សកម្មភាពកម្មករកំពុងបញ្ជាគ្រឿងម៉ាស៊ីននៅក្នុងរោងចក្រមួយកន្លែង។ សហការី
ទំហំពាណិជ្ជកម្មទ្វេភាគីកម្ពុជា-ចិន ក្នុងត្រីមាសទី១ ឆ្នាំ២០២៥ មានទឹកប្រាក់សរុបជាង ៤ ពាន់លានដុល្លារ(អាមេរិក) កើនប្រមាណ ១/៤ ដងបើធៀបនឹងត្រីមាសទី១ ឆ្នាំ២០២៤ ដោយក្នុងនោះទំនិញចិននាំមកកម្ពុជាមានទឹកប្រាក់រហូតដល់ជាង ៣,៧ ពាន់លានដុល្លារ ដែលធ្វើឱ្យជញ្ជីងពាណិជ្ជកម្មរបស់កម្ពុជាមានឱនភាពរហូតដល់ជាង ៩១ ភាគរយ។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងត្រីមាសទី១ ឆ្នាំ២០២៥ ការនាំចូល នាំចេញទំនិញរវាងប្រទេសកម្ពុជា និងចិន មានទឹកប្រាក់សរុប ៤ ០៦៨,៦ លានដុល្លារ កើនឡើង ២៦,៧ ភាគរយបើធៀបនឹងឆ្នាំ ២០២៤ ដែលមានចំនួន ៣ ២១០,២៣ លានដុល្លារ។
ចំនួនទឹកប្រាក់នៃពាណិជ្ជកម្មទ្វេភាគីរវាងកម្ពុជា-ចិន បានគ្របដណ្តប់ជិត ៣០ភាគរយនៃទំហំពាណិជ្ជកម្មអន្តរជាតិរបស់កម្ពុជាក្នុងត្រីមាសទី ១ ឆ្នាំ២០២៥ ដែលមានទឹកប្រាក់ ១៤ ៤៤៩,១៦លានដុល្លារ។
ក្នុងចំនួននេះ គឺទំនិញកម្ពុជានាំទៅប្រទេសចិន ៣៤៨,១៩ លានដុល្លារ ថយចុះ ៤,៩ ភាគរយ ចំណែកទំនិញចិននាំចូល ៣ ៧២០,៤១ លានដុល្លារ កើន ៣០,៨ ភាគរយ។
ផ្អែកតាមទិន្នន័យខាងលើ គឺជញ្ជីងពាណិជ្ជកម្មកម្ពុជា មានឱនភាពរហូតដល់ ៩១,៤៤ភាគរយ ដែលស្មើនឹងទឹកប្រាក់ ៣ ៣៧២,២២ លានដុល្លារ ខណៈកាលពីឆ្នាំ ២០២៤ មានត្រឹមតែ ២ ៤៤៤,៨៥ លានដុល្លារ។
បញ្ហាឱនភាពជញ្ជីងពាណិជ្ជកម្មនេះ ត្រូវបានប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី៣ ខែមេសា(ម៉ោងនៅអាមេរិក) បានប្រកាសយកពន្ធពីទំនិញកម្ពុជានាំចូលទៅអាមេរិកចំនួន ៤៩ ភាគរយ ដោយសារតែជញ្ជីងពាណិជ្ជកម្មរបស់អាមេរិក មានឱនភាពប្រមាណ ៩៧ភាគរយ ជាមួយកម្ពុជា។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍កាលពីសប្តាហ៍មុនថា ក្នុងនាមជាប្រទេសក្នុងទ្វីបអាស៊ីដែលមានទំនាក់ទំនងការទូត និងនយោបាយល្អជាមួយគ្នា ព្រមទាំងមានកិច្ចព្រមព្រៀងពាណិជ្ជកម្មសេរីទ្វេភាគី(FTA)ជាមួយគ្នា បាននាំឱ្យការធ្វើពាណិជ្ជកម្មរវាងប្រទេសទាំង ២ កើនឡើងជាបន្តបន្ទាប់ ជាពិសេសលំហូរទំនិញយ៉ាងច្រើនពីប្រទេសចិនមកកម្ពុជា។
