សកម្មភាពកម្មករក្នុងរោងចក្រកាត់ដេរមួយកន្លែង នៅរាជធានីភ្នំពេញ។ STPM
បើទោះបីសកម្មភាពការផ្លាស់ប្តូរពាណិជ្ជកម្ម និងការវិនិយោគពីសំណាក់វិនិយោគិនចិននៅប្រទេសកម្ពុជាបានបង្ហាញពីកំណើនជាបន្តបន្ទាប់ ក៏ភាគីទាំង ២ នៅតែបន្តកិច្ចខិតខំធ្វើការរួមគ្នាដើម្បីជំរុញឱ្យកិច្ចសហប្រតិបត្តិការវិនិយោគ និងទំហំពាណិជ្ជកម្មទ្វេភាគីឱ្យកាន់តែប្រសើរឡើងបន្ថែមទៀត។
នៅទីស្តីការក្រុមប្រឹក្សាអភិវឌ្ឍន៍កម្ពុជា(CDC) កាលពីថ្ងៃទី១០ ខែមីនា មានរៀបចំជំនួបពិភាក្សាមួយដែលធ្វើឡើងរវាងលោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា ជាមួយលោក Li Yongjun អគ្គនាយកនៃអគ្គនាយកដ្ឋានកិច្ចសហប្រតិបត្តិការសេដ្ឋកិច្ច និងវិនិយោគក្រៅប្រទេសរបស់ក្រសួងពាណិជ្ជកម្មនៃសាធារណរដ្ឋប្រជាមានិតចិន។ គោលបំណងនៃជំនួបនេះ គឺដើម្បីពិភាក្សា និងផ្លាស់ប្ដូរទស្សនស្ដីពីកិច្ចសហការវិនិយោគ និងការអភិវឌ្ឍតំបន់សេដ្ឋកិច្ចពិសេសកម្ពុជា-ចិន។
ក្នុងនៅជំនួបនេះ លោក សួន សុផល បានលើកឡើងថា វិនិយោគិនចិនកំពុងដើរតួនាទីយ៉ាងសកម្មក្នុងការចូលរួមចំណែកជំរុញកំណើនសេដ្ឋកិច្ចកម្ពុជា តាមរយៈការធ្វើពាណិជ្ជកម្មទំនិញ និងរំហូរវិនិយោគចិនជាច្រើនចូលមកបណ្តាក់ទុនផ្ទាល់នៅកម្ពុជា ជាពិសេសនៅក្នុងតំបន់សេដ្ឋកិច្ចពិសេសខេត្តព្រះសីហនុ(SSEZ)។
លោកបានថ្លែងថា៖«ក្រោមការជួយជ្រោមជ្រែងពីភាគីមិត្ត(ចិន) តំបន់សេដ្ឋកិច្ចពិសេសខេត្តព្រះសីហនុ បានក្លាយជាមជ្ឈមណ្ឌលទាក់ទាញវិនិយោគដ៏មានសក្ដានុពល និងបានបង្កើនទំហំពាណិជ្ជកម្ម និងជំរុញរំហូរវិនិយោគនៅកម្ពុជា តាមរយៈការស្រូបទាញនូវគម្រោងវិនិយោគ និងបង្កើតកន្លែងការងារបានជាអតិបរមា។ បន្ថែមពីនេះ តំបន់សេដ្ឋកិច្ចពិសេសខេត្តព្រះសីហនុ បានរួមចំណែកយ៉ាងច្រើនដល់ការពង្រឹងកិច្ចសហប្រតិបត្តិការរវាងភាគីទាំងពីរ តាមរយៈគំនិតផ្ដួចផ្ដើមខ្សែក្រវាត់និងផ្លូវ ដោយឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន»។
