ទិដ្ឋភាពមើលពីលើនៃរាជធានីភ្នំពេញ។ ភ្នំពេញប៉ុស្តិ៍
រដ្ឋាភិបាលកម្ពុជាក្នុងត្រីមាសទី ៤ ឆ្នាំ ២០២៤ បានចុះកិច្ចព្រមព្រៀងឥណទានថ្មីជាមួយនឹងម្ចាស់បំណុលក្នុងចំនួនទឹកប្រាក់ ៧៦៣,៨៣ លានដុល្លារអាមេរិក ដែលធ្វើឱ្យសន្និធិបំណុលសាធារណៈសរុបរបស់កម្ពុជាគិតត្រឹមចុងឆ្នាំ ២០២៤ កើនដល់ជាង ១២ ប៊ីលានដុល្លារអាមេរិក ក្នុងនោះជាង ៩៩ ភាគរយជាបំណុលសាធារណៈក្រៅប្រទេស។ ជាមួយគ្នានេះរដ្ឋាភិបាល ក៏បានទូទាត់សេវាបំណុលបានប្រមាណជិត ៥៦០លានដុល្លារអាមេរិកផងដែរ។
ឯកសារព្រឹត្តិបត្រស្ថិតិបំណុលសាធារណៈកម្ពុជា របស់ក្រសួងសេដ្ឋកិច្ច និងហិរញ្ញវត្តុ ចេញផ្សាយក្នុងថ្ងៃទី១០ ខែមីនា បង្ហាញថា ដោយគិតទាំងបំណុលមរតកនៅត្រឹមដំណាច់ឆ្នាំ ២០២៤ កម្ពុជាមានសន្និធិបំណុលសាធារណៈសរុបចំនួន ១២,០៣ ប៊ីលានដុល្លារអាមេរិក ក្នុងនោះ ៩៩ ភាគរយ ត្រូវនឹងប្រមាណ ១១,៩២ ប៊ីលានដុល្លារអាមេរិកជាបំណុលសាធារណៈក្រៅប្រទេស(ក្របខ័ណ្ឌទ្វេភាគី ៦២ ភាគរយ និងក្របខ័ណ្ឌពហុភាគី ៣៨ ភាគរយ) និង ១ ភាគរយ ត្រូវនឹង ១១៥ លានដុល្លារអាមេរិកជាបំណុលសាធារណៈក្នុងប្រទេស។
សម្រាប់សមាសភាគបំណុលសាធារណៈទាំងនោះរួមមាន ៤៩ ភាគរយជាដុល្លារអាមេរិក, ១៨ ភាគរយជាអេសដេអ៊ែរ, ១០ ភាគរយជាយ៉េនជប៉ុន, ១០ ភាគរយជាយ័នចិន, ៨ ភាគរយជាអឺរ៉ូ, និង ៥ ភាគរយទៀតជារូបិយវត្ថុជាតិ និងរូបិយប័ណ្ណផ្សេងៗ។
កាលពីចុងឆ្នាំ២០២៣ សន្និធិបំណុលសាធារណៈសរុបរបស់កម្ពុជា មានប្រមាណ ១១,២៤ប៊ីលានដុល្លារអាមេរិក។
ឯកសារឱ្យដឹងទៀតថា សម្រាប់ត្រីមាសទី៤ ឆ្នាំ ២០២៤ រដ្ឋាភិបាលបានចុះកិច្ចព្រមព្រៀងឥណទានសម្បទានថ្មីជាមួយដៃគូអភិវឌ្ឍន៍នានាសរុប ៧៦៣,៨៣ លានដុល្លារអាមេរិក សមមូលនឹង ៥៨២,៧៧ លានអេសដេអ៊ែរ។
ជារួមក្នុងឆ្នាំ ២០២៤ រាជរដ្ឋាភិបាលបានចុះកិច្ចព្រមព្រៀងឥណទានថ្មីជាមួយដៃគូអភិវឌ្ឍនានាសរុបចំនួន ១ ៧៩៥,៨៤ លានដុល្លារអាមេរិក ដែលសមមូលនឹង ១ ៣៧០,១៦ លានអេសដេអ៊ែ ស្មើនឹងប្រមាណ ៨១ ភាគរយនៃពិតានដែលច្បាប់អនុញ្ញាត (១៧០០ លានអេសដេអ៊ែ) ក្នុងនោះក្របខ័ណ្ឌទ្វេភាគី ៣៩ ភាគរយ និងក្របខ័ណ្ឌពហុភាគី ៦១ ភាគរយ។
បើធៀបនឹងឆ្នាំ ២០២៣ គឺការចុះកិច្ចព្រមព្រៀងឥណទានសម្បទានថ្មី នៅក្នុងឆ្នាំ ២០២៤ នេះ មានកំណើនប្រមាណ ២ ភាគរយ។
ឯកសារបានបញ្ជាក់ថា៖«ឥណទានទាំងនេះសុទ្ធសឹងជាឥណទានមានកម្រិតសម្បទានខ្ពស់ ដោយមានធាតុអំណោយជាមធ្យមប្រមាណ ៤៥ ភាគរយ។ គោលដៅការចុះកិច្ចព្រមព្រៀងឥណទានថ្មីទាំងនេះ គឺសម្រាប់បំពេញតម្រូវការហិរញ្ញប្បទានក្នុងវិស័យអាទិភាពរបស់រដ្ឋាភិបាល សំដៅរួមចំណែកទ្រទ្រង់ចីរភាពនៃកំណើនរយៈពេលវែង និងបង្កើនផលិតភាពសេដ្ឋកិច្ច ឬផលិតភាពផលិតកម្ម»។
