ថ្នាក់ដឹកនាំ CDC ធ្វើបទបង្ហាញពីសក្តានុពលវិនិយោគនៅកម្ពុជា ទៅដល់គណៈប្រតិភូធុរជនមកពីរដ្ឋកាលីហ្វ័រញ៉ា សហរដ្ឋអាមេរិក។ CDC
អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា(CDC) លោក ស៊ុន ចាន់ថុល បានអះអាងថា កម្ពុជាកំពុងបន្តខិតខំជំរុញការកែលម្អលើគ្រប់វិស័យដើម្បីធ្វើឱ្យប្រសើរឡើងនូវបរិយាកាសធុរកិច្ច និងបង្កើនសក្តានុពលក្នុងការទាក់ទាញអ្នកវិនិយោគបរទេសឱ្យចូលមកបណ្តាក់ទុនផ្ទាល់កាន់តែច្រើន។
ការលើកឡើងនេះបានធ្វើឡើងនៅទីស្តីការ CDC នាថ្ងៃទី៣ ខែមីនា ក្នុងជំនួបពិភាក្សាការងារ និងការផ្គូផ្គងធុរកិច្ច ជាមួយគណៈប្រតិភូធុរជនមកពីរដ្ឋកាលីហ្វ័រញ៉ា សហរដ្ឋអាមេរិក ដែលដឹកនាំដោយ លោក គីម ឆាហួត អគ្គកុងស៊ុលកិត្តិយសកម្ពុជាប្រចាំនៅរដ្ឋកាលីហ្វ័រនីញ៉ា និងជាប្រធានការិយាល័យតំណាងសភាពាណិជ្ជកម្មកម្ពុជា ប្រចាំរដ្ឋកាលីហ្វ័រនីញ៉ា។
លោក ចាន់ថុល បានលើកឡើងថា ស្ថានភាពសេដ្ឋកិច្ច និងនយោបាយប្រទេសកម្ពុជាកំពុងបោះជំហានទៅមុខកាន់តែល្អ ពិសេសជាមួយនឹងគោលនយោបាយក្នុងការបង្កើនពិពិធកម្មសេដ្ឋកិច្ចសំដៅសម្រេចឱ្យបានចក្ខុវិស័យកម្ពុជា ឆ្នាំ២០៥០ ជាប្រទេសដែលមានចំណូលខ្ពស់។
លោកបន្តថា ក្នុងនាមជាសេនាធិការ និងជាច្រកចេញចូលតែមួយរបស់រាជរដ្ឋាភិបាលលើការងារគ្រប់គ្រងការវិនិយោគឯកជន និងតំបន់សេដ្ឋកិច្ចពិសេស CDC បាននិងកំពុងបន្តខិតខំជំរុញការកែលម្អលើគ្រប់ផ្នែក ដើម្បីធ្វើឱ្យប្រសើរឡើងនូវបរិយាកាសធុរកិច្ច និងការវិនិយោគ ពិសេសការធ្វើឌីជីថលូបនីយកម្ម ក្នុងការផ្តល់សេវាសាធារណៈ។
លោកបញ្ជាក់ថា ជាក់ស្តែងការដាក់ឱ្យប្រើប្រាស់ប្រព័ន្ធគ្រប់គ្រងគម្រោងវិនិយោគកម្ពុជា(ប្រព័ន្ធ cdcIPM) កាលពីពេលថ្មីៗនេះ គឺបានចូលរួមជួយសម្រួលយ៉ាងច្រើនទៅដល់វិនិយោគិនក្នុងការដាក់ពាក្យស្នើសុំវិនិយោគ ដោយគេអាចធ្វើបានពីគ្រប់ទីកន្លែង និងគ្រប់ពេលវេលា តាមរយៈប្រព័ន្ធអ៊ីនធឺណេត។
លោកអះអាងថាថា៖«កម្ពុជាមានសក្តានុពលវិជ្ជមានជាច្រើន ដែលជាបច្ច័យសម្រាប់ពិចារណាក្នុងការមកដាក់ទុនវិនិយោគ ផ្ទាល់ ដែលមានដូចជា ទីតាំងភូមិសាស្រ្តដែលមានអំណោយផលខ្ពស់ និងជាប្រភពនៃថាមពលកកើតឡើងវិញ, មានសុខសន្តិភាព និងស្ថិរភាពនយោបាយល្អ, មានលំនឹងម៉ាក្រូសេដ្ឋកិច្ច, មានកម្លាំងពលកម្មវ័យក្មេងដែលមានលក្ខណៈរួចរាល់សម្រាប់បរិវត្តកម្មឌីជីថល និងបើកទូលាយក្នុងការទទួលយកការបណ្តុះបណ្តាលថ្មីៗ, ការគាំទ្រពីសំណាក់រាជរដ្ឋាភិបាលដល់ការរីកលូតលាស់នៃវិស័យធុរកិច្ចឯកជន