សកម្មភាពក្រុមកម្មការិនីដេរសម្លៀកបំពាក់នៅរោងចក្រមួយកន្លែង ក្នុងរាជធានីភ្នំពេញ។ STPM
ទីផ្សារនាំចេញផលិតផលវាយនភណ្ឌកម្ពុជានឹងត្រូវបានផ្សព្វផ្សាយកាន់តែទូលំទូលាយបន្ថែមទៀត ខណៈនៅចុងខែមីនានេះ ប្រទេសកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូលឧស្សាហកម្មវាយនភណ្ឌពិភពលោក ឆ្នាំ២០២៥ (Cambodia Global Textile Summit 2025)។
បណ្តាញសង្គមរបស់សភាពាណិជ្ជកម្មអឺរ៉ុបប្រចាំនៅកម្ពុជា (Eurocham Cambodia) កាលពីថ្ងៃទី២៥ ខែមីនា ឱ្យដឹងថា ចាប់ពីថ្ងៃទី៣១ ខែមីនា ដល់ថ្ងៃទី១ ខែមេសា ឆ្នាំ២០២៥ កម្ពុជានឹងធ្វើជាម្ចាស់ផ្ទះព្រឹត្តិការណ៍ឧស្សាហកម្មវាយនភណ្ឌពិភពលោក ឆ្នាំ២០២៥ នៅសណ្ឋាគារសូហ្វីតែលភ្នំពេញ។
ព្រឹត្តិការណ៍នេះគឺជាការប្រមូលផ្តុំអ្នកដឹកនាំធុរកិច្ចធំៗ ដៃគូអភិវឌ្ឍន៍ និងម៉ាកយីហោល្បីៗពិភពលោក ដើម្បីពិភាក្សាអំពីអនាគតនៃវិស័យកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ។
Eurocham Cambodia បានឱ្យដឹងទៀតថា ក្នុងព្រឹត្តិការណ៍រយៈពេល ២ ថ្ងៃនេះនឹងមានកិច្ចពិភាក្សា និងការពន្យល់បកស្រាយពីសំណាក់អ្នកជំនាញក្នុងវិស័យវាយនភណ្ឌផងដែរ។
ព្រឹត្តិការណ៍នេះរៀបចំដោយសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC), កម្មវិធី Better Factories Cambodia (BFC) នៃអង្គការ ILO, អង្គការ GIZ និងសហការរៀបចំដោយសភាពាណិជ្ជកម្មអឺរ៉ុប(Eurocham)។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បាននិយាយថា នេះជាមោទនភាពសម្រាប់ប្រទេសកម្ពុជាដែលធ្វើជាម្ចាស់ផ្ទះនៃកិច្ចប្រជុំកំពូលឧស្សាហកម្មវាយនភណ្ឌពិភពលោក ឆ្នាំ២០២៥។
ព្រឹត្តិការណ៍នេះក៏នឹងបង្ហាញពិភពលោកអំពីប្រទេសកម្ពុជា ដែលជាប្រទេសមានសក្តានុពលនៅក្នុងឧស្សាហកម្ម ខណៈកម្ពុជាបាននិងកំពុងកៀរគរវិនិយោគបរទេសកាន់តែច្រើនឱ្យចូលមកបណ្តាក់ទុនផ្ទាល់។
លោកបន្តថា ឧស្សាហកម្មវាយនភណ្ឌនៅកម្ពុជាកំពុងបោះជំហានទៅមុខកាន់តែលឿន។ ការណ៍នេះក៏បានជួយបង្កើតការងារជូនប្រជាពលរដ្ឋ ព្រមទាំងប្រាក់ចំណូលគ្រួសារ និងកំណើនសេដ្ឋកិច្ចជាតិផងដែរ។
លោកបានថ្លែងថា៖«កំណើននេះបង្ហាញឱ្យឃើញថា កម្ពុជាជាប្រទេសមានសុខសន្តិភាព សុវត្ថិភាព ស្ថិរភាព ហើយជាប្រទេសកំពុងមានការអភិវឌ្ឍឧស្សាហកម្ម ជាពិសេសវិស័យឧស្សាហកម្មវាយនភណ្ឌកាត់ដេរដែលបង្ហាញទៅពិភពលោកថា កម្ពុជាគឺជាកន្លែងនៃការវិនិយោគ ជាទីកន្លែងនៃការបង្កើតរោងចក្រ និងផលិតទំនិញសម្រាប់នាំចេញទៅកាន់បណ្តាប្រទេសនានាលើពិភពលោក»។
