ភ្ញៀវទេសចរចិន ដើរទស្សនាព្រះបរមរាជវាំង នាពេលកន្លងមក។ ភ្នំពេញប៉ុស្ដិ៍
ផ្នែកឯកជនក្នុងវិស័យទេសចរណ៍កម្ពុជា មានសុទិដ្ឋិនិយមថាចំនួនភ្ញៀវទេសចរចិន និងការវិនិយោគក្នុងវិស័យទេសចរណ៍នៅកម្ពុជាពីសំណាក់វិនិយោគិនចិន នឹងមានសម្ទុះឡើងបន្ថែមទៀត បន្ទាប់ពីដំណើរទស្សនកិច្ចផ្លូវការរបស់ប្រធានាធិបតីចិន លោក ស៊ី ជិនពីង មកកម្ពុជា។
ប្រធានាធិបតីចិន លោក ស៊ី ជិនពីង និងគណៈប្រតិភូរដ្ឋាភិបាលចិន ព្រមទាំងផ្នែកឯកជនចិនជាច្រើនរូបបានធ្វើទស្សនកិច្ចផ្លូវការក្នុងប្រទេសកម្ពុជារយៈពេល ២ ថ្ងៃចាប់ពីថ្ងៃទី១៧-១៨ ខែមេសា ឆ្នាំ២០២៥។ ក្នុងដំណើរទស្សនកិច្ចនេះមានឯកសារចំនួន ៣៧ ត្រូវបានចុះហត្ថលេខាក្រោមអធិបតីភាពរបស់លោកនាយករដ្ឋមន្ត្រីកម្ពុជា ហ៊ុន ម៉ាណែត ជាមួយលោក ស៊ី ជិនពីង។
ឯកសារទាំងនេះមានភាគ់ព័ន្ធនឹងវិស័យមួយចំនួនដូចជា ការវិនិយោគ, វិស័យពាណិជ្ជកម្ម, វិស័យអប់រំ, វិស័យហិរញ្ញវត្ថុ, វិស័យព័ត៌មាន, ការងារយុវជន, វិស័យកសិកម្ម, វិស័យសុខាភិបាល, វិស័យធនធានទឹក, វិស័យទេសចរណ៍, វិស័យកិច្ចការនារី និងវិស័យផ្សេងទៀត។
សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី១៧ ខែមេសា ស្តីពីដំណើរទស្សនកិច្ចផ្លូវការរបស់លោកប្រធានាធិបតីចិននៅកម្ពុជា បានឱ្យដឹងថា ដំណើរទស្សនកិច្ចដ៏មានសារៈសំខាន់នេះ គឺមិនត្រឹមតែបញ្ជាក់សាជាថ្មីពីការប្តេជ្ញាចិត្តឥតងាករេចំពោះទំនាក់ទំនងមិត្តភាពដែកថែបរវាងកម្ពុជា និងចិនប៉ុណ្ណោះទេ ប៉ុន្តែថែមទាំងបានពង្រឹង និងធ្វើឱ្យស៊ីជម្រៅថែមទៀតនូវភាពជាដៃគូយុទ្ធសាស្រ្តគ្រប់ជ្រុងជ្រោយ និងកិច្ចសហប្រតិបត្តិការឈ្នះ-ឈ្នះ រវាងប្រទេសទាំង ២ ផងដែរ។
ទាក់ទងនឹងវិស័យទេសចរណ៍ ភាគីទាំង ២ បានឯកភាពកំណត់យកឆ្នាំ ២០២៥ ជា«ឆ្នាំទេសចរណ៍កម្ពុជា-ចិន» និងលើកទឹកចិត្តប្រជាពលរដ្ឋខ្លួនឱ្យធ្វើដំណើររវាងប្រទេសទាំង ២ កាន់តែច្រើន។ ភាគីទាំង ២ នឹងរួមគ្នាអភិវឌ្ឍវិថីទេសចរណ៍ ការលើកកម្ពស់ការផ្សព្វផ្សាយគោលដៅទេសចរណ៍ និងពង្រឹងកិច្ចសហប្រតិបត្តិការផ្នែកសុវត្ថិភាពទេសចរណ៍។
ប្រធានសមាគមមគ្គុទេសក៍ទេសចរណ៍ភាសាចិនកម្ពុជា លោក អនហេង សុភ័ក្រ បានប្រាប់ភ្នំពេញប៉ុស្តិ៍នៅថ្ងៃទី១៨ ខែមេសា ថា វត្តមានរបស់ថ្នាក់ដឹកនាំកំពូលសាធារណរដ្ឋចិនក្នុងប្រទេសកម្ពុជានាពេលនេះ នឹងផ្តល់ផលវិជ្ជមានច្រើនសម្រាប់កម្ពុជា។
