ប៉េកាំង: ទីក្រុងនានារបស់ប្រទេសចិនបានធ្វើតេស្តមនុស្សរាប់លាននាក់ និងបានដាក់កំហិតលើបម្រាមគោចរថ្មីៗ ខណៈអាជ្ញាធរសុខាភិបាលកំពុងប្រយុទ្ធប្រឆាំងដើម្បីទប់ស្កាត់ការផ្ទុះឡើងថ្មីនៃជំងឺកូវីដ ១៩ ក្រោយពីបានធូរស្បើយអស់រយៈពេលប៉ុន្មានខែមក។
យោងតាមទីភ្នាក់ងារសារព័ត៌មានបារាំង Agence France Presse ប្រទេសចិន កាលពីថ្ងៃអាទិត្យ បានរាយការណ៍ជំងឺកូវីដ ១៩ ថ្មីចំនួន ៧៥ ករណី ដោយរាប់បញ្ជូលទាំង ៥៣ ករណីក្នុងសហគមន៍ ពាក់ព័ន្ធនឹងការឆ្លងជាចង្កោមនៃវ៉ារ្យ៉ង់ដែលតាពីអាកាសយានដ្ឋាន Nanjing កាលពីចុងខែកក្កដា ដែលមកទល់ឥឡូវនេះ បានរាលដាលដល់ក្រុងជាង ២០ និងខេត្តជាង ១០។
ខណៈនេះ អាជ្ញាធរចិនបានធ្វើតេស្តចំនួន ៣ ជុំទៅលើប្រជាជនចំនួន ៩,២ លាននាក់ ក្នុងទីក្រុង Nanjing ហើយបានបិទខ្ទប់តំបន់មួយចំនួនដែលមានប្រជាជនរស់នៅរាប់សែននាក់ ដើម្បីទប់ស្កាត់ការផ្ទុះឡើងនៃវ៉ារ្យ៉ង់ដែលឆ្លងរហ័សនេះ។
ទន្ទឹមនឹងនេះអាជ្ញាធរក៏កំពុងតាមដានមនុស្សជាង ៥ ០០០ នាក់ នៅទូទាំងប្រទេសដែលបានចូលរួមមហោស្រពនៅទីក្រុង Zhangjiajie ដែលជាទីក្រុងទេសចរណ៍មួយក្នុងខេត្តហ៊ូណាន។ ក្រុងដែលមានប្រជាជន ១,៥ លាននាក់នេះ ត្រូវបានបិទខ្ទប់ រួមជាមួយកន្លែងទាក់ទាញទេសចរណ៍ទាំងអស់ក្នុងក្រុងបន្ទាប់ពីអ្នកទេសចរ ៤ នាក់បានធ្វើតេស្តវិជ្ជមាន។
ចំណែកឯអាជ្ញាធរក្រុងប៉េកាំងឯណោះវិញ បានបិទផ្លូវដែកឡានក្រុងនិងផ្លូវអាកាសទាំងអស់ ក្នុងតំបន់ដែលមានករណីឆ្លងវីរុសកូរ៉ូណា និងបិទទេសចរក្នុងស្រុកដោយអនុញ្ញាតឱ្យចូលតែអ្នកធ្វើដំណើរសំខាន់ៗដែលមានលិខិតបញ្ជាក់ថាគ្មានវីរុសប៉ុណ្ណោះ។ករណីថ្មីៗ ក៏ត្រូវបានរកឃើញនៅកោះហៃណាន ខេត្ត Ningxia និងខេត្ត Shandong ផងដែរ។
យោងតាមគណៈកម្មការសុខភាពជាតិប៉េកាំងបាននិយាយថា គិតត្រឹមថ្ងៃសៅរ៍សប្ដាហ៍មុន ចិនបានចាក់វ៉ាក់សាំងជាង ១,៦៥ ប៊ីលានដូសដល់ប្រជាជនរបស់ខ្លួន តែមិនផ្តល់តួលេខអំពីចំនួនមនុស្សដែលបានទទួលវ៉ាក់សាំងពេញលេញនោះទេ៕
ហួន ឌីណា