ទិដ្ឋភាពភ្ញៀវជាតិ និងអន្តរជាតិនៅក្នុងអាកាសយានដ្ឋានអន្តរជាតិភ្នំពេញ។ ហ៊ឹន ពិសី
ក្រុមអ្នកជំនាញក្នុងវិស័យទេសចរណ៍បានលើកឡើងថា ការបើកជើងហោះហើររបស់ក្រុមហ៊ុនអាកាសចរណ៍តួកគី Turkish Airlines ពីទីក្រុងអ៊ីស្តង់ប៊ុល(ប្រទេសតួតគី) មកកាន់រាជធានីភ្នំពេញនៅចុងឆ្នាំ ២០២៥ នេះនឹងចូលរួមចំណែកយ៉ាងច្រើនក្នុងការជួយលើកកម្ពស់វិស័យទេសចរណ៍នៅកម្ពុជា ព្រមទាំងបង្កបរិយាកាសនៃធ្វើដំណើរឱ្យកាន់តែងាយស្រួលសម្រាប់វិនិយោគិននានាដែលចង់មកបណ្តាក់ទុនផ្ទាល់ ឬស្វែងរកធ្វើពាណីជ្ជកម្មជាមួយកម្ពុជា។
ក្រុមហ៊ុនអាកាសចរណ៍ Turkish Airlines កាលពីថ្ងៃទី៣ ខែមីនា បានចេញសេចក្តីប្រកាសព័ត៌មានមួយដែលមានខ្លឹមសារថា Turkish Airlines នឹងចាប់ផ្តើមហោះហើរពីទីក្រុងអ៊ីស្តង់ប៊ុល ទៅកាន់រាជធានីភ្នំពេញនៃប្រទេសកម្ពុជា នៅថ្ងៃទី១០ ខែធ្នូ ឆ្នាំ ២០២៥។
ជាមួយនឹងទិសដៅថ្មីនេះ កម្ពុជានឹងក្លាយជាប្រទេសទី ៧ ក្នុងតំបន់អាស៊ីអាគ្នេយ៍ដែលក្រុមហ៊ុនអាកាសចរណ៍របស់តួកគីផ្តល់សេវាកម្មហោះហើរ ហើយភ្នំពេញនឹងក្លាយជាទីក្រុងទី១១ ក្នុងតំបន់នេះ។
សេចក្តីប្រកាសព័ត៌មានឱ្យដឹងទៀតថា៖«ការហោះហើរនេះត្រូវបានរំពឹងថា នឹងជំរុញទំនាក់ទំនងពាណិជ្ជកម្មទ្វេភាគីរវាងតួកគី និងកម្ពុជា ព្រមទាំងចូលរួមជំរុញកំណើនសេដ្ឋកិច្ចរវាងទិសដៅថ្មីនៃក្រុមហ៊ុនអាកាសចរណ៍ផងដែរ។ ផ្លូវហោះហើរនេះនឹងពង្រីកបណ្តាញអាកាសចរណ៍របស់ Turkish Airlines នៅតំបន់អាស៊ីខាងកើតទៅទីក្រុង ២០ និងអាកាសយានដ្ឋាន ២១។ ផ្លូវហោះហើរថ្មីនេះនឹងផ្តល់ភាពងាយស្រួលជាងមុនដល់ភ្ញៀវរបស់ Turkish Airlines ក្នុងការធ្វើដំណើរទៅទីក្រុងសំខាន់មួយនៅតំបន់នេះ។ លើសពីនេះ ក្រុមហ៊ុនអាកាសចរណ៍ Turkish Airlines នឹងបង្ហាញបន្ថែមទៀតអំពីបណ្តាញតភ្ជាប់ធំបំផុតរបស់ខ្លួនជាក្រុមហ៊ុនអាកាសចរណ៍អឺរ៉ុបតែមួយគត់ ដែលផ្តល់សេវាហោះហើរទៅទីនោះ»។
យោងតាម Turkish Airlines ការហោះហើរទៅភ្នំពេញ នឹងមានការចុះចតនៅទីក្រុងបាងកក ប្រទេសថៃ។ ការហោះហើរ នឹងមានចំនួន ៣ ដងក្នុង ១ សប្តាហ៍ គឺចេញពីទីក្រុងអ៊ីស្តង់ប៊ុលទៅភ្នំពេញនៅថ្ងៃពុធ សុក្រ និងថ្ងៃអាទិត្យ ចំណែកការហោះហើរចេញពីរាជធានីភ្នំពេញទៅអ៊ីស្តង់ប៊ុល នឹងប្រតិបត្តិការនៅថ្ងៃចន្ទ ព្រហស្បតិ៍ និងថ្ងៃសៅរ៍។
ប្រធានក្រុមប្រឹក្សាភិបាល ក្រុមហ៊ុន Turkish Airlines លោក Ahmet Bolat បានឱ្យដឹងថា៖«ក្នុងនាមជាក្រុមហ៊ុនអាកាសចរណ៍តួកគី យើងបន្តពង្រីកបណ្តាញរបស់យើងនៅក្នុងតំបន់អាស៊ី និងពង្រឹងការផ្សារភ្ជាប់របស់យើងជាមួយនឹងគោលដៅយុទ្ធសាស្ត្រនៅក្នុងតំបន់។
