ជំនួបទ្វេភាគីរវាងថ្នាក់ដឹកនាំក្រសួងពាណិជ្ជកម្មកម្ពុជា(ស្តាំ) ជាមួយនឹងលោក Bader Alrebdi អនុប្រធាននៃលេខាធិការដ្ឋានគណៈកម្មាធិការនាំចេញ នៃអាជ្ញាធរទទួលបន្ទុកការអភិវឌ្ឍការនាំចេញរបស់អារ៉ាប៊ីសាអូឌីត។ ក្រសួងពាណិជ្ជកម្ម
កម្ពុជាកំពុងជំរុញការពង្រីកសក្តានុពលនាំចេញទំនិញទៅប្រទេសអារ៉ាប៊ីសាអូឌីត ក៏ដូចជាទាក់ទាញវិនិយោគិនអារ៉ាប៊ីសាអូឌីតឱ្យចូលមកវិនិយោគលើការកែច្នៃផលិតផលហាឡាល់នៅកម្ពុជាដើម្បីនាំចេញទៅទីផ្សារអន្តរជាតិ ខណៈប្រទេសទាំង ២ អាចនឹងចុះហត្ថលេខាលើអនុស្សារណៈនៃការយោគយល់គ្នាស្តីពីការជំរុញទំនាក់ទំនងពាណិជ្ជកម្មទ្វេភាគី នាពេលខាងមុខ។
របាយការណ៍សន្និបាតក្រសួងពាណិជ្ជកម្ម បានឱ្យដឹងថា ការចរចាស្តីពីសេចក្តីព្រាងអនុស្សារណៈនៃការយោគយល់គ្នាស្តីពីការជំរុញទំនាក់ទំនងពាណិជ្ជកម្មរវាងកម្ពុជា-អារ៉ាប៊ីសាអូឌីត បានបញ្ចប់រួចរាល់ហើយកាលពីឆ្នាំ ២០២៤។
នៅក្នុងឱកាសបំពេញទស្សនកិច្ចផ្លូវការ នៅព្រះរាជាណាចក្រអារ៉ាប៊ីសាអូឌីត រដ្ឋមន្ត្រីក្រសួងពាណិជ្ជកម្មកម្ពុជា លោកស្រី ចម និម្មល កាលពីថ្ងៃទី៥ ខែកុម្ភៈ បានជួបពិភាក្សាការងារដាច់ដោយឡែកចំនួន ២ គឺទី១ ជាមួយលោក Bader Alrebdi អនុប្រធាននៃលេខាធិការដ្ឋានគណៈកម្មាធិការនាំចេញ នៃអាជ្ញាធរទទួលបន្ទុកការអភិវឌ្ឍការនាំចេញរបស់អារ៉ាប៊ីសាអូឌីត និង ទី២ ជាមួយ លោក Hisham bin Saad Aljadhey នាយកប្រតិបត្តិនៃអាជ្ញាធរចំណីអាហារ និងឱសថរបស់អារ៉ាប៊ីសាអូឌីត។
ក្នុងជំនួបទាំង ២ លោកស្រីរដ្ឋមន្ត្រី សុទ្ធតែបានប្រាប់គូសន្ទនាអំពីសក្តានុពលវិនិយោគនៅកម្ពុជា និងបានលើកទឹកចិត្តឱ្យវិនិយោគិនអារ៉ាប៊ីសាអូឌីត ចូលមកបណ្តាក់ទុននៅកម្ពុជាឱ្យបានច្រើន ជាពិសេសពិចារណាលើការវិនិយោគលើការកែច្នៃផលិតផលហាឡាល់ សម្រាប់ការនាំចេញទៅទីផ្សារអន្តរជាតិ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ថា បើនិយាយពីទំនាក់ទំនងពាណិជ្ជកម្មទ្វេភាគីរវាងប្រទេសទាំង ២ ក្នុងពេលនេះគឺមិនសូវមានទេ ប៉ុន្តែកម្ពុជាត្រូវតែខិតខំពង្រីកទីផ្សាររបស់ខ្លួនទៅប្រទេសអារ៉ាប៊ីសាអូឌីត រួមទាំងប្រទេសក្នុងតំបន់អារ៉ាប់ទាំងមូលឱ្យកាន់តែសកម្ម។
