កិច្ចពិភាក្សាជាមួយអ្នកសារព័ត៌មាន និងអ្នកជំនាញក្នុងវិស័យហិរញ្ញវត្ថុស្តីអំពី «ការចូលរួមផ្សព្វផ្សាយចំណេះដឹងហិរញ្ញវត្ថុ និងប្រើប្រាស់ឥណទានប្រកបដោយការទទួលខុសត្រូវ» រៀបចំដោយ CBC រួមជាមួយក្លឹបអ្នកកាសែតកម្ពុជា។ រូបថត ថាញ់ រិទ្ធី
ភ្នំពេញ៖ ខណៈពេលដែលកម្ពុជារក្សាបាននូវស្ថិរភាពអត្រាប្តូរប្រាក់ និងអតិផរណាទាបជាង ១ភាគរយគំរូសេដ្ឋកិច្ចតាមរដូវកាលនៅតែបន្តមានឥទ្ធិពលលើតម្លៃប្រាក់រៀល ជាពិសេសក្នុងអំឡុងពេលបុណ្យជាតិ និងកត្ដាតម្រូវការរូបីយប័ណ្ណក្នុងស្រុកដទៃទៀត។
ថ្លែងពេលចូលរួមក្នុងកិច្ចពិភាក្សាជាមួយអ្នកសារព័ត៌មាន និងអ្នកជំនាញក្នុងវិស័យហិរញ្ញវត្ថុស្តីអំពី «ការចូលរួមផ្សព្វផ្សាយចំណេះដឹងហិរញ្ញវត្ថុ និងប្រើប្រាស់ឥណទានប្រកបដោយការទទួលខុសត្រូវ» លោក រ័ត្ន សោភ័ណ ប្រធានក្រុមប្រឹក្សាភិបាលសមាគមធនាគារនៅកម្ពុជា បានបង្ហាញពីការសង្កេតរបស់លោក។
រៀបចំដោយ CBC រួមជាមួយក្លឹបអ្នកកាសែតកម្ពុជា លោក សោភ័ណ្ឌ បានគូសបញ្ជាក់អំពីការប្រែប្រួលរយៈពេលខ្លីនៃប្រាក់រៀលដែលកើតឡើងតាមការព្យាករណ៍ក្នុងអំឡុងពេលជាក់លាក់ ដោយសារការប្រែប្រួលនៃតម្រូវការ។
លោក បានឱ្យដឹងថា សេដ្ឋកិច្ចកម្ពុជាមានអតិផរណាក្រោម ១ភាគរយ និងអត្រាប្ដូរនៅរង្វង់ ៤០០០រៀលក្នុងមួយដុល្លារអាមេរិក។
លោកបានថ្លែងថា៖ «ចំណុចពីរនេះពិតជាសំខាន់ ដែលវាមិនសូវប៉ះពាល់ការរស់នៅប្រចាំថ្ងៃរបស់ប្រជាជន ដោយសារទំនិញអត់ឡើងថ្លៃ ការប្ដូរប្រាក់មិនប្រែច្រើន»។
លោកបានពន្យល់ថា បើធៀបទៅនឹងប្រទេសផ្សេងៗ ដែលលុយដុល្លារឡើងថ្លៃ និងលុយរបស់ប្រទេសនោះធ្លាក់ចុះ អតិផរណាហក់ឡើង។ វាប្រាកដជាប៉ះពាល់ដល់ជីវភាពប្រចាំថ្ងៃ។
អត្រាប្ដូរប្រាក់រវាងលុយរៀល និងដុល្លាររយៈពេលប៉ុន្មានឆ្នាំចុងក្រោយនេះ វាមិនសូវប្រែប្រួលច្រើនលើសពីចន្លោះ ៤០០០រៀល។
លោក សោភ័ណ បានបង្ហាញពីការអង្កេតផ្ទាល់ខ្លួនថា លុយរៀលមានកការឡើងថ្លៃបន្ដិចនៅពេលវេលាជាក់លាក់មួយចំនួន។
លោកបានបញ្ជាក់ថា៖ «លុយរៀលឡើងថ្លៃបន្ដិចអំឡុងពេលនេះ ដោយសារក្រុមហ៊ុនទាំងអស់ត្រូវបង់ពន្ធប្រាក់ចំណេញ ២០ភាគរយ [ជាលុយរៀល]។ នៅអំឡុងបុណ្យចូលឆ្នាំ តម្រូវការលុយរៀលខ្ពស់ រួមទាំងពេលបុណ្យភ្ជុំបិណ្ឌ។ នៅពេលប្រជាកសិករប្រមូលផល លុយខ្មែរក៏ស្ទុះហក់ឡើងផងដែរ»។
យ៉ាងណាមិញ លោក សោភ័ណ បានអះអាងថា វាជាការប្រែប្រួលតិចតួចបំផុតសម្រាប់ប្រទេសកម្ពុជា ដែលមិនមានអ្វីខុសប្រក្រតីនោះទេ។ វាអាចប្រែប្រួលគួរឱ្យកត់សម្គាល់នៅពេលលុយរៀលឡើងដល់ ៣៩០០, ៣៨០០ ឬ ៣៧០០រៀលក្នុងមួយដុល្លារ។
លោកបានបន្ដថា ផ្ទុយទៅវិញ បើសិនបើអត្រាលុយដុល្លារឡើងថ្លៃខ្លាំង វាធ្វើឱ្យសេដ្ឋកិច្ចប៉ះពាល់ច្រើនកម្ពុជាចរាចរណ៍ប្រាក់ដុល្លាររហូតដល់ជិត ៩០ភាគរយ។ ការនាំចេញទំនិញមានតម្លៃថ្លៃ ទេសចរមកលេងកម្ពុជាក៏ត្រូវចំណាយខ្ពស់៕