តាមរយៈជំនួបនេះ ភាគីកម្ពុជា-ចិន ក៏បានពិភាក្សាយ៉ាងផុលផុសប្រកបដោយផ្លែផ្កាក្នុងការជំរុញកិច្ចសហប្រតិបត្តិការវិនិយោគតាមរយៈយន្ដការការងារដែលបានចុះអនុស្សារណៈនៃការយោគយល់គ្នានាពេលកន្លងមក ដើម្បីជំរុញការអនុវត្តនូវគម្រោងកិច្ចសហប្រតិបត្តិការ និងវិនិយោគទ្វេភាគីក្នុងវិស័យសេដ្ឋកិច្ចបៃតង និងឌីជីថល សំដៅធ្វើឱ្យហេដ្ឋារចនាសម្ព័ន្ធឧស្សាហកម្មនៅកម្ពុជាមានភាពទាក់ទាញដល់ការវិនិយោគដែលផ្ដល់តម្លៃបន្ថែមខ្ពស់ដល់ការអភិវឌ្ឍសេដ្ឋកិច្ច-សង្គម និងការធ្វើឱ្យប្រសើរឡើងនូវទំនាក់ទំនងសេដ្ឋកិច្ច និងពាណិជ្ជកម្មទ្វេភាគីប្រកបដោយគុណភាពខ្ពស់។
ទិន្នន័យចុងក្រោយបំផុតរបស់ អគ្គនាយដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងរយៈពេល ២ខែដើមឆ្នាំ ២០២៥ ទំហំពាណិជ្ជកម្មអន្តរជាតិរបស់កម្ពុជា មានទឹកប្រាក់សរុប ៩ ៤៤៧,៥៣ លានដុល្លារ កើនឡើង ១៦,៣ភាគរយបើធៀបនឹងរយៈពេលដូចគ្នាក្នុងឆ្នាំ ២០២៤។
ប្រទេសចិន គឺជាដៃគូពាណិជ្ជកម្មធំជាងគេរបស់កម្ពុជា ដោយគ្រប់គ្រងចំណែករហូតដល់ ២៨,១៨ ភាគរយនៃទំហំពាណិជ្ជកម្មសរុប។
យោងតាម GDCE ក្នុងខែមករា-កុម្ភៈ ឆ្នាំ២០២៥ ការផ្លាស់ប្តូរទំនិញរវាងភាគីទាំង ២ មានទឹកប្រាក់សរុប ២ ៦៦២,៧៣ លានដុល្លារ កើន ២១,១ ភាគរយ ក្នុងនោះកម្ពុជានាំចេញ ២១៧,៩៦លានដុល្លារ ធ្លាក់ចុះ ៤,៣ភាគរយ និងទំនិញនាំចូលពីប្រទេសចិន ២ ៤៤៤,៧៧ លានដុល្លារ កើនឡើង ២៤ភាគរយ។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បានប្រាប់ភ្នំពេញប៉ុស្តិ៍ថា ទំនោរនៃការធ្វើពាណិជ្ជកម្ម និងការបណ្តាក់ទុនផ្ទាល់ពីសំណាក់វិនិយោគិនចិននៅក្នុងប្រទេសកម្ពុជានឹងកើនឡើងបន្ថែមទៀត។
មានកត្តាជាច្រើនដែលជំរុញឱ្យវិនិយោគិនចិនសម្លឹង និងមើលឃើញពីឱកាសក្នុងការផ្លាស់ប្តូរទីតាំងរោងចក្រ/សហគ្រាសខ្លួននៅក្នុងប្រទេសចិនចូលមកប្រទេសកម្ពុជា។ ជាទូទៅអ្នកវិនិយោគតែងសម្លឹងមើលទៅទីតាំងណាដែលអាចផ្តល់ភាពងាយស្រួល និងជួយឱ្យការវិនិយោគទទួលបានផលចំណេញច្រើន។