ផ្ទុយពីការចុះកិច្ចព្រមព្រៀងឥណទានថ្មី ក្នុងត្រីមាសទី៤ ឆ្នាំ ២០២៤ រដ្ឋាភិបាលក៏បានធ្វើការទូទាត់សេវាបំណុលបានចំនួន ៩១,៩៩ លានដុល្លារអាមេរិក។
ជារួមក្នុងឆ្នាំ ២០២៤ រាជរដ្ឋាភិបាលកម្ពុជាបានទូទាត់សេវាបំណុលចំនួន ៥៥៨,៧៧ លានដុល្លារអាមេរិក រួមមាន ១.ក្របខ័ណ្ឌបំណុលសាធារណៈក្រៅប្រទេសចំនួន ៥៤២,៧៩ លានដុល្លារអាមេរិក(ប្រាក់ដើម ៤១៩,១៤ លានដុល្លារអាមេរិក និងការប្រាក់និងកម្រៃផ្សេងៗ ១២៣,៦៥ លានដុល្លារអាមេរិក) និង ២.ក្របខ័ណ្ឌបំណុលសាធារណៈក្នុងប្រទេស មានប្រមាណ ១៥,៩៨ លានដុល្លារអាមេរិក(ប្រាក់ដើម ១២,៧២ លានដុល្លារអាមេរិក និងការប្រាក់ ៣,២៧ លានដុល្លារអាមេរិក)។
ឯកសារបានអះអាងថា៖«បើធៀបនឹងឆ្នាំ២០២៣ ការទូទាត់សេវាបំណុលសរុបក្នុងឆ្នាំ ២០២៤ មានកំណើនប្រមាណ ៨ ភាគរយ»។
ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា៖«ផ្អែកតាមលទ្ធផលបឋមនៃការវិភាគចីរភាពបំណុលតាមមូលដ្ឋានទិន្នន័យប៉ាន់ស្មានឆ្នាំ២០២៤ បង្ហាញថា ស្ថានភាពបំណុលសាធារណៈកម្ពុជា បន្តរក្សានូវ «ចីរភាព» និង «ហានិភ័យ កម្រិតទាប» ដដែល ដោយរាល់សូចនាករបំណុលគន្លឹះៗទាំងអស់សុទ្ធតែស្ថិតក្រោមអនុបាតគោល ក្នុងនោះអនុបាតតម្លៃបច្ចុប្បន្ននៃបំណុលសាធារណៈសរុបធៀបនឹង ផសស មានត្រឹមកម្រិត ១៩,៣ ភាគរយធៀបនឹងអនុបាតគោល ៥៥ភាគរយ និងអនុបាតតម្លៃបច្ចុប្បន្ននៃបំណុលសាធារណៈក្រៅប្រទេសធៀបនឹង ផសស មានត្រឹមកម្រិត ១៩ភាគរយ ធៀបនឹងអនុបាតគោល ៤០ភាគរយ»។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ក្នុងឯកសារខាងលើបានអះអាងថា ស្ថានភាពបំណុលសាធារណៈបច្ចុប្បន្នរបស់កម្ពុជានៅតែត្រូវបានវាយតម្លៃថា ស្ថិតនៅក្នុងភាពអាចគ្រប់គ្រងបាន ពោលគឺនៅតែមាន «ចីរភាព» និង «ហានិភ័យកម្រិតទាប»។
ការរក្សាបាននូវចីរភាពបំណុលសាធារណៈនេះ គឺអាស្រ័យដោយកម្ពុជាមានប្រព័ន្ធគ្រប់គ្រងបំណុលសាធារណៈមួយដ៏រឹងមាំ ដែលមានជាអាទិ៍ ១.ក្របខ័ណ្ឌគតិយុត្ត, ២.គោលនយោបាយ, យុទ្ធសាស្ត្រ, និងនីតិវិធីគ្រប់គ្រងប្រតិបត្តិការគ្រប់ជ្រុងជ្រោយ, ៣.សមត្ថភាពស្ថាប័ន និងធនធានមនុស្សគ្រប់គ្រាន់, និង ៤.ប្រព័ន្ធព័ត៌មានវិទ្យាសម្រាប់គ្រប់គ្រងប្រតិបត្តិការ និងរក្សាទុកទិន្នន័យ ដើម្បីជាមូលដ្ឋាននៃការវិភាគ និងតាមដានហានិភ័យបំណុល។
ច្បាប់ថវិកាបានបង្ហាញថា សម្រាប់ការគ្រប់គ្រងឆ្នាំ ២០២៥ រាជរដ្ឋាភិបាលអាចខ្ចីប្រាក់ពីគេក្នុងកម្រិត ២ ០០០ ០០០ ០០០ SDR(ពីរប៊ីលានអេសដេអ៊ែ)។
ការខ្ចីប្រាក់ពីគេដែលត្រូវចុះកិច្ចសន្យាក្នុងកម្រិតខាងលើ ត្រូវមានលក្ខណៈជាការខ្ចីសម្បទាន ដែលត្រូវសងវិញជាមួយការប្រាក់អនុគ្រោះ៕
