ក្រុមកម្មករដើរចេញពីរោងចក្រមួយ កាលពីឆ្នាំ២០២៣។ ទីស្តីការគណៈរដ្ឋមន្ត្រី
គម្រោងវិនិយោគថ្មី និងគម្រោងពង្រីកផលិតកម្ម ចំនួន ១៧២ ដែលមានទុនវិនិយោគសរុប ២,៥ ពាន់លានដុល្លារ និងបង្កើតការងារបានជិត ១២ ម៉ឺនកន្លែង ត្រូវបានក្រុមប្រឹក្សាអភិវឌ្ឍន៍កម្ពុជា(CDC) អនុម័តក្នុងត្រីមាសទី១ ឆ្នាំ ២០២៥ ក្នុងនោះទុនវិនិយោគពីសំណាក់វិនិយោគិនចិនមានច្រើនជាងពាក់កណ្តាលនៃទុនវិនិយោគសរុប។
សេចក្តីប្រកាសព័ត៌មានរបស់ CDC កាលពីថ្ងៃទី ៨ ខែមេសា ឱ្យដឹងថា ចាប់ពីខែមករា ដល់ដំណាច់ខែមីនា ឆ្នាំ ២០២៥ CDC បានចុះបញ្ជីគម្រោងវិនិយោគសរុបចំនួន ១៧២ គម្រោង កើនឡើង ៦៦ គម្រោងបើធៀបនឹងរយៈពេលដូចគ្នាក្នុងឆ្នាំ ២០២៤។ ចំណែកទុនវិនិយោគមានទឹកប្រាក់សរុប ២,៥ ពាន់លានដុល្លារ កើនឡើង ១៤ ភាគរយ។
យោងតាម CDC ក្នុងចំណោមនោះ គឺ ១៦៦ ជាគម្រោងវិនិយោគថ្មី និង ៦ ជាគម្រោងពង្រីកផលិតកម្ម។ មានគម្រោងវិនិយោគចំនួន ៩៩ ស្ថិតនៅក្រៅតំបន់សេដ្ឋកិច្ចពិសេស និង ៧៣ នៅក្នុងតំបន់សេដ្ឋកិច្ចពិសេស(SEZ)។
សម្រាប់ប្រភពទុនសំខាន់ៗ គឺមកពីប្រទេសចិន មានចំណែក ៥៦,២៣ ភាគរយ តាមពីក្រោយដោយវិនិយោគិនក្នុងស្រុក ៣៤,៤ ភាគរយ និងសិង្ហបុរី ២,៩១ ភាគរយ។ វិនិយោគគិនផ្សេងៗទៀតមានដូចជា កោះ British Virgin, វៀតណាម, កោះ Cayman, អង់គ្លេស, កោះ Samoa, អាមេរិក និងកាណាដា។
ជាការកត់សម្គាល់ គម្រោងធំៗក្នុងត្រីមាសទី១ រួមមាន គម្រោងវិនិយោគអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យចំនួន ៣គម្រោង មានអនុភាពសរុប ៣៥០ មេហ្គាវ៉ាត់ ដែលមានទុនវិនិយោគសរុប ២៤៩ លានដុល្លារ។ គម្រោងទាំង ៣ ស្ថិតក្នុងខេត្តកំពង់ឆ្នាំង និងខេត្តពោធិ៍សាត់។
គម្រោងវិនិយោគផ្សេងៗទៀត មានដូចជា គម្រោងវិនិយោគលើរោងចក្រកាត់ដេរសម្លៀកបំពាក់, រោងចក្រផលិតឧបករណ៍បរិក្ខាពេទ្យ និងស្រោមដៃ, ផលិតសម្បកកង់រថយន្ត, ផលិតទៀន, ផ្គុំដំឡើងរថយន្ត, គ្រឿងសង្ហារិម, និងរោងចក្រកែច្នៃអាលុយមីញ៉ូម ជាដើម។
ដោយឡែក ក្នុងខែមីនា កន្លងទៅ CDC បានចុះបញ្ជីគម្រោងវិនិយោគចំនួន ៦០ គម្រោង ក្រោមទុនវិនិយោគប្រមាណ ១,៤ ពាន់លានដុល្លារ និងអាចបង្កើតការងារបានជិត ៥ ម៉ឺនកន្លែង ក្នុងនោះគម្រោងពង្រីកផលិតកម្មមានចំនួន ២ គម្រោង។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ ក្នុងថ្ងៃ៩ ខែមេសាថា ស្ថិរភាពនយោបាយ ប្រព័ន្ធច្បាប់វិនិយោគមានលក្ខណៈអំណោយផល ហេដ្ឋារចនាសម្ព័ន្ធល្អប្រសើរ និងសម្បូរកម្លាំងពលកកម្មជំនាញ បានជួយឱ្យកម្ពុជាទាក់ទាញអ្នកវិនិយោគកាន់តែច្រើនឱ្យចូលមកបណ្តាក់ទុនផ្ទាល់ ជាពិសេសក្នុងរយៈពេលជាង ១ ឆ្នាំកន្លងមកនេះ។
ក្រៅពីនេះកម្ពុជាក៏មានទីផ្សារនាំចេញទំនិញទៅប្រទេសជាច្រើននៅក្រោមលក្ខខណ្ឌពិសេសផ្នែកពន្ធគយ បន្ថែមពីលើកិច្ចព្រមព្រៀងពាណិជ្ជកម្មដែលកម្ពុជាបានចុះហត្ថលេខាជាមួយនឹងប្រទេសមួយចំនួនដូចជា ចិន កូរ៉េ និងកិច្ចព្រមព្រៀងពាណិជ្ជកម្មតំបន់ RCEP ជាដើម។
លោកលើកឡើងទៀតថា កំណើននៃការវិនិយោគលើស្ថានីយផលិតថាមពល ក៏ជាសញ្ញាបញ្ជាក់ពីការប្រមើលឃើញរបស់អ្នកវិនិយោគលើភាពរីកចម្រើននៅក្នុងប្រទេសកម្ពុជាផងដែរ។
លោកបាននិយាយថា៖«ប្រសិនបើស្ថានភាពនៃជម្លោះផ្នែកពាណិជ្ជកម្មនានាលើពិភពលោកដែលកំពុងកើតមាននៅពេលនេះឆាប់បញ្ចប់ទៅវិញ គឺកម្ពុជាប្រាកដជាអាចទាក់ទាញអ្នកវិនិយោគឱ្យចូលមកបណ្តាក់ទុនផ្ទាល់កាន់តែច្រើន»។
កាលពីឆ្នាំ ២០២៤ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងថ្មី និងគម្រោងពង្រីកផលិតកម្មទាំងក្នុងនិងក្រៅតំបន់សេដ្ឋកិច្ចពិសេសសរុបចំនួន ៤១៤គម្រោង និងមានទុនវិនិយោគសរុបប្រមាណ ៦,៩ប៊ីលានដុល្លារ និងអាចបង្កើតការងារបានចំនួន ៣២ម៉ឺនកន្លែង។
