លោកប្រធានាធិបតីបារាំង អេម៉ានុយអែល ម៉ាក្រុង(ឆ្វេង) ចាប់ដៃជាមួយលោកនាយករដ្ឋមន្ត្រីន័រវែស Jonas Gahar Store។ រូបថត AFP
ប្រទេសតួកគី នៅតែជាឆ្អឹងទទឹងកសម្រាប់ប្រទេសហ្វាំងឡង់ និងស៊ុយអែត ដែលស្ថិតនៅតំបន់ខាងជើងទ្វីបអឺរ៉ុប និងអាត្លង់ទិកខាងជើង ដែលគេហៅថា «Nordic» ទាំង ២ សម្រាប់ការដាក់ពាក្យសុំចូលជាសមាជិកក្នុងអង្គការសន្ធិសញ្ញាអាត្លង់ទិកខាងជើង (NATO) ដែលប្រទេសទាំង ២ យល់ថា ខ្លួនកំពុងរងការគំរាមកំហែងពីមហាអំណាចរុស្ស៊ី ដែលបានលុកលុយអ៊ុយក្រែន។
តួកគីដែលជាសមាជិករបស់អង្គការយោធាណាតូ ៧០ ឆ្នាំកន្លងមកនេះធ្លាប់បានបដិសេធបេក្ខភាពហ្វាំងឡង់ និងស៊ុយអែត ក្នុងពេលដ៏ស្រួចស្រាល់ដោយសារសង្គ្រាមពីសំណាក់ប្រទេសរុស្ស៊ីប៉ងលេបយកអ៊ុយក្រែន ដែលជាប្រទេសក្បែរខាង ខ្លួននោះ នៅតែមិនទាន់ផ្តល់សច្ចាប័នសម្រាប់ការចូលជា សមាជិកនៃប្រទេសទាំង ២ ទៅក្នុងអង្គការណាតូនៅឡើយទេ ខណៈប្រទេស ២៨ ផ្សេងទៀតក្នុងចំណោម ៣០ បានផ្តល់ សច្ចាប័នរួចហើយ។
រហូតដល់ថ្ងៃទី ៦ ខែតុលា នេះមានតែប្រទេស ២ ទៀតប៉ុណ្ណោះ គឺ តួកគី និង ហុងគ្រី ដែលតែងជំទាស់ និងអនុវត្តតាមការសម្រេចចិត្តនានារបស់អឺរ៉ុបប្រឆាំងនឹងរុស្ស៊ី មិនទាន់ផ្តល់សច្ចាប័នសម្រាប់ការសុំចូលជាសមាជិកនៃអង្គការណាតូរបស់ប្រទេសស៊ុយអែត និងហ្វាំងឡង់នោះទេ។
ប្រទេសសមាជិកណាតូពេញសិទ្ធិដែលបានផ្តល់សច្ចាប័នរួចហើយ រួមមាន អេស្ប៉ាញ ព័រទុយហ្គាល់ ស្លូវ៉ាគី ក្រិក សាធារណរដ្ឋឆែក សហរដ្ឋអាមេរិកអុីតាលី បារាំង ម៉ុងតេណេហ្គ្រោម៉ាសេដូនីខាងជើង រ៉ូម៉ានី បែលហ្ស៊ិក លីទុយអានី ប៉ូឡូញក្រូអាស៊ី ស្លូវេនី ឡេតូនី ប៊ុលហ្គារីលុចសំបួ ហូឡង់ អាល្លឺម៉ង់អាល់បានី អង់គ្លេស អេស្តូនី ន័រវែស អុីស្លង់ ដាណឺម៉ាក និងកាណាដា។ នេះបើយោងតាម Atlantic Council ដែលបានធ្វើ បច្ចុប្បន្នភាពនៅថ្ងៃទី ២ កញ្ញា ។
យោងតាមការចេញផ្សាយរបស់ទីភ្នាក់ងារព័ត៌មានតួកគី Anodolu កាលពីថ្ងៃពុធ គណៈប្រតិភូតួកគី និងស៊ុយអែត កំពុងពិភាក្សាលើការធ្វើបត្យាប័នអ្នកដែលតួកគីចោទថាជា «ភេរវករ» ប្រឆាំងរដ្ឋាភិបាលកាលពីឆ្នាំ ២០១៦ និងសកម្មប្រយុទ្ធផ្សេងទៀតដែលទាមទារដោយភាគីតួកគី ក្រោមកិច្ចព្រមព្រៀងណាតូ។
កិច្ចពិភាក្សារយៈពេល២ថ្ងៃបានធ្វើឡើងនៅក្នុងរដ្ឋធានីអង់ការ៉ារបស់តួកគី ដោយភាគីតួកគី ដឹកនាំដោយលោក Kasim Cicek អគ្គនាយកទំនាក់ទំនងការបរទេស និងសហភាពអឺរ៉ុប នៅក្រសួងយុត្តិធម៌។
