វាគ្មិន និងអ្នកតំណាងមកពីឧស្សាហកម្មនាំចេញ ក៏ដូចជាអ្នកច្បាប់ចូលរួមវេទិកា «បច្ចុប្បន្នភាពទីផ្សារ៖ ប្រធានបទថ្មីៗស្តីពីពន្ធដារ»។ រូបថត ហុង រស្មី
ភ្នំពេញ៖ ការដំឡើងពន្ធរបស់សហរដ្ឋអាមេរិក ៤៩ភាគរយ «សមតុល្យជញ្ជឹងពាណិជ្ជកម្ម» លើការនាំចេញរបស់កម្ពុជាបានបង្កឱ្យមានការព្រួយបារម្ភក្នុងចំណោមអ្នកនៅក្នុងវិស័យឧស្សាហកម្ម ដោយសារសេដ្ឋកិច្ចប្រឈមនឹងភាពមិនច្បាស់លាស់ចំពោះការដំឡើងពន្ធដ៏ខ្ពស់នេះ។
ថ្លែងនៅក្នុងវេទិកា «បច្ចុប្បន្នភាពទីផ្សារ៖ ប្រធានបទថ្មីៗស្តីពីពន្ធដារ» ដែលរៀបចំដោយសភាពាណិជ្ជកម្មអន្តរជាតិកម្ពុជា (IBC) នៅការិយាល័យ KPMG Cambodia ថ្ងៃទី ២៣ ខែមេសា អ្នកជំនាញផ្នែកឧស្សាហកម្មបានស្រាយបញ្ជាក់អំពីផលប៉ះពាល់នៃការវិវត្ដន៍ចុងក្រោយរបស់ទីក្រុងវ៉ាស៊ីនតោន។
អត្រាពន្ធ «សមតុល្យជញ្ជឹងពាណិជ្ជកម្ម» ត្រូវបានប្រកាសកាលពីដើមខែនេះដោយប្រធានាធិបតី លោក ដូណាល់ ត្រាំ ត្រូវបានពន្យារពេលការអនុវត្តរយៈពេល ៩០ ថ្ងៃ ដើម្បីបើកផ្លូវចរចា។
គោលនយោបាយនេះត្រូវបានគេមើលឃើញថាជាផ្នែកនៃយុទ្ធសាស្ត្ររបស់សហរដ្ឋអាមេរិកក្នុងការដាក់សម្ពាធដល់ប្រទេសក្នុងតំបន់អាស៊ីលើការអនុវត្តពាណិជ្ជកម្ម និងនាំយកការផលិតកាន់តែច្រើនមកដីអាមេរិកវិញ។
អ្នកស្រី សូ ដារី ប្រធានផ្នែកសេវាកម្មសាជីវកម្ម KPMG ប្រចាំនៅកម្ពុជាធ្វើបទបង្ហាញពីហានិភ័យនៃការដំឡើងពន្ធរបស់សហរដ្ឋអាមេរិក ដែលកម្ពុជានៅមានពេល ៩០ថ្ងៃក្នុងការចរចា។ រូបថត ហុង រស្មី
អ្នកស្រី សូ ដារី ប្រធានផ្នែកសេវាកម្មសាជីវកម្ម KPMG ប្រចាំនៅកម្ពុជា បានថ្លែងថា៖ «ចាប់ពីខែមករា ឆ្នាំ២០២៤ ដល់ខែមករា ឆ្នាំ២០២៥ កម្ពុជាបាននាំចេញទំនិញមានតម្លៃ ១២,៨ ពាន់លានដុល្លារទៅកាន់សហរដ្ឋអាមេរិក ដែលស្មើនឹង ៣៨ ភាគរយនៃការនាំចេញសរុបរបស់យើង»។
អ្នកស្រីបានបន្ថែមថា៖ «ផលិតផលនាំចេញនោះ រួមមានសម្លៀកបំពាក់ កៅស៊ូ ប្លាស្ទិក និងផលិតផលស្បែក។ ពន្ធ ៤៩ភាគរយ នឹងជះផលវិបាកសម្រាប់សេដ្ឋកិច្ចរបស់យើង និងអ្នកវិនិយោគជាច្រើនដែលជាប់ទាក់ទងនឹងទីផ្សារសហរដ្ឋអាមេរិក»។