លោកបានពន្យល់ថា សម្រាប់មូលហេតុដែលវិនិយោគគិនបរទេស ពិសេសជនជាតិចិន សម្លឹងឃើញឱកាសក្នុងការប្តូរទីតាំងរោងចក្ររបស់ខ្លួនពីប្រទេសផ្សេង ពិសេសពីប្រទេសចិនចូលមកកម្ពុជា គឺដោយសារលក្ខខណ្ឌក្នុងប្រទេសកម្ពុជា មានភាពអំណោយផលច្រើន ដូចជា ច្បាប់វិនិយោគមានភាពអនុគ្រោះសម្រាប់វិនិយោគិនបរទេស សម្បូរកម្លាំងពលកម្មជំនាញវ័យក្មេង មានហេដ្ឋារចនាសម្ព័ន្ធដឹកជញ្ជូនល្អប្រសើរ មានទីផ្សារទទួលទិញទំនិញច្រើន ព្រមទាំងមានប្រព័ន្ធអនុគ្រោះពន្ធគយពីប្រទេសជាច្រើន។
លោកលើកឡើងទៀតថា ក្រៅពីលក្ខខណ្ឌខាងលើ កម្ពុជាក៏ទទួលបានផលចំណេញពីភាពមិនស៊ីចង្វាក់គ្នាផ្នែកនយោបាយ និងពាណិជ្ជកម្មទំនិញរវាងប្រទេសមហាអំណាចសេដ្ឋកិច្ចអាមេរិក និងចិន ផងដែរ។
ការឡើងកាន់អំណាចរបស់ប្រធានាធិបតីអាមេរិក លោក ដូណាល់ ត្រាំ ដែលបានបន្ថែមពន្ធគយ ២០ភាគរយចំពោះទំនិញផលិតនៅប្រទេសចិននៅចូលទីផ្សារអាមេរិក ក៏ជាហេតុផងដែលជំរុញឱ្យម្ចាស់ក្រុមហ៊ុននៅប្រទេសចិនមួយចំនួនសម្រេចរើរោងចក្ររបស់ខ្លួនមកកម្ពុជាដែរ។
លោកបានថ្លែងថា៖«ក្នុងបរិបទដែលកម្ពុជាកំពុងខិតខំពង្រឹងសក្តានុពលទាក់ទាញវិនិយោគិនបរទេសឱ្យចូលមកបណ្តាក់ទុនផ្ទាល់កាន់តែច្រើន ព្រមទាំងការវិវត្តនៃសភាពការណ៍សកល ខ្ញុំមានសុទិដ្ឋិនិយមថានឹងមានរោងចក្រ/សហគ្រាសកាន់តែច្រើន និងគ្រប់ប្រភេទ ចូលមកបើកដំណើរការនៅកម្ពុជា»។
ឆ្លងកាត់ការកែទម្រង់ប្រព័ន្ធច្បាប់វិនិយោគ និងការដាក់ចេញគោលនយោបាយជាបន្តបន្ទាប់ដើម្បីទាក់ទាញវិនិយោគិនជាតិ និងអន្តរជាតិឱ្យវិនិយោគនៅកម្ពុជាកាន់តែច្រើន នៅក្នុងខែមីនា ឆ្នាំ២០២៥ នេះក៏អាចនឹងមានតំបន់សេដ្ឋកិច្ចពិសេសថ្មីមួយនៅខេត្តព្រះសីហនុ បើកដំណើរការផងដែរ។
ទីប្រឹក្សាបច្ចេកទេសនៃសម្ព័ន្ធក្រុមហ៊ុន East Group លោក ណាង សុធី កាលពីសប្តាហ៍មុនបានប្រាប់ភ្នំពេញប៉ុស្តិ៍ថា ក្នុងខែមីនា នេះអាចនឹងមានតំបន់សេដ្ឋកិច្ចពិសេសថ្មីមួយបើកដំណើរការ ដែលជាការវិនិយោគរបស់សម្ព័ន្ធក្រុមហ៊ុន East Group ក្រោមទុនវិនិយោគប្រហែល ៥០០លានដុល្លារ។