មូលហេតុដែលមានលំហូរទំនិញពីចិនច្រើន គឺដោយសារប្រទេសចិនមានមូលដ្ឋានផលិតវត្ថុធាតុដើម និងគ្រឿងផ្សំ ដែលជាតម្រូវការរបស់រោងចក្រ/សហគ្រាសនៅកម្ពុជា ដូចជា ក្រណាត់ អំបោះ និងវត្ថុធាតុដើមជាច្រើនទៀត។
លោកបន្តទៀតថា ចរន្តនៃលំហូរពាណិជ្ជកម្មពីចិនមកកម្ពុជានឹងបន្តមានច្រើនបន្ថែមទៀតនៅពេលខាងមុខ។
លោកបានថ្លែងថា៖«បើយើងមើលទៅជញ្ជីងពាណិជ្ជកម្ម គឺកម្ពុជាពិតជាមានឱនភាពច្រើន ប៉ុន្តែចំណុចនេះវាមិនមែនជាក្តីបារម្ភនោះទេ ព្រោះផលិតផលដែលកម្ពុជានាំចូលមកពីប្រទេសចិន គឺភាគច្រើនត្រូវបានយកទៅចូលក្នុងរោងចក្រ/សហគ្រាសដើម្បីកែច្នៃសម្រាប់នាំចេញទៅលក់បន្តនៅទីផ្សារប្រទេសផ្សេងៗទៀត»។
ទោះយ៉ាងណា លោកក៏បានជំរុញឱ្យរដ្ឋាភិបាល និងផ្នែកឯកជននៅកម្ពុជា ត្រូវខិតខំរិះរក និងសិក្សាស្រាវជ្រាវរកទំនិញសក្តានុពលរបស់ខ្លួនសម្រាប់នាំចេញទៅប្រទេសចិន និងប្រទេសផ្សេងៗទៀតឱ្យបានកាន់តែច្រើនបន្ថែមទៀត។
ក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី១១ ខែមេសា បានឱ្យដឹងថា ប្រធានាធិបតីនៃសាធារណរដ្ឋ ប្រជាមានិតចិន លោក ស៊ី ជីនពីង នឹងអញ្ជើញមកបំពេញទស្សនកិច្ចផ្លូវរដ្ឋនៅកម្ពុជាចាប់ពីថ្ងៃទី១៧-១៨ ខែមេសា ឆ្នាំ២០២៥។
បើតាមក្រសួងការបរទេស ដំណើរទស្សនកិច្ចផ្លូវរដ្ឋនេះជាព្រឹត្តិការណ៍ដ៏សំខាន់ដែលនឹងធ្វើឱ្យកាន់តែរឹងមាំថែមទៀត នូវចំណងមិត្តភាពជាប្រពៃណីដែលត្រូវបានកសាងឡើងដោយថ្នាក់ដឹកនាំជាបន្តបន្ទាប់នៃប្រទេសទាំងពីរ។
ទស្សនកិច្ចនេះក៏នឹងបង្កើនសារៈសំខាន់បន្ថែមទៀតដល់ចំណងមិត្តភាពដែកថែប និងភាព ជាដៃគូយុទ្ធសាស្ត្រគ្រប់ជ្រុងជ្រោយ រវាងប្រជាជាតិទាំងពីរ។
បន្ថែមពីនេះ ក៏មានឯកសារជាច្រើន ដែលរំពឹងថានឹងត្រូវបានចុះហត្ថលេខា ក្នុងឱកាសទស្សនកិច្ចនេះ ដើម្បីលើកកម្ពស់កិច្ចសហប្រតិបត្តិការក្នុងវិស័យនានាផងដែរ។
ទិន្នន័យរបស់ GDCE ឱ្យដឹងថា ក្នុងឆ្នាំ ២០២៤ ការនាំចូល នាំចេញទំនិញរវាងប្រទេសកម្ពុជា និងចិន មានទឹកប្រាក់សរុប ១៥,១៩ ពាន់លានដុល្លារ កើន ២៣,៨ ភាគរយបើធៀបនឹងឆ្នាំ ២០២៣។ ក្នុងចំនួននេះ គឺទំនិញចិននាំមកកម្ពុជា មានចំនួន ១៣,៤៤ ពាន់លានដុល្លារ កើនឡើង ២៤,៦ ភាគរយ ចំណែកទំនិញកម្ពុជានាំទៅប្រទេសចិន ១,៧៥ ពាន់លានដុល្លារ កើន ១៨,៤ ភាគរយ៕