អ្នកស្រី ដារី បានពន្យល់ថា ការយល់អំពីច្បាប់នៃប្រភពដើម និងលេខកូដប្រព័ន្ធចុះសម្រុងគ្នា (HS) សម្រាប់ទំនិញនាំចេញនឹងមានសារៈសំខាន់ក្នុងប៉ុន្មានខែខាងមុខ។
ផលិតផលដែលត្រូវបានចាត់ថ្នាក់ក្រោមលេខកូដ HS ជាក់លាក់អាចស្ថិតនៅក្រោមកម្រិតពន្ធផ្សេងៗគ្នា អាស្រ័យលើការចាត់ចំណាត់ថ្នាក់ និងប្រទេសដើមរបស់វា។
អ្នកស្រីបានកត់សម្គាល់ថា៖ «អាជីវកម្មចាំបាច់ត្រូវវាយតម្លៃឡើងវិញនូវកិច្ចសន្យា ខ្សែច្រវាក់ផ្គត់ផ្គង់ និងឯកសារ។ ការធានាថា ផលិតផលមានលក្ខណៈសម្បត្តិគ្រប់គ្រាន់ជា «ផលិតក្នុងប្រទេសកម្ពុជា» ក្រោមស្តង់ដាទាំងកម្ពុជា និងសហរដ្ឋអាមេរិក អាចធ្វើឱ្យមានភាពខុសគ្នាយ៉ាងសំខាន់ក្នុងអត្រាពន្ធ»។
បន្ថែមលើភាពស្មុគស្មាញ សម្ភារៈនាំចូលរបស់កម្ពុជាជិត ៤៧ភាគរយ មានប្រភពមកពីប្រទេសចិន ដែលបង្កើនការភ័យខ្លាចថា ផលិតផលដែលបានប្រមូលផ្តុំនៅក្នុងប្រទេសកម្ពុជាដោយប្រើសមាសធាតុរបស់ចិនក៏អាចប្រឈមមុខនឹងការយកពន្ធខ្ពស់ផងដែរ ប្រសិនបើសហរដ្ឋអាមេរិកកំណត់គោលដៅទំនិញដែលមានការពាក់ព័ន្ធខ្សែច្រវាក់ផ្គត់ផ្គង់របស់ចិនខ្លាំង។
លោក James Roberts ប្រធានទីប្រឹក្សានៅ KPMG នៅកម្ពុជា ថ្លែងក្នុងវេទិកា «បច្ចុប្បន្នភាពទីផ្សារ៖ ប្រធានបទថ្មីៗស្តីពីពន្ធដារ» ដែលរៀបចំដោយសភាពាណិជ្ជកម្មអន្តរជាតិកម្ពុជា (IBC) នៅការិយាល័យ KPMG Cambodia ថ្ងៃទី ២៣ ខែមេសា។ រូបថត ហុង រស្មី
លោក James Roberts ប្រធានទីប្រឹក្សានៅ KPMG នៅកម្ពុជា បានពន្យល់ពីភាពតានតឹងសេដ្ឋកិច្ចពិភពលោក។
លោកបានពន្យល់ថា៖ «យើងកំពុងស្ថិតក្នុងគ្រានៃភាពមិនប្រាកដប្រជា។ ពន្ធគយកំពុងត្រូវបានប្រើប្រាស់ជាឧបករណ៍នៃការចរចា ប៉ុន្តែវាប៉ះពាល់ប្រទេសកម្ពុជាផងដែរ»។
លោកបានបន្តថា៖ «នៅពេលដំរីប្រយុទ្ធគ្នា ស្មៅក៏រងគ្រោះ ហើយយើងជាស្មៅ។ ការប៉ះពាល់ខ្សែច្រវាក់ផ្គត់ផ្គង់ទៅប្រទេសចិនគឺជាហានិភ័យដ៏សំខាន់សម្រាប់អាជីវកម្មកម្ពុជា»។
លោកក៏បានកត់សម្គាល់ផងដែរថា ផលប៉ះពាល់នៃការយកពន្ធមិនមានជះឥទ្ធិពលតែប្រទេសកម្ពុជានោះទេ។
