ទូរស័ព្ទ iPhone 14 Pros និង 14 Pro Max ថ្មីត្រូវបានដាក់តាំងបង្ហាញនៅក្នុងព្រឹត្តិការណ៍ Apple នៅ Apple Park ក្នុងទីក្រុង Cupertino រដ្ឋកាលីហ្វ័រនីញ៉ា កាលពីថ្ងៃទី ៧ ខែកញ្ញា ឆ្នាំ ២០២២។ AFP
ការនាំចេញទូរស័ព្ទ iPhone ពីប្រទេសឥណ្ឌាមានទំហំទឹកប្រាក់រហូតដល់ ១ ប៊ីលានដុល្លារ សម្រាប់រយៈពេល ៥ ខែ គិតចាប់ពីខែមេសាមក។ នេះបើតាមការចុះផ្សាយរបស់សារព័ត៌មាន Bloomberg នៅថ្ងៃអង្គារ ទី ៤ ខែតុលា ឆ្នាំ ២០២២។ ទំហំនៃការនាំចេញនេះ បានឆ្លុះបញ្ចាំងឱ្យឃើញពីការដាក់ចិត្តវិនិយោគរបស់ក្រុមហ៊ុនបច្ចេកវិទ្យាអាមេរិក ក្នុងប្រទេសអាស៊ីខាងត្បូងមួយនេះ ខណៈក្រុងញូវដែលីជំរុញការផលិតក្នុងស្រុក។
ប្រភពដដែលបញ្ជាក់ថា ការនាំចេញទូរស័ព្ទ iPhone របស់ក្រុមហ៊ុន Apple ដែលផលិតនៅក្នុងប្រទេសឥណ្ឌា ភាគច្រើនត្រូវបាននាំចេញទៅកាន់ទ្វីបអឺរ៉ុប និងតំបន់មជ្ឈិមបូព៌ា។ តាមគោលដៅក្រុមហ៊ុនគ្រោងនាំចេញផលិតផល ដែលផលិតនៅឥណ្ឌាក្នុងរយៈពេល ១២ ខែ ក្នុងទំហំទឹកប្រាក់ ២,៥ ប៊ីលានដុល្លារ ហើយនឹងសម្រេចបាន នៅក្នុងខែមីនា ឆ្នាំ ២០២៣។ ប្រសិនបើទំហំនៃការនាំចេញសម្រេចដូចការគ្រោងទុក នោះទំហំនេះកើនទ្វេដងធៀបនឹងរយៈពេលដូចគ្នា កាលពីឆ្នាំ ២០២២។
ក្រុមហ៊ុនបច្ចេកវិទ្យាអាមេរិក Apple បានចាប់ផ្តើមផលិតទូរស័ព្ទម៉ូដែល iPhone 13 នៅក្នុងប្រទេសឥណ្ឌាកាលពីដើមឆ្នាំ ២០២២ កន្លងទៅ។ ក្រុមហ៊ុននេះក៏បានប្រកាសកាលពីសប្តាហ៍មុនថា នឹងបន្តផែនការរបស់ខ្លួន ក្នុងការផលិត iPhone 14 ក្នុងប្រទេសឥណ្ឌា។ ចំពោះក្រុមហ៊ុនអាមេរិកមួយនេះ វាមិនមែនជារឿងថ្មីទេ ដោយកន្លងមក Apple ក៏ធ្លាប់បានផលិតទូរស័ព្ទ iPhone នៅក្នុងប្រទេសឥណ្ឌាដែរ។
ការប្រកាសបន្តផលិតទូរស័ព្ទ iPhone 14 នៅប្រទេសឥណ្ឌា ធ្វើឡើងតែ ៣ សប្តាហ៍ប៉ុណ្ណោះ ក្រោយពីក្រុមហ៊ុនបច្ចេកវិទ្យាអាមេរិកមួយនេះ ប្រកាសចេញទូរស័ព្ទជំនាន់ចុងក្រោយរបស់ខ្លួន។ ការណ៍នេះត្រូវបានគេចាត់ទុកថា ជាចំណុចឈ្នះរបស់ប្រទេសឥណ្ឌា ខណៈប្រទេសនេះ កំពុងតែប៉ុនប៉ងចាប់យកចំណែកទីផ្សារផ្គត់ផ្គង់គ្រឿងអេឡិចត្រូនិច សម្រាប់ទីផ្សារពិភពលោក។
សារព័ត៌មាន Bloomberg បានឱ្យដឹងថា ផលិតផលទូរស័ព្ទ iPhone ដែលនាំចេញពីប្រទេសឥណ្ឌា គិតរហូតមកដល់ចុងខែសីហា រួមមានទូរស័ព្ទ iPhone11 iPhone12 និង iPhone13។
សេចក្តីរាយការណ៍ខាងលើ បានកើតឡើង ខណៈពេលដែលក្រុមហ៊ុន Apple កំពុងស្វែងរកការផ្លាស់ប្តូរលើផ្នែកខ្លះនៃផលិតកម្ម iPhone ពីប្រទេសចិនទៅកាន់ទីផ្សារផ្សេងទៀត។ ទីផ្សារទាំងនោះក៏រួមមានប្រទេសឥណ្ឌាដែរ។ ឥណ្ឌាដែលជាទីផ្សារស្មាតហ្វូនធំបំផុតទី២ នៅក្នុងពិភពលោក។ ក្រុមហ៊ុននេះក៏គ្រោងនឹងដំឡើង iPad ក្នុងប្រទេសឥណ្ឌាផងដែរ។
ប្រទេសឥណ្ឌា ម៉ិកស៊ិក និងវៀតណាមបានក្លាយជាទីតាំងសំខាន់នៃរោងចក្រ ដែលផលិតគ្រឿងបង្គំសម្រាប់ក្រុមហ៊ុន Apple អាមេរិក។ ក្រុមហ៊ុននេះ កំពុងតែមានគោលដៅធ្វើពិពិធកម្មផលិតកម្មពីប្រទេសចិន ក្រោយពីប្រទេសនេះ រងនូវការបិទខ្ទប់ដោយកូវីដ ១៩ និងភាពតានតឹង កើនឡើងជាបន្តបន្ទាប់ រវាងក្រុងវ៉ាស៊ីនតោន និងប៉េកាំង។
ក្រោយសេចក្តីរាយការណ៍នេះ ក្រុមហ៊ុន Apple មិនបានឆ្លើយតបបែបណានៅឡើយទេ ចំពោះសំណួររបស់ទីភ្នាក់ព័ត៌មាន Reuters៕