តាមរយៈវេទិការាជរដ្ឋាភិបាល-ផ្នែកឯកជន, ច្បាប់ស្តីពីវិនិយោគដែលមានភាពបត់បែន និងអនុគ្រោះខ្ពស់, ហេដ្ឋារចនាសម្ព័ន្ធដឹកជញ្ជូនអន្តរមធ្យោបាយ និងវិស័យភស្តុភារកម្ម ដែលបាននិងកំពុងអភិវឌ្ឍឱ្យកាន់តែមានភាពសម្បូរបែប និងប្រទាក់ក្រឡា ទាំងផ្លូវគោក ផ្លូវទឹក ផ្លូវដែក និងផ្លូវអាកាស សំដៅជំរុញឱ្យសមាហរណកម្មនៅទូទាំងប្រទេស និងទៅកាន់តំបន់មានភាពប្រសើរឡើង»។
ជាការឆ្លើយតប គណៈប្រតិភូធុរជនរដ្ឋកាលីហ្វ័រញ៉ា បានបង្ហាញការកោតសរសើរ និងសម្តែងនូវចំណាប់អារម្មណ៍ខ្ពស់លើការរីកចម្រើនគួរឱ្យកត់សម្គាល់របស់កម្ពុជា ព្រមទាំងបានវាយតម្លៃខ្ពស់ចំពោះការយកចិត្តទុកដាក់របស់រាជរដ្ឋាភិបាល ក៏ដូចជា CDC ក្នុងការសម្របសម្រួល និងថែទាំគាំទ្រដល់វិស័យឯកជន ព្រមទាំងបានបង្ហាញឆន្ទៈក្នុងការពិនិត្យលទ្ធភាពដើម្បីពង្រឹងកិច្ចសហប្រតិបត្តិការទ្វេភាគីរវាងរដ្ឋកាលីហ្វ័រញ៉ា និងកម្ពុជា ជាពិសេសលើទំនាក់ទំនងសេដ្ឋកិច្ច និងការវិនិយោគ។
យោងតាមសមាគមឧកញ៉ាកម្ពុជា ក្រុមហ៊ុនទាំង ២០ ដែលមកពីរដ្ឋកាលីហ្វ័រញ៉ា មានមកពីចម្រុះវិស័យដូចជា កសិកម្ម, អប់រំ, ដឹកជញ្ជូននិងភ័ស្តុភារ, ថាមពល, បច្ចេកវិទ្យាព័ត៌មាន, ទេសចរណ៍និងបដិសណ្ឋារកិច្ច, សេវាកម្មច្បាប់និងពន្ធដារ, សុខាភិបាល, ធនាគារនិងហិរញ្ញវត្ថុ, ធានារ៉ាប់រង, អចលនទ្រព្យ, សំណង់, វិស្វកម្ម, អាហារនិងភេសជ្ជៈ។
អ្នកសេដ្ឋកិច្ចនៅរាជមព្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី៣ ខែមីនា ថា ដំណើរទស្សនកិច្ចរបស់គណៈប្រតិភូប្រតិភូធុរជនរដ្ឋកាលីហ្វ័រញ៉ា មកកាន់ប្រទេសកម្ពុជានឹងផ្តល់ផលវិជ្ជមានសម្រាប់សេដ្ឋកិច្ចកម្ពុជា ព្រោះតិច ឬច្រើនអ្នកវិនិយោគទាំងនោះបានមកឃើញផ្ទាល់ពីភាពរីកចម្រើននៅកម្ពុជា ក៏ដូចជាយល់ដឹងកាន់តែច្បាស់ពីលក្ខណៈអំណោយផលនៃច្បាប់វិនិយោគកម្ពុជា។
តាមរយៈដំណើរទស្សនកិច្ចនេះក៏អាចមានក្រុមហ៊ុនអាមេរិកខ្លះ ចាប់ដៃគូសហការជាមួយវិនិយោគិនកម្ពុជាដើម្បីបណ្តាក់ទុនរួមគ្នាផងដែរ។
លោកនិយាយថា៖«ការធ្វើដំណើរមកពិនិត្យមើលស្ថានភាព និងពិភាក្សាដោយផ្ទាល់ គឺប្រាកដជាមានប្រសិទ្ធភាពជាងការផ្សព្វផ្សាយបន្ត ហេតុនេះតិច ឬច្រើន គឺកម្ពុជានឹងទទួលបានផលចំណេញ។ ការបណ្តាក់ទុននៅកម្ពុជានឹងទទួលបានផលចំណេញច្រើនសម្រាប់វិនិយោគិន ព្រោះកម្ពុជាមានច្បាប់វិនិយោគអំណោយផល មានទីផ្សារនាំចេញច្រើនគោលដៅ និងជាពិសេសកម្ពុជាមានកិច្ចព្រមព្រៀងពាណិជ្ជកម្ម និងប្រព័ន្ធអនុគ្រោះពន្ធសម្រាប់ការនាំទំនិញទៅកាន់ប្រទេសជាច្រើនលើពិភពលោក»៕
