ទិដ្ឋភាពនៅការដ្ឋានសាងសង់អាកាសយានដ្ឋានអន្តរជាតិតេជោ ដែលគ្រោងបើកដំណើរការជាផ្លូវការក្នុងខែកក្កដា។ យូសុះ អាប់ឌុលរ៉ាស់ហ៊ីម
វិស័យអាកាសចរណ៍ស៊ីវិលកម្ពុជាកំពុងខិតខំអភិវឌ្ឍន៍ខ្លួនដើម្បីស្វែងយល់ និងការចូលរួមជាសមជិកនៃអនុសញ្ញា និងពិធីសារខេបថោន(Cape Town Convention-CTC) ដែលវានឹងផ្តល់ផលប្រយោជន៍ផ្នែកសេដ្ឋកិច្ចយ៉ាងច្រើនដល់វិស័យអាកាសចរណ៍កម្ពុជា។
រដ្ឋលេខាធិការដ្ឋានអាកាសចរណ៍ស៊ីវិល សហការជាមួយក្រុមហ៊ុនផលិតយន្តហោះ Boeing កាលពីថ្ងៃទី២៤ ខែមីនា បានរៀបចំសិក្ខាសាលាស្តីពីអនុសញ្ញា និងពិធីសារខេបថោន (Workshop on Cape Town Convention and Protocols) ដោយមានការចូលរួមពីលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និងលោកស្រី Bridgette Walker ភារធារីស្ថានទូតសហរដ្ឋអាមេរិកប្រចាំកម្ពុជាតំណាងឱ្យក្រុមហ៊ុន Boeing ព្រមទាំងថ្នាក់ដឹកនាំ និងមន្រ្តីរាជការនៃរដ្ឋលេខាធិការដ្ឋានអាកាសចរណ៍ស៊ីវិល តំណាងក្រសួងស្ថាប័នពាក់ព័ន្ធ និងក្រុមហ៊ុនអាកាសចរណ៍ជាច្រើន។
រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល លោក ស៊ីន ចាន់សិរីវុត្ថា បានប្រាប់ភ្នំពេញប៉ុស្តិ៍ក្នុងថ្ងៃទី២៤ ខែមីនាថា សិក្ខាសាលាស្តីពីអនុសញ្ញា និងពិធីសារខេបថោន ពិតជាមានសារៈសំខាន់ណាស់ក្នុងការរួមចំណែកលើកកម្ពស់វិស័យអាកាសចរណ៍ស៊ីវិលនៅកម្ពុជា ព្រោះជាចំណុចចាប់ផ្តើមនៃការសិក្សាស្វែងយល់ និងត្រៀមខ្លួននៃវិស័យអាកាសចរណ៍ស៊ីវិលកម្ពុជាទៅជាសមាជិកនៃអនុសញ្ញា CTC។
សិក្ខាសាលានេះផ្តល់ឱ្យអ្នកនៅក្នុងវិស័យអាកាសចរណ៍យល់ដឹងពីនិន្នាការនៃភាពរីកចម្រើន និងការវិវឌ្ឍនៃវិស័យអាកាសចរណ៍អន្តរជាតិ ព្រមទាំងជាឱកាសនៃការជួបពិភាក្សា និងបង្កើតបណ្តាញជាមួយក្រុមហ៊ុនអាកាសចរណ៍ធំៗរបស់អាមេរិកដូចជា Boeing ជាដើម។
លោកបន្តថា ដើម្បីអាចចូលជាសមាជិក CTC កម្ពុជាត្រូវបំពេញនូវលក្ខខណ្ឌមួយចំនួនដូចជា ការកែលម្អច្បាប់ និងលិខិតបទដ្ឋានគិតយុទ្ធពាក់ព័ន្ធមួយចំនួននឹងវិស័យអាកាសចរណ៍ ដែលត្រូវការជំនួយបច្ចេកទេសពីដៃគូអភិវឌ្ឍន៍ដូចជា ក្រុមហ៊ុនផលិតយន្តហោះដូចជា Boeing និង Airbus ជាដើម។
លោកបានថ្លែងថា៖«អត្ថប្រយោជន៍ដែលបណ្តារដ្ឋសមាជិកនៃ CTC នឹងទទួលបានបន្ទាប់ពីក្លាយជាភាគីនៃអនុសញ្ញា និងពិធីសារមានចំនួន ២ គឺអត្ថប្រយោជន៍ផ្នែកច្បាប់ និងអត្ថប្រយោជន៍ផ្នែកសេដ្ឋកិច្ច»។
