ការប្រកាសពីការចាប់ផ្តើមផ្លូវដឹកជញ្ជូន«ខ្សែចង្វាក់ត្រជាក់ + ទំនិញទូទៅ»ពីកំពង់ផែ Fangchenggang មកកាន់កំពង់ផែសមុទ្ររបស់កម្ពុជា ក្នុងខេត្តកោះកុង។ Wang Wenbin
ផ្លូវដឹកជញ្ជូន«ខ្សែចង្វាក់ត្រជាក់ + ទំនិញទូទៅ» នឹងចូលរួមចំណែកលើកកម្ពស់សមត្ថភាពនាំចេញទំនិញកម្ពុជាទៅកាន់ទីផ្សារអន្តរជាតិ ជាពិសេសផលិតផលកសិកម្ម ខណៈសមត្ថភាពផលិតកម្ម និងទិន្នផលក្នុងវិស័យកសិកម្មកម្ពុជាបានកើនឡើងជារៀងរាល់ឆ្នាំ។ នេះបើតាមអនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ។
វិស័យដឹកជញ្ជូនទំនិញតាមផ្លូវទឹកកម្ពុជា នឹងបង្ហាញវឌ្ឍនភាពថ្មីមួយទៀតបន្ទាប់ពីកំពង់ផែ Fangchenggang នៃប្រទេសចិន កាលពីថ្ងៃទី១៥ ខែមីនា បានប្រកាសពីការចាប់ផ្តើមបើកផ្លូវ«ខ្សែចង្វាក់ត្រជាក់ + ទំនិញទូទៅ» មកកាន់កំពង់ផែសមុទ្ររបស់កម្ពុជា ក្នុងខេត្តកោះកុង។
ឯកអគ្គរដ្ឋទូតសាធារណរដ្ឋចិន ប្រចាំនៅកម្ពុជា លោក Wang Wenbin កាលពីថ្ងៃទី១៦ ខែមីនា បានសរសេរនៅលើបណ្តាញសង្គមផ្លូវការផ្ទាល់ខ្លួនថា៖«សូមអបអរសាទរចំពោះដំណើរលើកដំបូងនៃផ្លូវ«ខ្សែចង្វាក់ត្រជាក់ + ទំនិញទូទៅ»ពីកំពង់ផែ Fangchenggang ប្រទេសចិនទៅកាន់កំពង់ផែកោះកុង ប្រទេសកម្ពុជា។ ខ្សែដំណើរមានរយៈពេល ៧ ថ្ងៃ បើធៀប ដោយអាចកាត់បន្ថយពេលវេលាដឹកជញ្ជូនបានជាង ៥០ភាគរយ និងថ្លៃដឹកជញ្ជូនជាង ២០ភាគរយ»។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បានប្រាប់ភ្នំពេញប៉ុស្តិ៍ នៅថ្ងៃទី១៨ ខែមីនា ថា នេះជាវឌ្ឍនភាពមួយទៀតសម្រាប់វិស័យដឹកជញ្ជូន និងការនាំចេញទំនិញកម្ពុជាទៅទីផ្សារអន្តរជាតិ។
ខ្សែចង្វាក់ត្រជាក់ នឹងផ្តល់ផលវិជ្ជមានច្រើនសម្រាប់ការដឹកជញ្ជូនទំនិញកសិផល និងចំណីអាហារ ព្រោះជាការដឹកជញ្ជូនទំនិញក្នុងសីតុណ្ហភាពមួយដែលអាចកំណត់បាន និងរក្សាគុណភាពទំនិញបានល្អ។
ការដឹកជញ្ជូនដោយផ្ទាល់(រវាងកំពង់ផែ Fangchenggang មកកាន់កំពង់ផែកោះកុង) នឹងផ្តល់ផលចំណេញច្រើនដូចជា កាត់បន្ថយរយៈពេលដឹកជញ្ជូន មិនមានផ្ទេរទំនិញពីទូរកុងតឺន័រ/កប៉ាល់មួយទៅមួយ និងថ្លៃដឹកជញ្ជូនទាបជាងមុន។
លោកបន្តថា ការចាប់ផ្តើមដំណើរការផ្លូវ«ខ្សែចង្វាក់ត្រជាក់ + ទំនិញទូទៅ»គឺបង្ហាញពីភាពល្អប្រសើរនៃទំនាក់ទំនងការទូត និងពាណិជ្ជកម្មរវាងប្រទេសកម្ពុជា-ចិន ជាពិសេសការនាំកសិផលពីកម្ពុជាទៅប្រទេសចិន ដែលកំពុងមានការកើនឡើងជារៀងរាល់ឆ្នាំ។
លោកថ្លែងថា៖«ការដឹកជញ្ជូននេះនឹងជួយធ្វើឱ្យផលិតផលកសិកម្មកម្ពុជាកាន់តែច្រើនបង្ហាញវត្តមាននៅទីផ្សារប្រទេសចិន។ ក្រៅពីអាចរក្សាគុណភាពផលិតផល(ពិសេសចំណីអាហារ)ឱ្យនៅល្អបានយូរ និងរយៈពេលដឹកជញ្ជូនខ្លីជាងមុន វាក៏ជួយកាត់បន្ថយថ្លៃដើមផលិត ដែលធ្វើឱ្យសមត្ថភាពប្រកួតប្រជែងលើទីផ្សារអន្តរជាតិមានកាន់តែខ្លាំង»។
លោកលើកឡើងទៀតថា នាពេលអនាគតបើសិនផលិតកម្មឱសថកម្ពុជាកាន់តែរីកចម្រើន ហើយមានការនាំចេញកាន់តែច្រើន មធ្យោបាយនៃកាដឹកទំនិញតាម «ខ្សែចង្វាក់ត្រជាក់ + ទំនិញទូទៅ» នឹងមានតម្រូវការកាន់តែច្រើន។
