ភ្ញៀវជាតិ និងអន្តរជាតិដើរលេងកម្សាន្តនៅប្រាសាទអង្គរវត្ត។ អាជ្ញាធរអប្សរា
ភ្ញៀវទេសចរបរទេសជិត ៤០ម៉ឺននាក់ បានទិញសំបុត្រចូលទស្សនាតំបន់រមណីយដ្ឋានអង្គរ នាអំឡុងត្រីមាសទី១ ឆ្នាំ២០២៥ ដែលជួយឱ្យគ្រឹះស្ថានអង្គរ រកចំណូលបានជិត ១៩ លានដុល្លារ កើនជាង ១៣ ភាគរយបើធៀបនឹងត្រីមាសទី១ ឆ្នាំ២០២៤ ខណៈចំណូលពីការលក់សំបុត្រនៅទីតាំងផ្សេងទៀតមានប្រមាណជាង ១ លានដុល្លារ។
សេចក្តីប្រកាសព័ត៌មានរបស់គ្រឹះស្ថានអង្គរ ចេញផ្សាយក្នុងថ្ងៃទី២ ខែមេសា ឱ្យដឹងថា ចាប់ពីខែមករា-ដល់ដំណាច់ខែមីនា ឆ្នាំ ២០២៥ មានភ្ញៀវទេសចរបរទេស ៣៩៨ ៥៣១ នាក់បានទិញសំបុត្រចូលទស្សនារមណីយដ្ឋានអង្គរ កើនឡើង ១៤,៦៧ ភាគរយបើធៀបនឹងរយៈពេលដូចគ្នាឆ្នាំ ២០២៤។ ចំណែកទឹកប្រាក់ដែលបានពីការលក់សំបុត្រមានចំនួន ១៨,៧២ លានដុល្លារ កើនឡើង ១៣,២២ ភាគរយ។
សេចក្តីប្រកាសព័ត៌មាន បានឱ្យដឹងទៀតថា ក្រៅពីការលក់សំបុត្រចូលទស្សនារមណីយដ្ឋានអង្គរ គ្រឹះស្ថានអង្គរ ក៏រកបានចំណូលបន្ថែមចំនួន ១,០៨ លានដុល្លារផងដែរពីភ្ញៀវបរទេសទិញសំបុត្រចូលទស្សនាតំបន់ប្រាសាទកោះកែរ បឹងមាលា ភ្នំក្បាលស្ពាន និងសំបុត្រទូកនៅកំពង់ផែចុងឃ្នៀស(ខេត្តសៀមរាប)។
គ្រឹះស្ថានអង្គរ គឺជាគ្រឹះស្ថានសាធារណៈរដ្ឋបាលដែលត្រូវបង្កើតឡើងកាលពីឆ្នាំ២០១៦ ដោយស្ថិតក្រោមអាណាព្យាបាលបច្ចេកទេសនៃក្រសួងទេសចរណ៍ និងស្ថិតក្រោមអាណាព្យាបាលហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ។ ការប្រមូលចំណូលរបស់គ្រឹះស្ថានអង្គរ គឺរួមមាន រមណីយដ្ឋានអង្គរ, ប្រាសាទកោះកែរ, និងសំបុត្រទូកនៅកំពង់ផែចុងឃ្នៀស។
សម្រាប់តម្លៃតម្លៃសំបុត្រចូលទស្សនារមណីយដ្ឋានអង្គរ ត្រូវបានចែកចេញជា ៣ប្រភេទ គឺសំបុត្រចូលទស្សនា ១ថ្ងៃមានតម្លៃ ៣៧ដុល្លារ, រយៈពេល ៣ថ្ងៃតម្លៃ ៦២ដុល្លារ និង ៧ថ្ងៃ មានតម្លៃ ៧២ដុល្លារ។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានប្រាប់ភ្នំពេញប៉ុស្តិ៍ក្នុងថ្ងៃទី៣ ខែមេសា