តុលាការមីយ៉ាន់ម៉ា ដែលគ្រប់គ្រងដោយក្រុមយោធា បានកាត់ទោសដាក់ ពន្ធនាគាររយៈពេល ១៤៨ ឆ្នាំលើអតីតសមាជិក សភាម្នាក់ មកពីគណបក្សសម្ព័ន្ធជាតិ ដើម្បីប្រជាធិបតេយ្យមីយ៉ាន់ម៉ា (NLD) ដែលធ្វើឱ្យអតីតអ្នក នយោបាយរូបនោះ ត្រូវជាប់ពន្ធនាគារ ១៧៣ ឆ្នាំ បើសរុបទាំងការកាត់ទោសលើកមុន។
ក្នុងសាលក្រម កាលពីថ្ងៃចន្ទ លោក Win Myint Hlaing វ័យ ៥២ ឆ្នាំ បានរងការកាត់ទោសលើការចោទប្រកាន់ពីបទភេរវកម្ម និងក្លាយជាសមាជិករដ្ឋាភិបាលរបស់លោកស្រី អ៊ុងសាន ស៊ូជី ដែលជាប់គុករយៈពេលវែងបំផុត។
តុលាការនៅស្រុក Magway ដែលស្ថិតនៅចម្ងាយប្រហែល ៤៨០ គីឡូម៉ែត្រភាគខាងជើងនៃក្រុងពាណិជ្ជកម្មយ៉ាងហ្គូន បានរកឃើញថា លោក Win Myint Hlaing មានពិរុទ្ធចំនួន ៨ ករណី ក្រោមច្បាប់ប្រឆាំងភេរវកម្ម។ នេះបើយោងតាមការចុះផ្សាយ កាលពីថ្ងៃពុធ ទី ២ ខែវិច្ឆិកា របស់ទីភ្នាក់ងារព័ត៌មាន Association Press ដែលស្រង់សម្ដីប្រភពមិនបញ្ចេញឈ្មោះដឹងពីការកាត់ទោសនេះ។
ប្រភពដដែល បាននិយាយទៀតថា លោក Win Myint Hlain ត្រូវបានកាត់ទោសប៉ុន្មានដងរួចហើយ កាលពីខែមីនា មេសា និងខែមិថុនា ពីបទញុះញង់ និងអំពើភេរវកម្ម ដោយលោកត្រូវទទួលទោសចំនួន ២៥ ឆ្នាំជាសរុប។ ប្រភពបន្ថែមថា រឿងហេតុមួយចំនួនដែលលោក Win Myint Hlain ត្រូវបានកាត់ទោស កាលពីពេលថ្មីៗនេះ បានកើតឡើងនៅពេលដែលលោកជាប់គុករួចស្រាប់ទៅហើយ។
បើតាមធម្មតា ការកាត់ក្តីនយោបាយ នៅមីយ៉ាន់ម៉ាធ្វើឡើងដោយបិទមិនឱ្យសាធារណជនដឹង ដូច្នេះ វាពិបាកក្នុងការដឹងថា មានភ័ស្តុតាងអ្វីខ្លះ ដែលតុលារការប្រើប្រាស់ ដើម្បីកាត់ទោសជនសង្ស័យ។
សូមបញ្ជាក់ថា លោក Win Myint Hlain ត្រូវបានបោះឆ្នោតជ្រើសរើសជាតំណាងរាស្ត្រ ក្នុងតំបន់ Magway នៅឆ្នាំ ២០១៥។ លោកមិនបានចូលរួមក្នុងការបោះឆ្នោតឆ្នាំ ២០២០ ទេ ប៉ុន្តែបានចូលរួម ក្នងការតវ៉ាប្រឆាំងនឹងយោធា មុនពេលត្រូវក្រុមយោធាចាប់ខ្លួន នៅទីក្រុង Yaksawk ក្នុងរដ្ឋ Shan ភាគខាងកើតប្រទេសនៅខែវិច្ឆិកា ឆ្នាំ ២០២១។
បញ្ហានយោបាយ និងសិទ្ធិមនុស្ស នៅប្រទេសមីយ៉ាន់ម៉ា កាន់តែធ្លាក់ចុះទៅៗ បន្ទាប់ពីក្រុមយោធាធ្វើរដ្ឋប្រហារទម្លាក់រដ្ឋាភិបាលប្រជាធិបតេយ្យរបស់លោកស្រី អ៊ុងសាន ស៊ូជី ដែលត្រូវតុលាការកាត់ទោសឱ្យជាប់គុក ២៦ឆ្នាំ។
កាលពីខែកក្កដា មេដឹកនាំយោធាមីយ៉ាន់ម៉ា បានប្រហារជីវិតសកម្មជននយោបាយគាំទ្រលទ្ធិប្រជាធិបតេយ្យ ៤ នាក់ ដោយកាត់ទោសក្រោមបទចោទប្រកាន់អំពើភេរវកម្ម និងធ្វើសកម្មភាពប្រឆាំងនឹងរដ្ឋប្រហាររបស់ខ្លួន។ ការប្រហារជីវតនេះ រួមទាំងការចាប់ខ្លួន ក៏ដូចជាការវាយប្រហារយោធាលើក្រុមប្រឆាំង ដែលបន្តសម្លាប់ជនស៊ីវិលរាប់ពាន់នាក់ បានរងនូវការថ្កោលទោសយ៉ាងខ្លាំងពីសហគមន៍អន្តរជាតិ ក៏ដូចជាក្រុមអង្គការសិទ្ធិមនុស្ស៕
វីដេអូ៖