ដំឡូងមីស្ងួតត្រូវបានកសិករប្រមូលដាក់លើរទេះដឹកយកទៅលក់ឱ្យឈ្មួញ កាលពីពេលកន្លងមក។ សហការី
ផលិតផលដំឡូងមីស្ងួត(dried cassava chips)កម្ពុជានឹងមានទីផ្សារនាំចេញកាន់តែធំ បន្ទាប់ពីក្រុមហ៊ុនកម្ពុជា Hang Harvest Agriculture Co.,Ltd បានចុះអនុស្សារណៈនៃការយោគយល់គ្នា (MoU)ជាមួយនឹងក្រុមហ៊ុនចិន Cofco Bio-Technology Co., Ltd លើការទិញ-លក់ដំឡូងមីស្ងួតកម្ពុជា ក្នុងបរិមាណ ២០០ ០០០ តោនសម្រាប់ឆ្នាំ ២០២៥-២០២៦។
ពិធីចុះ MoU ស្តីពីការទិញ-លក់ដំឡូងមីស្ងួតកម្ពុជារវាងក្រុមហ៊ុនទាំង ២ ត្រូវបានធ្វើឡើងកាលពីថ្ងៃទី១៤ ខែមីនា ឆ្នាំ២០២៥ នៅកំពង់ផែក្នុងទីក្រុងប៉ីហៃ នៃតំបន់ស្វយ័តជនជាតិជាំងក្វាងស៊ី ប្រទេសចិន ដោយមានការចូលរួមធ្វើជាសាក្សីពីសំណាក់លោក លីម ឡោកពិសិដ្ឋ រដ្ឋលេខាធិការក្រសួងពាណិជ្ជកម្ម(LIM Lork Piseth, Secretary of State of the Ministry of Commerce)។
ពិធីនេះមានការអញ្ជើញចូលរួមពីថ្នាក់ដឹកនាំមន្ទីរពាណិជ្ជកម្មនៃតំបន់ស្វយ័តជនជាតិជាំងក្វាងស៊ី ការិយាល័យទំនាក់ទំនងពាណិជ្ជកម្មកម្ពុជាប្រចំាទីក្រុងណាននីង រដ្ឋាភិបាលប្រជាជនទីក្រុងប៉ីហៃ តំណាងធនាគារអភិវឌ្ឍន៍ជនបទនិងកសិកម្មនៃកម្ពុជា(ARDB Bank), ព្រមទាំងពាណិជ្ជករទិញ-លក់ដំឡូងមីចិននិងកម្ពុជា ជាច្រើនរូប។
ក្រៅពីចុះ MoU ក្នុងពេលជាមួយនេះក៏មានរៀបចំពិធីទទួលដំឡូងមីស្ងួតពីកម្ពុជាលើកទី១ ចំនួន ៥ ០០០ តោនពីប្រទេសកម្ពុជាផងដែរ។
ក្រសួងពាណិជ្ជកម្មកម្ពុជា បានឱ្យដឹងថា ការចុះកិច្ចព្រមព្រៀងនេះនឹងជួយពង្រឹង និងពង្រីកកិច្ចសហប្រតិបត្ដិការពាណិជ្ជកម្មរវាងប្រទេសទាំង ២ ក៏ដូចជួយជំរុញការនាំចេញវិស័យដំឡូងមីកម្ពុជាទៅកាន់ទីផ្សារប្រទេសចិនផងដែរ។
ប្រធានមន្ទីរពាណិជ្ជកម្មខេត្តបាត់ដំបង លោក គឹម ហួត បានចាត់ទុកការនាំចេញ និងការចុះកិច្ចព្រមព្រៀងជាមួយភាគីចិន លើការទទួលទិញដំឡូងមីកម្ពុជា គឺជាចូលរួមចំណែកជំរុញការដាំដុះ និងលើកតម្លៃដំឡូងមីកម្ពុជា ឱ្យកាន់តែប្រសើរជាងពេលបច្ចុប្បន្នដែលតម្លៃបានធ្លាក់ចុះយ៉ាងច្រើនបើធៀបនឹងឆ្នាំ២០២៤។
លោកបានប្រាប់ភ្នំពេញប៉ុស្តិ៍ក្នុងថ្ងៃទី១៧ ខែមីនាថា៖«ការព្រមព្រៀងទិញដំឡូងមីកម្ពុជាពីសំណាក់ក្រុមហ៊ុនចិន គឺជាការល្អណាស់ ព្រោះជាការជួយពង្រីកទីផ្សារឱ្យកាន់តែធំជាងមុន ហើយប្រជាកសិករ និងអ្នកវិនិយោគក៏នឹងទទួលបានផលចំណេញច្រើនជាងមុនដែរ»។