ការដាក់ឱ្យដំណើរការជើងហោះហើរទៅភ្នំពេញ ជាការបោះជំហានទៅមុខយ៉ាងសំខាន់ក្នុងគោលដៅនេះ។ ជើងហោះហើររបស់យើងទៅកាន់ប្រទេសកម្ពុជា នឹងបង្កើតឱកាសថ្មីសម្រាប់ទាំងទេសចរណ៍ និងអាជីវកម្ម។
លើសពីនេះ ក្នុងនាមជាក្រុមហ៊ុនអាកាសចរណ៍អឺរ៉ុបតែមួយគត់ ដែលហោះហើរទៅកាន់គោលដៅនេះ យើងនឹងពង្រឹងភាពជាអ្នកដឹកនាំរបស់យើងបន្ថែមទៀតនៅក្នុងតំបន់»។
ទិន្នន័យក្រសួងទេសចរណ៍ ឱ្យដឹងថា ក្នុងឆ្នាំ២០២៤ ជនជាតិតួកគីដែលធ្វើដំណើរមកកម្ពុជាមានចំនួនសរុប ៨ ៣៦៣ នាក់ កើនឡើង ៥១,៧ភាគរយបើធៀបនឹងឆ្នាំ២០២៣។ ក្នុងចំនួននេះ គឺភ្ញៀវទេសចរ មានចំនួន ៦ ៤៦៨នាក់ និង១ ៨៩៥នាក់ ទៀតជាអ្នកជំនួញ។
លោក ស សារិន នាយកគ្រប់គ្រងអាជីវកម្ម នៃក្រុមហ៊ុនទេសចរណ៍ ភី ធី អឹម និងជាស្ថាបនិក និងជានាយកប្រតិបត្តិក្រុមហ៊ុន Tovtrip បានប្រាប់ភ្នំពេញប៉ុស្តិ៍ ក្នុងថ្ងៃទី៤ ខែមីនា ថា ការបើកជើងហោះហើរនេះនឹងផ្តល់ផលវិជ្ជមានច្រើនសម្រាប់ប្រទេសកម្ពុជា ព្រោះប្រទេសតួកគី មានជើងហោះហើរជាច្រើនតភ្ជាប់ទៅប្រទេសជាច្រើនលើពិភពលោក។
ការបើកជើងហោះហើរនេះនឹងនាំមកទាំងភ្ញៀវទេសចរ និងអ្នកវិនិយោគ ព្រមទាំងជួយធ្វើឱ្យសកម្មភាពនៃការផ្លាស់ប្តូរទំនិញមានកាន់តែច្រើនផងដែរ។
លោកបានថ្លែងថា៖«ខ្ញុំគិតថានេះជាចំណុចចាប់ផ្តើមដ៏ល្អក្នុងការនាំយកភ្ញៀវទេសចរ និងអ្នកវិនិយោគបន្ថែមពីប្រទេសតួកគី និងបណ្តាប្រទេសនៅតំបន់អឺរ៉ុប និងតំបន់មជ្ឈឹមបូព៌ាមកប្រទេសកម្ពុជាកាន់តែច្រើន។ ក្រៅពីវិស័យទេសចរណ៍ ការភ្ជាប់ជើងហោះហើរនេះក៏នឹងជួយធ្វើឱ្យទំនាក់ទំនងពាណិជ្ជកម្មកើនឡើងផងដែរ»។
លោកប្រាប់ទៀតថា បច្ចុប្បន្នក្រុមហ៊ុនរបស់លោកក៏មានរៀបចំដំណើរកម្សាន្តទៅប្រទេសតួកគីផងដែរ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បាននិយាយថា ការសម្រេចរបស់ Turkish Airlines ក្នុងការបើកជើងហោះហើរមកកម្ពុជានៅចុងឆ្នាំនេះ គឺជាព័ត៌មានល្អសម្រាប់វិស័យទេសចរណ៍កម្ពុជា ខណៈ Turkish Airlines គឺជាក្រុមហ៊ុនដ៏ធំ និងមានឈ្មោះថ្មីលើពិភពលោក។
លោកស្រីបន្តថា នៅពេលក្រុមហ៊ុនសម្រេចបើកជើងហោះទៅកាន់គោលដៅណាមួយ គេនឹងធ្វើការផ្សព្វផ្សាយយ៉ាងទូលំទូលាយដើម្បីទាក់ទាញអតិថិជនឱ្យធ្វើដំណើរទៅកម្សាន្តនៅទីនោះ ដូច្នេះនេះជាចំណែកមួយក្នុងការជួយផ្សព្វផ្សាយពីសក្តានុពលវិស័យទេសចរណ៍នៅកម្ពុជា។
