(CDC)។
អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល នៅទីស្តីការក្រុមប្រឹក្សាអភិវឌ្ឍកម្ពុជា កាលពីថ្ងៃទី៥ ខែកុម្ភៈ បានជួបពិភាក្សាជាមួយគណៈប្រតិភូកុងស៊ុលកិត្តិយសនៃបណ្តាប្រទេសតំបន់អឺរ៉ុបប្រចាំនៅកម្ពុជា ចំនួន ៩ រួមមាន អគ្គកុងស៊ុលកិត្តិយសប្រទេសស៊ីប, អ៊ីតាលី, ស៊ុយអែត, អូទ្រីស, ប៊ែលហ្សិក, ដាណឺម៉ាក, ន័រវ៉េស, អេស្ប៉ាញ និងចក្រភពអង់គ្លេស។
ក្នុងជំនួបនោះ លោក ស៊ុន ចាន់ថុល បានប្រាប់គណៈប្រតិភូទាំង ៩ ប្រទេសអំពីការអភិវឌ្ឍ និងរីកចម្រើនដ៏ឆាប់រហ័សនៅកម្ពុជាបន្ទាប់ពីទទួលបានសុខសន្តិភាពពេញលេញ។ កម្ពុជាបានធ្វើកិច្ចការជាច្រើនប្រកបដោយប្រសិទ្ធភាព និងសម្រេចបានសមិទ្ធិផលជាបន្តបន្ទាប់ ជាពិសេសការទាក់ទាញបានគម្រោងវិនិយោគជាច្រើនឱ្យចូលមកបណ្តាក់ទុនផ្ទាល់។
លោកបន្តថា ជាក់ស្តែង ក្នុងឆ្នាំ ២០២៤ កន្លងមកគម្រោងវិនិយោគដែលរដ្ឋាភិបាលបានអនុម័តមានសរុប ៤១៤ គម្រោង និងគម្រោងវិនិយោគដែលបានអនុម័តក្នុងខែមករា ឆ្នាំ ២០២៥ ចំនួន ៦៨ គម្រោង។
លោកបានថ្លែងថា៖«តួលេខនេះជាសក្ខីភាពជាក់ស្តែងបង្ហាញពីប្រសិទ្ធភាពនៃច្បាប់ស្តីពីការវិនិយោគ ក៏ដូចជាគោលនយោបាយនានារបស់រាជរដ្ឋាភិបាលក្នុងការថែទាំគាំទ្រកិច្ចការវិនិយោគនៅកម្ពុជា ដែលបង្ហាញពីការយកចិត្តដាក់ខ្ពស់របស់រាជរដ្ឋាភិបាលចំពោះវិស័យឯកជន ដោយចាត់ទុកវិស័យនេះជាម៉ាស៊ីនដ៏សំខាន់ក្នុងការជំរុញកំណើនសេដ្ឋកិច្ចជាតិ»។
លោកលើកឡើងទៀតថា ដើម្បីផ្សារភ្ជាប់រវាងរដ្ឋាភិបាល និងផ្នែកឯកជនឱ្យកាន់តែជិតស្និត នៅរៀងរាល់ ៦ខែម្តង ក្រុមប្រឹក្សាអភិវឌ្ឍន៍កម្ពុជាតែងរៀបចំកិច្ចប្រជុំពិភាក្សាលើបញ្ហាកង្វល់ផ្សេងៗជាមួយសមាគមធុរកិច្ចមួយចំនួន ដូចជា ជប៉ុន សភាពាណិជ្ជកម្មអាម៉េរិក សភាពាណិជ្ជកម្មអឺរ៉ុប និងសមាគមធុរកិច្ចកូរ៉េ ដើម្បីស្វែងរកដំណោះស្រាយដោយមានការចូលរួមពីតំណាងក្រសួងស្ថាប័នពាក់ព័ន្ធ និងតំណាងវិស័យឯកជនរបស់ប្រទេសនីមួយៗផងដែរ។
