​អបអរសាទរ​ខួប​លើក​ទី​១០ របស់ខ្លួន សមាគម Shanty Town Spirit Association បានរៀបចំ​កម្មវិធី​ថ្លែងអំណរគុណ (Thank You) នៅ​សណ្ឋាគារ​រ៉ា​ហ្វ​ល ឡឺ​រ៉ូយ៉ាល់ ភ្នំពេញ នា​ថ្ងៃទី ​៧ ខែធ្នូ ដើម្បី​សម្តែង​ការដឹងគុណ​ដល់​អ្នក​ស​ប្បុរ​សជន និង​ការ ប្តេជ្ញាចិត្ត​គាំទ្រ​បេសកកម្ម​សប្បុរសធម៌​អស់​រយៈពេល​មួយ​ទសវត្សរ៍​កន្លងមកនេះ​។

កម្មវិធី​នា​រាត្រី​នោះ​ក៏មាន​ការសម្ដែង​របាំ​ព្រះរាជ​ទ្រព្យ​កម្ពុជា និង​សិល្បៈ​សហ​សម័យ​ក្រោម​វត្តមាន​របស់​ព្រះ​នាង នរោត្តម ជេន​ណា ព្រមទាំង​ការប្រគំ​តន្ត្រី​បស្ចិមប្រទេស​ផងដែរ​។

ស្ថាបនិក​សមាគម ព្រះ​នាង Ermine Norodom បាន​សម្ដែង​ក្ដី​រីករាយ និង​ការ ដឹងគុណ​ដ៏​ធំធេង​ដល់​អ្នក​ឧបត្ថម្ភ​គាំទ្រ​ក្នុង​រយៈពេល​ជាង​ទសវត្សរ៍​កន្លងមក​។

ព្រះ​នាង​បាន​រំឭក​ប្រាប់ថា៖ «​កាលពី ១០ ឆ្នាំមុន ស្វាមី​ខ្ញុំ​និង​ខ្ញុំ​បាន​បង្កើត​សមាគម Shanty Town Spirit ដើម្បី​ធានាថា​យើង​មិន​ត្រឹមតែ​អាចជួយ​អ្នកមាន​លក្ខណៈសម្បត្តិ​គ្រប់គ្រាន់​ប៉ុណ្ណោះ​ទេ ថែមទាំង​អាច​ផ្តល់ជំនួយ ដល់​អ្នក​ទីទ័លក្រ​ខ្វះខាត​ផងដែរ​»​។

ព្រះ​នាង Ermine បាន​បន្តថា ៖«​យើង​ជឿជាក់​យ៉ាង​មុតមាំ​ថា មនុស្ស​គ្រប់រូប​មិន​ថា​មាន​អាយុ ឋានៈ ឬ​ទ្រព្យសម្បត្តិ​កម្រិតណា​តែ គួរតែមាន​លទ្ធភាព​ទ​ទួលបាន​តម្រូវការ​ជា​មូលដ្ឋាន​»​។

កម្មវិធី​ថ្លែងអំណរគុណ​សប្បុរសជន ស្រប​នឹង​ការ​ប្រារព្ធ​ខួប ១០ ​ឆ្នាំ​នៃ​សមាគម​នេះ ត្រូវបាន​ចូលរួម​ដោយ​ភ្ញៀវ​ជាង ២០០​នាក់ ដែល​នាំគ្នា​មក​អបអរសាទរ​ដល់​ការឈាន​ចូលដល់​ដំណាក់កាល​ដ៏​សំខាន់​មួយ​ក្រោយ​បំពេញបេសកកម្ម​ជាង​មួយ​ទសវត្សរ៍​។

កម្មវិធី​នេះ​ត្រូវបាន​ប្រារព្ធ​ឡើង​ក្នុង​ភាពជា​ដៃគូ​ជាមួយ​អ្នកគាំទ្រ​ធំៗ ដូចជា Edan Group, Halys, Legend Cinema, Pernod Ricard, Raffles Hotel Le Royal, Urban Village និង SinnC Creative Solutions ព្រមទាំង​កាសែត ភ្នំពេញ ប៉ុស្ដិ៍ ជា​ដៃគូ​ផ្សព្វផ្សាយ​ផងដែរ​។

សមាគម Shanty Town Spirit ត្រូវបាន​បង្កើតឡើង​ដោយ​ព្រះ​នាង Ermine និងព្រះអង្គម្ចាស់​នរោត្តម ណា​រិ​ទ្ធិ​ពង្ស ក្នុង​ឆ្នាំ ២០១៣ ដើម្បី​ជួយ​សហគមន៍​ក្រីក្រ​បំផុត​ក្នុង​រាជធានី​ភ្នំពេញ​។

ដោយ​ចាប់ផ្តើម​ពី​ការជួយ​ក្មេង ​២ នាក់​ នៅ​តំបន់​អនាធិបតេយ្យ​ក្នុង​តំបន់​បឹងត្របែក​ក្នុង​រាជធានី ពេលនេះ Shanty Town Spirit បាន​ផ្តល់ជំនួយ​លើកកម្ពស់​សុខភាព អ​នា​ម័​យ ការអប់រំ និង​តម្រូវការ​ពិសេស ក៏ដូចជា​សកម្មភាព​ក​ម្សា​ន្ត​ដល់​មនុស្ស​ជាច្រើន​គ្រួសារ​។

ជាមួយនឹង​ក្រមសីលធម៌​នៃ «​វិញ្ញាណ​តែមួយ បេះដូង​តែមួយ សហគមន៍​មួយ​» សមាគម​បាន​រីកចម្រើន​និង​បានធ្វើ​កិច្ច​ការជួយ​សហគមន៍​រហូតដល់​ជាង ៣០០​នាក់ ដោយ​ផ្ដល់​មធ្យោបាយ និង​ឱកាស​ជា​មូលដ្ឋាន​ដែល​ពួកគេ​ស័ក្ដិសម​នឹង​ទទួលបាន​។

សម្រាប់​ព័ត៌មាន​បន្ថែម​ទាក់ទង​នឹង​បេស​-​ក​កម្ម​មនុស្សធម៌​រប​ស់​សមាគម Shanty Town Spirit សូម​ធ្វើការ​ទាក់ទង​តាមរយៈ​អ៊ីមែ​ល shantytownspirit@gmail.com៕