លោក Erdogan (កណ្ដាល) ថ្លែងទៅកាន់រដ្ឋសភា ដើម្បីប្រារព្ធពិធីបើកនីតិកាលថ្មី នៅមហាសន្និបាតជាតិតួកគី ក្នុងទីក្រុងអង់ការ៉ា ថ្ងៃទី ១ ខែតុលា ឆ្នាំ២០២២។ AFP
សភាតួកគី ប្រហែលដល់ពេលបើកភ្លើងខៀវ (ផ្ដល់ការអនុញ្ញាត) សម្រាប់ការផ្តល់សច្ចាប័នលើការស្នើសុំចូលជាសមាជិកពេញសិទ្ធិរបស់ប្រទេសហ្វាំងឡង់ និងស៊ុយអែត ទៅក្នុងអង្គការសន្ធិសញ្ញាអាត្លង់ទិកខាងជើង (ណាតូ) បន្ទាប់ពីថ្នាក់ដឹកនាំសភាទាំង ៣ ប្រទេស បានជួបគ្នា។
ខណៈពេលដែលការទន្ទឹងរង់ចាំការផ្តល់សច្ចាប័នពីរដ្ឋសភាតួកគី ដែលនឹងក្លាយជាប្រទេសចុងក្រោយបំផុត សម្រាប់ការសុំចូលជាសមាជិកភាពរបស់ប្រទេសស៊ុយអែត និងហ្វាំងឡង់ ទៅក្នុង អង្គការណាតូ ប្រមុខរដ្ឋសភានៃប្រទេសទាំង ៣ ជួបគ្នាផ្ទាល់និយាយគ្នាជុំវិញសំណុំរឿងក្រុម «YPG/PYD និង FETO» ដែលតួកគី ចាត់ទុកជាក្រុមភេរវករ ហើយហ្វាំងឡង់ និងស៊ុយអែត ផ្តល់ការគាំទ្រ កន្លងមក។
នៅក្នុងជំនួបត្រីភាគី ក្នុងរដ្ឋធានី Zagreb នៃប្រទេសក្រូអាស៊ី ដែលនៅទីនោះ ថ្នាក់ដឹកនាំជាន់ខ្ពស់រដ្ឋសភា បានចូលរួមកិច្ចប្រជុំសភាលើកដំបូងនៃវេទិកា Crimean អន្តរជាតិ ប្រមុខរដ្ឋសភាតួកគី លោក Mustafa Sentop បានជួបជាមួយសមភាគីស៊ុយអែត លោក Andreas Norlen និងប្រធានអនុសភាហ្វាំងឡង់ លោក Antti Rinne ដោយសភាតួកគី បានសន្យាផ្តល់សច្ចាប័ន នៅទីបំផុត ពេលដែលអនុស្សរណៈកាលពីខែមិថុនា ត្រូវបានអនុវត្ត។
រហូតមកដល់ពេលនេះ មានប្រទេសតែ ២ ប៉ុណ្ណោះនៃសមាជិកណាតូពេញសិទ្ធិទាំង ៣០ គឺតួកគី និងហុងគ្រី មិនទាន់ផ្តល់សច្ចាប័ន សម្រាប់ការស្នើសុំចូលជាសមាជិករបស់ហ្វាំងឡង់ និងស៊ុយអែត ដែលប្រទេសទាំង ២ មានការភ័យខ្លាចពីការឈ្លានពានរបស់រុស្ស៊ី ដូចករណីនៅអ៊ុយក្រែន។
យោងតាមការផ្សាយរបស់ភ្នាក់ងារសារព័ត៌មានតួកគី Anadolu តួកគីរំពឹងថា ហ្វាំងឡង់ និងស៊ុយអែតនឹងរារាំងក្រុមភេរវករ YPG/PYD និង FETO ពីប្រតិបត្តិការ ដោយសេរីនៅលើដីនៃប្រទេសទាំង ២ នោះ។ ក្នុងជំនួបនោះ ប្រធានសភាតួកគី បានសរសើរការប្តេជ្ញាចិត្តយ៉ាងម៉ឺងម៉ាត់របស់ហ្វាំងឡង់ ចំពោះអនុស្សរណៈនៃការយោគយល់គ្នាត្រីភាគី ដែលខ្លួនបានចុះហត្ថលេខា ក្នុងកិច្ចប្រជុំកំពូល កាលពីខែមិថុនារបស់ណាតូ ក្នុងទីក្រុងម៉ា្រឌីដ ដែលចែងថាហ្វាំងឡង់ និងស៊ុយអែត នឹងមិនផ្តល់ការគាំទ្រដល់ក្រុម YPG/PYD ក្រុមភេរវករ PKK ឬអង្គការភេរវករ Fetullah (FETO) ដែលជាអ្នកនៅពីក្រោយរដ្ឋប្រហារឆ្នាំ ២០១៦ នៅប្រទេសតួកគី។