លោកស្រីនិយាយថា៖«តួកគី ជាប្រទេសធំ មានប្រជាជនច្រើន និងមានសេដ្ឋកិច្ចរីកចម្រើន ដូច្នេះយើងរំពឹងថា តាមរយៈការបើកជើងហោះហើររបស់ក្រុមហ៊ុន Turkish Airlines នឹងមានភ្ញៀវទេសចរបរទេសកាន់តែច្រើនធ្វើដំណើរមកកម្សាន្តនៅកម្ពុជា»។
នាយករដ្ឋមន្ត្រីកម្ពុជា លោក ហ៊ុន ម៉ាណែត បានបង្ហាញការសាទរចំពោះកំណើននៃការតភ្ជាប់ និងបង្កើនជើងហោះហើររបស់ក្រុមហ៊ុនអាកាសចរណ៍នានាមកកាន់ប្រទេសកម្ពុជា ដោយលោកបានសរេសរនៅលើបណ្តាញសង្គមផ្ទាល់ខ្លួនផ្លូវការ កាលពីរសៀលថ្ងៃទី៤ ខែមីនា ថា ក្រោមកិច្ចសហការ និងការជំរុញបើកចំហជើងមេឃកម្ពុជាក្នុងការទទួលយកភ្ញៀវជាតិ អន្តរជាតិ និងអ្នកធុរកិច្ចមកកាន់កម្ពុជាកាន់តែសកម្ម និងប្រទាក់ក្រឡាជាមួយចក្ខុវិស័យវែងឆ្ងាយរបស់ជាតិ រដ្ឋលេខាធិការដ្ឋានអាកាសចរណ៍ស៊ីវិល បានបន្តពង្រីក និងលើកកម្ពស់បន្ថែមជើងហោះហើរត្រង់មកកម្ពុជា ដែលជាលទ្ធផលថ្មីសម្រេចបាន គឺទី១ ជើងហោះហើរ Turkish Airlines នឹងបើកការហោះហើរពីទីក្រុងអ៊ីស្តង់ប៊ុល មកកាន់រាជធានីភ្នំពេញ នៅចុងឆ្នាំ២០២៥ និងទី២ ជើងហោះហើរ Emirates នឹង ពង្រីកការហោះហើរមកកម្ពុជា ពីទីក្រុងឌូបៃទៅខេត្តសៀមរាប នាពាក់កណ្តាលឆ្នាំ២០២៥។
លោកអះអាងថា៖«ការដឹកជញ្ជូនតាមផ្លូវអាកាស ត្រូវបានចាត់ទុកថា ជាកត្តាផលិតកម្មយុទ្ធសាស្ត្រមួយដ៏សំខាន់នៃដំណើរការអភិវឌ្ឍន៍សេដ្ឋកិច្ច-សង្គម តាមរយៈការជួយសម្រួលដល់ការធ្វើដំណើរ ការដឹកជញ្ជូនទំនិញក្នុងរយៈពេលខ្លីនិងសុវត្ថិភាពខ្ពស់ ការជំរុញសកម្មភាពពាណិជ្ជកម្ម និងទេសចរណ៍ ការលើកកម្ពស់ទំនាក់ទំនងសង្គម និងបានចូលរួមចំណែកបង្កើនចំណូលថវិកាជាតិ»។
យោងតាមរដ្ឋលេខាធិការដ្ឋានអាកាសចរស៊ីវិល នៅក្នុងឆ្នាំ ២០២៤ ការដឹកជញ្ជូនតាមផ្លូវអាកាសនៅកម្ពុជា បានសម្រេចដឹកជញ្ជូនអ្នកដំណើរតាមផ្លូវអាកាសបានសរុបចំនួន ៦,២៤ លាននាក់ កំណើនប្រមាណ ២២ភាគរយ ទទួលបានជើងហោះហើរសរុបចំនួន ៥៨ ៣៥៤ ជើង កំណើន ១៤ភាគរយ និងដឹកទំនិញតាមផ្លូវអាកាសមានចំនួន ៧៧ ៨៥២ តោន ដែលមានកំណើន ៤០ភាគរយ បើប្រៀបធៀបទៅនឹងរយៈពេលដូចគ្នា ក្នុងឆ្នាំ២០២៣។
ក្នុងឆ្នាំ២០២៥ កម្ពុជា មានក្រុមហ៊ុនអាកាសចរណ៍ជាតិ និងអន្តរជាតិចំនួន៣១ ដែលកំពុងហោះហើរចេញ-ចូលព្រះរាជាណាចក្រកម្ពុជា គិតជាមធ្យម មានជើងហោះហើរទ្វេទិស (Flight Movements) ចំនួន ១ ៣២៤ជើងក្នុងមួយសប្តាហ៍ ដោយនៅក្នុងនោះ ជើងហោះហើរទ្វេទិស (Flight Movements) នៅអាកាសយានដ្ឋានអន្តរជាតិភ្នំពេញចំនួន ៩៤២ជើង អាកាសយានដ្ឋានអន្តរជាតិសៀមរាបអង្គរ ៣៤៦ជើង និងអាកាសយានដ្ឋានអន្តរជាតិខេត្តព្រះសីហនុ ៣៦ជើង៕
