សកម្មភាពកម្មករកំពុងចៀរជ័រកៅស៊ូ នៅចម្ការមួយកន្កែងក្នុងខេត្តត្បូងឃ្មុំ។ នៀម ឆេង
កម្ពុជាបានស្នើ និងលើកទឹកចិត្តឱ្យវិនិយោគិនវៀតណាមចូលមកបណ្តាក់ទុនលើការបង្កើតតំបន់កសិ-ឧស្សាហកម្ម ដើម្បីប្រមូលផ្តុំក្រុមហ៊ុនកែច្នៃជ័រកៅស៊ូ និងផលិតកម្មកសិកម្មផ្សេងៗទៀតដើម្បីផ្គត់ផ្គង់ដល់ឧស្សាហកម្មនៅកម្ពុជាដែលកំពុងមានតម្រូវការកើនឡើងពីមួយថ្ងៃទៅមួយថ្ងៃ។
សំណើនេះត្រូវបាន លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា(CDC) លើកឡើងក្នុងឱកាសនៃជំនួបទ្វេភាគីជាមួយគណៈប្រតិភូសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ដែលដឹកនាំដោយលោក Trương Minh Trung អគ្គនាយករងទី១ នៃក្រុមហ៊ុន Vietnam Rubber Group និងជាប្រធានគណៈកម្មាធិការអភិវឌ្ឍន៍ចម្ការកៅស៊ូទំហំ ១០ ម៉ឺនហិកតានៅកម្ពុជា នាទីស្តីការ CDC កាលពីថ្ងៃទី៣ ខែមេសា ឆ្នាំ២០២៥។
ក្នុងជំនួបខាងលើ លោក ជា វុទ្ធី បានសម្តែងការស្វាគមន៍ចំពោះគណៈប្រតិភូក្រុមហ៊ុន Vietnam Rubber Group ដែលកំពុងខិតខំជំរុញការអភិវឌ្ឍឧស្សហកម្មកៅស៊ូនៅកម្ពុជា និងបានលើកឡើងអំពីសក្តានុពលនៃការបណ្តាក់ទុននៅកម្ពុជា ព្រមទាំងអត្ថប្រយោជន៍ដែលអ្នកវិនិយោគនឹងទទួលបានពីការបណ្តាក់ទុនផ្ទាល់នៅកម្ពុជា។
លោកបន្ថែមថា បច្ចុប្បន្ននៅកម្ពុជាមានក្រុមហ៊ុនផលិតសម្បកកង់យានយន្តជាច្រើនកំពុងដំណើរការ ដែលបានធ្វើឱ្យមានតម្រូវការជ័រកៅស៊ូក្នុងស្រុកមានកាន់តែច្រើន។
លោកថ្លែងថា៖«ក្នុងន័យនេះ ខ្ញុំសូមលើកទឹកចិត្តឱ្យសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជាធ្វើការបណ្តាក់ទុនវិនិយោគបង្កើតតំបន់កសិ-ឧស្សាហកម្មមួយដើម្បីប្រមូលផ្តុំក្រុមហ៊ុនធ្វើការកែច្នៃជ័រកៅស៊ូ ដើមកៅស៊ូ ឬកសិផលផ្សេងទៀតដែលកំពុងមានសក្តានុពល ដើម្បីផ្គត់ផ្គង់ដល់ឧស្សាហកម្មក្នុងស្រុកដែលកំពុងមានតម្រូវការកើនឡើងពីមួយថ្ងៃទៅមួយថ្ងៃ»។
លោកប្រាប់ទៀតថា ក្រុមប្រឹក្សាអភិវឌ្ឍន៍កម្ពុជានឹងនៅតែបន្តគាំទ្រ ថែទាំការវិនិយោគរបស់វៀតណាមដែលកំពុងមានសកម្មភាពនៅកម្ពុជា និងរង់ចាំស្វាគមន៍ដោយក្តីរីករាយចំពោះការវិនិយោគបន្ថែម។
ជាការឆ្លើយតប លោក Trương Minh Trung បានថ្លែងអំណរគុណដល់ថ្នាក់ដឹកនាំ CDC ដែលបានផ្តល់ព័ត៌មានល្អៗជាច្រើន ជាពិសេសអំពីសភាពការណ៍ថ្មីៗនៃសកម្មភាពវិនិយោគនៅកម្ពុជា ជាពិសេសឧស្សាហកម្មកៅស៊ូ។