លោក Roberts បានឱ្យដឹងថា៖ «ពន្ធជំរុញតម្លៃនៅសហរដ្ឋអាមេរិក នាំឱ្យអតិផរណា មិនមែនការរស់ឡើងវិញនៃឧស្សាហកម្មទេ។ អាវយឺតដែលមានតម្លៃ ១ ដុល្លារសម្រាប់ផលិតនៅកម្ពុជា មិនអាចជំនួសដោយតម្លៃស្មើនឹង ២០ដុល្លារ ដែលផលិតនៅអាមេរិកមួយយប់នោះទេ។ ការចំណាយនឹងកើនឡើងជាធម្មតា ហើយអ្នកប្រើប្រាស់នឹងចំណាយកាន់តែច្រើន»។
ខណៈពេលដែលអត្រាពន្ធថ្មីស្ថិតក្នុងដំណាក់កាលចរចា វាគ្មិនទាំងពីរបានសង្កត់ធ្ងន់លើសារៈសំខាន់នៃការវាយតម្លៃហានិភ័យភ្លាមៗ និងការធ្វើផែនការបន្ទាន់។
ពីការកែតម្រូវខ្សែច្រវាក់ផ្គត់ផ្គង់ឡើងវិញ ដល់ការពិនិត្យមើលឡើងវិញនូវក្របខ័ណ្ឌច្បាប់ និងឯកសារកំណត់តម្លៃផ្ទេរ ក្រុមហ៊ុនត្រូវបានជំរុញឱ្យធ្វើសកម្មភាពឥឡូវនេះ ជាជាងរង់ចាំការសម្រេចចិត្តចុងក្រោយរបស់សហរដ្ឋអាមេរិក។
អ្នកស្រី ដារី ក៏បានកត់សម្គាល់ថា សេដ្ឋកិច្ចរបស់កម្ពុជានៅតែស្ថិតនៅលើផ្លូវរីកចម្រើន ដោយផលិតផលក្នុងស្រុកសរុបរំពឹងថានឹងកើនឡើង ៥,៥ភាគរយនៅឆ្នាំនេះដល់ ៣១,៦ ពាន់លានដុល្លារ។
ការនាំចេញសរុបបានកើនឡើង ១៥,៧ភាគរយ ដល់ ២៦,៧ ពាន់លានដុល្លារក្នុងឆ្នាំ ២០២៤ ដែលជំរុញដោយតម្រូវការខ្លាំងពីសហរដ្ឋអាមេរិកជាពិសេស។ យ៉ាងណាមិញ កំណើននោះឥឡូវស្ថិតក្នុងគ្រោះថ្នាក់។
អ្នកស្រីបាននិយាយថា៖ «កំណើននេះឆ្លុះបញ្ចាំងពីភាពធន់នៃវិស័យផលិតកម្មរបស់យើង ប៉ុន្តែផែនការពន្ធថ្មីរបស់សហរដ្ឋអាមេរិកធ្វើឱ្យយើងនៅផ្លូវបំបែកមួយ»។
នៅពេលដែលប្រទេសកម្ពុជាស្ថិតក្នុងភាពមិនច្បាស់លាស់នេះ មេដឹកនាំធុរកិច្ច និងអ្នកវិភាគដូចគ្នាបាននិយាយថា គន្លឹះសំខាន់គឺភាពរហ័សរហួន ការទូត និងការរៀបចំហ្មត់ចត់។
លោក Roberts បានបញ្ជាប់ថា៖ «នេះមិនមែនជាពេលវេលាដែលត្រូវភ័យខ្លាចនោះទេ ប៉ុន្តែវាជាពេលវេលាដើម្បីរៀបចំ។ តាមដានការប៉ះពាល់របស់អ្នក ធ្វើពិពិធកម្មកន្លែងដែលអាចធ្វើទៅបាន ហើយត្រៀមខ្លួនដើម្បីសម្របខ្លួន»។
ប៉ុន្មានសប្តាហ៍ខាងមុខនឹងមានអ្វីថ្មីៗកើតឡើង នៅពេលដែលការចរចារវាងសហរដ្ឋអាមេរិក និងកម្ពុជានៅតែបន្ត ហើយពាណិជ្ជកម្មនៅតែជាវិស័យសក្តានុពលដែលអាចផ្លាស់ប្តូរទិដ្ឋភាពសេដ្ឋកិច្ចរបស់កម្ពុជា៕
