មន្ទីរពេទ្យ​ជប៉ុន​សាន់រ៉ាយស៍​ភ្នំពេញ​កាលពី​ថ្ងៃ​ទី២៩ ខែ​តុលាបាន​ប្រារព្ធ​ខួប​លើក​ទី ៧ឆ្នាំ នៃ​ការ​ផ្តល់​សេវាថែទាំ​វេជ្ជសាស្រ្ដ​ដ៏ឆ្នើម​បំផុតមួយ​នៅក្នុងប្រទេស​កម្ពុជា។ ព្រឹត្តិការណ៍នេះ​ទទួល​បានការអញ្ជើញ ​ចូលរួម​ពីវត្តមាន​លោក KAMATA Keiya នាយក​ប្រតិបត្តិ​ នៃមន្ទីរពេទ្យ​ជប៉ុន​សាន់រ៉ាយស៍​ភ្នំពេញ, ​លោកវេជ្ជបណ្ឌិត OKAWADA Manabu ប្រធាន​មន្ទីរពេទ្យ​ជប៉ុន​សាន់​រ៉ាយស៍​ភ្នំពេញ វេជ្ជបណ្ឌិត បុគ្គលិក ​ព្រមទាំង​ដៃគូ និងភ្ញៀវកិត្តិយស​ជាច្រើនរូបទៀត​ដែលបាន​ប្រារព្ធ​ធ្វើឡើង​នៅឯ​មន្ទីរពេទ្យ​ផ្ទាល់ នៅក្នុង​ខណ្ឌ​ជ្រោយចង្វារ។

លោក KAMATA Keiya បានបង្ហាញ​មោទនភាព​យ៉ាងធំធេង​ចំពោះ​មន្ទីរពេទ្យនេះ​ដែលបាន​ឈានដល់​​ដំណាក់កាល​ដ៏សំខាន់ ដោយលោកបាន​មានប្រសាសន៍​ថា ៖«ការប្រារព្ធ​ខួប​ ៧ ឆ្នាំ​នៃ​មន្ទីរពេទ្យ​ជប៉ុន​សាន់រ៉ាយស៍​ភ្នំពេញ​នៅថ្ងៃនេះ គឺជាមោទនភាព​យ៉ាងក្រៃលែង​ សម្រាប់​យើង​ទាំងអស់គ្នា»។

«ក្នុងរយៈពេល ៧ ឆ្នាំ កន្លងមកនេះ មន្ទីរពេទ្យ​ជប៉ុន​សាន់រ៉ាយស៍​ភ្នំពេញ បានប្តេជ្ញាចិត្ត​ក្នុងការផ្តល់​សេវាថែទាំ​សុខភាពល្អ​បំផុត​ជូន​ប្រជាជន​កម្ពុជា​ ជាមួយនឹង​ការយកចិត្តទុក​ដាក់ឥត​ងាករេ​របស់​ខ្លួន ដោយផ្តោតលើ​សេវាថែទាំ​វេជ្ជសាស្ត្រ​ស្តង់ដារ​ជប៉ុន និងការព្យាបាល​ដោយចាត់ទុក​អ្នកជំងឺ​ជាអាទិភាព​»។

លោកបន្ថែម​ថា ៖«សព្វថ្ងៃនេះ​យើងបាន​អភិវឌ្ឍន៍​ខ្លួន​ក្លាយជា​មន្ទីរពេទ្យ​ពហុជំនាញ ដែលមាន​ក្រុម​វេជ្ជបណ្ឌិត គិលានុបដ្ឋាក ក៏ដូចជា​បុគ្គលិក​មកពី​គ្រប់​ផ្នែកទាំងអស់​បានខិតខំ​ព្យាយាម​ផ្តល់ការ​ថែទាំ​សុខភាព​ដ៏ល្អបំផុត​ដល់​ប្រជាជន​កម្ពុជា»។

នៅក្នុង​ព្រឹត្តិការណ៍​នោះក៏មាន​ស្តង់ផ្តល់​ព័ត៌មាន​ផ្សេងៗ​របស់​ធនាគារ​អេស៊ីលីដា Getz Pharma, Japan Eye Hospital, Malis Dental Clinic, NTT, Brown ​និងបានបង្ហាញ​ពីសេវាកម្ម​ជាច្រើន​ ដែល​មន្ទីរពេទ្យ​ជប៉ុន​សាន់រ៉ាយស៍​មាន។ លើសពីនេះ​អ្នកចូលរួម​មានឱកាស​បានទស្សនា​ស្តង់​នីមួយៗ និងជួប​ជាមួយ​វេជ្ជបណ្ឌិត និងក្រុមគ្រូពេទ្យ​ដើម្បី​ពិភាក្សា​អំពី​បញ្ហាសុខភាព​សំខាន់ៗ​ដូចជា ផ្នែក​អាហារូបត្ថម្ភ លំហាត់ប្រាណ ការថែទាំ​មាត់ធ្មេញ និងលាងរបួស​ដល់ជំងឺ​ដាច់សរសៃ​ឈាម​ខួរក្បាល ឈឺក្បាល​រ៉ាំរ៉ៃ ជំងឺ​មិនឆ្លង ជំងឺ​ក្រពះពោះវៀន មហារីក និងមាន​ច្រើនទៀត។

