ដើម្បីសោភ័ណភាពទីក្រុង និងលើកកម្ពស់ការយល់ដឹងរបស់សាធារណជន ក្នុងការទុកដាក់សំរាមឱ្យបានត្រឹមត្រូវនិងចូលរួមចំណែកថែរក្សា ការពារ ធ្វើឱ្យបរិស្ថានស្អាត មានសុខុមាលភាពសាធារណៈ ក្រុមហ៊ុន កូហ្សេតែល (អនឡាញ) និង (អ៊ិនធឺណិត ហូម) រួមសហការជាមួយ ក្រុមហ៊ុន រ៉ូសម៉ាវែល ប្រផឹធី ឌីវេឡុបម៉ិន ឯ.ក, ក្រុមហ៊ុន ម៉ាយក្រូម៉ាកស៍ ឯ.ក, គម្រោងមានជ័យ រ៉េស៊ីដិនស៍, ផ្សារមានជ័យ អាវឺន្យូ និងមានការគាំទ្រជ្រោមជ្រែងចូលរួមពីសំណាក់អាជ្ញាធរខណ្ឌមានជ័យ ខណ្ឌដង្កោ នគរបាលកងរាជអាវុធហត្ថ មន្ត្រីការិយាល័យ ព្រះសង្ឃ ប្រជាពលរដ្ឋ សហភាពសហព័ន្ធយុវជនកម្ពុជា (សសយក) យុវជន/យុវតីកាយរិទ្ធ និងកាកបាទក្រហមកម្ពុជា រួមទាំងមានការចូលរួមពីក្រុមការងាររបស់សមាគមសិល្បៈករខ្មែរ ជាច្រើនកុះករ បានរៀបចំយុទ្ធនាការសម្អាតទីក្រុង ក្រោមប្រធានបទ៖ «បរិស្ថានស្អាត ចាប់ផ្តើមពីយើងទាំងអស់គ្នា!»។
ប្រព្រឹត្តទៅកាលពីព្រឹកថ្ងៃទី២២ ខែមិថុនា ឆ្នាំ២០២៤ «យុទ្ធនាការសម្អាតទីក្រុង» ដែលត្រូវផ្ដួចផ្ដើមដោយបណ្ដាក្រុមហ៊ុន និងគម្រោងអាជីវកម្មខាងលើនេះ ត្រូវបានចូលរួមវត្តមានពីមនុស្សប្រមាណ ៦00នាក់នេះ ដើម្បីធ្វើការសម្អាតតាមដងមហាវិថី សម្ដេចតេជោ ហ៊ុន សែន (ផ្លូវ ៦០ម៉ែត្រ) ចាប់ពីគម្រោងមានជ័យ រ៉េស៊ីដិនស៍ រហូតដល់ផ្សារមានជ័យ អាវឺន្យូ។
មហាវិថីសម្ដេចតេជោ ហ៊ុន សែន ហៅថាផ្លូវ ៦០ម៉ែត្រ បានសម្រួលឲ្យអ្នកដំណើរអាចធ្វើដំណើរពីរាជធានីភ្នំពេញ ឆ្ពោះទៅកាន់ក្រុងតាខ្មៅ ខេត្តកណ្តាល ក៏ដូចជាបានភ្ជាប់ជាមួយផ្លូវក្រវាត់ក្រុង ដែលជួយរំដោះចរាចរណ៍បានយ៉ាងច្រើនចេញទៅលើផ្លូវជាតិនានា។ ដូច្នេះសោភ័ណភាពបរិស្ថាននៅតំបន់នោះដើរតួយ៉ាងសំខាន់ក្នុងការលើកស្ទួយសុខុមាលភាពសាធារណៈអ្នករស់នៅ និងអ្នកដំណើរតាមដងផ្លូវ ដ៏មានចំនួនកាន់តែច្រើនក្រោយពីស្ពានអាកាសមរតកតេជោ ដំណាក់កាលទី១ត្រូវបានដាក់ឱ្យដំណើរការកាលពីខែមេសាកន្លងទៅនេះ។
ភាពស្អាត និងសុខភាពប្រជាពលរដ្ឋជាការងារអាទិភាព ដែលរាជរដ្ឋាភិបាលកម្ពុជា នៅក្នុងអាណត្តិទី ៧ បាននឹងកំពុងយកចិត្តទុកដាក់។ ការសម្អាតអនាម័យបរិស្ថាននៅតាមមូលដ្ឋាន ប្រមូលទុកដាក់សំរាម រួមទាំងការកាត់បន្ថយសំណល់ប្លាស្ទិក ដែលឈានទៅបញ្ឈប់ការប្រើប្រាស់ប្លាស្ទិក ក្នុងចំណោមយុវជនជំនាន់ក្រោយ ធានាការគ្រប់គ្រងសំរាម ថែរក្សាអនាម័យបរិស្ថាននិងសុខុមាលភាពប្រជាពលរដ្ឋ បានល្អប្រសើរ ស្របនឹងភាពស្អាត ដែលជាមុំយុទ្ធសាស្ត្រអាទិភាពទី១ ចែងក្នុងយុទ្ធសាស្ត្រចក្រាវិស័យបរិស្ថាន។
យុទ្ធនាការ នេះស្របទៅនឹងយុទ្ធនាការក្រសួងបរិស្ថាន «កម្ពុជាស្អាត ខ្មែរធ្វើបាន» ដែលបានប្រកាសចាប់ពីថ្ងៃទី១៥ ខែឧសភា ឆ្នាំ២០២៤ ដើម្បីបំផុសឱ្យសិស្សានុសិស្ស ប្រជាពលរដ្ឋចេញរើសសំរាម សំអាតបរិវេណផ្ទះ សាលារៀន វត្តអារាម និងតាមទីសាធារណៈ រៀងរាល់ថ្ងៃសៅរ៍ ដោយប្រមូលទុកដាក់សំរាមឱ្យបានត្រឹមត្រូវ។
ស្របគ្នានេះដែរ «យុទ្ធនាការសម្អាតទីក្រុង» ដែលបានសហការដោយក្រុមហ៊ុន កូហ្សេតែល (អនឡាញ) បានបង្ហាញច្បាស់ពីការតាំងចិត្តចូលរួមពីវិស័យឯកជន ក្នុងការសំអាតបរិស្ថាន លើកស្ទួយការថែរក្សា ការពារបរិស្ថាន និងសោភ័ណភាព ដែលនាំមកនូវសុខុមាលភាពផងដែរ៕