លោក Alexei Navalny មេរិះគន់វិមានក្រឹមឡាំងរុស្ស៊ី។ រូបថត AFP
លោក Alexei Navalny មេរិះគន់វិមានក្រឹមឡាំងរុស្ស៊ី បាននិយាយកាលពីថ្ងៃចន្ទថា គណៈកម្មការពន្ធនាគារបានកំណត់រូបលោកថា ជាជនជ្រុលនិយម និងជាភេរវករ ប៉ុន្តែជាផ្លូវការលែងចាត់ទុកលោកថា ជាហានិភ័យនៃការហោះហើរទៀតហើយ។
លោកបាននិយាយក្នុងការបង្ហោះនៅលើបណ្ដាញសង្គម Instagram ដោយមានជំនួយពីមេធាវីថា លោកត្រូវបានកោះហៅនៅចំពោះមុខគណៈកម្មការដែលបានបោះឆ្នោតជាឯកច្ឆន្ទក្នុងការគាំទ្រការផ្លាស់ប្តូរនាមនេះ។ លោក Navalny បានធ្វើសេចក្តីបំភ្លឺដោយបាននិយាយថា លោកស្វាគមន៍ចំពោះការពិតដែលលោកលែងត្រូវបានគេកំណត់ថា ងាយនឹងរត់គេចខ្លួន។
លោកនិយាយថា៖ «វាគ្រាន់តែថាឥឡូវនេះ មានសញ្ញាមួយនៅពីលើគ្រែរបស់ខ្ញុំថា ខ្ញុំជាភេរវករ»។
ការកំណត់ថ្មីនេះ បានបង្ហាញពីការកើនឡើងបន្ថែមទៀតនៃសម្ពាធផ្លូវការប្រឆាំងនឹងអ្នករិះគន់ក្នុងស្រុកដ៏លេចធ្លោបំផុតរបស់លោកប្រធានាធិបតី វ្ល៉ាឌីមៀរ ពូទីន ដែលត្រូវជាប់ពន្ធនាគារ
២ ឆ្នាំកន្លះ ពីបទរំលោភបំពានលើការដោះលែង ដែលលោកនិយាយថា ត្រូវបានគេប្រើដើម្បីរារាំងមហិច្ឆតានយោបាយរបស់លោក។
អាជ្ញាធររុស្ស៊ីដែលកាន់សំណុំរឿងនាមថ្មីរបស់លោក Navalny មិនទាន់បានបញ្ជាក់ពីការលើកឡើងមួយនេះទេ ហើយសេវាកម្មពន្ធនាគារសហព័ន្ធរុស្ស៊ី ក៏មិនទាន់ធ្វើការអត្ថាធិប្បាយយ៉ាងណាដែរ។ កាលពីចុងខែមេសា ក្រុមឃ្លាំមើលហិរញ្ញវត្ថុរដ្ឋរបស់រុស្ស៊ី បានបញ្ចូលបណ្តាញទីស្នាក់ការកណ្តាលប្រចាំតំបន់របស់លោក Alexei Navalny ទៅក្នុងបញ្ជីឃ្លាំមើលភេរវកម្ម ហើយនៅដើមខែមិថុនា តុលាការរុស្ស៊ីក៏សម្រេចដាក់បណ្ដាញទាំងនេះឱ្យនៅក្រៅច្បាប់។
អ្នកនយោបាយវ័យ ៤៥ ឆ្នាំ Navalny ត្រូវបានអាជ្ញាធររុស្ស៊ីចាប់ដាក់ពន្ធនាគារក្រោយពីវិលត្រឡប់ចូលប្រទេសវិញកាលពីដើមឆ្នាំ ពីប្រទេសអាល្លឺម៉ង់ ជាកន្លែងដែលលោកសម្រាកព្យាបាលខ្លួនក្រោយត្រូវបានគេដាក់ថ្នាំបំពុលដែលរដ្ឋាភិបាលលោក ពូទីន បានបដិសេធពីការឃុបឃិត។ កាលពីខែមុនរុស្ស៊ីបានបើកសំណុំរឿងឧក្រិដ្ឋកម្មថ្មីប្រឆាំងនឹងរូបលោកដែលអាចដាក់ទោសលោកឱ្យជាប់ពន្ធនាគារអស់ ១ ទសវត្សរ៍ទៀត ក្រោមការសង្ស័យថា លោកបានបង្កើត និងដឹកនាំក្រុមជ្រុលនិយម៕
ហួន ឌីណា