ព្រឹត្តិការណ៍នេះ​ក៏មានសកម្មភាព​កម្សាន្ត​ជាច្រើនទៀត​សម្រាប់​ក្រុមគ្រួសារ និងកុមារ​ដើម្បី​ទទួលបាន​ភាពរីករាយ​ក្នុងនោះ​មាន Baby Art Photos និង VR Games ជាមួយអាហារភេសជ្ជៈ​និង​វត្ថុ​អនុស្សាវរីយ៍​ជាច្រើនប្រភេទ។

ចាប់តាំងពី​បានបង្កើត​ឡើង​ក្នុងឆ្នាំ២០១៦ មន្ទីរពេទ្យ​ជប៉ុន​សាន់រ៉ាយស៍​ភ្នំពេញ មានមជ្ឍមណ្ឌល​ចំនួន ៤ សម្រាប់ព្យាបាល​ជូន​អ្នកជំងឺក្រៅ និងអ្នកជំងឺ​សម្រាកពេទ្យ​រួមមាន៖ មជ្ឍមណ្ឌល​សង្គ្រោះបន្ទាន់​ មជ្ឈមណ្ឌល​វះកាត់​ប្រព័ន្ធប្រសាទ និងជំងឺ​ដាច់សរសៃឈាម​ខួរក្បាល មជ្ឈមណ្ឌលព្យាបាល​សរីរាង្គ​រំលាយ​អាហារ និងមជ្ឍមណ្ឌល​ជំងឺ​ទូទៅ និងពិនិត្យ​សុខភាព។

ក្នុងនោះ​មន្ទីរពេទ្យ​ជប៉ុន​សាន់រ៉ាយស៍​ភ្នំពេញ ក៏មាន​សេវាមួយចំនួន​ទៀតដូចជា ផ្នែក​អមរូបភាព​វេជ្ជសាស្ត្រ និងមន្ទីរ​ពិសោធន៍ ផ្នែកស្តាកាយ​និតិសម្បទារ ផ្នែក​ឱសថសាស្ត្រ ក្នុងនោះមាន​បន្ទប់​វះកាត់ ២ បន្ទប់ បន្ទប់​សង្គ្រោះ​ជំងឺ​កំរិត​ធ្ងន់​(ICU & HCU) គ្រែ​ចំនួន ៥០ រថយន្ត​សង្រ្គោះ​បន្ទាន់​ចំនួន ២ រួមជាមួយគ្រឿង​បរិក្ខាទំនើបៗ​ស្តង់ដារ​ខ្ពស់​ដូចជា ម៉ាស៊ីន x-ray, CT, MRI, និង Angiography ជាដើម។

២ ឆ្នាំបន្ទាប់​នាឆ្នាំ២០១៨ មជ្ឈមណ្ឌល​កុមារ​បានចាប់​ផ្តើម​បម្រើ​ជូន​លោកអ្នក​បន្ថែមពីលើ​មជ្ឈមណ្ឌល​វេជ្ជសាស្ត្រ​ដែលមាន។ ដើម្បី​អោយការមាន​សេវាថែទាំ​ពេញលេញ​សម្រាប់​មនុស្ស​គ្រប់វ័យ​នៅ ខែកញ្ញា ឆ្នាំ២០២០ មន្ទីរពេទ្យ​បានបើក​ផ្នែក​រោគស្រ្ដី និងផ្នែក​សម្ភព​ក្នុង​ខែវិច្ឆិកា​ឆ្នាំដដែល។

ដោយបង្ហាញ​ពីការប្តេជ្ញា​ចិត្ត​របស់ខ្លួន​ក្នុងការផ្តល់​សេវាថែ​ទាំសុខភាព​តាមស្តង់ដារ​ជប៉ុន​និង ចាត់​ទុក អ្នកជំងឺ​ជាអាទិភាព មន្ទីរពេទ្យ​ជប៉ុន​សាន់រ៉ាយស៍​ភ្នំពេញ​បានបង្កើន​នូវ​មជ្ឈមណ្ឌល​សរុប​ចំនួន ៧ រួមមាន៖

- មជ្ឈមណ្ឌល​សង្គ្រោះ​បន្ទាន់

- មជ្ឈមណ្ឌល​វះកាត់​ប្រព័ន្ធប្រសាទ​និងជំងឺ​ដាច់សរសៃឈាម​ខួរក្បាល

- មជ្ឈមណ្ឌល​ព្យាបាល​សរីរាង្គ​រំលាយអាហារ

- មជ្ឈមណ្ឌល​ជំងឺទូទៅ

- មជ្ឈមណ្ឌល​អមវេជ្ជសាស្រ្ត

- មជ្ឈមណ្ឌល​ជំងឺកុមារ

-​ មជ្ឈមណ្ឌល​សម្ភព និងរោគស្រ្តី

កាលពី​ពេលថ្មីៗ​នេះ​ បានបើក​មជ្ឈមណ្ឌល​វេជ្ជសាស្ត្រ​សាន់រ៉ាយស៍​សែនសុខ​ក្នុង​ខែមេសា​ឆ្នាំ២០២៣ កន្លងទៅ។ មជ្ឈមណ្ឌល​វេជ្ជសាស្ត្រ​សាន់រ៉ាយស៍​សែនសុខ​នេះ​គឺផ្តល់ការ​ការពារ​សុខភាព​ការព្យាបាល ជំងឺ​ទូទៅ​ក្នុងដំណាក់​កាលដំបូង​និងការអន្តរាគមន៍​ទាន់ពេល​នៃជំងឺ​ផ្សេងៗ​មុនជំងឺ​នោះឈាន​ដល់​ដំណាក់កាល​ស្រួចស្រាវ​ដែលអាច​គំរាមកំហែង​ដល់​អាយុជីវិត៕