ទិដ្ឋភាពនៃការលើកទូរកុងតឺន័រនៅកំពង់ផែស្វយ័តក្រុងព្រះសីហនុ។ ភ្នំពេញប៉ុស្តិ៍
ផ្នែកឯកជនអះអាងថា ការប្រកាសរបស់អាជ្ញាធរក្នុងការដាក់ឱ្យអនុវត្តសាកល្បង(Dry/Trial Run)ប្រព័ន្ធតាមដានការដឹកជញ្ជូនទំនិញដោយប្រើសៀលអេឡិចត្រូនិកនាពេលខាងមុខ នឹងចូលរួមចំណែកយ៉ាងច្រើនក្នុងការជួយលើកកម្ពស់ប្រសិទ្ធភាពក្នុងវិស័យដឹកជញ្ជូន ព្រមទាំងអាចបង្កើនទំនុកចិត្តទៅដល់ម្ចាស់ទំនិញផងដែរ។
សេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា(GDCE) កាលពីថ្ងៃទី២៤ ខែមីនា ឱ្យដឹងថា ក្នុងគោលបំណងពង្រឹងអនុលោមភាព និងប្រសិទ្ធភាពនៃគ្រប់គ្រងការដឹកជញ្ជូនទំនិញឆ្លងកាត់ឱ្យកាន់តែប្រសើរបន្ថែមទៀត GDCE នឹងដាក់ឱ្យអនុវត្តសាកល្បង(Dry/Trial Run) ប្រព័ន្ធតាមដានការដឹកជញ្ជូនទំនិញដោយប្រើបសៀលអេឡិចត្រូនិក អមជាមួយសៀលដែលកំពុងប្រើប្រាស់ជាធរមានចំពោះការដឹកជញ្ជូនទំនិញឆ្លងកាត់ ដើម្បីប្រមូលធាតុចូលជាមូលដ្ឋានក្នុងការត្រៀមដាក់ឱ្យអនុវត្តជាផ្លូវការតាមតម្រាយផ្លូវរបស់អង្គភាពគយ និងរដ្ឋាករកម្ពុជា ចំនួន ៨ ទីតាំង។
GDCE បានឱ្យដឹងទៀតថា អង្គភាពគយ និងរដ្ឋាករទាំង ៨ រួមមាន សាខាគយនិងរដ្ឋាករកំពង់ផែអន្តរជាតិក្រុងព្រះសីហនុ, សាខាគយនិងរដ្ឋាករកំពង់ផែអន្តរជាតិភ្នំពេញ, ការិយាល័យគយនិងរដ្ឋាករបាវិត, ការិយាល័យគយនិងរដ្ឋាករប៉ោយប៉ែត, ការិយាល័យគយនិងរដ្ឋាករប្រចាំតំបន់សេដ្ឋកិច្ចពិសេសខេមបូឌា ចេជាង ហ្គ័រជី, ការិយាល័យគយនិងរដ្ឋាករប្រចាំតំបន់សេដ្ឋកិច្ចពិសេសភ្នំពេញ, ការិយាល័យគយនិងរដ្ឋាករផែស្ងួត ហុង ឡេងហួរ និងការិយាល័យគយនិងរដ្ឋាករផែស្ងួត តិចស្រ៊ុន។
យោងតាម GDCE ប្រព័ន្ធតាមដានការដឹកជញ្ជូនទំនិញ ដោយប្រើសៀលអេឡិចត្រូនិកនេះ នឹងចាប់ផ្តើមអនុវត្តពីថ្ងៃទី១ ខែមេសា ឆ្នាំ២០២៥ តទៅ។
ប្រធានសមាគមបច្ចេកវិទ្យាឌីជីថលនៃកម្ពុជា លោក ឈិន កេន បានបង្ហាញការគាំទ្រចំពោះការដាក់ឱ្យប្រើប្រាស់សាកល្បងសៀលអេឡិចត្រូនិកដែលនឹងត្រូវយកទៅបំពាក់លើទូរកុងតឺន័រដឹកទំនិញ បន្ថែមពីលើអ្វីដែលមានស្រាប់។