លោកបន្ថែមថា៖«នេះក៏បង្ហាញផងដែរថាកម្ពុជាកំពុងដើរតួនាទីដ៏សំខាន់ក្នុងការផលិត និងនាំចេញទំនិញសម្រាប់ផ្គត់ផ្គង់ទីផ្សារក្នុងតំបន់ ក្រៅតំបន់ និងពិភពលោកទាំងមូលដែលជាគោលនយោបាយដ៏ល្អរបស់កម្ពុជា។ ព្រឹត្តិការណ៍នេះក៏ជាឱកាសដែលកម្ពុជាបង្ហាញទៅបរទេស និងការសហការជាមួយបរទេស ជាពិសេសនៅក្នុងវិស័យពាណិជ្ជកម្មអន្តរជាតិ។ កម្ពុជាក៏មាន កិច្ចព្រមព្រៀងពាណិជ្ជកម្មសេរីទ្វេភាគី-ពហុភាគីផ្សេងៗ ដើម្បីពង្រីកវិស័យឧស្សាហកម្ម ពាណិជ្ជកម្ម ក៏ដូចជា វិស័យផ្សេងៗទៀតពាក់ព័ន្ធនាំចេញទៅកាន់ពិភពលោក»។
អនុប្រធានសភាពាណិជ្ជកម្មកម្ពុជា លោក លឹម ហេង បានកត់សម្គាល់ថា ការងើបឡើងវិញនៃកំណើនសេដ្ឋកិច្ចសកលពីវិបត្តិបណ្តាលពីជំងឺកូវីដ១៩ ព្រមទាំងវិបត្តិនយោបាយនៅប្រទេសមានមូលដ្ឋានផលិតកម្មក្នុងវិស័យវាយនភណ្ឌធំៗដូចជា មីយ៉ាន់ម៉ា បានជំរុញឱ្យវិស័យវាយនភណ្ឌនៅកម្ពុជា នារយៈពេល ២-៣ឆ្នាំចុងក្រោយនេះបោះជំហានទៅមុខយ៉ាងលឿន ទាំងការចូលមកបើករោងចក្រនៅកម្ពុជា ក៏ដូចជាការបញ្ជាទិញសម្រាប់នាំចេញទៅទីផ្សារអន្តរជាតិ។
លោកបានប្រាប់ភ្នំពេញប៉ុស្តិ៍ថា៖ «នេះជាមូលហេតុធ្វើឱ្យកំណើននៃការនាំចេញវិស័យកាត់ដេរនៅកម្ពុជាកើនឡើង ជាពិសេសបណ្តាប្រទេសនៅសហគមន៍អឺរ៉ុប អាមេរិក និងចក្រភពអង់គ្លេស។ ខ្ញុំជឿថា នាពេលអនាគតវិស័យកាត់ដេរនឹងបោះជំហានទៅមុខកាន់តែល្អបន្ថែមទៀត»។
លោកលើកឡើងទៀតថា ដោយសាររដ្ឋាភិបាលកម្ពុជា និងចិន មានទំនាក់ទំនងល្អជាមួយគ្នា បានធ្វើឱ្យប្រទេសចិន គឺជាប្រភពនៃការផ្គត់ផ្គង់វត្ថុធាតុដើមដ៏ចម្បងរបស់កម្ពុជានៅក្នុងវិស័យវាយនភណ្ឌ។
ទិន្នន័យកត់ត្រាដោយ GDCE បង្ហាញថា ក្នុងឆ្នាំ២០២៤ កម្ពុជាបាននាំចេញផលិតផលវាយនភណ្ឌដែលមានលេខកូដ៍(HS ២ខ្ទង់) ៦១, ៦២, ៦៣ និង ៦៤ ក្នុងទឹកប្រាក់សរុប ១១,៦៨ ពាន់លានដុល្លារ កើនឡើង ២៤,៤ ភាគរយបើធៀបនឹងឆ្នាំ ២០២៣។
ទឹកប្រាក់នាំចេញផលិតផលទាំងអស់ខាងលើ ស្មើនឹង ៤៤,៥៩ ភាគរយនៃចំនួនទឹកប្រាក់នាំចេញសរុបរបស់កម្ពុជា ឆ្នាំ ២០២៤ ដែលមាន ២៦,២ ពាន់លានដុល្លារ។
ប្រភេទទំនិញលេខកូដ៍(HS ២ខ្ទង់) ៦១, ៦២ និង ៦៣ រួមមានសម្លៀកបំពាក់ និងគ្រឿងបន្ទាប់បន្សំ ធ្វើឡើងពីក្រណាត់ ឬមិនធ្វើពីក្រណាត់ និងវត្ថុវាយនភណ្ឌកែច្នៃមួយចំនួនទៀត ចំណែកទំនិញស្ថិតក្នុងលេខកូដ៍ ៦៤ រួមមាន ស្បែកជើង ស្រោមជើង និងវត្ថុប្រហាក់ប្រហែល៕