១ សប្តាហ៍ការជួបពិភាក្សានោះ រដ្ឋមន្ត្រីក្រសួងយុត្តិធម៌តួកគី លោក Bekir Bozdag បាននិយាយថា៖ «យើងរំពឹងថា ប្រទេសស៊ុយអែត និងហ្វាំងឡង់នឹងធ្វើបត្យាប័នសមាជិក FETO និង PKK (ក្រុមភេរវកម្ម) ទៅកាន់ប្រទេសតួកគីក្នុងវិសាលភាពនៃកិច្ចព្រមព្រៀងណាតូ» ។
អនុស្សរណៈត្រីភាគីនៅក្នុងកិច្ចប្រជុំកំពូលរបស់អង្គការណាតូដែលបានចុះហត្ថលេខាក្នុងចំណោមប្រទេសក្នុងខែមិថុនា កំណត់ថា ហ្វាំងឡង់ និងស៊ុយអែត នឹងមិនផ្តល់ការគាំទ្រដល់ អង្គការប្រជាជនអម្បូរឃើដស៊ីរីដែលមានទំនាក់ទំនងបក្សសហភាពប្រជាធិបតេយ្យ (YPG/PYD) ដែលពួកគេកំពុងវាយប្រហារនៅស៊ីរី ឬផ្តល់ការគាំទ្រដល់អង្គការ Fetullah (FETO) ដែលរដ្ឋាភិបាលតួកគីចោទថា ក្រុមភេរវករនៅពីក្រោយរដ្ឋប្រហារបរាជ័យនៅឆ្នាំ ២០១៦ នៅប្រទេសតួកគី។
ប្រទេសស៊ុយអែត និងហ្វាំងឡង់ បានដាក់ពាក្យជាផ្លូវការដើម្បីចូលរួមជាមួយអង្គការណាតូក្នុងខែមិថុនា ដែលជាការសម្រេចចិត្តជំរុញដោយសង្គ្រាមរបស់រុស្ស៊ីលើអ៊ុយក្រែន។ យ៉ាងណាក៏ដោយ ប្រទេសតួកគី ដែលជាសមាជិករបស់អង្គការណាតូអស់រយៈពេលជាង ៧០ ឆ្នាំមក ហើយ បានជំទាស់ចំពោះការប្រឹងប្រែងចូលជាសមាជិកភាព ដោយបានរិះគន់ប្រទេសទាំង ២ ចំពោះការអត់ឱន និងថែមទាំងគាំទ្រក្រុមភេរវករទៀតផង។
ធម្មនុញ្ញរបស់អង្គការណាតូបាននិយាយថា ការបញ្ចូលសមាជិកថ្មីទៅក្នុងអង្គការយោធាមួយនេះ តម្រូវឱ្យមានការឯកភាពជាឯកច្ឆន្ទ មិនមែនសម្រេចដោយសំឡេងភាគច្រើននោះទេ។ ព្រោះហេតុនោះ ទើបតួកគី តែងតែចេញមុខជំទាស់បំណងដ៏សំខាន់របស់ហ្វាំងឡង់ និងស៊ុយអែត ដោយដាក់លក្ខខណ្ឌសម្រាប់ទាមទាររបស់ខ្លួន។
សភារបស់ប្រទេសតួកគី ត្រូវតែផ្តល់សច្ចាប័នលើការដាក់ពាក្យចូលជាសមាជិកភាពដោយប្រទេសហ្វាំងឡង់ និងស៊ុយអែត ដើម្បីឱ្យពួកគេចូលរួមជាមួយអង្គការណាតូ។
ប្រទេសហ្វាំងឡង់ និងស៊ុយអែត ដែលស្ថិតនៅតំបន់ខាងជើងទ្វីបអឺរ៉ុប និងសមុទ្រអាត្លង់ទិកខាងជើង ដែលគេហៅ ថា «Nordic» មានព្រំដែនជាប់ប្រទេសរុស្ស៊ី បានដាក់ពាក្យស្នើចូលអង្គការសម្ព័ន្ធមិត្តយោធា NATO យ៉ាងតក់ក្រហល់បំផុត បន្ទាប់ពីឃើញប្រទេសរុស្ស៊ី លើកទ័ពចូលលុកលុយប្រទេសអ៊ុយក្រែន ដែលជារដ្ឋអធិបតេយ្យ នៅជាប់ប្រទេសរុស្ស៊ីដែរ។
គោលបំណងនៃការចូលជាសមាជិករបស់អង្គការណាតូនេះ ក៏ព្រោះតែក្តីរំពឹងថា ក្នុងពេលខ្លួនបានក្លាយជាសមាជិកនៃអង្គការយោធានេះពេញសិទ្ធិជាអង្គការយោធាមួយដែលដឹកមុខដោយសហរដ្ឋអាមេរិកនេះ នឹងជួយការពារខ្លួន ឬជួយខ្លួនក្នុងការប្រយុទ្ធក្នុងករណីដែលប្រទេសរុស្ស៊ី ធ្វើការលុកលុយ ដូចករណីអ៊ុយក្រែន៕
វីដេអូ៖