នេះជាវឌ្ឍនភាពថ្មីមួយទៀតក្នុងផ្នែកដឹកជញ្ជូននៅកម្ពុជា ព្រោះសៀលដែលនឹងប្រើប្រាស់នាពេលខាងមុខ គឺមានភាពច្បាស់លាស់ក្នុងការត្រួតពិនិត្យមើលពីលំហូរទំនិញពីកន្លែងមួយទៅកន្លែងមួយ។
លោកបានប្រាប់ភ្នំពេញប៉ុស្តិ៍នៅថ្ងៃទី២៥ ខែមីនាថា៖«ខ្ញុំនាមផ្នែកឯកជន ខ្ញុំសូមគាំទ្រចំពោះការយកសៀលដែលមានលក្ខណៈឌីជីថលនេះមកបន្ថែមមួយតង់ទៀតលើការដឹកជញ្ជូនទំនិញ ជាពិសេសបំពាក់ទៅលើទូរកុងតឺន័រ។ ចំណុចសំខាន់ពាក់ព័ន្ធការបន្ថែមសៀលឌីជីថលនេះ គឺវាជួយបង្ហាញនូវតម្លាភាពបន្ថែមទៀតទាំងក្រុមហ៊ុនដឹកជញ្ជូន ទាំងម្ចាស់ទំនិញ និងតម្លាភាពខាងរដ្ឋាភិបាល ដើម្បីឱ្យប្រាកដថាការដឹកជញ្ជូនតាមផ្លូវមិនមានការបន្លំ រើទំនិញតាមផ្លូវ ឬក៏បន្លំការផ្លាស់ប្តូរទំនិញជាដើម។ នេះជារឿងមួយសំខាន់ ខ្ញុំមើលឃើញថាចរន្តនេះល្អ ដើម្បីពង្រឹងគុណភាព និងប្រសិទ្ធភាពការងាររបស់រាជរដ្ឋាភិបាលផងដែរ»។
លោកលើកឡើងទៀតថា រាជរដ្ឋាភិបាលកម្ពុជាបាននិងកំពុងខិតខំយ៉ាងខ្លាំងក្នុងបង្កើនបរិយាកាសវិនិយោគដ៏ទាក់ទាញមួយនៅកម្ពុជាដើម្បីទាក់ទាញអ្នកវិនិយោគឱ្យចូលមកបណ្តាក់ទុនផ្ទាល់ ឬបញ្ជាទិញទំនិញផលិតនៅកម្ពុជាទៅទីផ្សារអន្តរជាតិកាន់តែច្រើន តាមរយៈការកែសម្រួលច្បាប់វិនិយោគ កសាងហេដ្ឋារចនាសម្ព័ន្ធដឹកជញ្ជូន និងនីតិវិធីជាច្រើនក្នុងការបំពេញឯកសារតាមប្រព័ន្ធឌីជីថល ។
ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា លោក ជា ចាន់ដារ៉ា បាននិយាយថា ការដាក់ឱ្យប្រើសាកល្បងនៃសៀលអេឡិចត្រូនិក នឹងផ្តល់ផលវិជ្ជមានច្រើនសម្រាប់ម្ចាស់ទំនិញ ក៏ដូចជាបង្កភាពងាយស្រួលដល់រដ្ឋាភិបាលក្នុងការគ្រប់គ្រចរាចរណ៍ទំនិញផងដែរ។
លោកនិយាយថា៖«ការដាក់ឱ្យប្រើប្រាស់សាកល្បងសៀលអេឡិចត្រូនិកសម្រាប់តាមដានទំនិញការដឹកជញ្ជូនទំនិញ វាគឹជាវិធីសាស្រ្តរបស់អគ្គនាយកដ្ឋានគយ និងរដ្ឋាករកម្ពុជា ដើម្បីធ្វើឱ្យការព្រប់គ្រងសកម្មភាពដឹកជញ្ជូនទំនិញនៅកម្ពុជាកាន់តែមានប្រសិទ្ធភាព។ តាមរយៈសៀលអេឡិតត្រូនិក គឺគេអាចដឹងថា តើទំនិញនោះទៅដល់ទិសដៅដល់កន្លែងណា? តើការដឹកជញ្ជូនទំនិញនោះត្រូវតាមតម្រាយផ្លូវ ឬអត់? នេះគឺជាវឌ្ឍនភាពមួយដ៏ល្អ ខ្ញុំគិតថាវានឹងជួយធ្វើឱ្យវិស័យដឹកជញ្ជូននៅកម្ពុជាកាន់តែប្រសើរ»៕
