អ្នករងគ្រោះក្នុងឧប្បទ្ទវហេតុនៃការរត់ជាន់គ្នាថប់ដង្ហើមស្លាប់ (stampede) ក្នុងព្រឹត្តិការណ៍ Halloween ដែលជាពិធីជប់លៀង ដែលមនុស្សស្លៀកពាក់តុបតែងខ្លួនដូចជាខ្មោចបិសាចបន្តកើនដល់ ១៥១ នាក់ ខណៈវត្តមាននៃការស្លាប់ជនបរទេសមានយ៉ាងហោច ១៩ នាក់ គិតត្រឹមម៉ោងនេះ។
សេចក្តីរាយការណ៍របស់ទីភ្នាក់ងារព័ត៌មានបារាំង AFP បានដកស្រង់ព័ត៌មានពីនាយកដ្ឋានពន្លត់អគ្គិសភ័យរបស់ប្រទេសកូរ៉េខាងត្បូង នៅមុននេះបន្តិច បានឱ្យដឹងថាចំនួនអ្នកស្លាប់ដោយសារឧបទ្ទវហេតុនេះ បានកើនឡើងដល់ ១៥១នាក់ក្នុងនោះមានជនបរទេសចំនួន ១៩ នាក់ដែលបានស្លាប់នៅក្នុងការកើនឡើងនៃហ្វូងមនុស្សនិងការរត់ជាន់គ្នាដែលបានកើតឡើងនៅម៉ោងប្រហែល ១០ យប់ថ្ងៃសៅរ៍ (ម៉ោងនៅប្រទេសកូរ៉េខាងត្បូង)។
ទីភ្នាក់ងារព័ត៌មានកូរ៉េខាងត្បូង«យ៉ុនហាប់» បានរាយការណ៍ថា ជនបរទេសទាំងនោះ មានមកពីប្រទេសអ៊ីរ៉ង់ អ៊ូសបេគីស្ថានចិន និងន័រវែស។
ប្រធានាធិបតីកូរ៉េខាងត្បូង លោក Yoon Suk-yeol បានប្រកាសរយៈពេលនៃការកាន់ទុក្ខថ្នាក់ជាតិកាលពីថ្ងៃអាទិត្យ ដោយនិយាយថា រដ្ឋាភិបាល នឹងចំណាយលើការថែទាំព្យាបាលអ្នករបួស និងពិធីបុណ្យសពរបស់អ្នកដែលបានស្លាប់។
ប្រធានាធិបតី Yoon បាននិយាយនៅក្នុងសុន្ទរកថាទៅកាន់ជាតិកូរ៉េថា៖«នៅកណ្តាលទីក្រុងសេអ៊ូល សោកនាដកម្ម និងគ្រោះមហន្តរាយបានកើតឡើងដែលមិនគួរកើតឡើង»។
គ្រោះមហន្តរាយនេះបានកើតឡើងនៅក្នុងសង្កាត់ Itaewon នៃរដ្ឋធានីសេអ៊ូល ជាកន្លែងដែលមានសេចក្តីរាយការណ៍ក្នុងស្រុកបាននិយាយថា មានមនុស្សរហូតដល់ ១០ ម៉ឺននាក់ ដែលភាគច្រើនក្នុងវ័យជំទង់ និងអាយុស្របាលៗ ២០ ឆ្នាំបានទៅប្រារព្ធពិធីបុណ្យ Halloween ដោយបានបង្កឱ្យស្ទះផ្លូវតូចចង្អៀតក្នុងតំបន់ និងផ្លូវដែលមានខ្យល់បក់ខ្លាំង។
លោក Choi Seong-beom ប្រធានផ្នែកពន្លត់អគ្គីភ័យនៅតំបន់ Yongsan ដែលរួមមានសង្កាត់ Itaewon នោះដែរ បាននិយាយថា ក្នុងចំណោមអ្នកស្លាប់មាន ៩៧នាក់ជាស្ត្រី និង ៥៤ នាក់ជាបុរស។
លោក Choi បាននិយាយថា មនុស្ស ៨២ នាក់បានរងរបួសក្នុងនោះមាន ១៩ នាក់ធ្ងន់ធ្ងរ បើទោះបីជាក្រសួងមហាផ្ទៃបាននិយាយថា មនុស្ស ១៥០ នាក់បានរងរបួសក៏ដោយ។
យ៉ុនហាប់ រាយការណ៍ថា ការរត់ជាន់គ្នាដែលសម្លាប់មនុស្សដ៏សាហាវបំផុតក្នុងប្រវត្តិសាស្ត្រនាពេលថ្មីៗនេះរបស់កូរ៉េខាងត្បូង បានកើតឡើងនៅក្នុងផ្លូវតូចចង្អៀតមួយក្បែរសណ្ឋាគារ Hamilton ដោយសាក្សីឃើញផ្ទាល់ភ្នែក បានពិពណ៌នាអំពីទិដ្ឋភាពនៃការភ័យស្លន់ស្លោនៅពេលដែលមនុស្ស «ដូលជាបន្តបន្ទាប់ (fall like dominoes)»។
យ៉ុនហាប់បានដកស្រង់សាក្សីស្ត្រីម្នាក់ ដោយអះអាងថា៖«មនុស្សទាបដូចខ្ញុំមិនអាចដកដង្ហើមបានទេ»។
នាងបាននិយាយថា៖«វាហាក់ដូចជាមនុស្សនៅកណ្តាលទទួលរងគ្រោះខ្លាំងបំផុត»៕