អគារក្រុមហ៊ុនបច្ចេកវិទ្យា Google។ រូបថត AFP
ប្រទេសចំនួន ១៣០ ចុះហត្ថលេខាលើកិច្ចព្រមព្រៀងជាសកលមួយស្តីពីកំណែទម្រង់ពន្ធសាជីវកម្មដែលមានគោលបំណងលុបបំបាត់ទីជម្រកពន្ធ ដោយនឹងជួយរកចំណូលជាង ១៥០ ប៊ីលានដុល្លារ ក្នុង ១ ឆ្នាំបន្ថែមទៀត ពីក្រុមហ៊ុនពហុជាតិ។
ប្រទេសទាំងនេះក៏យល់ព្រមផងដែរ ចំពោះការហាមឃាត់រយៈពេល ២ ឆ្នាំ លើការដាក់ពន្ធថ្មីលើក្រុមបច្ចេកវិទ្យាដូចជា Google និង Amazon ខណៈពេលដែលរដ្ឋបាលរបស់លោកប្រធានាធិបតី ចូ បៃដិន ព្យាយាមផ្តល់សច្ចាប័នលើកិច្ចព្រមព្រៀងនេះនៅសហរដ្ឋអាមេរិក។
កិច្ចព្រមព្រៀងដែលជាកំណែទម្រង់ពន្ធសាជីវកម្មដ៏ធំបំផុតក្នុងរយៈពេលជាង ១ សតវត្សរ៍ដែលរៀបចំឡើងដោយអង្គការដើម្បីសហប្រតិបត្តិការនិងអភិវឌ្ឍន៍សេដ្ឋកិច្ច (OECD) នេះរួមបញ្ចូលទាំងអត្រាពន្ធសាជីវកម្មប្រកបដោយប្រសិទ្ធភាពអប្បបរមា ១៥ ភាគរយ នៅទូទាំងពិភពលោកបូករួមទាំងច្បាប់ថ្មី ដើម្បីបង្ខំឱ្យក្រុមហ៊ុនពហុជាតិរបស់ពិភពលោកប្រកាសប្រាក់ចំណេញ និងបង់ប្រាក់បន្ថែមនៅក្នុងប្រទេសដែលពួកគេធ្វើអាជីវកម្ម។
យោងតាមអ្នកដែលស្និទ្ធនឹងកិច្ចចរចានេះ ចំនួនប្រទេសដែលត្រៀមខ្លួន ដើម្បីចុះបញ្ជីបានប្រែប្រួលនៅថ្ងៃសុក្រចុងសប្ដាហ៍មុនដោយឥណ្ឌាយល់ព្រមចុងក្រោយគេបង្អស់ហើយមានចិន និងប្រេស៊ីលជាហត្ថលេខីដែលស្ទាក់ស្ទើរនឹងកិច្ចព្រមព្រៀង ហើយមានតែស្រីលង្កា ប៉ាគីស្ថាននីហ្សេរីយ៉ា និងកេនយ៉ាប៉ុណ្ណោះដែលបដិសេធវិញ។
កិច្ចព្រមព្រៀងនេះ គឺជាជ័យជម្នះមួយសម្រាប់អង្គការ OECD ដែលព្យាយាមទប់ស្កាត់ការចៀសវាងពន្ធសាជីវកម្មក្នុងរយៈពេលជាច្រើនឆ្នាំនៃការចរចាដ៏ស្មុគស្មាញ។ លោក Mathias Cormann អគ្គលេខាធិការរបស់អង្គការនិយាយថា កិច្ចព្រមព្រៀង នេះនឹងធ្វើឱ្យប្រព័ន្ធពន្ធសាជីវកម្មអន្តរជាតិមានយុត្តិធម៌និងដំណើរការល្អជាងមុន។
កិច្ចព្រមព្រៀងដដែលបានបញ្ចប់ព័ត៌មានលម្អិតស្តីពីការចែករំលែកប្រាក់ចំណេញរបស់ក្រុមហ៊ុនពហុជាតិធំៗ ដូច្នេះពួកគេបង់ពន្ធបន្ថែមនៅកន្លែងដែលពួកគេធ្វើអាជីវកម្ម។ ក្រុមហ៊ុនដែលមានចំណូលលើសពី ២០ ប៊ីលានផោន នឹងត្រូវបែងចែក ២៥ ភាគរយ នៃប្រាក់ចំណេញរបស់ពួកគេលើសពី ១០ ភាគរយ សម្រាប់ប្រទេសដែលខ្លួនដំណើរការដោយផ្អែកលើការលក់របស់ខ្លួន។ ប្រាក់ចំណេញ ១០ ភាគរយ នឹងត្រូវគណនាដោយប្រើយន្តការជាមធ្យមដោយផ្អែកលើប្រាក់ចំណេញមុនពេលបង់ពន្ធ។
ប្រទេសកំពុងអភិវឌ្ឍន៍បានត្អូញត្អែរអំពីការខ្វះប្រាក់ចំណូលដែលខ្លួនបានពីកិច្ចព្រមព្រៀងស្តីពីការបែងចែកប្រាក់ចំណេញត្រឹមត្រូវ និងសិទ្ធិបង់ពន្ធ។ ប្រទេសទាំងនេះចង្អុលបង្ហាញថា បញ្ហានេះកាន់តែអាក្រក់ទៅៗដោយសារការដកពន្ធសេវាកម្មឌីជីថល ទោះបីជាការប៉ាន់ស្មានរបស់ OECD បង្ហាញថា ពួកគេនឹងទទួលបានក៏ដោយ៕
ហួន ឌីណា