East Sihanouk Special Economic Zone គឺជាតំបន់សេដ្ឋកិច្ចពិសេស ដែលមានផ្ទៃដីទំហំ ៣៤០ហិកតា ស្ថិតក្នុងស្រុកព្រៃនុប ខេត្តព្រះសីហនុ។
លោកបានថ្លែងថា៖«យើងកំពុងរង់ចាំអនុក្រឹត្យរបស់រាជរដ្ឋាភិបាល នៅពេលទទួលបានយើងនឹងចាប់ផ្តើមអនុវត្តន៍ភ្លាម ខណៈបច្ចុប្បន្នក្រុមហ៊ុនបានសាងសង់ផ្លូវដែលមានទំហំ(ទទឹង) ២០ម៉ែត្រ បានប្រវែងប្រហែលជាង ១,៥គីឡូម៉ែត្ររួចហើយ ដើម្បីតភ្ជាប់ពីផ្លូវជាតិលេខ ៤ ឆ្ពោះទៅកាន់ទីតាំងគម្រោង»។
លោកបានលើកឡើងថា ការបត់បែនដ៏ឆាប់រហ័សនៃបរិបទនយោបាយ និងសេដ្ឋកិច្ចសកល ជាពិសេសក្នុងរដ្ឋបាលរបស់ប្រធានាធិបតីអាមេរិក ដែលដឹកនាំដោយលោក ដូណាល់ ត្រាំ បានធ្វើឱ្យពិភពលោកមានប្រែប្រួលយ៉ាងខ្លាំង។
លោកបន្តថា ជម្លោះពាណិជ្ជកម្ម និងវិធានការដំឡើងពន្ធចំពោះទំនិញនាំចូលទីផ្សារអាមេរិកពីប្រទេសមួយចំនួន ដូចជា ចិន កាណាដា និងម៉ិកស៊ិក បានជំរុញឱ្យវិនិយោគិនខ្លះសម្រេចផ្លាស់ប្តូរទីតាំងរោងចក្ររបស់ពួកគេ មកកាន់ប្រទេសអភិវឌ្ឍន៍តិចតួចដូចជា កម្ពុជា។
តំបន់សេដ្ឋកិច្ចពិសេស នឹងដើរតួនាទីសំខាន់ក្នុងការស្រូបទាញក្រុមហ៊ុនទាំងអស់នោះឱ្យចូលមកបើករោងចក្រនៅកម្ពុជា។
ទាក់ទងនឹងចំនួនក្រុមហ៊ុនដែលគ្រោងបើករោងចក្រនៅក្នុងតំបន់សេដ្ឋកិច្ចពិសេស East Sihanouk Special Economic Zone លោក សុធី ប្រាប់ថា មានក្រុមហ៊ុនមួយចំនួនបានទាក់ទងរួចហើយ ដោយភាគច្រើនមានម្ចាស់ជាវិនិយោគិនមកពីប្រទេសចិន។
របាយការណ៍ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ឱ្យដឹងថា គិតត្រឹមចុងឆ្នាំ ២០២៤ នៅកម្ពុជាមានតំបន់សេដ្ឋកិច្ចពិសេសសរុបចំនួន ៣០ ដែលមានរោងចក្រកំពុងដំណើរការ។ ចំនួននេះ គឺកើនឡើងចំនួន ៤ បើធៀបនឹងឆ្នាំ ២០២៣។
ចំនួនតំបន់សេដ្ឋកិច្ចពិសេសដែលមានប្រតិបត្តិការ គឺកើនឡើងពីចំនួន ២១ ក្នុងឆ្នាំ ២០២០ ដល់ចំនួន ២៣ ក្នុងឆ្នាំ ២០២១ និង ២៥ ក្នុងឆ្នាំ ២០២២ ព្រមទាំងចំនួន ២៦ ក្នុងឆ្នាំ ២០២៣៕