របាយការណ៍ក្រសួងកសិកម្ម រុក្ខាប្រមាញ់ និងនេសាទ បង្ហាញថា ក្នុងឆ្នាំ២០២៤ កម្ពុជាបាននាំចេញកសិផលចំនួន ១១,៧ លានតោន កើនឡើង ៣៩ ភាគរយបើធៀបនឹងឆ្នាំ២០២៣ ដែលមានចំនួន ៨,៤ លានតោន។
សម្រាប់ទឹកប្រាក់ដែលទទួលបាន គឺប្រមាណ ៤,៨ ពាន់លានដុល្លារ។ ផលិតផលកសិកម្មនាំចេញសំខាន់ៗ រួមមាន ជ័រកៅស៊ូ ស្រូវ អង្ករ ដំឡូងមី ស្វាយចន្ទី ចេក ផ្លែមៀន ម្រេច និងកសិផលសំខាន់ៗមួយចំនួនទៀត។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ថា ការដាំដុះបានបន្តរក្សាបានកំណើនជារៀងរាល់ឆ្នាំ ដែលជាការបើកលទ្ធភាពឱ្យកម្ពុជាធ្វើការនាំចេញកាន់តែច្រើនទៅកាន់ទីផ្សារអន្តរជាតិ ជាពិសេសបានកំពុងអនុវត្តនូវកិច្ចព្រមព្រៀងពាណិជ្ជកម្មសេរីកម្ពុជា-ចិន និង កម្ពុជា-កូរ៉េ និងកិច្ចព្រមព្រៀង RCEP ផងនោះបានបើកទីផ្សារកាន់តែទូលាយសម្រាប់ការនាំចេញកសិផលរបស់កម្ពុជា។
លោកបានថ្លែងថា៖«ខ្ញុំសង្កេតឃើញថានាពេលបច្ចុប្បន្ននេះ ផលិតផលកសិកម្មរបស់យើងក៏ផលិតតម្រូវទៅតាមទីផ្សារនាំចេញផងដែរ ដូចជា ស្រូវ អង្ករ ពោត ស្វាយ ផ្លែចេក គឺកាន់តែមានគុណភាពល្អសម្រាប់ការនាំចេញ»។
នាយករដ្ឋមន្ត្រីកម្ពុជា លោក ហ៊ុន ម៉ាណែត ក្នុងពិធីសម្ពោធ«សមិទ្ធផលនានាក្នុងភូមិ ប៊ុនរ៉ានី សែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់» កាលពីថ្ងៃទី២០ ខែមករា ឆ្នាំ ២០២៥ បាននិយាយថា ក្នុងឆ្នាំ ២០២៤ កំណើននៃការនាំចេញកសិផលសរុបកើនដល់ ១១,៧ លានតោន ទៅ ៩៤ ប្រទេស កើនឡើង ២០ ប្រទេស ក្នុងនោះមានស្រូវជាង ៥ លានតោន និងអង្ករ ៦៥ ម៉ឺនតោន ទៅកាន់ ៧៥ ប្រទេស។
លោកបន្តថា រដ្ឋាភិបាលតែងតែយកចិត្តទុកដាក់យ៉ាងខ្លាំងពីការបង្កបង្កើនផលរបស់ប្រជាកសិករ និងអ្នកវិនិយោគ ដោយរាប់ចាប់តាំងពីការគិតគូរឱ្យប្រជាពលរដ្ឋមានដីសម្រាប់ដាំដុះ, មានទឹកសម្រាប់ស្រោចស្រព, មានផ្លូវ ភ្លើង សម្រាប់ដឹកជញ្ជូនកសិផល ឬបូមទឹក/ប្រើប្រាស់ និងមានទីផ្សារសម្រាប់លក់ដូរ ដោយគិតទាំងក្នុងស្រុក និងក្រៅស្រុក។
ទិន្នន័យចុងក្រោយបំផុតរបស់ អគ្គនាយដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងរយៈពេល ២ខែដើមឆ្នាំ ២០២៥ ទំហំពាណិជ្ជកម្មអន្តរជាតិរបស់កម្ពុជា មានទឹកប្រាក់សរុប ៩ ៤៤៧,៥៣ លានដុល្លារ កើនឡើង ១៦,៣ភាគរយបើធៀបនឹងរយៈពេលដូចគ្នាក្នុងឆ្នាំ ២០២៤។ ប្រទេសចិន គឺជាដៃគូពាណិជ្ជកម្មធំជាងគេរបស់កម្ពុជា ដោយគ្រប់គ្រងចំណែករហូតដល់ ២៨,១៨ ភាគរយនៃទំហំពាណិជ្ជកម្មសរុប។
យោងតាម GDCE ក្នុងខែមករា-កុម្ភៈ ឆ្នាំ២០២៥ ការផ្លាស់ប្តូរទំនិញរវាងភាគីទាំង ២ មានទឹកប្រាក់សរុប ២ ៦៦២,៧៣ លានដុល្លារ កើន ២១,១ ភាគរយ ក្នុងនោះកម្ពុជានាំចេញ ២១៧,៩៦លានដុល្លារ ធ្លាក់ចុះ ៤,៣ភាគរយ និងទំនិញនាំចូលពីប្រទេសចិន ២ ៤៤៤,៧៧ លានដុល្លារ កើនឡើង ២៤ភាគរយ៕
