កម្មករកំពុងប្រមូលជ័រកៅស៊ូ ក្នុងចម្ការកៅស៊ូ នៅខេត្តរតនគិរី។ ភ្នំពេញប៉ុស្តិ៍
វិស័យកសិកម្ម កសិ-ឧស្សាហកម្ម និងទេសចរណ៍ ត្រូវបានរដ្ឋាភិបាលកម្ពុជាកំណត់យកជាវិស័យអាទិភាពដើម្បីជំរុញការវិនិយោគ ក្នុងខេត្តនៅភូមិភាគឦសាន ចាប់ពីឆ្នាំ២០២៥-២០២៨ ខណៈក្នុងអាណត្តិមុនៗរាជរដ្ឋាភិបាលបានខិតខំយ៉ាងខ្លាំងលើការកសាងហេដ្ឋារចនាសម្ព័ន្ធរូបវ័ន្តដើម្បីតភ្ជាប់ទៅតំបន់ឆ្ងាយៗ។
កាលពីថ្ងៃទី២៧ ខែកុម្ភៈ ឆ្នាំ២០២៥ រាជរដ្ឋាភិបាលកម្ពុជា បានចេញសេចក្តីសម្រេចមួយស្តីពី«ការដាក់ឱ្យអនុវត្តកម្មវិធីពិសេសជំរុញការវិនិយោគក្នុងខេត្តទាំង៤ នៅភូមិភាគឦសាន នៃព្រះរាជាណាចក្រកម្ពុជា ឆ្នាំ២០២៥-២០២៨» ដែលមានគោលបំណងដាក់ទិសដៅអាទិភាពវិនិយោគ និងអភិវឌ្ឍឆ្ពោះទៅទិសឦសាន។
នេះជាការគិតគូរដែលមានលក្ខណៈជាយុទ្ធសាស្រ្ត ពោលគឺជំរុញការពង្រីកមូលដ្ឋានសេដ្ឋកិច្ចចំពោះបណ្តាខេត្តដែលនៅឆ្ងាយពីមជ្ឈមណ្ឌលកំណើន ក៏ដូចជាជំរុញការតភ្ជាប់នៃចរន្តសេដ្ឋកិច្ចជាតិ។ ខេត្តទាំង ៤ នៅភូមិភាគឦសាន រួមមាន ក្រចេះ ស្ទឹងត្រែង រតនគិរី និងមណ្ឌលគិរី។
ឯកសារបានបញ្ជាក់ថា កម្មវិធីពិសេសនេះ នឹងក្លាយជាទិសដៅគោលនយោបាយដែលមានសារៈសំខាន់មិនត្រឹមតែជំរុញការវិនិយោគ និងអភិវឌ្ឍន៍ភូមិភាគឦសានប៉ុណ្ណោះទេ ប៉ុន្តែក៏នឹងចូលរួមពង្រីកមូលដ្ឋានសេដ្ឋកិច្ច និងការអភិវឌ្ឍវិស័យគន្លឹះ ព្រមទាំងជាប្រភពកំណើនថ្មីរបស់សេដ្ឋកិច្ចជាតិ ស្របតាមសេចក្តីប៉ងប្រាថ្នារបស់រដ្ឋាភិបាល ដូចដែលបានចង្អុលបង្ហាញក្នុងយុទ្ធសាស្រ្តបញ្ចកោណ។
ឯកសារបានសរសេរថា៖«កម្មវិធីពិសេសនេះ គឺជាឯកសារដ៏មានសារៈសំខាន់ក្នុងការចង្អុលបង្ហាញវិស័យអាទិភាពចំនួន ៣ រួមមាន កសិកម្ម កសិ-ឧស្សាហកម្ម និងទេសចរណ៍ ដែលស្របតាមទាយជ្ជទាន(ធនធាន)ដែលមានស្រាប់របស់ខេត្តទាំង ៤ ដែលគួរជំរុញការវិនិយោគបន្ថែម ដោយមានការគាំទ្រយ៉ាងទូលំទូលាយពីរាជរដ្ឋាភិបាល។
