វិទ្យាស្ថាន ខេមអេដ កាលពីរសៀលថ្ងៃទី ២៤ ខែមីនាឆ្នាំ ២០២២ បានរៀបចំសន្និសីទកាសែត ដើម្បីអបអរសារទរនិស្សិតកម្ពុជាដែលទទួលបានជយលាភីចំណាត់ថ្នាក់លេខ ១ ទូទាំងពិភពលោកក្នុងការប្រឡងលើមុខវិជ្ជាមូលដ្ឋានគ្រឹះនៃការគ្រប់គ្រងហិរញ្ញវត្ថុ (Foundation in Financial Management-FFM) នៃកម្មវិធីសិក្សាគណនេយ្យករជំនាញ អេស៊ីស៊ីអេ (ចក្រភពអង់គ្លេស) ក្នុងឆមាសខែធ្នូឆ្នាំ ២០២១ កន្លងទៅក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិត ងី តាយី រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគ្រប់គ្រងកម្មវិធីសិក្សាគណនេយ្យករជំនាញកម្ពុជា និងជាប្រធានគណៈកម្មការចុះឈ្មោះ និងសមាជិកភាពវិទ្យាស្ថានគណនេយ្យករជំនាញ និងសវនករកម្ពុជាព្រមទាំងមានការអញ្ជើញចូលរួមពីសំណាក់លោកនាយកគណៈគ្រប់គ្រងនៃវិទ្យាស្ថាន ខេមអេដ និងលោក នូវ រតនា នាយកការិយាល័យតំណាង អេស៊ីស៊ីអេ ប្រចាំប្រទេសកម្ពុជា និងឡាវ។
លោក ខេស៊ីបាណេត នាយកវិទ្យាស្ថាន ខេមអេដ បានមានប្រសាសន៍ថា៖ «ចាប់តាំងពីឆ្នាំ ២០០៣ មកវិទ្យាស្ថាន ខេមអេដ សហការជាមួយក្រសួងសេដ្ឋកិច្ច និងហិរញ្ញវត្ថុបានធ្វើការបណ្តុះបណ្តាលនិស្សិតជាច្រើនជំនាន់រួចមកហើយ។ ក្នុងរយៈពេល ២០ ឆ្នាំមកនេះវិទ្យាស្ថាន ខេមអេដ បានខិតខំយ៉ាងខ្លាំងដើម្បីបង្កើតកាលានុវត្តភាពដល់និស្សិត និងសាធារណៈជនទូទៅដែលសិក្សានៅវិទ្យាស្ថាន ខេមអេដ ដោយយកគុណភាពជាចម្បងជាពិសេសទៅលើគុណភាពគ្រូបង្រៀន និងកម្មវិធីសិក្សាដើម្បីឱ្យស្របទៅនឹងស្តង់ដារជាតិ និងអន្តរជាតិ»។
លោកបានបន្ថែមថានៅថ្ងៃនេះយើងខ្ញុំមានមោទនភាពដែលលោក ហ៊ីសុខឡេង បានទទួលចំណាត់ថ្នាក់លេខ ១ ទូទាំងពិភពលោកលើការប្រឡងជាអន្តរជាតិលើមុខវិជ្ជាមូលដ្ឋានគ្រឹះនៃការគ្រប់គ្រងហិរញ្ញវត្ថុ (Foundation in Financial Management-FFM) នៃកម្មវិធីសិក្សាគណនេយ្យករជំនាញ អេស៊ីស៊ីអេ (ចក្រភពអង់គ្លេស) ក្នុងឆមាសខែធ្នូឆ្នាំ ២០២១ កន្លងទៅថ្មីៗនេះ។
