អ្នកស្រី Anna Kikina ថ្លែងនៅកាន់សារព័ត៌មាននាពេលកន្លងទៅ។ AFP
ជាលើកដំបូង ក្នុងរយៈពេល ២០ ឆ្នាំចុងក្រោយ អ្នកអវកាសរុស្ស៊ី បានជិះយានអវកាស ដែលបាញ់ចេញពីទឹកដីសហរដ្ឋអាមេរិក ឆ្ពោះទៅកាន់ស្ថានីយអវកាសអន្តរជាតិ។ តាមរយៈយានអវកាស ដែលបាញ់ កាលពីថ្ងៃពុធ ទី ៥ ខែតុលា ក៏មានដែរអវកាសយានិករបស់ NASA និងអវកាសយានិកជប៉ុន។
អ្នកស្រី Anna Kikina អវកាសយានិកស្រីតែម្នាក់គត់របស់រុស្ស៊ី បានថ្លែងអំណរគុណជាភាសាអង់គ្លេស និងរុស្ស៊ីថា យើងរីករាយណាស់ ដែលបានធ្វើវាជាមួយគ្នា។ អ្នកស្រី គឺជាអវកាសយានិក ដែលស្ថិតក្នុងចំណោមអ្នកចំណូលថ្មីទាំង ៣នាក់។ ក្រុមអវកាសយានិក ៣នាក់ទៀត គឺអ្នកស្រី Nicole Mann ជាស្ត្រីដើមកំណើតអាមេរិកដំបូងគេ ដែលនឹងធ្វើដំណើរជុំវិញភពផែនដី និងលោក Josh Cassada។ ចំណែកពីទីភ្នាក់ងារអវកាសជប៉ុនវិញ មានលោកKoichi Wakata ដែលហោះទៅកាន់ស្ថានីយអវកាសជាលើកទី៥។
បើតាមការគ្រោងទុក អ្នកអវកាសទាំង ៤ នឹងទៅដល់ស្ថានីយអវកាសអន្តរជាតិ នៅថ្ងៃព្រហស្បតិ៍ ទី ៦ ខែតុលា ពោលគឺមានរយៈពេល ២៩ ម៉ោង បន្ទាប់ពីហោះចេញពីមជ្ឈមណ្ឌលអវកាស Kennedy របស់ទីភ្នាក់ងារអវកាសអាមេរិក NASA។ តាមរយៈបេសកកម្មនេះ ពួកគេនឹងចូលទៅជំនួសអវកាសយានិកអាមេរិក-អ៊ីតាលី ដែលមកដល់ កាលពីខែមេសា ហើយពួកគេនឹងត្រឡប់មកផែនដីវិញ ក្នុងខែមីនា ឆ្នាំ ២០២៣។
ការបាញ់បង្ហោះយានរបស់ក្រុមហ៊ុន SpaceX ក្នុងបេសកកម្មនេះ ត្រូវបានពន្យារពេលម្តងមកហើយ ដោយសារព្យុះ Hurricane Ian កាលពីសប្តាហ៍មុន។ ប៉ុន្តែសម្រាប់ថ្ងៃពុធ ទី៥ ខែតុលា អាកាសធាតុអំណោយផលល្អ សម្រាប់គ្រាប់រ៉ុកែត Falcon ដែលបញ្ជូនយានឆ្ពោះទៅកាន់លំហរអាកាស។
ជាការពិតវត្តមានរបស់អ្នកស្រី Kikina អ្នកអវកាសរុស្ស៊ីក្នុងបេសកកម្មនេះ គឺជាការផ្លាស់ប្តូរ រវាងទីភ្នាក់ងារអវកាសរុស្ស៊ី និងទីភ្នាក់ងារអវកាសអាមេរិក NASA នៅក្រោយពេលអវកាសយានិកអាមេរិក លោក Frank Rubio ហោះតាមយាន Soyuz របស់រុស្ស៊ីទៅកាន់ស្ថានីយអវកាសអន្តរជាតិ កាលពី ២ សប្តាហ៍មុន ក្នុងទឹកដីកាហ្សាក់ស្ថាន។
ទីភ្នាក់ងារអវកាសនៃប្រទេសទាំង ២ បានព្រមព្រៀងគ្នា កាលពីរដូវក្តៅកន្លងទៅ ក្នុងផ្លាស់ប្តូរកៅអី សម្រាប់អ្នកអវ កាស ដើម្បីធានាបាននូវវត្តមានរបស់ជនជាតិអាមេរិក និងរុស្ស៊ីនៅលើស្ថានីយអវកាសអន្តរជាតិ ដែលមានកម្ពស់ជាង ៤២០ គីឡូម៉ែត្រពីផែនដី។ បើទោះជាមានភាពតានតឹង រវាងប្រទេសទាំង ២ ជុំវិញការលុកលុយរបស់រុស្ស៊ីលើអ៊ុយក្រែនក្តី ប៉ុន្តែការដោះដូរនេះ នៅតែត្រូវបានធ្វើឡើង។ ទីភ្នាក់ងារអវកាសទាំង ២ ក៏នឹងមានការផ្លាស់ប្តូរបែបនេះម្តងទៀត នៅនិទាឃរដូវខាងមុខ។
អ្នកគ្រប់គ្រងទីភ្នាក់ងារអវកាសអាមេរិកលោក Bill Nelson បានថ្លែងថា ហេតុផលសំខាន់ ក្នុងការប្តូរកន្លែងអង្គុយ រវាងអវកាសយានិកនៃប្រទេសទាំង ២ គឺដើម្បីសុវត្ថិភាព។ សុវត្ថិភាពនៅត្រង់ថា ក្នុងករណីមានអាសន្ន ដែលបង្ខំឱ្យយានមួយ មិនអាចហោះបាននោះ គេសល់យាន ១ ទៀត ដែលមានវត្តមានអវកាសយានិកអាមេរិក និងរុស្ស៊ីនៅទីនោះ។
ក្នុងកាលៈទេសៈនេះ រុស្ស៊ីនៅតែបន្តការប្តេជ្ញាចិត្តរបស់ខ្លួន ដើម្បីបេសកកម្មនៅស្ថានីយអវកាស រហូតដល់ឆ្នាំ ២០២៤។
នេះបើតាមបញ្ជាក់ពីមន្ត្រីអវកាសរុស្ស៊ីលោក Sergei Krikalev ដែលបានថ្លែងប្រាប់អ្នកសារព័ត៌មាន បន្ទាប់ពីការបាញ់បង្ហោះយានអវកាស។ រុស្សីបានបង្ហាញពីបំណងសាងសង់ស្ថានីយអវកាសរបស់ខ្លួន នៅចុងទសវត្សរ៍នេះ ប៉ុន្តែលោក Sergei Krikalev បានបញ្ជាក់ថា ការសាងសង់ គឺត្រូវការពេលវេលា ដូច្នេះវាសមហេតុផល ក្នុងការបន្តសហការជាមួយ NASA៕
