លោកប្រធានាធិបតីតួកគី រ៉េសិបតៃយីប អេរដូហ្គែន (ស្តាំ) និងលោកនាយករដ្ឋមន្ត្រីស៊ុយអែត Ulf Krister sson ធ្វើសន្និសីទកាសែតរួម បន្ទាប់ពីជំនួបរបស់ពួកគេនៅវិមានប្រធានាធិបតី ក្នុងទីក្រុងអង់ការ៉ាកាល ពីថ្ងៃទី ៨ វិច្ឆិកា។ AFP
បើគ្មានការប្រែប្រួលអ្វីទេ រដ្ឋសភារបស់ប្រទេសស៊ុយអែតដែលជាប្រទេសមួយស្ថិតនៅជាប់ព្រំដែនប្រទេសរុស្ស៊ី នឹងបោះឆ្នោតគាំទ្រសេចក្តីព្រាងច្បាប់ប្រឆាំងភេរវកម្ម ដែលជាការចង់បានរបស់ភាគីប្រទេសតួកគីជាថ្នូរនឹងការគាំទ្រចូលជាសមាជិកពេញសិទ្ធិរបស់អង្គការណាតូរបស់ប្រទេសស៊ុយអែត និងប្រទេសហ្វាំងឡង់។
ប្រទេសតួកគីដែលធ្លាប់ជំទាស់បំណងចូលជាសមាជិករបស់អង្គការណាតូរបស់ប្រទេសស៊ុយអែត និងហ្វាំងឡង់ កាលពីខែឧសភាឆ្នំាំនេះ ដោយចោទប្រកាន់ប្រទេសទាំង ២ ថា គាំទ្រក្រុមសកម្មប្រយុទ្ធឃើដនៅប្រទេសស៊ីរី ដែលតួកគីចោទថា ជាក្រុម «ភេរវករ» ប៉ុន្តែក្នុងខែមិថុនា ប្រទេសទាំង ៣ បានបង្កើតកិច្ចព្រមព្រៀងត្រីភាគីសម្រាប់ការគាំទ្ររបស់ប្រទេសតួកគី សម្រាប់បេក្ខភាពនៃអង្គការណាតូ។
រហូតមកដល់ពេលនេះមានតែប្រទេស ២ គត់ គឺតួកគី និងហុងគ្រី ដែលមិនទាន់បានផ្តល់សច្ចាប័នគាំទ្រប្រទេសហ្វាំងឡង់ និងស៊ុយអែតចូលជាសមាជិករបស់អង្គការណាតូ ដោយប្រទេសហុងគ្រី មិនទុកឱ្យតួកគីនៅឯកោតែម្នាក់លើវិថីការទូត ខណៈប្រទេសតួកគី បន្តទាមទារឱ្យហ្វាំងឡង់ និងស៊ុយអែត ធ្វើបត្យាប័នមេដឹកនាំដែលខ្លួនចោទថាជាភេរវករ និងធានាអះអាងពីការមិនជាប់ពាក់ព័ន្ធនឹងក្រុមទាំងនោះ។
ការប្រកាសរបស់សភាស៊ុយអែតអំពីការបោះឆ្នោតនាសប្តាហ៍ក្រោយនេះ បានធ្វើឡើងបន្ទាប់ពីដំណើរទស្សនកិច្ចរបស់ លោក Ulf Kristersson នាយករដ្ឋមន្ត្រីថ្មីរបស់ប្រទេសស៊ុយអែត កាលពីថ្ងៃអង្គារទៅកាន់ទីក្រុងអង់ការ៉ា ជាកន្លែងដែលលោក បានជួបពិភាក្សាជាមួយប្រធានាធិបតីតួកគី Recep Tayyip Erdogan ។
យោងសេចក្តីប្រកាសនោះ រដ្ឋសភាពស៊ុយអែតនឹងបោះឆ្នោតគាំទ្រសេចក្តីស្នើច្បាប់នោះនៅថ្ងៃទី ១៦ ខែវិច្ឆិកានេះ។
សេចក្តីរាយការណ៍របស់បណ្តាញទីភ្នាក់ងារព័ត៌មានអន្តរជាតិជាច្រើន បានអះអាងថា គណៈកម្មាធិការរដ្ឋធម្មនុញ្ញស៊ុយអែត បានស្នើច្បាប់ដែលរឹតត្បិតសេរីភាពនៃការប្រមូលផ្តុំនៃក្រុមដែលមាននិន្នាការជាប់ពាក់ព័ន្ធជាមួយក្រុមភេរវកម្ម។
អាជ្ញាធរ នឹងត្រូវផ្តល់ឱ្យនូវឱកាសកាន់តែមានប្រសិទ្ធភាពក្នុងការប្រយុទ្ធប្រឆាំងអំពើភេរវកម្មជាមួយច្បាប់ថ្មីនោះ។
ច្បាប់នោះរំពឹងចូលជាធរមាននៅថ្ងៃទី ១ ខែមករា ប្រសិនបើត្រូវបានអនុម័ត។ ក្នុងករណីដូចគ្នានេះ ប្រទេសហ្វាំងឡង់ ក៏ត្រូវរៀបចំដំណើរការផ្លូវច្បាប់ដូចគ្នានឹងប្រទេសស៊ុយអែតដែរ ជាថ្នូរនឹងការគាំទ្ររបស់ប្រទេសតួកគីសម្រាប់សមាជិកភាពរបស់អង្គការណាតូ៕