យោងតាមលោក ចាន់សិរីវុត្ថា គំនិតនៃការផ្តួចផ្តើមចូលជាសមាជិក CTC ពីសំណាក់កម្ពុជា គឺមានតាំងពីឆ្នាំ២០១៩ ប៉ុន្តែវាត្រូវបានអូសបន្លាយពេលជាបន្តបន្ទាប់ដោយសារវិបត្តិជំងឺកូវីដ១៩។
ស្ថានទូតមេរិកប្រចាំកម្ពុជា បានបង្ហាញការសាទរចំពោះសិក្ខាសាលាខាងលើ ដោយបានសរសេរនៅលើបណ្តាញសង្គមរបស់ខ្លួនថា សូមចូលរួមជាមួយក្រុមហ៊ុន Boeing និងរដ្ឋលេខាធិការដ្ឋានអាកាសចរណ៍ស៊ីវិលកម្ពុជា ដែលបានបើកសិក្ខាសាលាដ៏មានសារសំខាន់ស្តីពីអនុសញ្ញានិងពិធីសារខេបថោន ដែលនឹងជួយឱ្យព្រះរាជាណាចក្រកម្ពុជា នូវលទ្ធភាពជាច្រើនក្នុងការទទួលបានធនធានហិរញ្ញវត្ថុសម្រាប់ទីផ្សារអាកាសចរណ៍ស៊ីវិលកម្ពុជា។
ស្ថានទូតបញ្ជាក់ថា៖«ក្នុងនាមជាក្រុមហ៊ុនឈានមុខគេក្នុងឧស្សាហកម្មអាកាសចរណ៍ ក្រុមហ៊ុន Boeing មានការប្តេជ្ញាចិត្តក្នុងការជួយគាំទ្រដល់ការអភិវឌ្ឍវិស័យអាកាសចរណ៍របស់កម្ពុជា ដោយនាំមកនូវវិបុលភាពកាន់តែប្រសើរ ដល់ប្រទេសជាតិរបស់យើងទាំងពីរ»។
រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល លោក ម៉ៅ ហាវណ្ណាល់ ក្នុងពិធីបូកសរុបលទ្ធផលការងារអាកាសចរណ៍ស៊ីវិលឆ្នាំ ២០២៤ របស់រដ្ឋលេខាធិការដ្ឋានអាកាសចរណ៍ស៊ីវិល បាននិយាយថា វិស័យអាកាសចរណ៍ស៊ីវិលកម្ពុជាកំពុងបង្ហាញសញ្ញាវិជ្ជមានគួរឱ្យកត់សម្គាល់ ដោយក្នុងឆ្នាំ២០២៤ កន្លងមកអាកាសយានដ្ឋានអន្តរជាតិទាំង ៣ របស់កម្ពុជា(ភ្នំពេញ សៀមរាប និងព្រះសីហនុ) បានតភ្ជាប់ជើងហោះហើរអន្តរជាតិទៅកាន់ ១២ប្រទេស ព្រមទាំងតំបន់រដ្ឋបាលពិសេសហុងកុង និងកោះតៃវ៉ាន់(គិតជាសរុបបានភ្ជាប់ការហោះហើរទៅកាន់គោលដៅ ឬរាជធានី/ទីក្រុងចំនួន ៣៤ នៅទូទាំងពិភពលោក) និងមានក្រុមហ៊ុនអាកាសចរណ៍ជាតិ និងអន្តរជាតិចំនួន ៣១ កំពុងមានប្រតិបត្តិការនៅកម្ពុជា។
សម្រាប់អ្នកធ្វើដំណើរតាមផ្លូវអាកាស ក្នុងឆ្នាំ២០២៤ គឺមានប្រមាណ ៦,២៤ លាននាក់ កើនឡើង ២២ ភាគរយបើធៀបនឹងឆ្នាំ ២០២៣ ចំណែកទំនិញដឹកតាមផ្លូវអាកាស មាន ៧៧,៨ ពាន់តោន កើន ៤០ភាគរយ។ ដោយឡែកសម្រាប់ជើងហោះហើរ គឺមានសរុបចំនួន ៥៨ ៣៥៤ ជើង កើនឡើង ១៤ ភាគរយ។
លោកបន្ថែមថា ភាពវិជ្ជមានទាំងនេះនឹងមិនបញ្ចប់ត្រឹមនេះឡើយ ដោយរដ្ឋលេខាធិការដ្ឋានអាកាសចរណ៍ស៊ីវិលបាននិងកំពុងខិតខំធ្វើកិច្ចការជាច្រើន ព្រមទាំងបានដាក់ចេញនូវយុទ្ធសាស្រ្តថ្មីៗជាបន្តបន្ទាប់ ជាពិសេសការប្រកាសដាក់ឱ្យអនុវត្ត«ផែនការយុទ្ធសាស្ត្រអាកាសចរណ៍ស៊ីវិល ឆ្នាំ២០២៥-២០៣០» ដើម្បីធ្វើយ៉ាងណាជំរុញវិស័យអាកាសចរណ៍ស៊ីវិលកម្ពុជា ឱ្យបោះជំហានទៅមុខកាន់តែលឿនបន្ថែមទៀត៕
