.jpg)
ការធ្វើភីហ្សានំបញ្ចុកនៅក្នុងរាជធានីភ្នំពេញ កាលពីពេលកន្លងទៅ ។ រូបថត សហការី
ភ្នំពេញៈ របោយនំបញ្ចុកចម្រុះពណ៌មានទាំងផ្កាស្នោ ផ្កាកំប្លោក ត្រួយក្ទម្ពទេស និងត្រយូងចេករំលេចលើសម្បកភីហ្សានំបញ្ចុកភាយក្លិនឈ្ងុយទឹកប្រហុក និងឈីសប្រហើរស្រាល។ នេះជាភីហ្សានំបញ្ចុកចម្អិនចេញពីតុល្យភាពលាយបញ្ចូលគ្នានៃគ្រឿងផ្សំប្រពៃណីកម្ពុជា និងរូបមន្តឈីស ដែលទើបតែត្រូវ បានដាក់លក់នៅហាង Pizza 4P''s រាជធានីភ្នំពេញ និងនៅសាខាទីក្រុងហូជីមិញ។
លោក Kayuza Kubota នាយកគ្រប់គ្រង Pizza 4P''s ប្រចាំប្រទេសកម្ពុជាបានប្រាប់ ភ្នំពេញ ប៉ុស្ដិ៍ ឱ្យដឹងថា៖ «គម្រោងការកែច្នៃភីហ្សានំបញ្ចុកនេះ គឺយើងមានតាំងពីមុនពេលបើកដំណើរការហាងជាផ្លូវការកាលពីជិត១ឆ្នាំមុនមកម្ល៉េះ»។
មុនហ្នឹងលោកក៏បានជ្រើសរើសច្នៃធ្វើភីហ្សានំបញ្ចុក លោកបានសួរមិត្តភក្ដិថា តើអ្វីជាម្ហូបអាហារប្រពៃណីខ្មែរដែលល្បី និងពេញនិយមបំផុតនៅកម្ពុជា។
លោកបានរំឭកប្រាប់ថា៖ «ក្រោយពីបង្កើតគំនិតធ្វើភីហ្សានំបញ្ចុកនេះហើយ រយៈពេលប្រមាណ ២ខែ យើងបានពិសោធសាកល្បងធ្វើ និងភ្លក្សជាច្រើនលើកច្រើនសា ដោយមានការលៃលកគ្រឿងផ្សំរហូតដល់ទទួលបានរសជាតិមួយឆ្ងាញ់»។
នំបញ្ចុកជាអាហារប្រពៃណីខ្មែរ ដែលត្រូវបានទទួលទានសម្រាប់អាហារពេលព្រឹក អាហារថ្ងៃត្រង់ ឬជាអាហារសម្រន់។ នៅក្នុងរូបមន្តច្នៃប្រឌិតថ្មី ជំនួសឱ្យនំបញ្ចុក ហាង Pizza 4P''s បានប្រើប្រាស់ភីហ្សា និងឈីស។
គ្រឿងផ្សំប្រពៃណីខ្មែរមានប្រហុក ត្រីស្រស់ ខ្ទិះដូង ភ្លៅកង្កែប ជីរនាងវង កញ្ឆែត ត្រយូងចេក ផ្កាកំប្លោក ផ្កាស្នោ និងត្រួយក្ទម្ពទេស បន្ថែមដោយសណ្ដែកដីលីងស្រួយ និងទឹកឈីសគ្រីមដែលសមល្មមទៅនឹងភីហ្សារសជាតិនំបញ្ចុកខ្មែរនេះ។
