រថយន្តដឹកទំនិញនៅព្រំដែនកម្ពុជា វៀតណាម។ សហការី
គណៈប្រតិភូនៃសភាពាណិជ្ជកម្មកម្ពុជា(CCC) បានប្រាប់ពាណិជ្ជករវៀតណាមឱ្យមកធ្វើទស្សនកិច្ចនៅកម្ពុជា ដើម្បីពិនិត្យលទ្ធភាពក្នុងការចាប់ដៃគូជាមួយពាណិជ្ជករកម្ពុជា ក៏ដូចជាបណ្តាក់ទុនវិនិយោគផ្ទាល់នៅកម្ពុជា ខណៈពាណិជ្ជកម្មទ្វេភាគីរវាងប្រទេសទាំង ២ ក្នុងឆ្នាំ ២០២៤ សម្រេចបានជិត ៧,៨ ពាន់លានដុល្លារ។
គណៈប្រតិភូសភាពាណិជ្ជកម្មកម្ពុជា ដឹកនាំដោយ លោក ជឹម សុខ អនុប្រធានសភាពាណិជ្ជកម្មកម្ពុជា និងជាប្រធានសភាពាណិជ្ជកម្មខេត្តព្រៃវែង កាលពីថ្ងៃទី១៧-២០ ខែមីនា បានដឹកនាំគណៈប្រតិភូ CCC សរុប ៣៦រូប ធ្វើទស្សនកិច្ចនៅទីក្រុងហូជីមិញ ប្រទេសវៀតណាម។
CCC បានឱ្យដឹងថា ក្នុងដំណើរទស្សនកិច្ចនេះ គណៈប្រតិភូ CCC បានជួបពិភាក្សាការងារជាមួយសមាគមមិត្តភាពវៀតណាម-កម្ពុជា ប្រចាំទីក្រុងហូជីមិញ និងបានចូលរួមកម្មវិធីផ្គូផ្គងពាណិជ្ជកម្មជាមួយសមាគមពាណិជ្ជករ នៃទីក្រុងហូជីមិញ ផងដែរ។
ក្រៅពីនេះ គណៈប្រតិភូសភាពាណិជ្ជកម្មកម្ពុជា ក៏បានទៅទស្សនកិច្ចនៅក្រុមហ៊ុនផលិតអង្ករ TV Food Company Limited, ក្រុមហ៊ុនផលិតប្រេងរំអិល Indo-Petrol, និងនៅរោងសិប្បកម្មផលិតគ្រឿងទេស Bao Ngoc ព្រមទាំងបានចូលរួមពិព័រណ៍កែច្នៃ និងវេចខ្ចប់អន្តរជាតិ ឆ្នាំ២០២៥ នៅមជ្ឈមណ្ឌលពិព័រណ៍ និងសន្និបាតសៃហ្គន ទីក្រុងហូជីមីញ។
CCC បានឱ្យដឹងទៀតថា តាមរយៈទស្សនកិច្ចខាងលើ គឺបានផ្តល់ឱកាសដល់ពាណិជ្ជករកម្ពុជាបានជួបដោយផ្ទាល់ជាមួយពាណិជ្ជករវៀតណាម ដើម្បីជជែកពិភាក្សា និងផ្លាស់ប្តូរយោបល់គ្នាលើវិស័យសក្តានុពលដែលភាគីទាំងពីរមាន ដើម្បីអាចឈានទៅដល់ការចាប់ដៃគូពាណិជ្ជកម្មនាពេលខាងមុខ។
ប្រធានគណៈប្រតិភូ CCC បានថ្លែងថា៖«តាមរយៈដំណើរទស្សនកិច្ចនេះ ខ្ញុំសូមអញ្ជើញពាណិជ្ជករវៀតណាមមកទស្សនកិច្ចនៅកម្ពុជា ដើម្បីស្វែងយល់កាន់តែច្បាស់ និងអាចពិនិត្យលទ្ធភាពក្នុងការចាប់ដៃគូជាមួយពាណិជ្ជករកម្ពុជា ក៏ដូចជាដាក់ទុនវិនិយោគនៅកម្ពុជាលើវិស័យអាទិភាពនានា ជាពិសេសគឺវិស័យកសិកម្ម»។
ជាការឆ្លើយតប ក្រុមពាណិជ្ជករវៀតណាមបានបង្ហាញការចាប់អារម្មណ៍ខ្លាំងទៅលើវិស័យសំខាន់ៗមួយចំនួនរបស់កម្ពុជា និងបានសន្យារកពេលវេលាសមស្របណាមួយដើម្បីមកទស្សនកិច្ចនៅកម្ពុជាដោយផ្ទាល់។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ក្នុងឆ្នាំ២០២៤ ការនាំចេញនាំចូលទំនិញរវាងកម្ពុជា-វៀតណាម មានទឹកប្រាក់សរុប ៧,៧៨ពាន់លានដុល្លារ កើនឡើង ១៨,២ភាគរយបើធៀបឆ្នាំ២០២៣។ វៀតណាម គឺជាដៃគូពាណិជ្ជកម្មអន្តរជាតិធំទី ៣ របស់កម្ពុជា បន្ទាប់ពីប្រទេសចិន និងសហរដ្ឋអាមេរិក។
ក្នុងចំនួនខាងលើ គឺកម្ពុជានាំទៅវៀតណាម ៣,៦១ ពាន់លានដុល្លារ កើន ២១,៦ ភាគរយ និងទំនិញវៀតណាមនាំចូលមកកម្ពុជា ៤,១៧ ពាន់លានដុល្លារ កើន១៥,៤ ភាគរយ៕