ជាមួយគ្នានេះរាជរដ្ឋាភិបាលក៏បានយកចិត្តទុកដាក់យ៉ាងខ្លាំងទៅលើការអភិវឌ្ឍវិស័យហេដ្ឋារចនាសម្ព័ន្ធទាំងផ្លូវគោក ផ្លូវទឹក ផ្លូវអាកាស និងផ្លូវដែក ដែលសុទ្ធសឹងជាកត្តាសំខាន់ៗក្នុងការជំរុញការធ្វើពាណិជ្ជកម្ម និងការវិនិយោគរបស់ផ្នែកឯកជនឱ្យកាន់តែមានប្រសិទ្ធភាព និងប្រសិទ្ធផលខ្ពស់។ បច្ចុប្បន្ន CDC ក៏បានរៀបចំផែនការក្នុងការធ្វើឌីជីថលូបនីយកម្មជាបន្តបន្ទាប់ សំដៅបង្កើនភាពងាយស្រួល និងទំនុកចិត្តជូនដល់វិនិយោគិនបន្ថែមទៀត។
ជាការឆ្លើយតបគណៈប្រតិភូអគ្គកុងស៊ុលកិត្តិយសទាំងអស់ បានសម្ដែងការចាប់អារម្មណ៍ជាខ្លាំងលើការអភិវឌ្ឍយ៉ាងឆាប់រហ័សរបស់កម្ពុជា ជាពិសេសពាក់ព័ន្ធនឹងការងារវិនិយោគពីបរទេសនៅក្នុងប្រទេសកម្ពុជា និងបានលើកឡើងអំពីភាពជោគជ័យរបស់វិនិយោគិនពីប្រទេសរបស់ខ្លួន ដែលបានសម្រេចចិត្តមកដាក់ទុនវិនិយោគនៅកម្ពុជា ដើម្បីផ្គត់ផ្គង់ទីផ្សារនៅក្នុងតំបន់ផងដែរ។
គណៈប្រតិភូក៏បានបង្ហាញអារម្មណ៍កក់ក្តៅ និងសុទិដ្ឋិនិយមកាន់តែខ្ពស់ និងសម្តែងនូវចេតនាក្នុងការជួយផ្សព្វផ្សាយ និងទាក់ទាញវិនិយោគិនពីប្រទេសរបស់ខ្លួនឱ្យងាកមកពិចារណា និងពិនិត្យលទ្ធភាពក្នុងការដាក់ទុនវិនិយោគនៅក្នុងប្រទេសកម្ពុជា ឱ្យបានកាន់តែច្រើនបន្ថែមទៀត។
យោងតាម CDC ក្នុង៊ឆ្នាំ ២០២៤ គម្រោងវិនិយោគសរុប ៤១៤ ត្រូវបានអនុម័តឱ្យវិនិយោគនៅកម្ពុជា ក្នុងនោះគម្រោងវិនិយោគថ្មី មានចំនួន ៣៨៧ គម្រោង និងគម្រោងពង្រីកផលិតកម្មចំនួន ២៧ គម្រោង ដែលមានទុនវិនិយោគសរុប ៦,៩ ពាន់លានដុល្លារ និងអាចបង្កើតការងារបានជិត ៣២ ម៉ឺនកន្លែង។ បើធៀបនឹងឆ្នាំ ២០២៣ គឺចំនួនគម្រោងដែលបានអនុម័តកើនឡើង ១៤៦ គម្រោង ខណៈទុនវិនិយោគកើនឡើងជិត ២ ពាន់លានដុល្លារ ឬស្មើនឹងជិត ៤០ ភាគរយ។
អ្វីដែលគួរកត់សម្គាល់ គឺភាគច្រើននៃគម្រោងវិនិយោគដែលបានអនុម័តស្ថិតក្នុងវិស័យឧស្សាហកម្ម ដោយមានចំនួនជិត ៤០០ ក្នុងចំណោមគម្រោងទាំង ៤១៤។ ក្រៅពីគម្រោងក្នុងវិស័យឧស្សាហកម្ម គឺមានក្នុងវិស័យកសិកម្ម និងកសិ- ឧស្សាហកម្ម ចំនួន ៨ គម្រោង, ទេសចរណ៍ ៤ គម្រោង, ហេដ្ឋារចនាសម្ព័ន្ធ និងផ្សេងៗ មានចំនួន ៨ គម្រោង។ នេះបើតាម CDC៕
