រូបតំណាងសួនកសិ-ឧស្សាហកម្ម ដែលគ្រោងបង្កើតនៅកម្ពុជា នាពេលកន្លងមក។ សហការី
ថ្នាក់ដឹកនាំក្រុមហ៊ុនមានមូលដ្ឋានក្នុងខេត្តហឺណាន Zhengzhou Agricultural Development Group បានបង្ហាញការចាប់អារម្មណ៍ចំពោះឱកាសមកបណ្តាក់ទុននៅកម្ពុជា ជាពិសេសការកសាងសួនកសិ-ឧស្សាហកម្ម។
នៅក្នុងជំនួបជាមួយ លោក លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(CDC) នៅក្នុងទីក្រុងចឹងចូវ ខេត្តហ៊ឺណាន កាលពីថ្ងៃទី១៧ ខែមីនា លោក Zhou Fuqiang ប្រធានគណៈកម្មាធិការអចិន្ត្រៃយ៍នៃសភាប្រជាជនក្រុងចឹងចូវ បានសម្តែងការស្វាគមន៍ចំពោះគណៈប្រតិភូកម្ពុជាដែលបានមកធ្វើទស្សនកិច្ចនៅខេត្តហឺណាន។
ជាមួយគ្នានេះ លោកក៏បានធ្វើការពន្យល់ដល់គណៈប្រតិភូកម្ពុជាអំពីសក្តានុពលរបស់ខេត្តហឺណាន ព្រមទាំងវឌ្ឍនភាពរបស់ក្រុមហ៊ុន Zhengzhou Agricultural Development Group លើការស្ថាបនាសួនកសិ-ឧស្សាហកម្ម ស្ថិតនៅតំបន់សេដ្ឋកិច្ចពិសេសនៃអាកាសយានដ្ឋានអន្តរជាតិក្រុងចឹងចូវ។
លោកបានថ្លែងថា៖«ក្រុមហ៊ុន Zhengzhou Agricultural Development Group នឹងអាចមានលទ្ធភាពសិក្សាសមិទ្ធិលទ្ធភាព និងបណ្តាក់ទុនវិនិយោគនៅកម្ពុជានាពេលខាងមុខ»។
ជាការឆ្លើយតប លោក ស៊ុន ចាន់ថុល បានលើកបង្ហាញពីបច្ច័យវិជ្ជមាន ព្រមទាំងលក្ខខណ្ឌអំណោយផលជាច្រើនដែលកម្ពុជាកំពុងផ្តល់ឱ្យអ្នកវិនិយោគ ពិសេសវិនិយោគិនចិន។
លក្ខណៈអំណោយផលទាំងនោះមានដូចជា សុខសន្តិភាព និងស្ថិរភាពនយោបាយ លំនឹងម៉ាក្រូសេដ្ឋកិច្ច សម្បូរកម្លាំងពលកម្មវ័យក្មេងដែលបើកទូលាយក្នុងការទទួលយកការបណ្តុះបណ្តាលថ្មីៗ និងមានទីតាំងភូមិសាស្រ្តអំណោយផលសម្រាប់ការដឹកជញ្ជូនទៅគ្រប់ទីតាំងទូទាំងពិភពលោក។
លោកបានបញ្ជាក់ថា៖«ក្រៅពីកត្តាទាំងអស់ខាងលើ ការវិនិយោគិននៅកម្ពុជាក៏ទទួលបាននូវការគាំទ្រពីសំណាក់រាជរដ្ឋាភិបាលដល់ការរីកលូតលាស់នៃវិស័យឯកជន តាមរយៈវេទិការាជរដ្ឋាភិបាល-ផ្នែកឯកជន, ច្បាប់ស្តីពីវិនិយោគដែលមានភាពបត់បែន និងអនុគ្រោះ, ហេដ្ឋារចនាសម្ព័ន្ធដឹកជញ្ជូនអន្តរមធ្យោបាយសម្បូរបែប និងប្រទាក់ក្រឡា ជំរុញឱ្យសមាហរណកម្មនៅទូទាំងប្រទេស និងនៅក្នុងតំបន់កាន់តែមានភាពប្រសើរឡើង ជាមួយនឹងទីតាំងភូមិសាស្រ្តដែលមានអំណោយផលខ្ពស់ ដែលរំពឹងថានឹងក្លាយជាមជ្ឈមណ្ឌលភស្តុភារកម្មក្នុងតំបន់នាពេលអនាគត»។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី១៨ ខែមីនា ថា ទំនាក់ទំនងការទូត លក្ខខណ្ឌភូមិសាស្រ្ត ច្បាប់វិនិយោគ ព្រមទាំងកត្តាទីផ្សារនាំចេញដែលមានប្រព័ន្ធអនុគ្រោះពន្ធពីប្រទេសជាច្រើន បានលើកទឹកចិត្តឱ្យវិនិយោគចិនកាន់តែច្រើនចូលមកបណ្តាក់ទុនផ្ទាល់នៅកម្ពុជា។
បច្ចុប្បន្នការបណ្តាក់ទុនពីសំណាក់វិនិយោគិនចិននៅកម្ពុជា មាននៅស្ទើគ្រប់វិស័យ រាប់ចាប់តាំងពីអាជីវកម្មតូច រហូតដល់រោងចក្រ/សហគ្រាសធំៗ ដែលប្រើប្រាស់បច្ចេកវិទ្យាទំនើប។
លោកប្រាប់ទៀតថា ៖«បើកម្ពុជាអាចទាក់ទាញវិនិយោគិនចិនឱ្យចូលមកវិនិយោគលើតំបន់សេដ្ឋកិច្ចពិសេស និងកសិ-ឧស្សាហកម្ម កាន់តែច្រើន គឺនឹងអាចទាក់ទាញវិនិយោគិនបរទេស ពិសេសជនជាតិចិនឱ្យចូលមកបណ្តាក់ទុនកាន់តែច្រើន»។
ដើម្បីបង្កើនភាពទាក់ទាញ និងបរិយាកាសងាយស្រួលដល់វិនិយោគិនចិន នៅទីស្នាក់ការនៃក្រុមប្រឹក្សាអភិវឌ្ឍន៍កម្ពុជា (CDC) បច្ចុប្បន្នក៏មានតុចិន (China Desk) សម្រាប់ផ្តល់ការប្រឹក្សាជូនវិនិយោគិនចិនផងដែរ៕