នាយកគ្រប់គ្រង Pizza 4P''s ប្រចាំប្រទេសកម្ពុជា បានបញ្ជាក់ថា៖ «យើងប្រើប្រាស់គ្រឿងបុកពណ៌លឿង ប្រហុក ត្រីទឹកសាបស្រស់ៗ ខិ្ទះដូង គ្រឿងទេសប្រពៃណីខ្មែរ ផ្កាកំប្លោក ដោយធ្វើតាមរូបមន្តប្រពៃណីខ្មែរទាំងអស់ គ្រាន់តែបន្ថែមឈីសម៉ូហ្សារ៉ែឡាដែលយើងធ្វើនៅក្នុងហាងផ្ទាល់តែម្ដង។ យើងប្រើប្រាស់សម្បកភីហ្សាជំនួសឱ្យនំបញ្ចុក»។
ការប្រើប្រាស់គ្រឿងផ្សំប្រពៃណីខ្មែរឱ្យត្រូវទៅនឹងរសជាតិភីហ្សាបែបបស្ចិមប្រទេសមិនមែនជាការងាយស្រួលនោះទេ។
លោកបញ្ជាក់ថា៖ «ដោយការគោរពចំពោះវប្បធម៌ខ្មែរ យើងមិនបានផ្លាស់ប្ដូររសជាតិប្រពៃណី និងគ្រឿងផ្សំរូបមន្តដើមនោះទេប៉ុន្តែយើងត្រូវគិតគូរលៃលកយ៉ាងណាឱ្យវាមានរសជាតិត្រូវនឹងម្សៅ និងឈីសភីហ្សា»។
ប្រហុកត្រូវបានយករសជាតិតាមរសជាតិតាមប្រហុកពីស្រុកកំណើតរបស់បុគ្គលិកហាងហើយដើម្បីធ្វើភីហ្សានេះ ប្រហុកត្រូវបានចម្អិនធ្វើជាទឹកស្រូបលើភីហ្សា។
លោក Kubota បញ្ជាក់ទៀតថា៖ យើងគិតគូរយ៉ាងហ្មត់ចត់រាល់ចំណុចលម្អិតតូចតាចក្នុងការសម្របរសជាតិពេលធ្វើភីហ្សានំបញ្ចុកនេះ»។
ភីហ្សានំបញ្ចុកត្រូវសម្ពោធដាក់លក់កាលពីថ្ងៃទី២៥ ខែឧសភា នៅ Pizza 4P''s ប្រទេសកម្ពុជា ហើយ១សប្ដាហ៍ក្រោយ វាត្រូវបានដាក់លក់នៅសាខាហាងភីហ្សា Hai Ba Trung ទីក្រុងហូជីមិញ ប្រទេសវៀតណាម ដោយទទួលបានចំណាប់អារម្មណ៍ខុសៗគ្នាពីអតិថិជន។
លោកបានលើកឡើងថា៖ «យើងទទួលបានមតិឆ្លើយតបទាំង២ប្រភេទ តែនិយាយរួមភាគច្រើនគឺជាមតិវិជ្ជមានទៅលើរសជាតិ និងគំនិតច្នៃប្រឌិតដែលគាំទ្រឱ្យមានការសហការប្រើប្រាស់រូបមន្តម្ហូបខ្មែសហការជាមួយបរទេសបែបនេះ»។
ភីហ្សានំបញ្ចុកមួយទំហំ ២៩ សង់ទីម៉ែត្រ មានតម្លៃ ៧,៨ ដុល្លារ មិនទាន់គិតពន្ធ ហើយអតិថិជនអាចធ្វើការសាកល្បងរសជាតិថ្មីនេះ ដោយកុម្ម៉ង់ភីហ្សាមួយ បែងជា ២ គឺ រសជាតិនំបញ្ចុកពាក់កណ្ដាល លាយជាមួយរសជាតិផ្សេងទៀតពាក់កណ្ដាល។
លោក Kubota បានឱ្យដឹងថា៖ «ចាប់តាំងពីដាក់លក់មក យើងបានលក់ជាង ១០០ នំ (សម្រាប់នំទំហំពេញ)»។
ហាង Pizza 4P''s ក៏បានប្រើប្រាស់គ្រឿងផ្សំចម្បង ដោយផ្ដោតលើគោលការណ៍និរន្តរភាពបរិស្ថាន និងសហគមន៍ប្រជាពលរដ្ឋនៅកម្ពុជា។
