សាច់បង្កកខូចគុណភាពជាច្រើនប្រភេទដែលសមត្ថកិច្ចរឹបអូសបាននាពេលកន្លងមក។ អគ្គនាយកដ្ឋានគយនិងរដ្ឋាករកម្ពុជា
វិធានការហាមឃាត់ការនាំចូលជាបណ្តោះអាសន្នគ្រឿងក្នុង និងបំណែកសាច់សត្វបង្កក ដែលបានអនុវត្តរយៈពេល ១ឆ្នាំកន្លងមក បានត្រូវបិទបញ្ចប់ហើយកាលពីថ្ងៃម្សិលមិញ ដែលនេះមានន័យថា សកម្មភាពនៃការនាំចូលគ្រឿងក្នុង និងបំណែកសាច់សត្វបង្កក ត្រូវធ្វើឡើងជាធម្មតាស្របតាមអនុក្រឹត្យលេខ ៣៧០ អនក្រ.បក ចុះថ្ងៃទី២៨ ខែធ្នូ ឆ្នាំ២០២៣ ស្តីពីការដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ ជាធរមានវិញ។
សេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា(អគរ) ចុះថ្ងៃទី១២ ខែមីនា ឆ្នាំ២០២៥ បានលើកឡើងថា អនុលោមតាមខ្លឹមសារលិខិតលេខ ០៧៤៤ ព.ណ ផផច ចុះថ្ងៃទី១១ ខែមីនា ឆ្នាំ២០២៥ របស់ក្រសួងពាណិជ្ជកម្ម, អគ្គនាយកដ្ឋានគយនិងរដ្ឋាករកម្ពុជា(អគរ) មានកិត្តិយសសូមជម្រាបជូនសាធារណជន ក៏ដូចជាធុរជនពាក់ព័ន្ធជ្រាបថា ការហាមឃាត់ការនាំចូលជាបណ្តោះអាសន្ននូវមុខទំនិញគ្រឿងក្នុងសត្វជ្រូក ចំនួន ២ បន្ទាត់ពន្ធ (០២០៦.៤១.០០ និង ០២០៦.៤៩.០០) ដូចមានចែងក្នុងសេចក្តីជូនដំណឹងរបស់ក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ ចុះថ្ងៃទី១១ ខែកញ្ញា ឆ្នាំ២០២៤ ត្រូវផុតសុពលភាពនៅថ្ងៃទី១២ ខែមីនា ឆ្នាំ២០២៥ នេះ។
បន្ទាត់ពន្ធលេខ ០២០៦.៤១.០០ សំដៅដល់ថ្លើមនៃសត្វជ្រូកបង្កក ចំណែកលេខ ០២០៦.៤៩.០០ គឺជាភាគបំណែកសាច់ និងគ្រឿងក្នុង(Offal)ផ្សេងៗទៀត ក្រៅពីថ្លើមនៃសត្វជ្រូក ដែលអាចបរិភោគបាន បង្កក។
សេចក្តីជូនដំណឹង អគរ បានឱ្យដឹងថា៖«ចាប់ពីថ្ងៃទី១៣ ខែមីនា ឆ្នាំ២០២៥ តទៅ ប្រព្រឹត្តកម្មលើការនាំចូលមុខទំនិញគ្រឿងក្នុងសត្វជ្រូកបង្កកខាងលើ ត្រូវអនុលោមតាមបញ្ញត្តិអនុក្រឹត្យលេខ ៣៧០ អនក្រ.បក ចុះថ្ងៃទី២៨ ខែធ្នូ ឆ្នាំ២០២៣ ស្តីពីការដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ ជាធរមានវិញ»។
