លោក ហ៊ុន ម៉ាណែត ជួបពិភាក្សាជាមួយលោក CHEN Simon ប្រធានក្រុមប្រឹក្សាភិបាលក្រុមហ៊ុន ADATA Technology Co., Ltd។ STPM
ក្រុមហ៊ុន ADATA Technology Co., Ltd. ដែលជាក្រុមហ៊ុនបច្ចេកវិទ្យាឈានមុខមួយរបស់ចិនតៃវ៉ាន់ បានបង្ហាញការចាប់អារម្មណ៍លើការវិនិយោគវិស័យបច្ចេកវិទ្យានៅកម្ពុជា ដែលជាប្រទេសមួយកំពុងមានកំណើននៃចំណេះដឹង និងតម្រូវការបច្ចេកវិទ្យាកាន់តែច្រើន។
ការបង្ហាញចំណាប់អារម្មណ៍របស់ក្រុមហ៊ុននេះ ធ្វើឡើងក្នុងជំនួបរវាងលោក CHEN Simon ប្រធានក្រុមប្រឹក្សាភិបាលក្រុមហ៊ុន ADATA Technology Co., Ltd ជាមួយលោក ហ៊ុន ម៉ាណែត នាយករដ្ឋមន្ត្រីកម្ពុជា នៅព្រឹកថ្ងៃទី៣០ ខែមេសា ឆ្នាំ២០២៥ នៅវិមានសន្តិភាព។
ក្នុងជំនួបនោះ លោក Simon បានលើកឡើងថា ADATA Technology Co., Ltd គឺជាក្រុមហ៊ុនធំលំដាប់អន្តរជាតិ ដោយបច្ចុប្បន្នក្រុមហ៊ុនមានបុត្រសម្ព័ន្ធចំនួន ៥ ដែលបានចុះបញ្ជីនៅផ្សារភាគហ៊ុននៅកោះតៃវ៉ាន់ និងទីក្រុងហុងកុង ប្រទេសចិន ព្រមទាំងមានការិយាល័យតំណាងជាង ៤០ ដែលកំពុងប្រតិបត្តិការអាជីវកម្មនៅបណ្តាប្រទេសនានាជុំវិញពិភពលោក។ លោកបន្តថា ក្រុមហ៊ុន ADATA Technology មានជំនាញផ្នែកគ្រឿងអេឡិចត្រូនិក រ៉ូបូត កុំព្យូទ័រ បច្ចេកវិទ្យាជីវមាត្រ(Biometrics) និងយានយន្ត។
លោកបញ្ជាក់ថា៖«នេះជាដំណើរទស្សនកិច្ចលើកទី៤ របស់ខ្ញុំមកកាន់ប្រទេសកម្ពុជា ហើយក្រុមហ៊ុនមានចំណាប់អារម្មណ៍ខ្លាំងក្នុងការវិនិយោគនៅកម្ពុជា ដោយផ្តោតលើវិស័យបច្ចេកវិទ្យាទំនើប។ ទន្ទឹមនឹងនេះ ក្រុមហ៊ុនក៏ចាប់អារម្មណ៍ពង្រឹង និងពង្រីកកិច្ចសហប្រតិបត្តិការជាមួយក្រសួងស្ថាប័នរបស់កម្ពុជា ដើម្បីបណ្តុះបណ្តាល និងកសាងធនធានមនុស្ស ផ្នែកបច្ចេកវិទ្យាទំនើប ផងដែរ»។
ជាការឆ្លើយតប លោក ហ៊ុន ម៉ាណែត បានសម្តែងការស្វាគមន៍ចំពោះគណៈប្រតិភូក្រុមហ៊ុនដែលបានមកបំពេញទស្សនកិច្ច និងចាប់អារម្មណ៍វិនិយោគនៅកម្ពុជា។ ជាមួយគ្នានេះលោកនាយករដ្ឋមន្ត្រីក៏បានវាយតម្លៃខ្ពស់ចំពោះភាពរីកចម្រើនរបស់ក្រុមហ៊ុនដែលមានបទពិសោធ និងឈានមុខគេ ខាងវិស័យបច្ចេកវិទ្យាទំនើប។
លោកនាយករដ្ឋមន្រ្តីបានអះអាងថា ការអភិវឌ្ឍវិស័យបច្ចេកវិទ្យានៅកម្ពុជា គឺជាវិស័យអាទិភាពមួយរបស់រាជរដ្ឋាភិបាល ដូច្នេះលោកសូមលើកទឹកចិត្តឱ្យក្រុមហ៊ុនបន្តភ្ជាប់ទំនាក់ទំនងជាមួយក្រសួងស្ថាប័នពាក់ព័ន្ធបន្ថែមទៀត ដើម្បីចាប់យកកាលានុវត្តភាពក្នុងការវិនិយោគនៅកម្ពុជា»។
ជាមួយគ្នានេះ លោក ហ៊ុន ម៉ាណែត ក៏បានគូសបញ្ជាក់អំពីគោលនយោបាយ និងយន្តការចាំបាច់នានារបស់រាជរដ្ឋាភិបាល ក្នុងការគាំទ្រដល់បរិស្ថានវិនិយោគនៅកម្ពុជា រួមមាន ច្បាប់ស្តីពីការវិនិយោគនៃព្រះរាជាណាចក្រកម្ពុជា ការដាក់ចេញវិធានការចាំបាច់ និងការកែសម្រួលនីតិវិធីពាក់ព័ន្ធនឹងការវិនិយោគ ព្រមទាំងការដាក់ចេញនូវកញ្ចប់វិធានការលើកទឹកចិត្តសម្រាប់វិនិយោគិន ជាពិសេសការវិនិយោគលើខ្សែច្រវាក់ផ្គត់ផ្គង់៕
