ការតាំងបង្ហាញរថយន្ត BYD។ សហការី
ចំនួននៃការប្រើប្រាស់រថយន្តអគ្គិសនីនៅកម្ពុជានឹងហក់ឡើងខ្ពស់បន្ថែមទៀតនៅចុងឆ្នាំនេះ ខណៈប្រតិបត្តិការរបស់រោងចក្រដំឡើងរថយន្ត BYD នៅកម្ពុជា គ្រោងនឹងចាប់ផ្តើមនៅចុងឆ្នាំ ២០២៥។
ក្នុងជំនួបរវាងថ្នាក់ដឹកនាំនៃក្រុមប្រឹក្សាអភិវឌ្ឍន៍កម្ពុជា (CDC) ជាមួយគណៈប្រតិភូក្រុមហ៊ុន BYD Auto Industry Co., Ltd. ដែលដឹកនាំដោយលោក Xiao Haiping នាយកប្រតិបត្តិនៃការិយាល័យប្រធានសម្ព័ន្ធក្រុមហ៊ុន BYD នៅទីស្តីការរបស់ CDC កាលពីថ្ងៃទី១០ ខែមេសា លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ CDC បានសម្តែងក្តីសោមនស្សរីករាយចំពោះថ្នាក់ដឹកនាំក្រុមហ៊ុន BYD ដែលបានជ្រើសរើសប្រទេសកម្ពុជាធ្វើជាមូលដ្ឋានសម្រាប់រោងចក្រដំឡើងរថយន្ត BYD មួយបន្ថែមទៀតនៅក្នុងតំបន់អាស៊ីអាគ្នេយ៍។ រោងចក្រដំឡើងរថយន្តរបស់ BYD នៅកម្ពុជាអាចនឹងចាប់ផ្តើមដំណើរការនៅត្រីមាសទី៤ ខាងមុខ។
លោកបន្តថា ក្នុងនាមជាសេនាធិការច្រកចេញចូលតែមួយរបស់រាជរដ្ឋាភិបាល គឺក្រុមប្រឹក្សាអភិវឌ្ឍន៍កម្ពុជា តែងតែត្រៀមលក្ខណៈក្នុងការសម្របសម្រួលរាល់គ្រប់កិច្ចការងារវិនិយោគរបស់ផ្នែកឯកជននៅកម្ពុជា សំដៅធានាបាននូវបរិយាកាសវិនិយោគ ប្រកបដោយភាពបត់បែន អំណោយផល និងអនុគ្រោះបំផុត។
លោកនិយាយទៀតថា និន្នាការនៃការប្រើប្រាស់រថយន្តថ្មីរបស់ក្រុមហ៊ុន BYD នៅកម្ពុជាកំពុងកើនឡើង។
លោកបានថ្លែងថា៖«បន្ទាប់ពីរោងចក្រដំឡើងរថយន្តអគ្គិសនីសាងសង់រួចរាល់ និងដាក់ឱ្យប្រតិបត្តិការជាផ្លូវការនៅអំឡុងត្រីមាសទី៤ ឆ្នាំ ២០២៥ នេះ អត្រានៃការប្រើប្រាស់រថយន្ត BYD នៅកម្ពុជានឹងមានការកើនឡើងផងដែរ»។
បើតាមថ្នាក់ដឹកនាំក្រុមហ៊ុន BYD នៅចុងខែមេសា នេះ ក្រុមហ៊ុននឹងរៀបចំធ្វើពិធីបញ្ចុះបឋមសិលាបើកការដ្ឋានសាងសង់រោងចក្រដំឡើងរថយន្តអគ្គិសនីរបស់ខ្លួននៅក្នុងប្រទេសកម្ពុជា។
រោងចក្រដំឡើងរថយន្តរបស់ BYD មានទីតាំងស្ថិតក្នុងតំបន់សេដ្ឋកិច្ចពិសេសក្រុងព្រះសីហនុ ដែលជាទីតាំងមានភាពងាយស្រួលសម្រាប់ការដឹកជញ្ជូនគ្រឿងបង្គុំផ្សេងៗ។ រោងចក្រនេះមានទុនវិនិយោគជាង ៣០ លានដុល្លា ជាមួយនឹងសមត្ថភាពផលិតរថយន្តបាន ១ម៉ឺនគ្រឿងនៅក្នុង ១ ឆ្នាំ។
កាលពីពេលថ្មីៗនេះ 𝗕𝗬𝗗 ក៏បាននាំចូលរថយន្តម៉ូឌែលថ្មីរបស់ខ្លួនចូលទីផ្សារប្រទេសកម្ពុជាផងដែរ ដូចជា 𝗕𝗬𝗗 𝗦𝗘𝗔𝗟𝗜𝗢𝗡 𝟱 និង 𝗕𝗬𝗗 𝗔𝗧𝗧𝗢 𝟮 ដែលជារថយន្តមិនត្រឹមតែមានគុណភាពខ្ពស់ បច្ចេកវិទ្យាទំនើប និងសន្សំសំចៃខ្លាំងនោះទេ ហើយតម្លៃពិតជាស័ក្តិសមបំផុតសម្រាប់ប្រជាជនកម្ពុជាផងដែរ។
លោកនាយករដ្ឋមន្ត្រី ហ៊ុន ម៉ាណែត កាលពីខែមិថុនា ឆ្នាំ២០២៤ បានប្រកាសចាត់ទុកការឈានជើងចូលរបស់ក្រុមហ៊ុន BYD មកបង្កើតរោងចក្រដំឡើងនៅកម្ពុជា គឺជាជោគជ័យមួយរបស់រាជរដ្ឋាភិបាលកម្ពុជាក្នុងការទាក់ទាញអ្នកវិនិយោគលំដាប់អន្តរជាតិឱ្យចូលមកបោះទុនវិនិយោគនៅកម្ពុជា។
ក្រសួងសាធារណការ និងដឹកជញ្ជូន បានឱ្យដឹងថា ចំនួននៃការចុះបញ្ជីយានយន្តអគ្គិសនី(EVs) នៅកម្ពុជាបានកើនឡើងយ៉ាងច្រើន។ ក្នុងឆ្នាំ២០២៤ មានរថយន្ត EV ដែលចុះបញ្ជីសរុបចំនួន ២ ២៥៣ គ្រឿង កើនឡើង ៦២០ ភាគរយបើធៀបនឹងឆ្នាំ២០២៣ ដែលបានចុះបញ្ជីរថយន្ត EV ថ្មីចំនួន ៣១៣ គ្រឿង។
របាយការណ៍របស់ក្រសួងបានបង្ហាញទៀតថា ម៉ាករថយន្ត EV ដែលពេញនិយមបំផុតនៅក្នុងប្រទេសកម្ពុជា មានដូចជា BYD, Toyota និង Tesla។
នៅកម្ពុជាបច្ចុប្បន្នមានរោងចក្រដំឡើងរថយន្តចំនួន ៦ កំពុងដំណើរការដូចជា រថយន្ត Ford, Sangyong, Hyundai, Kia, GTV, និងក្រុមហ៊ុន Toyota៕