អនុក្រឹត្យលេខ ៣៧០ អនក្រ.បក ចុះថ្ងៃទី២៨ ខែធ្នូ ឆ្នាំ២០២៣ ស្តីពីការដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ នៅក្នុងមាត្រា ៥ ចែងថា ក្នុងករណីមានហានិភ័យខ្ពស់ដែលតម្រូវឱ្យមានចំណាត់ការបន្ទាន់ជាយថាហេតុ ក្រសួងមានសមត្ថកិច្ចពាក់ព័ន្ធអាចដាក់វិធានការជាបណ្តោះអាសន្នក្នុងការគ្រប់គ្រងការនាំចេញ នាំចូល និងការដឹកជញ្ជូនឆ្លងកាត់ នៃមុខទំនិញដែលមានហានិភ័យខ្ពស់នោះ និងត្រូវជូនដំណឹងមកអគ្គនាយកដ្ឋានគយនិងរដ្ឋាករកម្ពុជា នៃ ក្រសួងសេដ្ឋកិច្ចនិងហិរញ្ញវត្ថុ ដើម្បីអនុវត្ត។
ក្រសួងមានសមត្ថកិច្ច ត្រូវបញ្ជាក់កាលបរិច្ឆេទចាប់ផ្តើម និងបញ្ចប់ ការអនុវត្ត ដោយមិនត្រូវលើសពី ៦ (ប្រាំមួយ) ខែឡើយ។ រយៈពេលនេះ អាចត្រូវបានពន្យារ ឬបញ្ចប់មុនពេល កំណត់ អាស្រ័យទៅតាមស្ថានភាពជាក់ស្តែងនៃកម្រិតហានិភ័យ។
វិធានការហាមឃាត់ការនាំចូលជាបណ្តោះអាសន្ននូវគ្រឿងក្នុង និងបំណែកសាច់បង្កក ត្រូវបានក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ សម្រេចដាក់ឱ្យអនុវត្តលើកទី១ ដែលមានរយៈពេល ៦ខែ ដោយគិតចាប់ពីថ្ងៃទី១២ ខែមីនា រហូតដល់ថ្ងៃទី១២ ខែកញ្ញា ឆ្នាំ២០២៤ និងលើកទី២ ចាប់ពីថ្ងៃទី១២ ខែកញ្ញា ឆ្នាំ២០២៤ រហូតដល់ថ្ងៃទី១២ ខែមីនា ឆ្នាំ២០២៥។
យោងតាមសេចក្តីប្រកាសរបស់ក្រសួងទាំង ២ វិធានការហាមឃាត់ការនាំចូលជាបណ្តោះអាសន្ននូវគ្រឿងក្នុង និងបំណែកសាច់បង្កក ត្រូវបានធ្វើឡើងក្នុងគោលបំណងដើម្បីសង្រ្គោះដល់ផលិតកម្មសត្វចិញ្ចឹមនៅស្រុក។
ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ ធ្លាប់បានប្រាប់ភ្នំពេញប៉ុស្តិ៍ថា ឥទ្ធិពលនៃការនាំចូលសាច់ជ្រូកបង្កក (សាច់ គ្រឿងក្នុង ក្បាល...ជើង) ដែលគ្មានច្បាប់ និងគ្មានប្រភពច្បាស់លាស់បានធ្វើឱ្យផលិតកម្មនៅក្នុងស្រុកខាតបង់យ៉ាងធ្ងន់ធ្ងរក្នុងរយៈពេលប៉ុន្មានឆ្នាំមកនេះ ខណៈមុនពេលមានការនាំចូលផលិតផលបង្កកច្រើន គឺសកម្មភាពចិញ្ចឹមសត្វក្នុងស្រុកបានរីកលូតលាស់យ៉ាងឆាប់រហ័ស។
លោកបន្តថា វិធានការហាមឃាត់បណ្តោះអាសន្នការនាំចូលផលិតផលសាច់បង្កក បានចូលរួមចំណែកលើកកម្ពស់ផលិតកម្មក្នុងស្រុក និងការពារសុខភាពអ្នកបរិភោគ។
លោកថ្លែងថា៖ «វិធានការហាមឃាត់នាំចូលផលិតផលសាច់បង្កកនឹងផ្តល់ផលវិជ្ជមានសម្រាប់ផលិតកម្មក្នុងស្រុក ព្រោះក្រៅពីជួយឱ្យតម្លៃផលិតផលក្នុងស្រុកល្អជាងមុន វាក៏ជួយកាត់បន្ថយផលប៉ះពាល់សុខភាពអ្នកទទួលទានផងដែរ ខណៈផលិតផលសាច់បង្កកភាគច្រើនត្រូវបាននាំចូលដោយគ្មានច្បាប់ និងគ្មានការត្រួតពិនិត្យគុណភាព និងប្រភពទំនិញច្បាស់លាស់»៕
