ស្រ្តីម្នាក់កំពុងស្វែងរកទិញទំនិញនៅលើប្រព័ន្ធអេឡិចត្រូនិក។ ភ្នំពេញប៉ុស្តិ៍
បដិវត្តន៍ឧស្សាហកម្ម ៤.០ ព្រមទាំងការលេចឡើងវត្តមានជំងឺកូវីដ១៩ នាចុងឆ្នាំ ២០១៩ បានជំរុញឱ្យការប្រើប្រាស់បច្ចេកវិទ្យាក្នុងការធ្វើពាណិជ្ជកម្មនៅទូទាំងពិភពលោក រួមទាំងក្នុងប្រទេសកម្ពុជាហក់ឡើងយ៉ាងលឿនហួសពីការរំពឹងទុក។ ជាក់ស្តែងក្នុងឆ្នាំ ២០២៤ ការធ្វើពាណិជ្ជកម្មអេឡិចត្រូនិក(Cambodia’s E-Commerce)នៅកម្ពុជា មានទឹកប្រាក់សរុបជាង ១,៥ ពាន់លានដុល្លារ។
ឯកសារព្រឹត្តិបត្រពាណិជ្ជកម្ម(iTrade Bulletin) របស់ក្រសួងពាណិជ្ជកម្ម ចេញផ្សាយនារាត្រីថ្ងៃទី៧ ខែមេសា បង្ហាញថា កំណើនពាណិជ្ជកម្មអេឡិចត្រូនិកនៅកម្ពុជា ក្នុងឆ្នាំ ២០២៤ មានទំហំទីផ្សារ ១,៥១ ពាន់លានដុល្លារ ហើយត្រូវបានព្យាករណ៍ថា នឹងកើនដល់ ១,៧៨ ពាន់ដុល្លារក្នុងឆ្នាំ ២០២៥ នេះ ដែលស្មើនឹងកំណើន ១៧,៨៨ ភាគរយ។ ទំហំពាណិជ្ជកម្មអេឡិចត្រូនិកនៅកម្ពុជា គឺស្មើនឹង ១,៣ ភាគរយ នៃទីផ្សារក្នុងតំបន់ដែលមានប្រមាណ ១១៦,៣៦ ពាន់លានដុល្លារ។
ពាណិជ្ជកម្មអេឡិចត្រូនិកក្នុងឆ្នាំ ២០២៤ បានរួមចំណែក ៦,៦៨ ភាគរយនៃផលិតផលក្នុងស្រុកសរុប(GDP)របស់កម្ពុជា។ ពាណិជ្ជកម្មតាមបណ្តាញសង្គម Facebook, TikTok, និង Telegram កំពុងគ្របដណ្តប់លើទីផ្សារអនឡាញនៅកម្ពុជា។
ការទិញតាមប្រព័ន្ធបច្ចេកវិទ្យាភាគច្រើន គឺជាផលិតផលសម្លៀកបំពាក់ ដែលមានប្រមាណ ៣៧ ភាគរយ, ផលិតផលថែរក្សាសម្រស់ និងគ្រឿងសំអាង ២០ ភាគរយ និងការដឹកជញ្ជូនអាហារ ១៩ភាគរយ។
ឯកសារឱ្យដឹងទៀតថា ថ្នាលទិញទំនិញសំខាន់ៗនៅកម្ពុជា រួមមាន Facebook(១១,៦៥ លានគណនី),TikTok(៩,៩៦ លានគណនី) ក្រៅពីនោះមានដូចជា Khmer 24, និង Taobao។ អ្នកទិញភាគច្រើនបានចំណាយក្នុង ១ ដងក្នុង១ខែ ចន្លោះពី ១១ ទៅ ៥០ ដុល្លារ។
ការទូទាត់ប្រាក់ភាគច្រើនធ្វើឡើងតាមរយៈ QR code ដែលមានអត្រា ៤៧,១៥ ភាគរយ, ក្រដាសប្រាក់(ផ្ទាល់) ២៦,៥ ភាគរយ, ការផ្ទេរប្រាក់ ១៣,៣ ភាគរយ និងមធ្យោបាយផ្សេងៗទៀត ១៣,០៥ ភាគរយ។
ប្រធានសមាគមបច្ចេកវិទ្យាឌីជីថលនៃកម្ពុជា លោក ឈិន កេន បានប្រាប់ភ្នំពេញប៉ុស្តិ៍ក្នុងថ្ងៃទី៨ ខែមេសា ថា និន្នាការនៃការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជាបានហក់ឡើងយ៉ាងលឿនចាប់តាំងពីមានការរីករាលដាលជំងឺកូវីដ ១៩ ខណៈការទិញទំនិញដោយប្រើប្រព័ន្ធអេឡិចត្រូនិក គឺមានភាពងាយស្រួល លឿន និងអាចមានតម្លៃទាបជាងទិញទៅផ្សារ។
លោកបន្តថា ជាមួយគ្នានេះរាជរដ្ឋាភិបាលកម្ពុជាក៏បានដាក់ចេញនូវគោលនយោបាយជំរុញ និងលើកកម្ពស់សមត្ថភាពផ្នែកបច្ចេកវិទ្យាដល់ប្រជាជនក្នុងប្រទេសឱ្យកាន់តែទូលំទូលាយផងដែរ។
លោកបានថ្លែងថា៖«ឧបសគ្គនៃការធ្វើដំណើរ និងការប្រាស្រ័យទាក់ទងគ្នាដោយផ្ទាល់នាអំឡុងពេលការរីករាលដាលជំងឺកូវីដ១៩ បានធ្វើឱ្យសម្ទុះនៃការធ្វើពាណិជ្ជកម្មតាមប្រព័ន្ធអេឡិចត្រូនិកកើនឡើងជាបន្តបន្ទាប់ បើទោះបីជាពេលដំបូងៗ ចំណេះដឹងផ្នែកបច្ចេកវិទ្យារបស់ប្រជាជនខ្មែរនៅមានកម្រិតក៏ដោយ»។
ទោះបីយ៉ាងណា លោក ឈិន កេន ទទួលស្គាល់ថា ការធ្វើពាណិជ្ជកម្មតាមប្រព័ន្ធអេឡិចត្រូនិក ក៏មានបញ្ហាប្រឈមមួយចំនួនដែរ ដូចជា ការក្លែងបន្លំរូបរាង គុណភាព ថ្លៃដឹកជញ្ជូនខ្ពស់ និងមានករណីខ្លះអតិថិជនបានផ្ទេរលុយរួចហើយ ប៉ុន្តែមិនផ្ញើទំនិញ ជាដើម៕
