លោក ដូណាល់ ត្រាំ ថ្លែងក្នុងពេលប្រកាសបន្ទាត់ពន្ធគយថ្មីសម្រាប់ប្រទេសនានានៅលើពិភពលោក នៅថ្ងៃទី២ ខែមេសា។ សេតវិមាន
អ្នកវិភាគសេដ្ឋកិច្ចមានសុទិដ្ឋិនិយមថា អត្រាពន្ធគយសម្រាប់ទំនិញពីកម្ពុជានាំចូលទៅសហរដ្ឋអាមេរិក អាចចុះទាបជាង ៤៩ភាគរយ តាមរយៈកិច្ចចរចារវាងកម្ពុជានិងអាមេរិក។ ប្រធានាធិបតីសហរដ្ឋអាមេរិក ដូណាល់ ត្រាំ បានកំណត់ពន្ធគយឆ្លើយតប (Reciprocal Tariffs) សម្រាប់ទំនិញកម្ពុជានាំចូលទីផ្សារអាមេរិកក្នុងអត្រាជាមធ្យម ៤៧ ភាគរយ ខណៈទំនិញអាមេរិកនាំមកកម្ពុជា ជាប់ពន្ធជាមធ្យម ៩៧ ភាគរយ។
ទិន្នន័យពាណិជ្ជកម្មអន្តរជាតិរបស់កម្ពុជា ដែលកត់ត្រាដោយអគ្គនាយកដ្ឋានគយ និងរដ្ឋាករកម្ពុជា(GDCE) បង្ហាញថា ក្នុងឆ្នាំ ២០២៤ ការនាំចេញ នាំចូលទំនិញទ្វេភាគីកម្ពុជា-អាមេរិក មានទឹកប្រាក់សរុប ១០,១៨ ពាន់លានដុល្លារ កើនឡើង ១១,២ ភាគរយបើធៀបនឹងឆ្នាំ ២០២៣។ ក្នុងចំនួននេះ គឺកម្ពុជានាំទៅអាមេរិក ៩,៩២ ពាន់លានដុល្លារ កើន ១១,៤ ភាគរយ ចំណែកទំនិញអាមេរិកនាំចូលវិញ មានចំនួន ២៦៤,១៥ លានដុល្លារ កើន ២,៧ ភាគរយ។
អាមេរិក គឺជាទីផ្សារទទួលទិញទំនិញពីកម្ពុជាច្រើនជាងគេ ដោយគ្រប់គ្រងចំណែកទីផ្សាររហូតដល់ ៣៧,៩ភាគរយ តាមពីក្រោយដោយវៀតណាម ១៣,៨ ភាគរយ ប្រទេសចិន ៦,៧ ភាគរយ និងប្រទេសជប៉ុន ៥,៤ ភាគរយ។ ភាគច្រើនលើសលប់នៃទំនិញកម្ពុជានាំទៅទីផ្សារអាមេរិក គឺជាផលិតផលសម្លៀកបំពាក់ កាបូបធ្វើដំណើរ និងស្បែកជើង។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បាននប្រាប់ភ្នំពេញប៉ុស្តិ៍នាព្រឹកថ្ងៃទី៣ ខែមេសា ថា ការកំណត់វិធានការពន្ធគយថ្មីរបស់រដ្ឋបាលអាមេរិកដែលដឹកនាំដោយលោកប្រធានាធិបតី ដូណាល់ ត្រាំ នៅពេលនេះ គឺធ្វើឡើងស្ទើរគ្រប់ប្រទេសដែលជាដៃគូពាណិជ្ជកម្មទាំងអស់របស់អាមេរិក។
ការកំណត់អត្រាពន្ធគយថ្មីរបស់រដ្ឋាភិបាលអាមេរិកនាពេលនេះ គឺធ្វើឡើងដោយផ្អែកភាគច្រើនទៅលើការកំណត់ពន្ធនាំចូលពីសំណាក់ប្រទេសដៃគូពាណិជ្ជកម្មអាមេរិកដែលកំពុងអនុវត្តនាពេលនេះ។
លោកបានពន្យល់ថា សម្រាប់ប្រទេសកម្ពុជាបើតាមតារាង Reciprocal Tariffs គឺកម្ពុជាយកពន្ធទំនិញអាមេរិកក្នុងអត្រា ៩៧ភាគរយ ដូច្នេះអាមេរិក បានកំណត់យកពន្ធវិញ ៤៩ ភាគរយដែលស្មើនឹងប្រហែលពាក់កណ្តាលនៃការកំណត់របស់កម្ពុជា។