ថា ក្នុងរដូវកាលសម្បូរភ្ញៀវទេសចរ(High Season) ចាប់ពីអំឡុងខែតុលា ឆ្នាំ២០២៤ រហូតដល់ដើមខែមេសា ឆ្នាំ២០២៥ នេះគឺភ្ញៀវទេសចរបរទេសដែលមកដើរកម្សាន្តតាមបណ្តាប្រាសាទបុរាណ និងរមណីយដ្ឋាននានាក្នុងខេត្តសៀមរាប គឺពិតជាកើនច្រើនបើធៀបនឹងរយៈពេលប៉ុន្មានឆ្នាំកន្លងមក។ លោកបន្តថា ទោះយ៉ាងណាចំនួននេះបើធៀបនឹងមុនអំឡុងឆ្នាំ២០២០ (ពិភពលោកជួបនឹងវិបត្តិជំងឺកូវីដ១៩) គឺនៅមិនទាន់ស្មើនៅឡើយទេ។
លោកបានថ្លែងថា៖«ក្នុងរដូវកាល High Season នេះគឺមានភ្ញៀវបរទេសចូលមកកម្សាន្តនៅខេត្តសៀមរាបច្រើនជាងឆ្នាំមុន។ ទោះយ៉ាងណាចាប់តាំងពីខែមីនាមក ចំនួនភ្ញៀវទេសចរបរទេសបានចាប់ផ្តើមធ្លាក់ចុះជាបន្តបន្ទាប់ ខណៈ Low Season បានឈានចូលមកដល់ហើយ»។
លោកលើកឡើងទៀតថា ជារួមស្ថានភាពវិស័យទេសចរណ៍នៅកម្ពុជា គឺចាប់ផ្តើមមានសម្ទុះឡើងវិញហើយ។
លោក លី សែ អគ្គនាយកគ្រឹះស្ថានអង្គរ កាលពីដើមឆ្នាំ២០២៥ បាននិយាយថា ក្នុងឆ្នាំ២០២៥ នេះ តាមការព្យាករ គឺចំនួនភ្ញៀវទេសចរបរទេសទិញសំបុត្រចូលទស្សនារមណីយដ្ឋានអង្គរ នឹងអាចកើនចន្លោះពី ២៥-៣០ ភាគរយបើធៀបនឹងឆ្នាំ២០២៤។
ដើម្បីបង្កភាពងាយស្រួលគ្រឹះស្ថានអង្គរ កាលពីពេលថ្មីៗនេះ បានដាក់ឱ្យដំណើរការម៉ាស៊ីនទិញសំបុត្រចូលទស្សនាតំបន់រមណីយដ្ឋានអង្គរដោយស្វ័យប្រវត្តិសម្រាប់ការកម្សាន្តរយៈពេល ១ ថ្ងៃ។ ចំណែកសំបុត្រទស្សនារយៈពេល ៣ ថ្ងៃ និង ៧ ថ្ងៃ គឺតម្រូវឱ្យភ្ញៀវបរទេសទិញសំបុត្រនៅទីតាំងលក់សំបុត្រគ្រឹះស្ថានអង្គរដូចពេលមុនដដែល។
ម៉ាស៊ីនទិញសំបុត្រស្វ័យប្រវត្តិទាំងអស់ មាន ៣ ទីតាំង គឺនៅគ្រឹះស្ថានអង្គរ (ទីតាំងលក់សំបុត្របច្ចុប្បន្ន), នៅប៉ាវីអង្គរ, និងនៅផ្សារទំនើបហេរាថេកវ៉ក។
កាលពីឆ្នាំ ២០២៤ មានភ្ញៀវទេសចរបរទេស ១,០២ លាននាក់បានទិញសំបុត្រចូលទស្សនារមណីយដ្ឋានអង្គរ កើនឡើង ២៨ភាគរយបើធៀបនឹងឆ្នាំ២០២៣។ ចំណែកប្រាក់ទទួលបានមានជិត ៤៧,៨៣ ដុល្លារ កើនជាង ២៨ ភាគរយ។ នេះបើតាមទិន្នន័យរបស់គ្រឹះស្ថានអង្គរ៕