នាយកគ្រប់គ្រង Pizza 4P''s ប្រចាំប្រទេសកម្ពុជាបានបន្តទៀតថា៖ «ជម្រើសប្រភពគ្រឿងផ្សំដើរតួនាទីសំខាន់ក្នុងគោលការណ៍និរន្តរភាពរបស់យើងចំពោះបរិស្ថាន សង្គម សហគមន៍ និងតម្លាភាព។
លោកថា៖ «យើងតែងតែសម្លឹងស្វែងរកកិច្ចសហការជាមួយកសិដ្ឋាន និងផលិតករដើម្បីបង្កើនភាគរយក្នុងការប្រើប្រាស់គ្រឿងផ្សំក្នុងស្រុកឱ្យបានច្រើនតាមលទ្ធភាព ហើយភីហ្សានំបញ្ចុកខ្មែរនេះ បានជួយឱ្យយើងបង្កើនការប្រើប្រាស់គ្រឿងផ្សំក្នុងស្រុកកាន់តែច្រើន»។
ភីហ្សានំបញ្ចុក ក៏ជាការច្របាច់បញ្ចូលគ្នានៃម្ហូបខ្មែររសជាតិដើម ជាមួយគំនិតគិតគូរបរិស្ថាន។
នៅក្នុងឆ្នាំ ២០២២ Pizza 4P''s បានព្យាយាមសាកល្បងនូវធនធាននៅក្នុងតំបន់កាន់តែច្រើនតាមដែលអាចធ្វើទៅបាន និងបានគាំទ្រដល់ប្រជាជនក្នុងតំបន់ទទួលបានការងារធ្វើ ផលិតផលធម្មជាតិ និងជួយកាត់បន្ថយកាកសំណល់ភពផែនដី។
សម្បកភីហ្សាត្រូវបានផលិតដោយការប្រមូលផលស៊ុតពីកសិដ្ឋានចិញ្ចឹមមាន់មិនដាក់ទ្រុង នៅទីជនបទឯខេត្តសៀមរាប។ កាកសំណល់សម្បកស៊ុតត្រូវបានកិនក្លាយជាម្សៅ និងបានលាយបញ្ចូលគ្នាជាមួយស្លឹកម្រុំដើម្បីផ្តល់ជាចំណីត្រឡប់ទៅសត្វមាន់ចិញ្ចឹមនោះវិញ។
ការចិញ្ចឹមបែបប្រពៃណី ការចិញ្ចឹមមាន់មិនដាក់ទ្រុង ដោយប្រជាជននៅក្នុងតំបន់ ផ្តល់នូវអនាម័យ សុវត្ថិភាព និងមានគុណភាពខ្ពស់ និងទទួលបានស៊ុតដែលមានវីតាមីនខ្ពស់ និងស៊ុតពណ៌ក្រហមល្អ។
លោក Kubota បានលើកឡើងថា៖ «ទំនាក់ទំនងរបស់យើងគឺមិនត្រឹមតែជាអ្នកផ្គត់ផ្គង់ សម្រាប់ផលិត-ផលគ្រឿងផ្សំប៉ុណ្ណោះទេ យើងក៏ជាដៃគូសហការដ៏ល្អផងដែរ សម្រាប់គម្រោងបែបរង្វង់និងការផ្សព្វផ្សាយអំពីគោល-
គំនិតភាពគ្មានកាកសំណល់»។
កន្លងមកក៏មានបណ្ដាភោជនីយដ្ឋាន និងចុងភៅខ្មែរជាច្រើន យកអាហារប្រពៃណីខ្មែរកែច្នៃជាលក្ខណៈបរទេសដែរ។