វិស័យទេសចរណ៍ នៅពេលមានការផ្តល់ទំនុកចិត្ត និងលើកទឹកចិត្តពីថ្នាក់ដឹកនាំចិនឱ្យមកកម្សាន្តនៅកម្ពុជា គឺប្រាកដណាស់នឹងមានភ្ញៀវទេសចរចិនចូលមកកម្ពុជាច្រើនជាងមុនជាមិនខាន។
លោកប្រាប់ទៀតថា ភ្ញៀវទេសចរចិនបានចូលរួមចំណែកយ៉ាងច្រើនក្នុងការជំរុញកំណើនសេដ្ឋកិច្ចជាតិ តាមរយៈការបង្កើតការងារ និងប្រាក់ចំណូលក្នុងចរន្តសេដ្ឋកិច្ចកម្ពុជា ជាពិសេសមុនពេលពិភពលោកជួបនឹងវិបត្តិបណ្តាលមកពីជំងឺកូវីដ១៩ នាអំឡុងដើមឆ្នាំ២០២០។
ទិន្នន័យក្រសួងទេសចរណ៍ បង្ហាញថា ឆ្នាំ ២០១៩ គឺជាពេលកម្ពុជាទទួលបានភ្ញៀវទេសចរអន្តរជាតិចំនួន ៦,៦១ លាននាក់ កើន ៦,៦ ភាគរយបើធៀបនឹងឆ្នាំ២០២៣។ ភ្ញៀវជនជាតិចិនមានចំនួនច្រើនជាងគេ គឺ ២,៣៦ លាននាក់(ស្មើនឹង ៣៥,៧ ភាគរយនៃចំនួនភ្ញៀវបរទេសសរុប) កើនឡើង ១៦,៧ភាគរយ។ ចំណូលដែលកម្ពុជាទទួលបានពីទេសចរណ៍អន្តរជាតិនៅពេលនោះ គឺ ៤,៩២ ពាន់លានដុល្លារ។ វិស័យទេសចរណ៍បានចូលរួមចំណែកក្នុងផលិតផលក្នុងស្រុកសរុប (GDP) ១២,១ ភាគរយ។
លោក អនហេង សុភ័ក្រ បានបញ្ជាក់ថា៖«តាមរយៈដំណើរទស្សនកិច្ចផ្លូវរដ្ឋរបស់លោកប្រធានាធិបតីចិន ស៊ី ជិនពីង មកកម្ពុជា ខ្ញុំសង្ឃឹមថានឹងមានការវិនិយោគ និងភ្ញៀវទេសចរចិនបន្ថែមទៀតមកកាន់កម្ពុជា ជាពិសេសតាមរយៈថ្នាក់ដឹកនាំនៃប្រទេសទាំងពីរបានសម្រេចយកឆ្នាំ២០២៥ ជាឆ្នាំទេសចរណ៍កម្ពុជា-ចិន កំណើនភ្ញៀវទេសចរនឹងមានការកើនឡើង»។
សម្រាប់ឆ្នាំ ២០២៤ កម្ពុជាទទួលបានភ្ញៀវទេសចរអន្តរជាតិសរុប ៦,៧ លាននាក់ កើនឡើង ២២,៩ ភាគរយ ធៀបនឹងឆ្នាំ២០២៣ ក្នុងនោះជនជាតិចិនស្ថិតនៅលេខរៀងទី ៣ ជាមួយនឹងចំនួន ៨៤៨ ៩៥២ នាក់ កើនឡើង ១២,៧ភាគរយ។ រយៈពេល ២ ខែដើមឆ្នាំ២០២៥ កម្ពុជាទទួលបានភ្ញៀបរទេសសរុបចំនួន ១,២៦ លាននាក់ កើនឡើង ២៧,៩ភាគរយធៀបនឹងរយៈពេល ២ ខែដើមឆ្នាំ២០២៤ ក្នុងនោះភ្ញៀវជនជាតិចិនចំនួន ១៨៤ ៣៧២នាក់ កើនឡើង ៦៧,៦ ភាគរយ។
ក្រសួងទេសចរណ៍បានព្យាករណ៍ថា ភ្ញៀវទេសចរអន្តរជាតិមកទស្សនាប្រទេសកម្ពុជានឹងកើនឡើងដល់ចន្លោះពី ៧,២ ទៅ ៧,៥ លាននាក់ នៅឆ្នាំ២០២៥ នេះបន្ទាប់ពីមានសញ្ញាល្អនៅឆ្នាំ ២០២៤។ រដ្ឋាភិបាលក៏នឹងបន្តឆ្នាំផ្លាស់ប្ដូរប្រជាជនកម្ពុជា-ចិន និងឆ្នាំទេសចរណ៍កម្ពុជា-ឥណ្ឌា នៅឆ្នាំ២០២៥ នេះផងដែរ៕