ឯកឧត្តមបណ្ឌិត ងី តាយី បានមានប្រសាសន៏ថាសន្និសីទកាសែតនាថ្ងៃនេះគឺដើម្បីចូលរួមអបអរសារទរដល់និស្សិតឆ្នើមកម្ពុជាទាំងអស់របស់វិទ្យាស្ថានខេមអេដដែលទទួលបានជ័យលាភីលេខ ១ ក្នុងការប្រឡងមុខវីជ្ជាជាច្រើនក្នុងកម្មវិធី ACCA និង CAT ទាំងទូទាំងពិភពលោក (Worldwide Ranking) និងប្រចាំព្រះរាជាណាចក្រកម្ពុជា (Local Ranking)។ លទ្ធផលថ្ងៃនេះគឺពិតជាបានឆ្លុះបញ្ចាំងពីការខិតខំប្រឹងប្រែងក្នុងការសិក្សាកន្លងរបស់ក្មួយៗកន្លងមករហូតទទួលលទ្ធផលដ៏ល្អប្រសើរសម្រាប់ខ្លួនឯងគ្រួសារ និងប្រទេសយើង។
លោក ហ៊ីសុខឡេង ថ្លែងថា៖ «តាមរយៈការខិតខំរៀនសូត្រ និងការស្រាវជ្រាវបន្ថែមក្រោមការជួយជ្រោមជ្រែងយ៉ាងយកចិត្តទុកដាក់ពីសំណាក់សាស្ត្រាចារ្យនៃវិទ្យាស្ថាន ខេមអេដ កន្លងមកនេះខ្ញុំតែងតែទទួលបានលទ្ធផលល្អប្រសើរលើគ្រប់មុខវិជ្ជាប្រឡង។ ខ្ញុំពិតជាសប្បាយចិត្ត និងរំភើបមែនទែនដែលវិទ្យាស្ថានបានយកចិត្តទុកដាក់ក្នុងការរៀបចំកម្មវិធីសម្រាប់ថ្ងៃនេះដល់រូបខ្ញុំបាទក៏ដូចជានិស្សិតឆ្នើមទាំងអស់គ្នាដែលបានទទួលជយលាភីល្អៗក្នុងការសិក្សាកន្លងមក។ ពួកយើងពិតជាមានមោទនៈភាពយ៉ាងខ្លាំងចំពោះកិច្ចខិតខំប្រឹងប្រែង និងសមិទ្ធផលនានារបស់វិទ្យាស្ថាន ខេមអេដ។ កត្តាទាំងនេះហើយជាហេតុធ្វើឱ្យនិស្សិតនៃវិទ្យាស្ថានខេមអេដតែងតែត្រូវបានគេកោតសរសើរលើលទ្ធផលការសិក្សា និងអាជីពការងារផ្សេងៗ ទាំងក្នុងស្រុក និងអន្តរជាតិ»។
សូមបញ្ជាក់ថាបច្ចុប្បន្នលោក ហ៊ីសុខឡេង គឺជានិស្សិតដែលកំពុងសិក្សាឆ្នាំទី ៤ នៃកម្មវិធីសិក្សាបរិញ្ញាបត្រគណនេយ្យ និងហិរញ្ញវត្ថុ+ សញ្ញាបត្រអន្តរជាតិអ្នកបច្ចេកទេសផ្នែកគណនេយ្យ CAT នៅវិទ្យាស្ថានខេមអេដ។ លោក ហ៊ីសុខឡេង បានទទួលពិន្ទុខ្ពស់លើមុខវិជ្ជាមូលដ្ឋានគ្រឹះនៃការគ្រប់គ្រងហិរញ្ញវត្ថុ (Foundation in Financial Management-FFM) នៃកម្មវិធីសិក្សា គណនេយ្យករជំនាញអេស៊ីស៊ីអេ (ចក្រភពអង់គ្លេស) ក្នុងឆមាសខែធ្នូឆ្នាំ ២០២១ ដោយទទួលបាន ៩១ ពិន្ទុក្នុងចំណោម និស្សិតជាច្រើននាក់នៅទូទាំងពិភពលោកដែលបានប្រឡងលើមុខវិជ្ជាមួយនេះ៕