តំបន់អារ៉ាប់ ភាគច្រើនជាប្រទេសមានប្រភពធនធានផ្នែកថាមពលច្រើន ប៉ុន្តែទន់ខ្សោយផ្នែកកសិកម្ម ដូច្នេះក្នុងនាមជាប្រទេសមានវិស័យកសិកម្ម និងកសិ-ឧស្សាហកម្មរីកចម្រើន កម្ពុជាចាំបាច់ត្រូវតែខិតខំពង្រីកទីផ្សារទៅកាន់ទីនោះ និងទាក់ទាញអ្នកវិនិយោគពីអារ៉ាប់ ឱ្យចូលមកវិនិយោគនៅកម្ពុជា។ វិស័យកសិកម្ម និងឧស្សាហកម្មផលិតអាហារហាឡាល់ គឺជាសក្តានុពលមួយសម្រាប់អារ៉ាប៊ីសាអូឌីត ចូលមកបណ្តាក់ទុននៅកម្ពុជា។
លោកបានថ្លែងថា៖«ជាជំហានៗខ្ញុំបានសង្កេតឃើញព័ត៌មានពីការខិតខំរបស់រដ្ឋាភិបាល និងផ្នែកឯកជនកម្ពុជាក្នុងការឈានទៅពង្រីកទីផ្សារនៅបណ្តាប្រទេសក្នុងតំបន់អារ៉ាប់ជាបន្តបន្ទាប់ ជាពិសេសប្រទេសអារ៉ាប់រួមអេមីរ៉ាត»។
ប្រធានព្រឹទ្ធសភាកម្ពុជា លោក ហ៊ុន សែន នៅក្នុងដំណើរទស្សនកិច្ចទៅបំពេញទស្សនកិច្ចនៅប្រទេសអារ៉ាប៊ីសាអូឌីត កាលពីខែធ្នូ ឆ្នាំ២០២៤ បានស្នើប្រទេសអារ៉ាប៊ីសាអូឌីត ជួយទិញអង្ករពីកម្ពុជា ហើយជំរុញអ្នកវិនិយោគចូលមកវិនិយោគលើការកែច្នៃស្រូវអង្ករ ដើម្បីនាំចូលទៅប្រទេសអារ៉ាប៊ីសាឌីត។
ក្នុងជំនួបជាមួយលោក Abdullah Mohammed Ibrahim Al-Sheikh ប្រធានសភាអារ៉ាប៊ីសាអូឌីត នៅវិមានរដ្ឋសភា រាជធានីរីយ៉ាដ កាលពីថ្ងៃទី៩ ខែធ្នូ ឆ្នាំ២០២៤ លោក ហ៊ុន សែន បានលើកឡើងថា កម្ពុជា និងអារ៉ាប៊ីសាអូឌីត គួរចាប់ផ្តើមធ្វើកិច្ចសហប្រតិបត្តិការស្នូល តាមរយៈកម្ពុជានាំចេញអង្ករមកអារ៉ាប៊ីសាអូឌីត ដោយសារកម្ពុជាមានប្រព័ន្ធស្រោចស្រពល្អជាងមុន និងមានអតិរេកស្រូវ។
បន្ថែមពីលើនេះ លោកក៏ស្នើប្រធានសភាអារ៉ាប៊ីសាអូឌីត ជួយជំរុញវិនិយោគិនអារ៉ាប៊ីសាអូឌីត ឱ្យមកវិនិយោគរៀបចំម៉ាស៊ីនកិនស្រូវ ស្តុក និងវេចខ្ចប់នៅកម្ពុជា សម្រាប់នាំចេញអង្ករមកប្រទេសអារ៉ាប៊ីសាអូឌីត និងប្រទេសនានាក្នុងតំបន់។ លោកបានបញ្ជាក់ថា អារ៉ាប៊ីសាអូឌីតមានសន្តិសុខថាមពល រីឯកម្ពុជា មានសន្តិសុខស្បៀង ដូច្នេះប្រទេសទាំងពីរអាចបំពេញឱ្យគ្នាទៅវិញទៅមក។
ទិន្នន័យក្រសួងទេសចរណ៍បានឱ្យដឹងថា ក្នុងឆ្នាំ២០២៤ ជនជាតិអារ៉ាប៊ីសាអូឌីត ដែលធ្វើដំណើរមកកម្ពុជា មានចំនួន ៤០០នាក់ កើនឡើង ១៣,៦ភាគរយធៀបនឹងឆ្នាំ២០២៣៕
