ប្រធានាធិបតីរុស្ស៊ី លោក Vladimir Putin (ស្ដាំ) និងប្រធានាធិបតីចិន លោក Xi Jinping ក្នុងជំនួបនាពេលកន្លងទៅ។ រូបថត AFP
រុស្ស៊ីនិយាយថា ខ្លួននឹងចាប់ផ្តើមសមយុទ្ធយោធាទ្រង់ទ្រាយធំរួមគ្នា ជាមួយកងកម្លាំងមកពីប្រទេសចិន ដើម្បីបង្ហាញពីទំនាក់ទំនងការពារជាតិកាន់តែជិតស្និទ្ធរវាងទីក្រុងម៉ូស្គូ និងទីក្រុងប៉េកាំង ខណៈសង្គ្រាមនៅអ៊ុយក្រែនកំពុងបន្ត។
សមយុទ្ធ Vostok 2022 នឹងធ្វើឡើងចន្លោះពីថ្ងៃទី ១ ដល់ថ្ងៃទី ៧ ខែកញ្ញា នៅតាមទីតាំងផ្សេងៗ ក្នុងតំបន់ចុងបូព៌ា និងសមុទ្រជប៉ុនរបស់រុស្ស៊ី ដោយនឹងមានការចូលរួមពីទាហានជាង ៥ ម៊ឺននាក់ និងអាវុធ ៥ ពាន់គ្រឿង រួមទាំងយន្តហោះចម្បាំង ១៤០ គ្រឿង និងនាវាចម្បាំង ៦០ គ្រឿង។ នេះបើយោងតាមក្រសួងការពារជាតិរុស្ស៊ី។
សមយុទ្ធ ក៏នឹងមានការចូលរួមពីទាហានមកពីបណ្តាប្រទេសផ្សេងទៀតផងដែរ រួមទាំងរដ្ឋអតីតសហភាពសូវៀតមួយចំនួន ឥណ្ឌា ឡាវ ម៉ុងហ្គោលី នីការ៉ាហ្គា និងស៊ីរី។ ប៉ុន្តែកាសែត Deccan Herald របស់ឥណ្ឌារាយការណ៍ថា ប្រទេសនេះ ដកខ្លួនពីសមយុទ្ធសមុទ្រ ដើម្បីកុំឱ្យប៉ះពាល់ចំណុចរសើបរបស់ជប៉ុន។
ក្រសួងការពារជាតិរុស្ស៊ីកត់សម្គាល់ថា ជាផ្នែកមួយនៃសមយុទ្ធនេះ កងនាវាចរណ៍រុស្ស៊ី និងចិន នៅក្នុងសមុទ្រជប៉ុននឹង «អនុវត្តសកម្មភាពរួមគ្នា ដើម្បីការពារទំនាក់ទំនងលើសមុទ្រ តំបន់នៃសកម្មភាពសេដ្ឋកិច្ចសមុទ្រ និងការគាំទ្រសម្រាប់កងទ័ពជើងគោកនៅក្នុងតំបន់ [ឆ្នេរសមុទ្រ]»។
ក្រសួងនិយាយថា អង្គភាពនៃកងទ័ពអាកាសរុស្ស៊ី យន្តហោះទម្លាក់គ្រាប់បែករយៈចម្ងាយឆ្ងាយ និងយន្តហោះដឹកទំនិញយោធា នឹងចូលរួមក្នុងសមយុទ្ធនេះ រួមជាមួយនឹងកងកម្លាំងដទៃទៀត។
សមយុទ្ធ Vostok 2022 ឆ្លុះបញ្ចាំងពីការបង្កើនទំនាក់ទំនងការពារជាតិ ដែលកាន់តែរឹងមាំរវាងទីក្រុងម៉ូស្គូ និងទីក្រុងប៉េកាំង ក្រោយរុស្ស៊ីលុកលុយអ៊ុយក្រែន។ ចិនបដិសេធយ៉ាងដាច់អហង្ការ ក្នុងការថ្កោលទោសការឈ្លានពានរបស់រុស្ស៊ី ហើយថា សហរដ្ឋអាមេរិកជាអ្នកបង្កាត់ភ្លើងសង្គ្រាម៕
ហួន ឌីណា