បើតាមលោក គឹម ហួត ក្នុង១ឆ្នាំ ទិន្នផលដំឡូងមី ដែលប្រជាកសិករក្នុងខេត្តបាត់ដំបងប្រមូលបាន អាចស្ថិតក្នុងរង្វង់ជាង ២ លានតោន ក្នុងនោះប្រហែល ៨០ភាគរយត្រូវបានលក់ទៅឱ្យឈ្មួញមកពីប្រទេសថៃ និងប្រហែល ២០ ភាគរយសម្រាប់ប្រើប្រាស់ក្នុងស្រុក។
លោក គីម ហួត បាននិយាយទៀតថា តម្លៃដំឡូងមីស្រស់ក្នុងឆ្នាំនេះ បានធ្លាក់ចុះច្រើនបើធៀបឆ្នាំមុន ដោយដំឡូងមីស្រស់ មានតម្លៃជាមធ្យមចន្លោះពី ១៨០-២២០រៀលក្នុង ១គីឡូក្រាម ខណៈកាលពីឆ្នាំ២០២៤ មានតម្លៃប្រមាណពី ២៥០-៣២០រៀល។
ដំឡូងមី គឺជាដំណាំកសិឧស្សាហកម្មឈានមុខគេមួយរបស់កម្ពុជា។ កាលពីឆ្នាំ ២០២០ កម្ពុជាបានដាក់ចេញជាផ្លូវការនូវ «គោលនយោបាយជាតិស្តីពីដំឡូងមី ២០២០-២០២៥» ក្នុងគោលបំណង ដើម្បីបង្កើនផលិតកម្មនិងធ្វើឱ្យវាកាន់តែមានលក្ខណៈពាណិជ្ជកម្មសម្រាប់ការនាំចេញទៅទីផ្សារអន្តរជាតិ។
អតីតរដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ធ្លាប់បាននិយាយថា ដំណាំដំឡូងមី គឺជាដំណាំកសិឧស្សាហកម្ម និងជាផលិតផលនាំចេញដ៏សំខាន់របស់កម្ពុជាដែលបានរួមចំណែកពី ៣-៤ ភាគរយនៃ GDP ក្នុង ១ ឆ្នាំៗ។
អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ ត្រូវបានសារព័ត៌មាន Fresh News ដកស្រង់សម្តីថា នេះជាវឌ្ឍនភាពបន្ថែមទៀតនៃផលិតកម្មដំឡូងមីកម្ពុជា ដែលទទួលបានឱកាសកាន់តែច្រើនក្នុងការនាំទៅទីផ្សារប្រទេសចិន។
រាជរដ្ឋាភិបាលកម្ពុជា តែងលើកទឹកចិត្តឱ្យមានការកែច្នៃមុននឹងធ្វើការនាំចេញ ព្រោះផលិតផលកែច្នៃរួច នឹងជួយឱ្យកម្ពុជាទទួលបានតម្លៃបន្ថែមខ្ពស់ជាងការនាំចេញផលិតផលមិនទាន់កែច្នៃ។
លោកប្រាប់ទៀតថា នេះជាមិនមែនជាក្រុមហ៊ុនទី ១ ដែលនាំចេញដំឡូងមីស្ងួតទៅប្រទេសចិនឡើយ ខណៈកម្ពុជាមានកិច្ចព្រមព្រៀងលក្ខខណ្ឌតម្រូវភូតគាមអនាម័យជាមួយរដ្ឋាភិបាលចិន រួចមកហើយសម្រាប់នាំចេញ (SPS)។
ភាគច្រើននៃផលិតផលដំឡូងមីនាំចេញទៅប្រទេសចិន គឺជាប្រភេទដំឡូងមីស្ងួត (ចំណិតដំឡូងមីក្រៀម) ម្ស៉ៅ និងសំណល់ដំឡូងមី។ ចំណែកដំឡូងមីស្រស់ នាំចេញទៅប្រទេសជិតខាងដូចជា វៀតណាម និងថៃ។
របាយការណ៍ក្រសួងកសិកម្ម រុក្ខាប្រមាញ់ និងនេសាទ ឱ្យដឹងថា ក្នុងឆ្នាំ២០២៤ កម្ពុជានាំចេញចំណិតដំឡូងមីក្រៀម ចំនួន ៩៦៤ ៦៨១ តោន, ដំឡូងមីស្រស់ចំនួន ៣ ៤៤៣ ៧៦០តោនម្សៅដំឡូងមីចំនួន ៦០ ៥២៤ និងកាកសំណល់ដំឡូងមីចំនួន ៣៣ ១៥៣ តោន៕
