លោក Sheikh Mohammed bin Abdulrahman Al-Thani ថ្លែងក្នុងវេទិកាក្រុងដូហា។ AFP
ប្រទេសកាតា និងអារ៉ាប៊ី សាអ៊ូឌីត បានសម្តែងការសោកស្តាយចំពោះការខ្វះការយកចិត្តទុកដាក់ទៅលើជម្លោះនៅមជ្ឈិមបូព៌ា ខណៈដែលលោកខាងលិច បានជំរុញពួកគេឱ្យបង្ហាញសាមគ្គីភាពបន្ថែមជាមួយអ៊ុយក្រែន។
រដ្ឋមន្ត្រីការបរទេសកាតា លោក Sheikh Mohammed bin Abdulrahman Al-Thani បានថ្លែងប្រាប់ជំនួបតុមូលនៅវេទិកាប្រចាំឆ្នាំនៅទីក្រុងដូហាថា៖ «ការប៉ះពាល់ផ្នែកមនុស្សធម៌ ដែលបានឃើញនៅក្នុងប្រទេសអ៊ុយក្រែន ហើយមនុស្សរាល់គ្នាកំពុងជជែកអំពីបញ្ហានេះ បានធ្វើឱ្យប៉ះពាល់ដល់ប្រទេសជាច្រើននៅក្នុងតំបន់នេះជាច្រើនឆ្នាំ»។
លោកបានបន្ថែមថា៖ «យើងមិនដែលឃើញការឆ្លើយតបជាសកល ដើម្បីដោះស្រាយការប៉ះពាល់ទាំងនោះឡើយ ដោយលើកឡើងពីអំពើព្រៃផ្សៃប្រឆាំងនឹងប្រជាជនស៊ីរី ឬ ប្រឆាំងនឹងប្រជាជនប៉ាឡេស្ទីន ឬប្រឆាំងប្រជាជនលីប៊ី ឬប្រឆាំងប្រជាជនអ៊ីរ៉ាក់ ឬប្រឆាំងប្រជាជនអាហ្វហ្គានីស្ថាន»។
ទាំងស្តេចប្រេងអារ៉ាប៊ី សាអ៊ូឌីត និងកាតាសម្បូរហ្គាស ជិតស្និទ្ធនឹង លោកខាងលិច បានប្រកាន់គោលជំហររឹងមាំដើម្បីគាំទ្រ ឬប្រឆាំងនឹងទីក្រុងម៉ូស្គូ ចាប់តាំងពីទីក្រុងនេះ បានលុកលុយប្រទេសអ៊ុយក្រែន កាលពីខែមុន។
អឺរ៉ុប និងអាមេរិក សង្ឃឹមថា ប្រទេសទាំង ២ នឹងបង្កើនផលិតកម្មប្រេង និងឧស្ម័នដើម្បីជួយកាត់បន្ថយការពឹងផ្អែករបស់លោកខាងលិចលើការផ្គត់ផ្គង់របស់រុស្ស៊ី។
អ្នកការទូតកាតាបានសម្តែងក្តីសង្ឃឹមថា ជម្លោះអ៊ុយក្រែននឹងដើរតួជាការអំពាវនាវដល់មនុស្សគ្រប់រូបនៅក្នុងសហគមន៍អន្តរជាតិ ឱ្យក្រឡេកមើលតំបន់របស់យើង និងដោះស្រាយបញ្ហា ទាំងអស់នេះ ដោយការប្តេជ្ញានូវកម្រិតដូចគ្នាដែលយើង បានឃើញរវាងរុស្ស៊ី និងអ៊ុយក្រែន។
ប្រជាជនរាប់ម៊ឺននាក់នៅប្រទេសយេម៉ែន ត្រូវបានគេសម្លាប់ដោយផ្ទាល់ ឬដោយប្រយោល ហើយរាប់លាននាក់ត្រូវបានជម្លៀសដោយសារជម្លោះរយៈពេលច្រើនឆ្នាំនេះ ជាអ្វីដែលអង្គការសហប្រជាជាតិហៅថា វិបត្តិមនុស្សធម៌អាក្រក់បំផុតនៅក្នុងពិភពលោក។
សង្គ្រាមនៅប្រទេសស៊ីរី ត្រូវបានប៉ាន់ប្រមាណថា បានបណ្តាលឱ្យមនុស្សជិតកន្លះលាននាក់ស្លាប់ និងរាប់លានភៀសខ្លួនចេញពីផ្ទះសំបែងរបស់ពួកគេ ចាប់តាំងពីប្រទេសនេះ បានចាប់ផ្តើមការបង្ក្រាបយ៉ាងព្រៃផ្សៃទៅលើការតវ៉ាប្រឆាំងនឹងរដ្ឋាភិបាលនៅក្នុងឆ្នាំ ២០១១។
នៅក្នុងសារវីដេអូមួយទៅកាន់វេទិកាទីក្រុងដូហាកាលពីព្រឹកថ្ងៃសៅរ៍ លោកប្រធានាធិបតីអ៊ុយក្រែន វ៉ុលឌីមៀរ ហ្សេលេនស្គី បានអំពាវនាវឱ្យប្រទេសកាតា បង្កើនផលិតកម្មឧស្ម័នធម្មជាតិដោយសារជម្លោះនេះ។
លោកបានប្រាប់ទស្សនិកជនដែលរាប់បញ្ចូលមេដឹកនាំកាតាលោក Sheikh Tamim bin Hamad Al-Thani ថា៖ «អនាគតរបស់អឺរ៉ុបស្ថិតនៅលើកិច្ចខិតខំប្រឹងប្រែងរបស់អស់លោកអ្នកទាំងអស់គ្នា»។
លោកបានធ្វើការប្រៀបធៀបរវាងសង្គ្រាមនៅក្នុងប្រទេសរបស់លោក និងជម្លោះនៅក្នុងប្រទេសស៊ីរី ជាទីដែលរុស្ស៊ី បានអន្តរាគមន៍នៅក្នុងឆ្នាំ ២០១៥ ត្រូវបានគេមើលឃើញថា ក្លាយទៅជារលកនៃការគាំទ្រលោកប្រធានាធិបតី បាសារ-អាល់-អាសាដ។
រដ្ឋមន្ត្រីការបរទេសអារ៉ាប៊ី សាអ៊ូឌីត ព្រះអង្គម្ចាស់ Faisal bin Farhan បានបង្ហាញការគាំទ្រជំហររបស់ប្រទេសកាតា។
ព្រះអង្គបានមានបន្ទូលនៅវេទិកានោះថា៖ «ការចូលរួមរបស់សហគមន៍សកល...នៅពេលបច្ចុប្បន្ន និងពេលនោះវាពិតជាខុសគ្នាឆ្ងាយណាស់»។
ព្រះអង្គមានបន្ទូលទៀតថា៖ «សាមគ្គីភាពឆ្លងមហាសមុទ្រអាត្លង់ទិកនាពេលបច្ចុប្បន្ន ពិតជាគួរឱ្យសរសើរណាស់ ដោយថ្លែងថា មន្ត្រីអាមេរិក និងអឺរ៉ុប គាំទ្រព្រះអង្គ»៕