កម្មវិធីពិសេសនេះ បានគូសបញ្ជាក់យ៉ាងច្បាស់នូវការលើកទឹកចិត្តដ៏ច្រើនដែលរាជរដ្ឋាភិបាលអាចផ្តល់ជូនផ្នែកឯកជន ហើយក៏មានការគិតគូរពីការផ្តល់ហិរញ្ញប្បទានដែលមានអត្រាការប្រាក់សមរម្យ, ការជួយកាត់បន្ថយថ្លៃដើមផលិតកម្ម, ការសម្រួលនីតិវិធី និងការគាំទ្រសកម្មភាពវិនិយោគឯកជនផងដែរ»។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី៨ ខែមេសា ថា ការដាក់ចេញនូវយុទ្ធសាស្រ្តរបស់រាជរដ្ឋាភិបាលក្នុងការជំរុញការវិនិយោគនៅបណ្តាខេត្តភូមិភាគឦសាន គឺពិតជាមានភាពចាំបាចដើម្បីផ្សារភ្ជាប់ប្រជាជននៅទូទៅប្រទេស និងការអភិវឌ្ឍនៅទីកន្លែងផ្ទាល់តែម្តង។ ភូមិភាគឦសាន ជាទីតាំងមានសក្តានុពលខ្ពស់សម្រាប់ការដាំដុះដំណាំច្រើនប្រភេទ ពិសេសដំណាំកសិ-ឧស្សាហកម្ម ព្រមទាំងវិស័យទេសចរណ៍។
លោកបន្តថា កម្មវិធីពិសេសជំរុញការវិនិយោគក្នុងខេត្តទាំង៤ នៅភូមិភាគឦសាន គឺពិតជានឹងផ្តល់ផលវិជ្ជមានច្រើនសម្រាប់ខេត្តទាំង ៤ តាមរយៈការរៀបចំយុទ្ធសាស្រ្តថ្មីៗដែលមានភាពបត់បែន និងលើកទឹកចិត្តឱ្យមានការពង្រីកការដាំដុះ និងអភិវឌ្ឍទីតាំងផ្សេងៗដើម្បីទាក់ទាញចំណាប់អារម្មណ៍អ្នកវិនិយោគ និងភ្ញៀវទេសចរ ឱ្យទៅទីនោះកាន់តែច្រើន។
លោកថ្លែងថា៖«ខ្ញុំមានសុទិដ្ឋិនិយមថា កម្មវិធីពិសេសជំរុញការវិនិយោគក្នុងខេត្តទាំង ៤ ចាប់ពីឆ្នាំ ២០២៥-២០២៨ នឹងក្លាយជាត្រីវិស័យបង្ហាញផ្លូវដល់អ្នកវិនិយោគឱ្យទៅបោះទុននៅទីនោះកាន់តែច្រើន ពិសេសលើវិស័យដែលរដ្ឋាភិបាលផ្តល់អាទិភាព។ តាមរយៈការវិនិយោគនៅទីនោះ គឺអ្នកវិនិយោគនឹងទទួលបានការលើកទឹកចិត្តច្រើនពីអាជ្ញាធរ»។
លោកលើកឡើងទៀតថា បច្ចុប្បន្នដោយសារការប្រមូលផលបានកាន់តែច្រើន បណ្តាខេត្តនៅភូមិភាគឦសាន ក៏ជួបប្រទះនឹងបញ្ហាកង្វះរោងចក្រ/សហគ្រាសសម្រាប់កែច្នៃផលិតសម្រេចដើម្បីនាំចេញ។
ក្រៅពីនោះ វិស័យអាទិភាពដែលរដ្ឋាភិបាលបានកំណត់ខាងលើ លោក វណ្ណៈ លើកឡើងថា បណ្តាខេត្តនៅភូមិភាគឦសាន ក៏ជាទីតាំងដែលមានសក្តានុពលផ្នែកធនធានរ៉ែ ផងដែរ៕