លោក Sentop ក៏បានសម្តែងការពេញចិត្ត ចំពោះការសន្យារបស់រដ្ឋាភិបាលស៊ុយអែត ថ្មីថា ខ្លួននឹងបន្តគោលនយោបាយស្រដៀងគ្នានេះ។ ប្រធានសភាតួកគី ក៏បានអះអាងពីការប្រយុទ្ធរបស់តួកគីជាមួយភេរវករ PKK អស់រយៈពេល ៤ ទសវត្សរ៍មកហើយ ប៉ុន្តែប្រទេសរបស់លោក មិនបានទទួលការគាំទ្រគ្រប់គ្រាន់ ក្នុងរឿងនេះពីសម្ព័ន្ធមិត្តណាតូរបស់ខ្លួនឡើយ។
លោកនិយាយថា ជាគោលការណ៍ តួកគីគាំទ្រការប្រឹងប្រែងចូលជាសមាជិកភាពរបស់ណាតូទាំងហ្វាំងឡង់ និងស៊ុយអែត ប៉ុន្តែសភាតួកគី នឹងធ្វើការសម្រេចចិត្ត នៅទីបំផុត បន្ទាប់ពីបានពិនិត្យមើលថា តើប្រទេសទាំង ២ បានបំពេញកាតព្វកិច្ចរបស់ពួកគេស្របតាមអនុស្សរណៈនេះ ឬយ៉ាងណា។ លោកបានព្រមានថា៖ «នៅក្រោមស្ថានភាពបច្ចុប្បន្ន វាមិនអាចទៅរួចទេក្នុងការបញ្ចុះបញ្ចូលសាធារណជនតួកគីថា លក្ខន្តិកនៃអនុស្សរណៈ ត្រូវបានអនុវត្ត»។ នេះបើតាមបណ្ដាញសារព័ត៌មានដដែល។
ហ្វាំងឡង់ និងស៊ុយអែត បានដាក់ពាក្យសុំចូលជាសមាជិកអង្គការណាតូ ក្នុងខែមិថុនា ដោយជាការសម្រេចចិត្ត ដែលជំរុញដោយសង្គ្រាមរបស់រុស្ស៊ី លើអ៊ុយក្រែន។ តែតួកគី ដែលជាសមាជិកណាតូរយៈពេលជាង ៧០ ឆ្នាំ បានសម្តែងការជំទាស់ ចំពោះការដាក់ពាក្យចូលជាសមាជិកភាពនេះ ដោយបានរិះគន់ប្រទេសទាំង ២ ចំពោះការអត់ឱន និងថែមទាំងគាំទ្រដល់ក្រុមភេរវករទៀតផង។
ប្រទេសទាំង ៣ បានចុះហត្ថលេខាលើអនុស្សរណៈនៃការយោគយល់ត្រីភាគី ក្នុងកិច្ចប្រជុំកំពូល នៅខែមិថុនារបស់ណាតូ ក្នុងទីក្រុងម៉ា្រឌីដ ដែលកំណត់ថា ហ្វាំងឡង់ និងស៊ុយអែត នឹងមិនផ្តល់ការគាំទ្រដល់ក្រុម YPG/PYD ឬ FETO នោះឡើយ។
PKK ត្រូវបានចុះបញ្ជីជាអង្គការភេរវករ ដោយតួកគី សហភាពអឺរ៉ុប និងសហរដ្ឋអាមេរិក ហើយជាអ្នកទទួលខុសត្រូវ ចំពោះការស្លាប់របស់មនុស្ស ៤ ម៉ឺននាក់ ក្នុងនោះរួមមានទាំងស្ត្រី កុមារ និងទារកផងដែរ។ YPG/PYD ដែលមានវត្តមាន នៅអឺរ៉ុប ផងដែរនោះ ត្រូវបានដាក់ទណ្ឌកម្ម ដោយចំហពីរដ្ឋាភិបាលមួយចំនួន។
បណ្តាប្រទេស Nordic ក៏បានយល់ព្រមដោះស្រាយការនិរទេស ដែលកំពុងមានការទង្ទឹងរង់ចាំពីទីក្រុងអង់ការ៉ា ឬសំណើធ្វើបត្យាប័ន សម្រាប់ជនសង្ស័យភេរវករ។ សភារបស់ប្រទេសតួកគី ត្រូវតែផ្តល់សច្ចាប័នលើការយល់ព្រមរបស់ហ្វាំងឡង់ និងស៊ុយអែត សម្រាប់សមាជិកភាពរបស់អង្គការណាតូ។
ក្រៅពីតួកគី ក៏នៅមានហុងគ្រី ១ ទៀតដែរ ដែលមិនទាន់ផ្ដល់សចា្ចប័ននេះ ខណៈមានសមាជិកគណបក្សប្រឆាំង ១ រូប របស់ប្រទេសនេះ លើកឡើងថា ការពន្យារពេលរបស់នាយករដ្ឋមន្រ្តីលោក Viktor Orban គឺដោយសារហេតុផលនយោបាយ៕
វីដេអូ៖