ប្រធានសមាគមចុងភៅកម្ពុជា លោក ឡុង ប៊ុនហោ បាននិយាយថា៖ «ពួកខ្ញុំមានខ្លះដែរ នំបញ្ចុកច្នៃស្លចម្អិនទៅជាបែបបរទេសអាចញ៉ាំបាន វាមានបន្លែ មានទឹក មានសាច់ត្រី តែខ្ញុំច្នៃទៅរបស់វេស្ទើនទទួលទានបាន»។
លោកបានជំរុញឱ្យបណ្ដាហាងនានាដែលព្យាយាមផ្សព្វផ្សាយម្ហូបខ្មែរ ធ្វើតាមបែបបទឱ្យត្រឹមត្រូវ សមប្រកប និងគ្រប់លក្ខណៈច្បាស់លាស់ជារបស់ខ្មែរ»។
លោកបានបញ្ជាក់ថា៖ «បើយើងកែច្នៃ យើងកែច្នៃ យើងប្រាកដបញ្ជាក់ថា អាហ្នឹងកែច្នៃ។ ឧទាហរណ៍ថាស្លកកូរឱ្យវាប្រាកដថាស្លកកូរ យើងដាក់ប្រហុក កុំស្លកកូរច្នៃទៅដាក់កាពិអី កុំព្យាយាមកែរបស់ដើមពេក បើរបស់ច្នៃ យើងប្រាកដថានេះរបស់យើងច្នៃ។ យើងកុំយករបស់បែបបុរាណមកច្នៃឱ្យខុសប្រពៃណីខ្មែរយើង ដែលយើងបានចុះបញ្ជីក្នុងបេតិកភណ្ឌហើយ»។
ក្រសួងទេសចរណ៍ដែលជាស្ថាប័នរដ្ឋតែងរៀបចំពិព័រណ៍ម្ហូប និងបណ្ដុះបណ្ដាលអ្នកបម្រើការក្នុងវិស័យ ភោជនីយដ្ឋានបានចាត់ទុកផលិតកម្មម្ហូបអាហារថា រួមចំណែកការលើកស្ទួយ និងស្តារវិស័យទេសចរណ៍ឡើងវិញក្នុងអំឡុង និងក្រោយវិបត្តិកូវីដ១៩។
គំនិតកែច្នៃម្ហូបប្រពៃណីខ្មែរជារសជាតិភីហ្សានេះត្រូវបានលោក គឹម សេរីរ័ត្ន ប្រធាននាយកដ្ឋានគ្រប់គ្រងឧស្សាហកម្មទេសចរណ៍ ដែលរួមមានសេវាកម្មស្នាក់នៅទេសចរណ៍ និងម្ហូបអាហារបានប្រាប់ភ្នំពេញ ប៉ុស្ដិ៍ថា៖ «ក្នុងនាមក្រសួងយើងអត់ទាន់មានណែនាំឬក៏ការសិក្សាវាយតម្លៃអីច្បាស់លាស់ទេ។ សម្រាប់ខ្ញុំក្នុងនាមផ្ទាល់ខ្លួនគ្រប់រូបភាពទាំងអស់នៃការផ្សព្វផ្សាយទៅខាងក្រៅសុទ្ធតែចូលរួមចំណែកផ្សព្វផ្សាយវិស័យទេសចរណ៍យើងទាំងអស់ឱ្យតែគាត់រក្សានូវលំនាំយើងហៅថាឈ្មោះឬក៏ប្រវត្តិដើម»។
លោកបានលើកឡើងទៀតថា៖ «ឥឡូវគាត់ធ្វើភីហ្សាអីគាត់ច្នៃទៅ យកគ្រឿងនំបញ្ចុកដាក់លើភីហ្សា។ សំខាន់ឱ្យតែដឹងថា នេះជាភីហ្សា ដែលគេប្រើគ្រឿងផ្សំពីប្រភេទនំម្យ៉ាងរបស់ខ្មែរ គឺនំបញ្ចុក អាហ្នឹងសុទ្ធតែជួយផ្សព្វផ្សាយទាំងអស់ឱ្យតែគាត់រក្សានៅប្រវត្តិ និងឈ្មោះដើម។ ខ្ញុំគិតថាជារឿងជួយផ្សព្វផ្សាយទាំងអស់ ជាការល្អទាំងអស់ហើយ»៕
