សត្វត្រចៀកកាំកំពុងបញ្ចេញទឹកមាត់សម្រាប់ធ្វើជាសម្បុកនៅក្នុងផ្ទះត្រចៀកកាំមួយនៅខេត្តកំពត។ រូបថត ហ្វេសប៊ុក
កម្ពុជា-ចិន សម្រេចបានកិច្ចព្រមព្រៀងនាំចេញកូនក្រពើ ផ្លែទុរេន និងសំបុកត្រចៀកកាំ ទៅកាន់ទីផ្សារចិនជាផ្លូវការចាប់ពីពេលនេះតទៅ។ កិច្ចព្រមព្រៀងនេះសម្រេចបានក្នុងអំឡុងពេលប្រធានាធិបតីចិន លោក ស៊ី ជីនពីន មកបំពេញទស្សនកិច្ចផ្លូវរដ្ឋនៅកម្ពុជាកាលពីថ្ងៃទី១៧-១៨ ខែមេសា ឆ្នាំ២០២៥។
ប្រធានសហព័ន្ធត្រចៀបុកកកាំកម្ពុជា លោក ណាង សុធី (Nang Sothy, Cambodia Swiftlet Federation) បានប្រាប់ភ្នំពេញប៉ុស្តិ៍ក្នុងសប្តាហ៍នេះថា កាលពីថ្ងៃទី១៧ ខែមេសា ឆ្នាំ២០២៥ ប្រមុខរដ្ឋាភិបាលនៃប្រទេសកម្ពុជា និងចិន បានចុះហត្ថលេខាអនុស្សរណៈយោគយល់គ្នាទាំង ៣៧ ក្នុងនោះ មានចំនួន ៣ ពាក់ព័ន្ធនឹងកសិកផលកសិកម្មកម្ពុជា គឺមានសំបុកត្រចៀកកាំ ធុរេន និងកូនក្រពើ ត្រូវបានអនុញ្ញាតឱ្យនាំចេញទៅកាន់ប្រទេសចិនចាប់ពីពេលនេះតទៅ។
លោកបានថ្លែងថា៖«សំបុកត្រចៀកកាំកម្ពុជា គឺត្រូវបានគេទទួលស្គាល់ថាមានគុណភាពល្អ ព្រោះប្រទេសយើងមានបរិស្ថានបៃតងល្អច្រើនជាងគេបើប្រៀបធៀបទៅនឹងប្រទេសផ្សេងៗដូចជា ថៃ វៀតណាម ឥណ្ឌូនេស៊ី និង ម៉ាឡេស៊ី ជាដើម ដែលឧស្សាហកម្មគេរីកចម្រើនជាងយើង ដូច្នេះផ្សែងពុលគីមីគ្រប់សព្វបែបយ៉ាងក៏មានច្រើនដែរ»។
លោកបន្តថា៖«ខ្ញុំជឿជាក់ថា ទិន្នផលនៃសំបុកត្រចៀកកាំរបស់យើង គឺមានគុណភាពល្អ និងអាចប្រកួតប្រជែងក្នុងតម្លៃមួយយ៉ាងខ្ពស់»។
លោកបន្ថែមទៀតថា តាមរយៈអនុស្សរណៈនេះគឺកម្ពុជាអាចនាំចេញសំបុកត្រចៀកកាំដែលមិនទាន់កែច្នៃ និងសំបុកត្រចៀកកាំដែលកែច្នៃរួច ក្រោមវិញ្ញាបនបត្រភូតគាមអនាម័យរបស់កម្ពុជា។
យោងតាមលោក ណាង សុធី នៅកម្ពុជាបច្ចុប្បន្នអាចមានផ្ទះអភិរក្សត្រចៀកកាំ(ផ្ទះចិញ្ចឹម) ចន្លោះពី ៣ ០០០ ទៅ ៣ ៥០០ខ្នង។ ទោះយ៉ាងណា ចំនួនផ្ទះដែលចុះបញ្ជីអភិរក្សនៅក្រសួងកសិកម្ម រុក្ខាប្រមាញ់ និងនេសាទ មានប្រហែល ៧០០ផ្ទះប៉ុណ្ណោះ។
សូមបញ្ជាក់ថា ក្នុងអំឡុងពេលប្រធានាធិបតីចិនមកធ្វើទស្សនកិច្ចនៅកម្ពុជា មានការចុះហត្ថលេខាលើឯកសារកិច្ចសហប្រតិបត្តិការចំនួន ៣៧ ដោយគ្របដណ្តប់លើវិស័យជាច្រើន រួមមាន ការលើកកម្ពស់កិច្ចសហប្រតិបត្តិការសន្តិសុខសកល ការអប់រំ និងការអភិវឌ្ឍធនធានមនុស្ស កសិកម្ម ឧស្សាហកម្ម ខ្សែច្រវាក់ផ្គត់ផ្គង់ ជំនួយអភិវឌ្ឍន៍ ពន្ធគយ ចត្តាឡីស័ក សុខាភិបាល ទេសចរណ៍ និងប្រព័ន្ធផ្សព្វផ្សាយ។
ឯកសារទាំងនេះ គឺមិនរាប់បញ្ចូលឯកសាររវាងរដ្ឋ និងឯកជន ព្រមទាំងរវាងធុរកិច្ច និងធុរកិច្ចមួយចំនួនដែលបានចុះហត្ថលេខាលើគម្រោងធំៗ រួមមានគម្រោងគ្រប់គ្រងធនធានទឹកចម្រុះហ្វូណនតេជោ ការសាងសង់រោងចក្រ ថាមពល LPG 900 MW ក្នុងខេត្តកោះកុង និងគម្រោងភាពជាដៃគូយុទ្ធសាស្ត្រផ្លូវដែក ជាដើម៕