ដោយឡែកសម្រាប់ប្រទេសជិតខាងដូចជា វៀតណាម ដែលយកពន្ធទំនិញអាមេរិក ៩០ ភាគរយ អាមេរិកបានកំណត់អត្រាពន្ធថ្មីចំនួន ៤៦ ភាគរយ, ថៃ ៧២ ភាគរយ ការកំណត់ថ្មី ៣៦ ភាគរយ, ឥណ្ឌូនេស៊ី យកពន្ធពីអាមេរិក ៦៤ ភាគរយ អាមេរិកយកវិញ ៣២ ភាគរយ, ម៉ាឡេស៊ី ៤៧ ភាគរយ អាមេរិក យកវិញ ២៤ ភាគរយ។
លោកបានថ្លែងថា៖«ការកំណត់វិធានលើអត្រាពន្ធគយថ្មីពីសំណាក់រដ្ឋាភិបាលអាមេរិកចំពោះទំនិញនាំចូលពីបរទេសនាពេលនេះ គឺជាការឆ្លើយតបនឹងការកំណត់ពន្ធរបស់ប្រទេសដៃគូពាណិជ្ជកម្មទាំងអស់ដែលបានដាក់ពន្ធលើទំនិញនាំចូលពីអាមេរិក។ បើពិនិត្យជាទូទៅ គឺអត្រាពន្ធដែលរដ្ឋាភិបាលអាមេរិកកំណត់យកពីប្រទេសដៃគូពាណិជ្ជកម្មនៅពេលនេះ គឺស្មើនឹងពាក់កណ្តាលនៃការយកពន្ធពីប្រទេសដៃគូតែប៉ុណ្ណោះ»។
បើតាមលោក វិចិត្រ ការកំណត់អត្រាពន្ធគយថ្មីពីសំណាក់រដ្ឋាភិបាលអាមេរិក គឺធ្វើឡើងក្នុងគោលបំណងចម្បងៗដូចជា ទី១. ដើម្បីបង្រួញឱនភាពជញ្ជីងពាណិជ្ជកម្មរបស់អាមេរិកជាមួយប្រទេសដៃគូទាំងអស់, ទី២ លោក ដូណាល់ត្រាំ ចង់លើកទឹកចិត្ត និងជំរុញឱ្យអ្នកវិនិយោគឱ្យទៅបើករោងចក្រ ឬ សហគ្រាសផ្ទាល់នៅអាមេរិកដើម្បីបង្កើតការងារឱ្យបានច្រើននៅទីនោះ, និងទី៣ ការកាត់បន្ថយឥទ្ធិពល ឬការចូលរួមក្នុងក្រុមប្រទេស BRIC ដែលរួមមាន ប្រទេសប្រេស៊ីល រុស្ស៊ី ឥណ្ឌា និង ចិន។
លោកបាននិយាយថា៖«ខ្ញុំគិតថា សម្រាប់ប្រទេសកម្ពុជា ការកំណត់អត្រាពន្ធគយថ្មីពីសំណាក់រដ្ឋាភិបាលអាមេរិក នឹងមិនមានផលប៉ះពាល់ច្រើនទេ ដោយយើងអាចនៅមានការចរចាគ្នាបន្ថែម តាមរយៈការបន្ថយអត្រាពន្ធនាំចូលទំនិញពីអាមេរិក ខណៈបច្ចុប្បន្នទឹកប្រាក់ដែលកម្ពុជាបានចំណាយទៅលើការនាំទំនិញចូលពីអាមេរិក នៅមានកម្រិតតិចតួចនៅឡើយ។ មួយវិញទៀតដោយសារកម្ពុជា ជាប្រទេសដែលប្រើប្រាស់រូបិយបណ្ណដុល្លាររបស់អាមេរិក ដូច្នេះមាគ៌ាសម្រាប់ការចរចានៅតែមានច្រើន»។
លោកបានលើកឡើងថា បើតាមព័ត៌មានដែលលោកទទួលបាន គឺបន្ទាប់ពីការប្រកាសអត្រាពន្ធគយថ្មីនេះ រដ្ឋាភិបាលអាមេរិកនឹងបន្តតាមដានពីការឆ្លើយតបពីសំណាក់រដ្ឋាភិបាលនៃប្រទេសនីមួយៗ ដូច្នេះលោកសង្ឈឹមថា អ្វីៗអាចនឹងមានភាពប្រសើរឡើងវិញនៅពេលខាងមុខឆាប់ៗនេះ។
សម្រាប់ការកំណត់របស់កម្ពុជាដែលយកពន្ធពីទំនិញនាំចូលពីអាមេរិកខ្ពស់រហូតដល់ជាមធ្យម ៩៧ ភាគរយនោះ គឺភាគច្រើនលើសលប់ជាផលិតផលរថយន្ត ដែលមានប្រភេទខ្លះមានអត្រាពន្ធគយ លើសពី ១០០ភាគរយ ខណៈផលិតផលមួយចំនួនទៀតមានអត្រាពន្ធទាប។
ទាក់ទងនឹងការធ្វើពិពិធកម្មទីផ្សារនាំចេញទំនិញរបស់កម្ពុជា នាពេលនេះ លោក វិចិត្រ បានប្រាក់ថា កំពុងមានភាពល្អប្រសើរ ប៉ុន្តែនៅត្រូវការពេលបន្ថែមទៀត៕