បន្ថែមលើនេះ លោកក៏បានប្រាប់គូសន្ទនាអំពីវឌ្ឍនភាពការងាររបស់សម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា និងបានបង្ហាញពីចំណាប់អារម្មណ៍ក្នុងការពង្រីកការវិនិយោគក្នុងវិស័យផលិតថាមពលស្អាតនៅកម្ពុជា ដោយបានស្នើសុំការគាំទ្រពីក្រុមប្រឹក្សាអភិវឌ្ឍន៍កម្ពុជា។
លោកបានបន្តថា ក្នុងនាមជាក្រុមហ៊ុនមានបទពិសោធវិនិយោគនៅកម្ពុជា រូបលោក និងសហការីពិតជាចាប់អារម្មណ៍ចំពោះការវិនិយោគបង្កើតតំបន់កសិ-ឧស្សាហកម្ម ដើម្បីធ្វើការកែច្នៃកសិផលនៅកម្ពុជាសម្រាប់បំពេញឱ្យតម្រូវការប្រើប្រាស់ក្នុងស្រុក និងនាំចេញទៅទីផ្សារអន្តរជាតិ។
របាយការណ៍របស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ ឱ្យដឹងថា ក្នុងឆ្នាំ២០២៤ កម្ពុជាបាននាំចេញជ័រកៅស៊ូទៅទីផ្សារអន្តរជាតិចំនួន ៣៣៨ ០០០ តោន ថយចុះ ៣០ ០៤៨ តោន ឬស្មើនឹង ៨,១៦ ភាគរយធៀបនឹងឆ្នាំ ២០២៣។ ចំណែកប្រាក់ដែលទទួលបាន គឺ ៦៦៦,២៥ លានដុល្លារ។
ការធ្លាក់ចុះបរិមាណជ័រកៅស៊ូនាំចេញទៅទីផ្សារអន្តរជាតិ គឺដោយសារតម្រូវការប្រើប្រាស់ជ័រកៅស៊ូពីសំណាក់ក្រុមហ៊ុនផលិតសម្បកយានយន្តក្នុងស្រុក កើនឡើងគួរឱ្យកត់សម្គាល់នារយៈពេល ២-៣ ឆ្នាំចុងក្រោយនេះ។
អគ្គនាយករង នៃអគ្គនាយកដ្ឋានកៅស៊ូ លោក ឃុន កក្កដា បានឱ្យដឹងថា ទោះបីបរិមាណទិន្នផលជ័រកៅស៊ូនាំចេញទៅទីផ្សារអន្តរជាតិក្នុងឆ្នាំ ២០២៤ ធ្លាក់ចុះបន្តិចធៀបនឹងឆ្នាំ ២០២៣ ប៉ុន្តែសម្រាប់ទិដ្ឋភាពជាក់ស្តែង គឺទិន្នផលជ័រកៅស៊ូដែលកម្ពុជាប្រមូលបានក្នុងឆ្នាំ ២០២៤ ពិតជាកើនឡើង។
លោកបន្តថា មូលហេតុដែលបរិមាណជ័រកៅស៊ូនាំចេញធ្លាក់ចុះ គឺដោយសារតែ ចំនួនរោងចក្រផលិតសម្បកកង់រថយន្តក្នុងស្រុកបានកើនឡើង ដែលធ្វើឱ្យមានតម្រូវការជ័រកៅស៊ូនៅតាមបណ្តារោងចក្រទាំងនោះកើនឡើង។
ផលិតផលជ័រកៅស៊ូ ក្នុងឆ្នាំ ២០២៤ គឺមានប្រមាណ ៤០៧ ២០៩ តោន កើនឡើង ១៥ ៤១០តោន ស្មើនឹង ៣,៩៣ភាគរយធៀបនឹងឆ្នាំ ២០២៣។ នេះបើតាមលោក កក្កដា។
លោកបានថ្លែងថា៖«ជាមួយនឹងវត្តមានរោងចក្រផលិតសម្បកកង់រថយន្តក្នុងស្រុក ក្នុងឆ្នាំ២០២៤ រោងចក្រចំនួន ៣ បានដំណើរការផលិតសម្បកកង់រថយន្ត និងបានស្រូបទាញយកជ័រកៅស៊ូក្នុងស្រុកប្រើប្រាស់ជាវត្ថុធាតុដើមប្រមាណ ៥៨ ០០០ តោន ឬប្រមាណ ៤ ៨០០តោន ក្នុង ១ថ្ងៃ»៕
